Aruba

Aruba

Bandera Escudo
Himno: Aruba Dushi Tera
Informacion basico
Capital	Oranjestad
Idioma(nan) oficial	Papiamento Hulandes
Gentilicia	Arubano, Arubiano, Rubiano
Forma di gobernacion	Monarkia constitucional Democracia parlamentario
Forma di estado	Estado singular centralisa den Reino Hulandes
Hefe di estado	Rey Willem-Alexander
Gobernador	Juan Alfonso Boekhoudt
Hefe di gobierno	Prome Ministro Evelyn Wever-Croes
Area	193 km²
Poblacion	111.837 (CBS,2019)
Densidad	572.52/km²
Pais di origen di habitantenan	66% Aruba 9.1% Colombia 4.3% Hulanda 4.1% Rep. Domin. 3.2% Venezuela 2.2% Corsou 1.2% Haiti 1.1% Peru 1.1% China 6.2% Otro
Moneda	Florin (533) (AWG)
Zona di tempo	Atlantic Standard Time (GMT-4) (UTC-4)
Codigo telefonico	+297
Codigo TLD	.aw
Codigo ISO	AW
Informacion extra
Producto Nacional Bruto	ƒ 5,732,000,000 (CBS, 2018)
Producto Nacional Bruto pa capita	ƒ 51,423 (CBS, 2018)

Aruba, un isla situa den e parti zuid di e Lama Caribe 27 km noord di e peninsula di Paraguaná na Venezuela, ta un pais autonomo cu ta forma parti di e Reino Hulandes. E isla ta cubri un area di 193 km² y desde 2020 ta conoce un poblacion di 108,166 hende.^[1]

Oranjestad ta capital di Aruba y na mes momento e ciudad mas habita cu un poblacion estima na 35,000 hende. Aruba ta rondona pa lama y mester comparti frontera di su awanan teritorial cu tres pais. E frontera den direccion oost ta wordo comparti cu Corsou, e fronteranan den direccion zuid y west ta ser comparti cu Venezuela y den direccion noord e frontera ta ser comparti cu Republica Dominicana.^[2][3] E punto mas halto di Aruba ta e sero Jamanota (188m) cu ta situa den Parke Nacional Arikok na e parti noord oost di e isla, pero e sero mas central y visibel ta Hooiberg (165m).

Aruba su posicion central entre Estadonan Uni di Merca y continente di Sur America, democracia stabil, clima leve y sistema di impuesto cu reglanan suave pa compania stranhero a atrae varios negoshi internacional pa establece nan mes riba e isla. Desde 1926 cu e construccion di e refineria pa refina azeta na San Nicolas di Lago Oil & Transport Company y atrobe na 1986 cu inversion di gobierno pa desaroya sector turistico, caminda varios cadenanan hotelero Mericano a establece nan mes na Palm Beach, e economia y poblacion di Aruba a conoce un crecemento rapido cu a pone cu pa casi un siglo Aruba a disfruta di un calidad di bida halto den region Caribe.

Articulo principal: Historia di Aruba

Segun Museo Arqueologico[sic] Nacional Aruba, e sitio arkeologico mas bieu na Aruba ta Sero Muskita. Na e sitio aki nan a haña solamente un herment di piedra. Na un otro sitio na Arikok a haña un herment similar. Basa riba e tecnica uza pa completa e hermentnan y nan forma, e arkeologonan ta pensa cu tawatin hende sa bishita Aruba incidentalmente desde 4000 aña pasa caba.^[4] E prome evidencia cu tawatin hende bibando riba e isla ta indica cu hendenan a hasi Aruba nan patria desde por lo menos aña 500BC.^[5] Nan tawata considera hendenan semi nomadico y tawata jaag, pisca y colecciona nan cuminda y no tawata hasi uzo di agricultura, ni traha ceramica.^[5]

Arkeologonan ta sintetisa cu entre añanan 900 y 1000, un grupo nobo di hende a yega Aruba for di area di Falcón. E grupo aki tawata forma parti di e Caquetionan cu en turno tawata forma parti di un cultura politico den e region, yama e Falcon Costal.^[5] Nan tawata uza e lenga tambe yama Caquetio cu ta forma parti di e famia di idioma Arawak. Nan yegada ta marca e inicio di e epoca Ceramico di Aruba. E comunidadnan mas importante di e Caquetionan tawata Tanki Flip, Santa Cruz, Savaneta y tambe Tanki Leendert y Parkietenbos y rond di e comunidadnan tawatin un red di sitionan uza pa pesca, coleccion di cocolishi y agricultura.^[5] Ta parse cu e Caiquetionan a habita e isla te algun aña despues di yegada di e Spañonan. Awendia ainda tin cuebanan y baranca rond e isla caminda tin pinturanan haci pa e habitantenan di e isla, pensa di ta mil aña bieu. Investigacion arkeologico aindo no por detemina si e pinturanan ta pinta pa e Caquetionan of pa e prome habitantenan di Aruba.

