Gaga kska Yacow ka Laos, 18 00 N, 105 00 E ka gaga na nniqan.

Kana ka knlbangan na o 236,800 sq km（hangan na o Tg84）(knlbanga dxgal o 230,800 sq km, knlbangan qsiya o 6,000 sq km).

Kana ka sejiqun o niqan 7,019,073 hiyi.

Gaga Vientiane ka pusu alang paru, jiyax 2 idas 12 ka jiyax skrayan klwaan.

Manu ka dxgal Laos ga wada sugan 10.60% ka dxgal qpahan, 67.90% ka dxgal bbuyu, rahuq dxgal do niqan 21.50% na.

Bukung klwaan ta sayang o kiya ka Bounnhang Vorachith, pnaah hngkawas2016 idas 1 jiyax 22pnrajing kmlawa klwaan.

cinkhulan sa knita’ sa brbiru’

Lao Jnmin Mincu Konghekwo pa lxan bay splawa u qnlhangan Lao, kiya ka wa mniq Tnarac hunac Asia Congnan pantaw na qnlhangan sehuy cuyi, sotu mi beyhing bay alang mkbrnux u Yongcn. Dmuwi kari Lao, knlbangan dxral u 23.68 pinghwang km, knhbrawan hiyi sediq u 700 knbkiyan (kngkawas 2018), qnlhangan Lao ka murux bay neyrukwo Tuhunac Asia, tunarac u msdalih sqapah Vietnam, tuhunac u mtayus Cambodia, tuiwil u sqapah Thailand mi Myanmar, tudaya u msqapah Cyokoku.

Lao ka Tunarac Hunac Asia murux bay neyrukwo, tndxral dha u msqapah Thailand mi Vietnam mi Cambodia mi Cyokoku mi Myanmar. Knrbangan weytu pa ya bay peywey 14˚~22˚, knrbangan cingtu u tongcing 100˚~108˚, knrbangan tndxral qnlhangan u 23.68 knbkiyan pinghwang km, bbaraw ka hnyuwan tndxral dha. Kndadax tudaya mquri tuhunac, psnakan Tubaraw Lao, Tukcka Lao, Turahuc Lao tuturu nniqan lnlingay dxral.

Kcka tndxral Lao u psnakan dxral dwiyaq mi dxral mkbrnux nux hari, dxral dwiyaq u ya bay 80% knrbangan niya kana qnlhangan, nniqan dxral u kndadax tunarac daya mquri tuiwil hunac mstabuy mridil. Yayung Meykong u speyyah tudaya mquri tuhunac mttuku bay muda kana qnlhangan, kiya ka knbeyhing bay yayung kana qnlhangan, mklelu mkngahu u niqan ou bay so tiping mbrnux dxral, mniq mtayus Lao ka mtayus yayung Thailand mi Myanmar. Yayung Nanwu ka yayung Meykong knbeyhing bay cida yayung mniq Lao. Tunarac u niqan Annan tudu dwiyaq u mssiyaw Vietnam, tiwil daya u niqan dwiyaq tudu Rangporapang mi mssiyaw tuiwil daya dxral Thailand. Nniqan Tubaraw Lao ka tubaraw bay, niqan ‘Dnamux sapah Tunarac hunac Asia’ ka splawa dha; brnux dxral baraw Cwankwang ka splawa dha ‘Dnamux sapah Lao’, tuhunac niya ka dwiyaq Pupiya u knbaraw 2,818 m, kiya ka knbaraw bay dwiyaq qnlhangan Lao. Putting bay tuhunac ka brnux dxral baraw Purawan.

Tudaya Lao pa psnakan mksama rakaw na Jetay Yurin mi Cihung Yurin,  pusu na bay tuhunac u qqhuni mhhur wasaw. Nniqan dxral Cihung Yurin u Bungan knbeyhing mi kndux bay spriq lmiqu. Dxral kcka qnlhangan Lao pa psnakan kari bay qqhuni u niqan ddima, qqhuni skssik mi blbun syawkwo lmiqu, kiya mi hmrinas 100 kluwanan ka phpah rang mi qhuni sksik; niqan qhuni yomu, hwari mi qqhuni mkray bbiyan niqan hhangan. Tndxral qnlhangan Lao na ccamac mnunuh mi mnkkarang ccamac mi kkuwi mi ryangci tongwu u ya bay pn200 kluwanan kana, ya bay niqan 700 kluwanan ka qqduda. Qtan bay ccamac mnunuh u kiya knkana dapa lmiqu Intu, rqnux, kumay mi rungay; qtan bay ka mnkkarang quyu, srongcu, qpatung mi cilu. Dapa ngucun, sinyo, rklic tora mi ou kluwanan dapa lmiqu mi rungay mi rungay bbaraw bawa mnccamac mpkuka. Kngkawas 1993, seyhu Lao u wada dha bkuwan ida nkiya lnlingay nniqan qlhangan ka 21% dxral qnlhangan.

