Streit dei Dardanei

Quell articol qì l'è scrivud in Lombard, cond l'ortografia Scriver Lombard.

Ol streit dei Dardanei (in turc: Çanakkale Boğazı), ind l'antigitaa ciamad Ellespont (Hellespontus, Hellespontium Pelagus, Rectum Hellesponticum, o Fretum Hellesponticum) l'è un streit qe al liga ol Mar Mediterrani e qell de Marmara e, insema a'l Bosfor, al fa de confin intra Europa e Asia.

Ol nom Dardanei al vegn de Dardania, l'antiga terra in su la riva asiatega qe la ciapa ol nom del Dardan, ol fiœl de Zeus e Eletra.

Ol nom Ellespont inscambe, qe al vœl dir Mar de Elle, al vegn d'un olter mit grec: Elle, sorella de Frisso e s'cieta de Atamante e Nefele, ind el viaj per indar ind la Colqide (fait in gropa a'l bessot con la pell d'or) la saress borlada jo ind el mar, qe l'ha ciapad ol nom da lee.

La largeza minima del streit l'è de 1 300 meter, e qella massema l'è de 6 km; l'è long circa 70 km. La profonditaa media l'è de circa 60 m, la massema 90 m.

In sui rive dei Dardanei g'è tante antige citaa: ind la banda europea Eleunte, Maidos, Sest (Turqia), Gallipoli (Turqia); ind la banda asiatega Troia, Dardan (incœ Çanakkale), Abid, e dei oltre.

• (IT) Dardanelli