Durante un campaña di exploracion na aña 1499, e explorador spaño Alonso de Ojeda a descubri Aruba. E prome indicacion di e isla ta riba un mapa publica na aña 1500 di e continente Sur Americano recien descubri, pinta pa e cartografo Juan de la Cosa. Durante e decada aki, cu autorisacion di Reina Isabel di Castilla y Rey Fernando II di Aragon sin conocemento di Cristobal Colon, e isla a bira un posesion capital di monarkia catolico di Spaña pa e siguiente 135 aña. Prome bou di Gobernacion de Coquivacao, un entidad teritorial administrativo sin poder ehecutivo. Despues di esaki na 1508 Aruba a forma parti di Nueva Andalucia. Desde 1526 e isla a bira parti di recien crea Provencia de Venezuela cu su prome capital sinta na Santa Ana de Coro caminda awe e ciudad Coro den estado di Falcon na Venezuela ta situa. Durante e temporada Spaño, Aruba a wordo despobla y repobla algun biaha cu habitantenan nativo di e otro islanan di e region Caribense cu tawata traha riba plantacion of den mina riba isla di Hispañola, cu tambe tawata bou dominio Spaño.

Durante culminacion di Guera di Ochenta Aña na aña 1636, e Shete Provincianan di Hulanda a logra nan independencia di Spaña. Siguiendo e logro aki, un compania funda na Amsterdam yama Geoctroyeerde West Indische Compagnie (WIC) bou mando di Johannes van Walbeeck, a conkista Aruba for di e Spañonan. Na 1674 despues di varios aña cu problema financiero WIC a desolve. Pero debi na demanda grandi pa negoshi den e region Caribense un Tweede Geoctroyeerde West-Indische Compagnie a wordo funda na 1675. E di dos version di WIC a tuma over e teritorionan, flota y establecimentonan di e prome version di WIC. E di dos version di WIC a desolve den aña 1792.

Despues di 1795 Aruba a sigui como colonia di e Bataafse Republiek y despues Koninkrijk Holland. Durante e Gueranan Napoleano y Guera Revolucionario na Europa e Hulandesnan no tawatin e recursonan necesario pa proteha nan colonianan. Esaki a hasi'e posibel pa e marina real Britanico conkista casi tur e colonianan Hulandes rond di mundo. E Britaniconan a ocupa Aruba di 1802 te cu 1816, cu excepcion di un periodo di dos aña entre 1804 y 1806.

Desde 1830 Aruba ta parti di Koninkrijk der Nederlanden (Reino Hulandes) den un of otro forma. Te cu 1935 Aruba, hunto cu e islanan Corsou, Boneiro, Sint Eustatius, Sint Maarten y Saba, tabata forma parti di e teritorio yama "Curaçao en Onderhorigheden". Di 1936 pa 1948 a cambia e nomber pa "Gebiedsdeel Curaçao" y di 1948 pa 1986 pa Antias Hulandes. Riba 1 januari 1986 dia cu e Status Aparte a drenta na vigor, Aruba a bira un pais autonomo den Reino Hulandes.

Desde 2 mei 2015 Aruba ta bou di supervision financiero di organo independiente den Reino Hulandes, College Aruba financieel toezicht (CAft).^[6] E organo ta duna conseho na Gobierno di Aruba y tambe percura pa ehecutacion di e presupuesto di Aruba keda den balansa y ta dentro di limitenan stipula entre Hulanda y Aruba.

Aruba ta un isla rondona pa e lama Caribe. E isla ta cubri un area terestre di 193 km². Aruba tin alrededor di 75 km di costa, sin conta e rifnan pazuid di e isla.

E costa west y zuid di Aruba ta rondona pa laman relativamente seco y trankil cu playanan di santo blanco. E topografia di e tereno na e costa west y zuid di e isla ta plat. Casi henter e costa zuid di e isla, cuminsando for di Paardenbaai na Oranjestad te cu Indiaanskop na San Nicolas, ta separa di lama grandi pa un cadena los di rif cu ta forma un lagun cu ta corre paralel cu e costa. Den direccion noord di e area mas central di e lagun tin un baia ta habri den e zona humeda Spaans Lagoen. Den direccion zuid oost di Spaans Lagoen tin e mondi di manglo yama Mangel Halto. Den cercania di Hudishibana, e punta mas noord west di e isla, tin un duna di santo blanco. E costa norte di Aruba ta consisti di klipnan di piedra y lama bruto. E topografia di e costa norte y e interior di e parti aki di e isla ta varia den elevacion y ta arido. Na varios parti di e costa norte e forsa persistente di e olanan a causa bocanan pa forma den e piedra. Otro formacion natural cu por observa na parti ki Aruba ta cuebanan manera Quadirikiri y Fontein, brug natural manera antes Natural Bridge y tambe formacion di baranca Ayo y Casibari.