Snturung mqriqu uuda quri mchdil balay uuda smipaq qhuni ka Lao, mqriqu uuda niyi u kiya ka yayu tmabu puniq phuma, sangyey kayhwa, ssmalu quri qsiya mi deyngki, mrana ka knhbrawan hiyi sediq, sntangan kndusan kndadax qnlhangan icill ka ccamac mi mnudus lmiqu, kiya mi uxay qhunui uqun mi ddiyun iyu canpin ka kana psngan uuda niyi. Kngkawa 1992 ka ndanan pnkla quri seyhu, niqan 48% ka bungan qqhuni lmiqu ka tndxral Lao, mniq kngkawas 2002 muda pnkla u, wada mlih dhuq 41% ka nbungan qqhuni lmiqu da. Spuda pnkla Lao u, alaw ssmalu sliyan qsiya mi quri kacideynsyo deyngki mi knhmuc umowi smipaq qhuni, ya bay musa mhlih 35% balay ka nbungan qqhuni lmiqu ka tndxral Lao. Mnuda pusa kari ka Ryeynhekwo kayhwa cihwasu: “Qmlahang qnlhangan Lao na lnlingay ida nkiya mi malu ltudun dmuwi ka cuyeyn ida nkiya pa, quri so otalax qnnrinuc mi pkrana keyjay u kasi ka spruwan mita kana.”

Lao u psnakan Tubaraw Lao, Tukcka Lao mi Turahuc Lao 3 nniqan, 17 sng (khoueng), 1 cusyasu (kampheng nakhon) Yongcnsu. Trahuc sng u phiyu go (muang), alang nniqan (ban).

Hangan	Ji Lao	Sbrahun matas ka ji Lao	Sohu	ISO	Cyu
Asupo sng	ອັດຕະປື	Attapeu	Asupo	AT	Turahuc Lao
Pocyaw sng	ບໍ່ແກ້ວ	Bokeo	Huysay	BK	Tubaraw Lao
Porikan sng	ບໍລິຄໍາໄຊ	Bolikhamsai	Peysan	BL	Tukcka Lao
Canpasay sng	ຈຳປາສັກ	Champasak	Pase	CH	Tukcka Lao
Hwapan sng	ຫົວພັນ	Hua Phan	Sangnu	HO	Tubaraw Lao
Kanmong sng	ຄໍາມ່ວນ	Khammouane	Tacyu	KH	Tukcka Lao
Rangnanta sng	ຫຼວງນໍ້າທາ	Luang Namtha	Rangnanta	LM	Tubaraw Lao
Rangporapang sng	ຫຼວງພະບາງ	Luang Prabang	Rangporapang	LP	Tubaraw Lao
Utomusay sng	ອຸດົມໄຊ	Oudomxay	Mangsay	OU	Tubaraw Lao
Hongsari sng	ຜົ້ງສາລີ	Phongsali	Hongsari	PH	Tubaraw Lao
Sayeywuri	ໄຊຍະບູລີ	Xayabuli	Sayeywuri	XA	Tubaraw Lao
Sarawan sng	ສາລະວັນ	Salavan	Sarawan	SL	Turahuc Lao
Sawannaci sng	ສະຫວັນນະເຂດ	Savannakhet	Kaysanhongweyhan	SV	Turahuc Lao
Konghe sng	ເຊກອງ	Sekong	Saykong	XE	Turahuc Lao
Yongcn cusyas	ນະຄອນຫຼວງວຽງຈັນ	Nakhonlouang Vieng Chan	Yongcn	VT	Tukcka Lao
Wansyang sng	ແຂວງແຂວງວຽງຈັນ	Vieng Chan	Mongponghong	VT	Tukcka Lao
Cwankwang sng	ຊຽງຂວາງ	Xieng Khouang	Cwankwang	XI	Tubaraw Lao
Saysongpn sng	ໄຊສົມບູນ	Xaisomboun	Anuwang	XN	Tubaraw Lao

