Escudo di Aruba

Escudo di Aruba

Fecha di fundashon òf kreashon	1955
Pais	Aruba

E escudo di Aruba ta e escudo oficial di Aruba. E escudo a keda estableci pa decreto insular di 15 di november 1955 y ta legalmente reconoci como un di e simbolonan nacional Arubano.^[1]

Colegio ehecutivo di Aruba (hulandes: bestuurscollege) ta anuncia den corant di 27 di maart 1953 un concurso pa yega na un escudo pa teritorio insular di Aruba. E Colegio tabata kier mira un expresion di e autonomia di e isla, despues di e decentralisacion politico di Antias Hulandes conforme e "Eilandenregeling Nederlandse Antillen" (ERNA) na 1954. Di e seis islanan Antiano Aruba tabata esun prome pa uza un escudo. Ni Antias Hulandes mes tabatin escudo.^[2] Di e binti concursante ta elegi e diseño di W.J.D. Posthumus, diseñador y experto heraldico di ‘Atelier voor Heraldische Kunsten” di Amsterdam, Hulanda.^[3] Pa refleha e identidad Arubano mihor gobierno di Aruba a trece dos cambio den e diseño original.^[4] Na 1991 a fiha e reglanan di e diseño y uzo di e escudo den ley.^[5]

E escudo ta consisti di siete elementonan principal.^[1]

1. Riba e escudo ta sinta e leon cora cu ta simbolisa forsa y generosidad. E leon ta simbolisa alabes e laso cu Reino Hulandes.
2. E ramanan di laurel parti abou di e escudo t’e simbolo di paz y amistad.
3. Un cruz blanco mey-mey di e escudo ta dividi esaki den cuater compartimento. E cruz, desde siglo diesun e simbolo di cristianismo, ta representa devocion y fe.
4. E prome compartimento robes ariba ta mustra e mata di aloë (aloë vera) contra un fondo blauw. E mata di aloë ta simbolisa e industria di aloë, e prome fuente di ingreso di Aruba.^[6]
5. E di dos compartimento drechi ariba ta ilustra e sero di Hooiberg. Esaki ta simbolisa e isla cu ta halsa for di lama. E color berde t’e color di e alegria cu ta wordo sinti desde Aruba su autodeterminacion y e liñanan manera ola ta simbolisa e lama.
6. E di tres compartimento robes abou ta mustra dunamento di man na color cora contra un fondo color oro. E dunamento di man aki ta simbolisa e lasonan di amistad entre e pueblo Arubano y otro nacion, riba tereno politico, economico y cultural. E color cora ta nifica nos caracter generoso, nos simplesa y balor di trabou pa reforsa e lasonan aki.
7. E di cuater compartimento drechi abou ta mustra un wiel contra un fondo color cora. E wiel ta simbolisa un timon cu ta duna guia na nos industria, cu t’e fuente di bida mas importante di e isla.

• Escudo di Corsou