E seronan ubica na e parti mas west di e isla bayendo direccion oost ta e plataforma di Hudishibana, Sero Muskita (50m), Sero Grandi (50m) y Sero Tres Cabes (20m), Turibana, Sero Boegoeroei, Alto Vista (72m), Sero Pos di Noord, Sero Sumpiña (48m), Sero Gerard (18m), Jaburibari, Sero Koeriboeri y Sero Crystal (89m). Un di e seronan mas visibel y central riba e isla ta Hooiberg (165m). Pazuid di Hooiberg tin Sero Biento, Sero Canashito (75m) y Sero Tijshi. Mas oost den Santa Cruz tin Urataka y e dos Seronan Warawara. Den Parke Nacional Arikok, na e costa noord oost, e seronan di Daimari, Sero Cabai (165m), Jamanota (188m)y Arikok (185m) ta situa. Nan ta forma parti di un cadena di sero cu ta extende den direccion noord west y ta core hunto cu e costa. Sero Alejandro panort di Savaneta, Sero Blanco (34m) panort di San Nicolas, Sero Colebra y Sero Colorado ta e seronan ubica na e parti mas oost di e isla.

Na e parti central di e costa west di e isla tin e moeras Bubaliplas, cu antes a wordo usa como saliña.^[7] Bubaliplas ta cubri un area di 43 hectar. E moeras ta contene un curpa di awa permanente den parti interior di e isla. Bubaliplas ta forma parti di un cadena di saliña cu ta core paralel cu costa west di Aruba entre Bushiri y Hudishibana. E parti mas pazuid di e saliña, den pasado a wordo reclama pa facilita construccion di edificio y tereno pa practica golf. Cu excepcion di Bubaliplas, cu su fuente primario di awa ta bin di e planta pa limpia awa di riool, e resto di e cadena di saliña y e interior di e isla ta normalmente seco. Si e tereno interior di Aruba ta cubri cu un variedad di sistema separa di riu seco, tambe yama rooi. Acumulacion di awa den e seronan durante temporada di yobida cu no wordo absorbi den tera, ta dren via rooinan bek den lama of den dam. Tin biaha despues di yobida fuerte, e rooinan cu forma na e banda mas west di e isla ta dren via e cadena di saliña bek pa lama, caminda por observa e resto di e saliñanan temporariamente inhunda.

Mira tambe: Economia di Aruba

Aruba tin un economia chikito compara cu otro pais den region Caribe, cu desde 2004 tin un averahe di produccion nacional bruto di 4.2 mil miyon florin pa aña. Aruba su economia ta uno specialisa den turismo, caminda mitar di PNB ta wordo genera den e sector aki. Na aña 2016 e mercadonan turistico mas importante pa Aruba tabata Merca, Venezuela, Canada, Hulanda y Colombia. Merca ta Aruba su pareha di comercio mas grandi y mas importante.

Den aña 1840 e mata soculento aloe vera a wordo introduci riba e isla. Funda na 1890 pa Cornelius Eman, Aruba Aloe Balm a cuminsa cultiva aloe na scala grandi. Na un momento gran parti di e isla tawata cubri cu mata di aloe. Durante e tempo aki Aruba a bira e exportado mas grandi di aloe vera na mundo.

Na cuminsamento di siglo 20 un otro industria a yega na domina e economia Arubano, e industria petrolero. Arend Petroleum Maatschappij a establece su mes den area di Druif Beach y Lago Oil & Transport Company a establece su mes den centro di San Nicolas caminda tin un baia natural relativamente hundo. E facilidadnan di Arend Petroleum Maatschappij a wordo desmantela ora cu e compania aki a para su operacion na Aruba na aña 1953.^[8] Lago a keda opera e facilidadnan na San Nicolas te cu 1985 ora nan a dicidi di termina produccion na Aruba. Durante tempo di Lago Aruba a conoce crecemento economico rapido y tambe infrastructura moderno a wordo introduci rond di e isla.

Prome cu 1985 tabata tin un sector turistico presente riba e isla, pero esaki tabata uno chikito. Despues cu Lago a sera y Aruba a logra su autonomia, e Gobierno di Aruba nobo a dedica placa y atencion pa atrae cadena di hotel mericano pa establece nan mes riba e isla y laga e sector crece. E resultado ta cu awendia tin hopi hotel internacional presente practicamente riba full e costa west di Aruba y tambe tin hopi compania crusero cu ta uza Oranjestad como stop den itinerario Caribense. Aruba ta wordo bishita pa mas cu 1 miyon turista "stayover" tur aña.