Patas bntasan:2013 Presidential palace Vientiane.jpg

Spoda qnlhangan Lao mniq kngkawas 1991 pkla keyngpo dha, Lao Jnmin Konghekwo ka qnlhangan jnmin mincu, kana bniyax u nsediq qnlhangan, sediq qnlhangan ka muda dmuwi biyax; tnpusu biyax sediq qnlhangan u, spuda Qnlhangan Lao Jnmin Kmingtang ka pusu bay mpdudul seyji ticu na uuda miyah qmpah mi smdhu.

Spuda so niyi, Lao u qnlhangan murux bay pnwaya kingal tang, Qalhangan Lao Jnmin Kmingtang ka cucngtang, kiya ka murux bay cngtang Lao uri. Qalhangan Lao Jnmin Kmingtang Congyang Weyyeynhuy Congsuki ka tang mi qnlhangan knbeyhing bay bukung mpdudul. Lao u kana mtqiri qnlangan babaw dxral ini khbaraw umarang Kyosang cuyi na qnlhangan, Qalhangan Lao Jnmin Kmingtang na isusingtay ka Makos Ryeyning Cuyi mi Kaysan Hongweyhan Susyang. Ana so wada psnakan quri Qnlhangan Sehuy Cuyi, binaw Qalhangan Lao Jnmin Kmingtang muda pkla qnlhangan Lao u “Qnlhangan Jnmin Mincu Cuyi”, wisu muda tnuda sehuy cuyi ka saya ha, pusu sngtangan ka phiyu mndungus bay sehuy cuyi.

Kwocya cusi ka yeynso qnlhangan Lao, kwohuy ka spuda kwohuy cangweyhuy ka muda pprngaw seyngkyo pnhiyu, 5 kngkawas ka diyax  snpngan qqpahun, kiya uri u qnlhangan Lao jnmin ucwang riryang na tongsway. Hukucusi qnlhangan u dmayaw qpahun cusi qnlhangan, pnhiyu seyngkyo kwohuy, malu mniq uka brahan muda qnpah cida ka cusi daw rmirih qqpahun niya. Qnlhangan Lao cweynkwo jnmin dayhyo taykay u mndha bay muda mssli kaygi, kngkawas1950 mniq bccbu nanaq ka qnlhangan dha u Patryaw ka muda dmudul pssli pprngaw, kngkawas1975 Lao Jnmin Mincu Konghekwo phiyu brah cida muda mssli pprngaw, pstuq kari pskingal lnglungan phiyu Jnmin Konghekwo. Kwohuy mi kana qnpringan qnlhangan u, spuda Pnwaya Pssli Mincu ka pusu elu pphiyu mi uuda dha.

Biyax sediq u ida pprngawan bay seyhu Lao mi quri qnlhangan Tuiwil uri. Seyhu quri qnlhangan Tuiwil mi duxay pnssliyan seyhu u ida dha ngalan qnnaqah bay ka quri biyax sediq Lao, binaw Lao u ini sruwa kari pnyahan dha. Qnlhangan Lao ka pusa kari u “Snbliqan qnlhangan, kongkong cusyu, waya syakay” u kasi ka mkala “biyax sediq”. Jiyu na tnsapah spatas dha u bqanan dha puting bay thiti “7” ka jiyu na qnlhangan Lao. Quri so jiyu rrngaw kari qnlhangan sediq umi biyax seyji u wada shtur seyhu uri. Seyhu u wada tyuwan qmraq mi phmuk sediq ini pntna tnkari dha. Qnita Jncweyn Kwanca pa quri so biyax sediq ka Lao u “Uka  balay tikuh mkala”, smliq waya phmuk u ida nanaq kiya nina, shtur ka biyax mpqpah uri.

Pnwaya keyngpo Lao, Lao u muru psblayaq, dukuricu, psdangi mi msupu qmpah na waycyaw cngce, pusu uuda dha u psblayaq msupu, pshu pqqita dukuricu, pusu biyax, mndungus pttuku tndxral, ini pddayak ddaun kcka seyhu mi psbalay pkmalu.

