Vänsterpartiet

Vänsterpartiet (sweedsch för „de Linkspartei“) is een vun de politischen Parteien, de in’n sweedschen Rieksdag sitten doot. Se steiht för sozialistische Ansichten. De Vörsitter vun de Partei is siet 2012 Jonas Sjöstedt. Bi de Rieksdagwahlen 2006 kreeg Vänsterpartiet 5,85 % vun de Stimmen un dormit 22 vun 349 Mandaten.

De sweedsche Linkspartei weer 1917 vun en Koppel vun Sozialisten grünnt, de ut de sozialdemokraatschen Partei utslaten worrn weern. De ne’e Partei harr den Naam Sveriges socialdemokratiska vänsterparti (Sozialdemokraatsch Linkspartei vun Sweden). Op den Parteidag 1921 sünd aver all antileninistischen Liddmaten ut de Partei utslaten worrn un de Partei kreeg mit Sveriges kommunistiska parti (Kommunistsiche Partei vun Sweden) en ne’en Naam. Man, binnen de Pareti geev dat noch wieteren Stried un dormit verbunnen ok wietere Utslüss vun de Koppels üm Zeth Höglund 19242 un Karl Kilbom 1929.

Na’n Dood vun Stalin un dat Vertwein twüschen de Sowjetunion un de Volksrepubliek China geev dat in de Partei düchtige binnere Diskusschonen, de an’n Enn to de Grünnen vun wietere kommunistische Parteien in Sweden föhrt hebbt. Af Mitt vun de 1960er Johren güng dat binnen de Partei mit Reformen los, de to’n Teel harr, en sülvststännigere Positschoon to kriegen. 1967 geev dat denn ok wedder en Naamwessel to Vänsterpartiet kommunisterna (Linkspartei – Kommunisten). Vun’n Prinzip hett man sik nu ok to de parlamentaarsche Demokratie as Staatsform bekennt un söch de Eenigen vun all sozialistischen Kräft.

De Entwickeln hen to en allgemeen Linkspartei is 1990 in’t Strieken vun den Naamsdeel „Kommunisten“ un in dat Parteiprogramm vun 1993 düütlich worrn- Dorin hett sik Vänsterpartiet as en sozialistische un feministische Partei defineert. De Parteivörsitt güng an de dormols düchtig populäre Gudrun Schyman. Dordör un dör de in’n Vergliek to annere Parteien teemlich klore Ansicht in de EU-Fraag, hebbt 1998 to dat beste Wahlergeevnis föhrt in de hele Historie vun de Linkspartei. To de Tiet weer ok de drange parlamentaarsche Tosamenarbeit mit de sozialdemokraatsch Minnerheitsregeeren inleit.

As Schyman torüchpett is, keem na en kort Twüschenspeel de hüütige Vörsitter Lars Ohly an de Macht. Dat bröch en Wennen torüch na de traditschonellere Politik mit sik, wieldat sik Ohly sülvst as Kommunist defineert un de maatigeren Liddmaten vun’n Parteivörstand afwählt weern.

• twüschen 1917 un 1921 geev dat keen Parteivörsitter
• 1921–24 Zeth Höglund
• 1921–23 Karl Kilbom
• 1924–29 Nils Flyg
• 1929–51 Sven Linderot
• 1951–64 Hilding Hagberg
• 1964–75 C.H. Hermansson
• 1975–93 Lars Werner
• 1993–2003 Gudrun Schyman
• 2003–04 Ulla Hoffman
• 2004–12 Lars Ohly
• 2012- Jonas Sjöstedt

• Offiziell Nettsiet vun de Vänsterpartiet