Na 2017 Aruba tabatin e concentracion di mas halto di cafenan Starbucks Coffee pa capita den region Caribe y di cuater mas halto na mundo despues di Monaco, Merca y Canada cu 2.7 cafe pa cada 100,000 habitante.^[9]

Aruba ta dispone ademas di dos zona di comercio liber, unda bou di cierto condicionnan importacion y exportacion di mercancia i servicionan por tuma lugar liber di impuesto.^[10]

Utilities Aruba NV ta encarga cu e produccion y distribuimento di energia riba e isla. E unico doño di e compania aki ta Gobierno di Aruba. Tin dos compania ta cay bou di Utilities Aruba NV; Water- en Energiebedrijf NV (WEB) y NV Elmar. WEB ta responsabel pa e produccion di electricidad y tambe esun di awa na su planta di desalinacion situa na Balashi. Desde fin di aña 2009 WEB ta cumpra y bende energia produci pa varios fuente di energia sostenibel rond di e isla. Elmar ta suministra e isla cu electricidad produci pa WEB via un red di distribuimento consistiendo di 7 substacion, 34 stacion di cambio y casi 900 transformator.

Na aña 2009 a completa construccion di e prome parke di biento na Vaderpiet. E facilidadnan ta consisti di 10 molina y por produci un maximo di 30MW . E compania Windpark Vader Piet NV ta exploita e facilidadnan y ta bende e coriente produci den e parke na WEB. Durante aña 2015 a construi a prome parke solar riba e isla. E structura ta cubri e parkeerplaats publico principal di Aeropuerto Internacional Reina Beatrix y ta consisti di 14,400 modula fotovoltaico solar. E parke por produci un total di 3.3MW.^[11] Entre 2017 y 2019 e di dos parke solar riba e isla a wordo construi riba tereno di Refineria di Aruba na San Nicolas. E parke por produci 5.9MW y ta cubri un area di casi 91,000m².^[12]

Pa e periodo desde comienso di aña 2021, 18% di e energia produci pa WEB, tin un fuente sostenibel.

E moneda oficial di Aruba ta e florin. Placa efectivo den circulacion riba e isla ta consisti di moneda rondo den varios tamaño di 0.05, 0.10, 0.25, 1.00 florin; un moneda cuadra cu rand rondo di 0.50 y briyechi di 10, 25, 50, 100 y 200 florin. Aruba ta actualmente e unico pais na mundo cu tin un moneda cuadra den circulacion, pero esaki por causa inconveniencia ora haci uzo di mashin cu ta acepta placa efectivo pasobra nan ta traha pa acepta moneda rondo so.

Na Aruba e dollar Mericano ta acepta casi tur caminda. E florin cu e dollar ta mara na otro abase di un tarifa oficial fiho di AWG 1,79 pa cada US$ 1,00.^[13] Cu e resto di monedanan stranhero, incluyendo e euro, e florin tin un tarifa dinamico riba marshe di divisa stranhero. E balor interno y externo di florin ta maneha pa e Banco Central di Aruba (CBA). Tambe e banco ta dirigi e polisa monetario, supervisa e sistema financiero nacional y tin derecho pa traha moneda y imprimi nota di florin. E maneho di e reservanan di oro y divisa ta ser ehecuta pa CBA.^[14]

Na aña 2019 CBA a emiti un serie nobo di briyechi pa e florin asina reemplasando e serie bieu cu tawata den circulacion. Apesar di ricibi un rediseño completo cu ta inclui varios caracteristica estetico representando Aruba su cultura, flora y fauna, tambe a introduci caracteristicanan pa seguridad di nivel superior incluyendo printmento cu relief halto, ink cu ta cambia di color y un strepi movibel micro optico di miniatura cu ta hasi uzo di tecnologia patenta. E diseño nobo di e briyechi di 100 florin a gana International Bank Note Society su premio di “Banknote of the Year Award” pa aña 2019.

Aeropuerto Internacional Reina Beatrix ta e unico aeropuerto riba e isla y un di e aeropuertonan mas importante den Caribe. Doño di e aeropuerto ta Aruba Airport Authority NV y ta wordo maneha pa Schiphol Group. Den pasado e terminalnan tawata situa na e pazuid di e pista di aterizaje. A inicia e contruccion di e base di e terminal panort di e pista na 1965 y esaki a ser inaugura na aña 1972. E ultimo expansion grandi cu a tuma lugar tawata na aña 2000. E aeropuerto ta ofrece buelonan directo pa Estadonan Uni, Canada, Sur America y Europa. Conneccion cu otro islanan den Caribe ta limita. Actualmente e aeropuerto tin ocho porta di contact y dos edificio pa check-in: un pa buelonan destina pa Merca y un pa resto di buelonan internacional. Den pasado e aeropuerto a fungi como centro di operacion pa e aerolineanan Air Aruba y Aruba Airlines.