Lao saya ka Ryeynhekwo, Tongnanya Kwocya Syeyhuy, Sucyey Mawyi Cucu, Tongya Honghuy mi Hwayucweyn Kwoci Cucu cngyeyn. Kngkawas 1955, burah dukuricu na Lao wangkwo ka tumal Ryeynhekwo, kngkawas 1975 idas 12 diyax 2 knpriyux hangan qnlhangan kaying Lao Jnmin Mincu Konghekwo. kngkawas 1997 idas 7, balay bay tumal Tongnanya Kwocya Syeynhuy, mniq kngkawas 2004 mi kngkawas 2016 mn2 muda phiyun qnlhangan cisi, wada mndungus bay muda Tongsyey Honghuy mi Tongya Honghuy. Lao ka yayung Tameykong ccyuyu cingci cngyeyn. Kngkawas 2013 tumal Sucyey Mawyi Cucu.

Kngakawas 1989, wada mndungus ka pnluban Cyokoku mi Lao ddha dha, wada dhuq msbalay kana mi pkrana, kndadax hiya cida ddha qnlhangan niyi u mniq ou kluwanan uuda muda cyawryo miini pstuq pqrbuq ddaun dha. Kngkawas 1991, Nihong ka rmirih Sureyn wada knbeyhing bay mpdayaw Lao. Kngkawas 2002 qnlhangan Lao jnktang 7ta u wada pnwaya “Iya pspayis, kou sndangi” na uuda waycyaw. Kngkawas 1992 idas 8, Lao mi Amirika u wada pkmalu pnluban mi ppskaun snkulan Dungan; kngkawas 2005, Amirika u subway dha Lao pnluban mndungus mawyi. Kngkawas 1997 idas 7, tumal Tongnanya Kwocya Syeyhuy ka Lao. Kngkawas 2009, tuhuy Cyokoku phiyu pnluban kana balay msupu mccbu.

Heytay Lao pa splawa dha heytay dsediq Lao, smruwa dndulan Qnlhangan Lao Jnmin Kmingtang. Tubrah niya Heytay dsediq Lao ka dndulan qnlhangan Lao aykwo cansyeyn na “Qnlhangan Lao canto butay”, pnhiyu kngkawas 1949 idas 1 diyax 20, kngkawas 1965 idas 10 knpriyux hangan qnlhangan Lao jnmin ceyhwangcyu, kngkawas 1982 idas 7 knpriyux hangan saya. Knbeyhing bay bukung ka Congyang Kwohwang mi Cuan weyyeynhuy. Muru pnwaya heytay yiwuping, butun bay diyax mniq heytay u 18 idas. Alaw shtur biyax qnlhangan, Lao u uka kwohwang koci mi kwohwang kongyey, ini kbiyax ka biyax heytay dha, qqiya dha ddiyun mccbu u ini bay ttuku uri. Pusu bay qpahun heytay Lao pa kiya ka qmlahang psbliqan dxral tnayus mi qnsbliqan kcka qnlhangan, pusu na balay u wa mniq mkkngahu yayung Meykong ka qlhangan dha. Puniq ddiyun mcbu u pusu bay ka pneyyah dnyawan Suryeyn, niqan duma ka dnyawan Cyokoku mi Vietnam. Kana bay knhbrawan ucwang butay pa ya bay 6 knbkiyan hiyi sediq, kcka na hiya pa ya bay 5 knbkiyan hiyi sediq, pusu bay biyax stmanan ka 5 pupingsu; kongcyu u 2000 hiyi sediq; Neyhe syunrwo butay ka 1000 hiyi sediq.

Malu bay pnluban dha ka heytay sediq Lao u tuhuy heytay sediq Vietnam, ppwaluk bay kddiyax ka ddha bukung heyta hiyi, ini sangay smkaul heytay Lao musa Vietnam smluhay sslhayun, musa balay Vietnam smluhay mssli pcaping uri. Spuda quri so patas pnsdhuwan Lao mi Vietnam ddha qnlhangan niyi pa, heytay Vietnam u malu mtmay tndxral Lao so nniqan ddyaun mccbu.

