Abjad

Un abjad es un sistem de scrive en cual cada sinia o glifo representa un consonante, e lasa la lejor eleje la vocal coreta. Alga abjades "nonpur" ave alga representas per vocales, tipal con diacritos o sinias spesial, ma no a la grado cual abigudas o alfabetas usa la un o la otra. La nom "abjad" es creada de la pronunsias de la leteras prima de la alfabeta arabi, en la ordina arabi, ivri, fenesian, etc ("alef, beta, gama, delta", per usa la nomes elinica).

Abjades difere de alfabetas car consonantes es representada, ma no (normal) la vocales, e de la abigudas car la diacritos per vocales no es normal usada. Ma tipal sinietas esiste per vocales, como la "nicud" per ivri e la "haracat" per arabi, per aida la interprete de scrivedas santa o en la educa de enfantes.

La abjades conveni bon per la strutur morfolojial de la linguas semitica per cual lo ia es developada. Parolas en esta linguas es formida de un radis cual es tipal composada de tre consonantes. La vocales es usada en parla per indica formas de infleta o derivada. Per esemplo, la radis arabi per "mata" es h-B-Ḥ (ذ ب ح), de cual on pote deriva "el ia mata" - dhabaḥa (ذَبَحَ), "tu (mas singular) ia mata" - ddhabaḥta (ذَبَحْتَ), "el mata" - yudhabbiḥu (يُذَبِّحُ), e "mataderia" - madhbaḥ (مَذْبَح). En la plu de casos, la asentia de vocales resulta en un forma de la radis clar e lejores capas pote divina la sinifia esata de contesto, en un modo simil a alga stenografias.

Abjades inclui estas:

• Alfabeta arabi (o, plu esata, perso-arabi) – arabi, azeri, panjabi, balutxi, caxmiri, paxto, persian, sindi, urdu, e la linguas de otra poplas de Asia este, sude, e sentral, e de Africa norde
• Alfabeta arami
• Alfabeta fenisia – fenisian e otra linguas relatada
• Alfabeta ivri – ivri, iides, e otra linguas parlada par iudis
• Alfabeta iaui – arabi, malaiu
• Alfabeta maniste
• Alfabeta nabatea
• Alfabeta orijinal (o plu esata, protosinaica, protocananes)
• Alfabeta palavi
• Alfabeta saba (o arabi sude) – saba e otra linguas relatada de Arabia sude
• Alfabeta sogdian
• Alfabeta samari (o ivri vea) – arami, arabi, e ivri
• Alfabeta suri – linguas neo-arami
• Alfabeta tifinag – tuareg
• Alfabeta ugaritica – ugaritica, hurita