Mira articulo principal: Politica di Aruba, Status aparte di Aruba

Aruba ta un pais singular centralisa cu ta un entidad autonomo den e monarkia constitucional di Reino Hulandes. Su teritorio ta constitui e isla di Aruba. Aruba su gobernacion ta tuma forma di un democracia parlamentario, cu e monarca Rey Willem-Alexander como hefe di estado y e Gobernador Alfonso Boekhoudt y Prome Ministro Evelyn Wever-Croes como hefe di e gobierno. E constitucion di Aruba yama e Staatsregeling van Aruba. Simbolonan nacional di e identidad di pais Aruba ta su escudo, himno, bandera, idioma Papiamento, moneda y e shoco.

Na Aruba eleccion pa parlamento (Staten) ta tuma lugar cada cuater aña. E siguiente eleccion ta na 2025. E parlamento tin bintiun miembro cu ta ser eligi directamente door di e pueblo di Aruba. En consulta cu parlamento ta nombra y retira un ministro. E ministronan conhunto ta forma e conseho di ministro (Ministerraad), cu ta consisti te maximo nuebe miembro. E Gabinete di Ministro ta presidia pa e Prome Ministro. E monarca y e ministronan hunto ta forma e Gobierno di Aruba (regering). Hunto cu e resto di e organonan gubernamental (e.o.: ministerionan; KPA; DOW; Impuesto) nan ta forma e aparato gubernamental di Aruba (overheid). E monarca no ta miembro di e gabinete. Na Aruba e monarca ta wordo representa door di e gobernador. E gobernador ta wordo nombra pa un termino di seis aña cu e posibilidad di extende e termino cu seis aña mas.

E poder ehecutivo ta wordo eherce pa e Gobierno di Aruba. E poder legislativo ta sinta den e gobierno y e parlamento. E poder hudicial ta independiente di e poder ehecutivo y e poder legislativo y ta sinta den e Corte. Actualmente e gabinete cu ta administra gobierno di Aruba ta gabinete Wever-Croes II. Den parlamento di Aruba e siguente fraccion nan ta wordo representa: MEP (9), AVP (7), RAIZ (2), MAS (2) y Accion21 (1). E presidente di parlamento ta Edgard Vrolijk.

Aruba tin un autonomia den mayoria asunto nacional cu excepcion di defensa, relacion stranhero, y Corte Supremo.

Despues di Status Aparte na comienso di añanan 1990, e movemento pa completa e proceso di independencia a wordo laga pa otro ocasion riba peticion di Aruba su prome minister na e momento, Nelson Oduber.^[15][16] E ultimo parti di e proceso pa Aruba logra su independencia for di Reino Hulandes riba 1 di januari 1996, cu un base den e Referendum di 1977 y e Acuerdo di 1983, a wordo rescindi den aña 1991. Sí, e proceso tabata un condicion di un mandato oficial pa e pueblo entre 1947 y 1977.

• Cuminsando 1 januari 1986, e Reino Hulandes tabata consisti di tres pais: Hulanda, Antias Hulandes y Aruba.
• Desde 10 october 2010, Reino Hulandes ta contene cuatro pais: Hulanda (incl. Boneiro, Saba, Sint Eustatius), Aruba, Corsou y Sint Maarten.

E ley fundamental cu ta dicta e interaccionnan entre Hulanda, Corsou, Sint Maarten y Aruba den Reino Hulandes ta e Statuut pa e Reino Hulandes (Statuut voor het Koninkrijk der Nederlanden). E hefe di estado di Reino Hulandes ta e monarca Rey Willem-Alexander. E monarca ta residencia na Hulanda. E hefe di estado di Hulanda tambe ta Rey Willem-Alexander. Hunto cu e prome minister di Hulanda y su gabinete nan ta forma e Gobierno di Hulanda (regering). E poder personal di e Rey den Hulanda y Reino ta limita. E constitucion di Hulanda ta e Grondwet. E Rey hunto cu Conseho di Minister di Reino (rijksministerraad), cu ta e gabinete di ministro di Hulanda cu e prome ministro di Hulanda como hefe, ta forma e Gobierno di Reino Hulandes (koninkrijksregering). E minister plenipotenciario di Corsou, Sint Maarten y Aruba ta miembro di y por atende reunion di Conseho di Ministro di Reino, pero no ta forma parti di Gobierno di Reino Hulandes. E conseho di minister di Reino ta dicidi tocante casonan caminda di antemano a logra consensus entre gobierno (regering) di Hulanda y gobierno (regering) di Corsou, Sint Maarten y Aruba. Actualmente no tin un organo ekivalente cu un parlamento na nivel di Reino.

Aruba ta participa den varios organisacion internacional, esta Caricom (observado), ECLAC (asocia), Interpol, IOC, UNESCO (asocia), Parlatino, WCL(World Confederation of Labour), WTO (asocia) y Caribbean Tourism Organisation.