Qnlhangan mqrinuc hari ka Lao, wada ngalan kntikuh bay pnkrana qnlhangan uri, kngkawas 2018 knkana kcka qnhlangan osang mniq Tongnanya tbkuwan tubukuy tu2. Bnkuwan keyjay Lao pa nongyey ka pusu balaqy, ini kndhu ka pusu kongyey, bukuy hari pknrana niya. Lao Jnmin Konghekwo babaw pnhiyu qnlhangan daw, wada mnnuda muru mnssli balay cihwa keyjay ticu, thiti daw mniq kngkawas 1986 u muda psburah ptrawah cngce, skkingal muda ptrawah hntran seyhu, mquri sucang cingci ka pusu na mrrimax cingci niya, kiya u quri so neydang bbriyan qqiya cngce, pnwaya kocing, nongyey cngce, quri so uuda kongyey kwanri ticu u ptrawah knpriyux. Alaw mntxal qnuqu ka cngce mi mnuda psbuc Tongnanya cinjong weyci, uka brahan knpriyux mthiti bay ka keyjay dha Lao. Mniq kngkawas 2011 dhuq kngkawas 2015 tu7 kcka keykaku 5 kngkawas Lao, GDP knkala na kngkawas Lao pa 7.9%. Kngkawas 2018, GDP balay bay knrana niya u 6.5%, tnbkuwan kana qnlangan u tu16, jncyu GDP u wada hmrinas ssiyaw qnlhangan dha Vietnam da.               

Knrana keyjay knbaraw Lao pa sntama waypu tocu, wayray tocu ka hmrinas 70% knkana qnlhangan Lao kwomin cingci smmalu knkana tocu. Kngkawas 2016, knbeyhing bay brah tu3 pnsliyan knkana keyjay Lao pa kiya ka Cyokoku, Thailand mi Vietnam. Kngkawas 2011, spuda cisu mi keyjay Hangkoku ka dmkuh, qblhangan Lao cngcweyn cyawyiso u mniq kngkawas 2011 balay bay prading pstalang. Kngkawa 1988, Qnlhangan Lao Jnmin Kmingtang tu4 kay 5 congcweynhuy pskingal lnglungan psbeyhing quri pkrana “Kanbu cukong katey keyjay”, knhbaraw bay kanbu cukong katey ka mniq dndulan seyhu mquri mttuku dnuwi hbangan, kiya mi keyjay u kndadax phuma nanaq, tmabu tnbuwan, qpahun bawa pkrana dhuq mbbari bnriyan, ryotong, huwu, kci mi mquri nganguc msupu qmpah, pcriyu ka sediq kanimoci mi “Snburah cupncya”, binaw wada krinah balay ka pnsnakan mblayaq sediq mi mqrinuc sediq uri da. Ini biyaw mrana ka keyjay pa kiya ka wada kndudul mquri nganguc ka sediq niqan knkla uri, spuda kngkawas 2015 ka snpuwan, niqan 37% mnuyas na sediq qnlhangan Lao u wa mniq qnlhangan nganguc.

Nongyey ka uruc dmkuh pumn pnsltudan Lao, 20 seyki kngkawas 70 cida, nongyey cncu Lao quri GDP u canpi 70% dhuq 80%; kngkawas 2015, canpi 17.59%. Malu qpahun ka knrbangan dxral Lao u ya bay 500 knbkiyan, bungan ryu lmiqu dwiyaq u dhuq 60%. Lao u 2/3 knrbangan na dxral malu qpahun pa ini dani dmuwi nina, “Patas Lao syakay keyjay pnspuwan” mi “Qnlhangan Lao nyeyncyeyn” tongci na kngkawang 2015 Lao knrbangan dxral qpahun u 134.58 knbkiyan lituk. Pusu bay uuqun Lao u niqan payay, lhngay, bbungay mi ssukay, mntxal knrbangan pnhuma payay u dhuq dmka knrbangan dxral malu phmanan, kiya ka pusu bay uuqun pnhmanan Lao, kngkawas 2016 kana bay nngalan pnhuma paya pa ya bay 343 knbkiyan tun, ya bay 77% na sediq mpqpah Lao u dhuq diya nanaq ka mhuma uuqun dha nanaq. Pusu bay keyjay pnhuma pnwalan u niqan sukay layan, sukay mcayis, trabus, spriq puqan, wata, sibus, kahuy mi ociya, kcka na hiya pa kahuy ka knrbangan bay dxral pnhuma, kiya mi dhuq hmrinas dmka knrbangan dxral keyjay pnhuma pnwalang.

