Риони

Риони – Грузиядагы дарыя. Узундугу 327 км, алабынын аянты 13,4 миң км². Чоң Кавказ кырка тоосунун түштүк капталдарынан башталып, Кутаиси шаарынан төмөнүрөөк Колхида ойдуңу боюнча агат. Кара деңизге куярда (Поти шаарынын жанында) дельтаны пайда кылат. Орточо чыгымы 405 м³/секдай. Суусу өтө киргилт. Самтредиа шаарынан кеме жүрөт. Они шаарынан сал агызылат. Ортонку агымында сугатка пайдаланылат. Рионинин жогорку агымындагы өрөөн аркылуу Аскер-Осетин жолу өтөт.

• “Кыргызстан” улуттук энциклопедиясы: 6-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2014. 816 бет, илл. ISBN 978 9967-14-117-9