Desde siglo 20 Aruba ta ricibi emigracion di varios otro pais di Caribe y Sur America cu ta bin labora riba e isla. Na aña 2010 tabatin 92 diferente nacionalidad bibando riba e isla. E poblacion di Aruba na 2010 tabata 101,484 habitante. E idioma mas uza na cas despues di Papiamento, tabata Spaño, Ingles, Hulandes y Chines respectivamente.^[17] CBS ta estima un poblacion di Aruba na fin di aña 2019 cu 112,190 habitante. Pa añanan 2018 y 2017 e estimacion ta 111,849 y 111,083 respectivamente. Durante aña 2019 tabatin un cantidad di 1092 nacemento y 665 fayecimento. E cantidad di emigrante den aña 2019 tabata 2793 persona aterisando y 2896 persona departiendo for di Aruba.

Mira tambe: Regionnan di Aruba

E isla no tin ciudad grandi. Pa amplia administracion y facilita e proceso di censo, e isla ta parti den ocho region sin poder ehecutivo: Noord/ Tanki Leendert, Oranjestad (West y Oost), Paradera, Santa Cruz y San Nicolas (Noord y Zuid). E districto nan mas pobla ta Oranjestad y San Nicolas.

Mira articulo principal: Enseñansa na Aruba

E sistema escolar di Aruba ta deriva di esun di Hulanda y ta financia en gran parti pa gobierno di Aruba.^[18] Pa ley enseñansa ta obligatorio pa muchanan entre 4 pa 17 aña.^[19] Enseñansa ta wordo duna na scolnan publico i scolnan seculario (predominantemente catolico). E idioma di instruccion ta Hulandes y desde 2009 tin un proyecto piloto di Scol Arubano Multilingual (SAM). E meta di SAM ta pa den e prome seis klasnan di enseñansa primario Papiamento sirbi como idioma di instruccion y despues den enseñansa secundario esaki ta bira un di e idiomanan cu ta materia obligatorio.^[18] Aruba tambe conoce scolnan priva no-subsidia, manera International School of Aruba (enseñansa na Ingles) y Stichting Onderwijs Combina (enseñansa na Hulandes). E aña escolar ta core di augustus te cu juni.

Papiamento ta e idioma local di Aruba. Un mayoria di e poblacion ta papia Papiamento.^[17] Ta wordo specula hopi tocante e origin di e idioma. Riba islanan di Corsou y Boneiro, Papiamentu ta wordo uza. Riba 22 mei 2003 Papiamento a keda aproba pa Parlamento di Aruba como idioma oficial di e pais, hunto cu e idioma Hulandes.^[20] Esaki a drenta na vigor riba 1 augustus 2003.^[21]

E ortografia di Papiamento na Aruba tin diferencia cu e ortografia di Papiamentu uza na Corsou y Boneiro. Na aña 1976 Gobierno di Aruba a aproba e ortografia di Papiamento na Aruba, cu a drenta na vigor na aña 1977. Na aña 1992 Ministro di Bienestar General a nombra un comision cu e meta pa reformula, elabora y amplia e ortografia oficial. Na final di aña 2006 y durante 2007 Departamento di Enseñansa a bolbe inventarisa tur comentario y recomendacion di diferente instancia den comunidad. Despues cu a analisa y adapta e ortografia amplia a presenta na Minister di Enseñansa "Ortografia di Papiamento- version juni 2007" cu e peticion pa inicia e proceso di legislacion. Na juli 2007 Parlamento di Aruba a expresa su sentimento positivo pa cuminsa uza e ortografia aki en espera di su legislacion. Na april 2009 Minister di Enseñansa, Asunto Social y Infratructura a duna aprobacion pa manda un version di “Ortografia di Papiamento - version april 2009”, despues di ricibi coreccion y y ampliacion chikito di e reglanan den aña 2009, pa Departamento di Legislacion y Asunto Huridico.^[22]

Desde colonisacion door di Hulanda te comienso di siglo 20 e arkitectura den e areanan mas habita na Aruba a tuma influencia di e estilo colonial Hulandes y estilo Spaño, pero no via colonisacion Spaño, sino atrabes di emigracion y lasonan familiar cu terrafirme.^[23] Despues di yegada di industria petrolero y sector turistico den siglo 20, e estilo arkitectonico di e isla a tuma influencia mas mericano y internacional. Awendia ainda por observa elementonan di e estilo Art Deco den varios edificio den e centro di San Nicolas.