Kwangyey Lao u ida mthiti balay ka pkrana niya, wisu muda knbeyhing balay kwangcang kance keykaku. Wada prading kmari kwangcan quri knkana sikwang, btasil payyun, meykwang, sukaw. Myeyn hwangcuyey u pumn niqan balay knkla dha mi pupyeyn balay mniq Lao; lukus cyakongyey dhuq 21th u wada ini biyaw balay knrana niya uri. Kngkawas 2008, smruwa tuhuy Vietnam msupu kmari gasoring wa mniq Tuhunac 2 sng.

Lao pa knkana balay u niqan 49 minjoku, llutuc mnrudan kari Thailand joku, Mong- llutuc kari Kawmyeyn joku, Myaw- llutuc kari Yaw joku, Han- llutuc kari Cang joku, pspun kana lmawa qnlhangan Lao minjoku, dmuwi kari Lao, wa quri so tubaraw hari nniqan dha pa dmuwi kari Muko. Sediq Lao u hbaraw ka snhiyi sangcwopu Bukyo. Hwayi u ya bay 3 knbkiyan hiyi sediq.

Lao pusu lhayan kyoiku pnwaya ppyasan u 5 kngkawas ka pyasan tutiping, pyasan tukcka u 3 kngkawas, pyasan tubaraw u 4 kngkawa. Pkrana quri kyoiku ka Lao u ini hari pndungus, spuda bntasan pnspuwan smpu kngkawas 2008 dhuq kngkawas 2012 mkla smpu patas u 72.7%. Kyoiku Lao saya u snturung ini ttuku ka ddiyun sttsa daha, ini ttuku knhbrawan ka mptusa uri. Mniq nniqan alang mqrinuc u hbaraw bay laqi muyas u uka brahan mndungus bay musa sapah pyasan smhuhay. Seyhu Lao saya u wada pkrana mniq quri kyoiku, kiya mi wada niqan knrana niya.

Patas bntasan:Wattay Intl Airport Vientiane Laos.jpg

Patas bntasan:Thanaleng Train Station Vientiane.jpg

Ppanan rulu Lao pa pusu niya balay u ppanan rulu sediq elu beyhing. Rulu Lao u to bay na rulu smudal kndadax Taiwan, Nihong mi Hankoku.

Yayong Meykong pa mniq thunac Lao u niqan mtbiyax bay yayong, naqah daun, binaw kcka dxral Lao u ou bay yayong, ppanan asu u stmanan balay kiya uri.

Kngkawas 2008 idas 7 diyax 4 Lao mi Thailand u mwaya bay muda psdhu prading pstalang kisya. Kisya niyi u kndadax eyki Thailand Rangkay mriq, mniq hakaw Tayraw yoyi muda keyngsa mlatac mi mtmay, mquri msdalih sotu Lao Yongcn 9 km na eyki Tanarng hiya mriq, elu kisya niyi pa mniq tndxral Lao u wana bay 3.5 km knrbangan balay, kiya ka mwaya bay elu kisya Lao uri. Elu kisya niyi u mniq kngkawas 2009 idas 3 diyax 5 ka balay bay prading tmalang.

Mmahun mi uuqun Lao pa msdalih hari Thailand, tndxral Lao saya u wana mniq Pocyaw Sng Cinci Tecyu ka niqan Maytangraw, Knteci mi mntna so niyi ryeynswo susutyeyn, uka ana 1 ka mntna so Cyarohu na ryeynswo bbriyan.

Lao pa Bukyo ka pusu bay snhiyan dha, 8th u snpiyah Rawting joku picyo ka mnadas, wada ngalan snhiyan qnlhangan da, Lao saya u niqan 5,000 ka suyeyn, 29,000 hiyi ka sngjn (niqan duma ka sami wa mniq suyeyn muyas), picyoni u 4,500 hiyi sediq.

Hbaraw balay sediq ka smluhay Bukyo, niqan duma sediq ka smluhay Koristokyo. Rawsong joku, Rawting joku u pusu bay smluhay Sangcwopu Bukyo mi snhiyan mincyeyn Lao, Hwajn mi sediq Vietnam pusu bay snhiyan dha u Hancwan Bukyo.

• CIA
• 外交部
• List of current heads of state and government
• https://zh.wikipedia.org/wiki/%E8%80%81%E6%8C%9D
• Tnhjil kari seejiq Watan Diro(瓦旦 吉洛) mtabug