Rond di e isla tin edificio cu ta presenta un ehempel di un estilo local den e arkitectura. E cas di torto ta un residencia basico traha di material natural y organico haña den vecindario di e construccion. Un cas di cunucu ta mustra similar cu un cas di torto, pero e material uza ta piedra y e murayanan di exterior ta gepleister. Un cas di comerciante ta un edificio di minimo dos piso cu e piso abou siendo un espacio pa hasi negoshi y e piso ariba ta un espacio residencial, caminda e exterior di e parti residencial sa tin elementonan di un cas di cunucu.

Un cas di cunucu cu ornamentacion riba e exterior ta wordo yama cas floria of cas decora.^[24] Den e sistema tradicional, un mazon tawata adheri decoracion riba e muraya externo rond di e cas of solamente riba e fachada, por medio di un molda.^[25] Door di uza e molda, e material cu nan tawata uza ta crea un relief cu ta contrasta e decoracion, contra e muraya. E tipo di diseñonan tawata depende di e mazon su imaginacion y su abilidad pa pinta.^[25] Ornamentonan comun tawata inclui entre otro simbolonan di cortina, strea, flor, mita luna, bik di parha.^[25] Awendia e decoracion di cas normalmente ta ser logra pa un pintor cu ta aplica, por medio di verf, e simbolonan riba e exterior di e cas.

Na Aruba e deportenan mas conoci y practica ta baseball y futbol. Otro deportenan popular ta arte marcial, landamento, tennis, volleyball, atletismo, windsurfing, kitesurfing, beach tennis, basketball y softball. E stadion mas grandi di Aruba ta Stadion Guillermo Prospero Trinidad. Asina tin hopi mas veld di beisbol y futbol rond di henter e isla. Na Savaneta tin e unico piscina olimpico di e isla, Piscina olimpico Roly Bisslick. Durante henter e aña tambe tin varios caminata organisa ta tuma lugar. Un otro deporte cu ta ser practica riba e isla ta ciclismo. E wega di domino tambe ta un pasatempo na Aruba.

Celebracion di Carnaval ta uno importante den e cultura Arubiano. E celebracion aki a cuminsa rond di aña 1950 influencia pa e habitantenan nobo procedente di Venezuela, Sint Vincent, Trinidad, Barbados, Sint Maarten y Anguilla cu a bin traha pa e refineria di Lago. Oficialmente e temporada di carnaval ta cuminsa den luna di november caba, pero e actividadnan carnavalesco mes ta cuminsa algun siman despues di Aña Nobo te cu un dia prome cu Diaranson Shinishi. Durante e temporada tin varios actividad manera eleccion di Reina y di Prins y Pancho, festivalnan di calypso, tumba y roadmarch. Tin paradanan ta tuma lugar den e districtonan di Noord, Oranjestad y San Nicolas. E temporada ta culmina cu e Parada Grandi riba e ultimo diadomingo y kimamento di Momo riba e bisbo di Diaranson Shinishi.

Aruba tin varios corant, di papel y digital cu ta publica principalmente na Papiamento, e.o.: Awe Mainta, Bon Dia, Diario, Solo di Pueblo, 24ora, NoticiaCla. Tambe tin dos corant cu ta publica na Ingles. Amigoe ta un corant na Hulandes. Aruba tin tambe diesocho emisora di radio (2 AM y 16 FM) y tin tres stacion di television local: Tele Aruba, Aruba Broadcasting Company y Canal Bintidos.

Mira tambe: Lista di Arubano conoci

• Henny "Shon A" Eman, politico di AVP (a entrega na 1948 mocion pa Aruba haya separacion for di Antias Hulandes)
• Jan Hendrik "Henny" Eman, e prome Prome Ministro di Aruba y politico di AVP
• Dave Benton, musico y e ganador di Eurovision Song Contest na 2001 representando Estonia
• Juan Chabaya "Padu" Lampe, musico y compositor di Aruba su himno nacional
• Rufo Wever, musico y compositor di Aruba su himno nacional
• Edward Cheung, ingeniero principal pa proyecto Telescoop Espacial Hubble di NASA
• Betico Croes, politico (Libertador di Aruba)
• Boy Ecury, luchador pa resistencia Hulandes durante Guerra Mundial II
• Edjean Semeleer, cantante
• Taryn Mansell, prome finalista Miss Universo 1996 y Miss Aruba 1996
• Jonathan "Jeon" Thiel, musico
• Vale Croes, comediante
• Roger Peterson, musico
• Bobby Farrell, musico pa grupo Boney M
• Percy Irausquin, diseñado di moda
• Zizi Lee, prome finalista Miss Mundo 2001 y Miss Aruba 2001
• Eugene Kingsale, beisbolista di MLB
• Calvin Maduro, pelotero di MLB
• Pete Philly, artista Hulandes di hip-hop
• Sidney Ponson, pelotero di MLB
• Sarah-Quita Offringa, windsurfer profesional
• Xander Bogaerts, pelotero di MLB, shortstop pa Boston Red Sox
• Bernadina Growell (1939-2009), artista folklorico

• Gobierno di Aruba, website oficial
• Camara di Comercio , website oficial
• Departamento di Enseñansa, website oficial
• Centraal Bureau voor de Statistiek Aruba, website oficial
• Coleccion Digital Departamento Arubiana-Caribiana (BNA), website Internet Archive
• Autoridad di Turismo Aruba, website oficial

Fuente, nota i/òf referensia ↑ "Mapping Census 2020". CBS Aruba. Consulta 28 di augustus 2022 ↑ "Maritiem Grenzen voor de Benedenwindse Nederlandse Antillen" (PDF). Tweede Kamer. Un mapa cu ta visualisa e awa teritorial y zone economico exclusivo di Aruba, Corsou, Boneiru. Recupera 16 october 2017 ↑ “Bulletin of Act and Decrees 2010, 277” (PDF). United Nations. Na momento di publicacion di e boletin, Venezuela so a conclui e tratado di contorno di awa teritorial Caribeño di Reino Hulandes. Pagina 6 Alinea 3. Recupera 7 maart 2021 ↑ Ruud R.W.M Derix, PhD.(2016) "History of Resource Exploitation in Aruba"(PDF). CBS Aruba. Pagina 3, alinea 4 Pre-ceramic period 2500BC-ca.1000. Recupera 26 october 2017 ↑ 5.0 5.1 5.2 5.3 “First Inhabitants of Aruba”. Museo Arqueologico Nacional Aruba. (1)Pagina 1 Alinea 2; (2)Pagina 3 Alinea 2; (3)Pagina 5 Alinea 1; (4)Pagina 7 Alinea 2. Recupera 9 maart 2021 ↑ “CAft zure appel voor Aruba” Antilliaans Dagblad. Publica 6 mei 2015. Recupera 22 februari 2021 ↑ R. van Halewijn, L.W.G. Higler & A.L. Spaans(1992) Ecologisch onderzoek Bubaliplas(PDF). DLO-instituut voor Bos- en Natuuronderzoek. Pagina 7, alinea 1. Recupera 1 november 2017 ↑ Hoetink, H., & Anink, G. B., Encyclopedie van de Nederlandse Antillen, 1969, Amsterdam, pag. 47. ↑ Smith, Oliver (1 october 2017) Mapped: The countries that drink the most coffee. The Telegraph UK. Lista #3: "The most branches of Starbucks per capita" Recupera 6 december 2017 ↑ (en) Free Zone Aruba, Barcadera Free Zone ↑ Solar Power Park Reina Beatrix Airport Aruba. Croon Caribe. Recupera 5 december 2017 ↑ Sunrise Solar Park one of the biggest in the Caribbean region. Utilities N.V. Recupera 5 december 2017 ↑ A Brief History of Central Bank Aruba Centrale Bank van Aruba Recupera 31 October 2017 ↑ Main Functions and Activities Centrale Bank van Aruba Recupera 31 October 2017 ↑ “A entrega Aruba un herencia sagrado”. Diario. Publica 12 maart 2020. Recupera 20 februari 2021 ↑ “Prosperous Isle of Aruba Puts Independence on Hold,...” Los Angeles Times. Publica 4 augustus 1991. Recupera 21 februari 2021 ↑ 17.0 17.1 Censo 2010(PDF) CBS Aruba. Pagina 20, e prome grafiek. Recupera 2 november 2017 ↑ 18.0 18.1 Education system Aruba, Nuffic (januari 2015) ↑ AB 2011 no.82 “Leerplichtverordening”. Centraal Wettenregister. Articulo 1; Articulo 2. Recupera 7 maart 2021 ↑ “Cuida Papiamento como idioma nacional y tambe como idioma oficial desde 2003”. Diario. Publica 22 februari 2020. Recupera 2 maart 2021 ↑ “Landverordening Officiële talen”(PDF). Afkondigingsblad van Aruba. Riba pagina 4 Artikel 10, lid. 1. Publica 6 juni 2003. Recupera 2 maart 2021. ↑ “Ortografia di Papiamento - version 2009” (PDF). Departamento di Enseñansa. Den e introduccion di e texto ta duna un update riba e proceso pa oficialisa e ortografia di e idioma. Recupera 2 maart 2021 ↑ Alofs, Luc (2008) “The Aruba Heritage Report”. Aruba National Commission for UNESCO. Pagina 14 Alinea 2. Recupera 9 maart 2021 ↑ R. Van Voren(2017) “De herkomst en betekenis van de kunukuhuizen in Aruba”. Monumentenbureau. Pagina 3, inleiding. Recupera 23 februari 2021 ↑ 25.0 25.1 25.2 Tromp, Ito (1976) “The Decorated House in Aruba”. Departamento di Cultura y Enseñansa Aruba. Pagina 1. Recupera 5 maart 2021