Orden sacher

Quest articol chì l'è scrivud in lombard, con la Noeuva Ortografia Lombarda

Per orden sacher se intend, in varie confession cristiane, che el corp de sgent che l'è al servizzi de la Gesa in bas a una specifega ordenazzion, che despess l'è ciamada orden sacher anca lee per estension: 'sti orden chi inn spartid in vescov, prevet e diacon, che i gese che ghe stann adree a l'orden pensen che inn stad fad su inscì del Gesù.

A havégh l'orden sacher inn i catolegh, i ortodoss, i ortodoss orientai e la pupart di anglican, anca se per la pupart de lor l'ordenazzion l'è minga un sacrament. El Martin Luter el vedeva in del sacerdozzi un'istituzzion minga biblega, ma l'era minga contra a l'ordinazzion e a ciamàlla sacrament, donca in tra i luteran a gh'è di bei diferenze in su l'orden sacher.

In di alter gese protestante, de solit, se i pastor inn ordenad a l'è domà una question de autorizazzion de la gesa o de tradizzion.

Catolegh, ortodoss e ortodoss orientai permeten no che di done sien ordenade prevet o vescov, desgià che l'è mai stad fad di prim cristian, e se nota che 'l Gesù l'ha scernud 'me apostoi domà di omen e lor hann scernud di omen.

Per i catolegh, i done poden no deventàll perché el sacerdot el lavora in persona Christi, e 'l Crist l'è vegnud sgiò 'me om, e 'l Papa Giovann Paol II l'ha scrivud in la letera apostolega Ordinatio sacerdotalis che la Gesa la gh'ha nissun poder de ordenà done.

I ortodoss, in del retegnì l'ordenazzion di done contra la tradizzion, gh'hann nissuna dotrina contra, e gh'è di comentador ortodoss che retegnen che la podaria vesser metuda, desgià che la Gesa la gh'ha no el poder de dìgh al Spirit Sant chi ciamà al sacerdozzi.

In di prim agn de storia de la Gesa a gh'era di disconesse: anca se de rari, a gh'è capitad che di vescov ortodoss hann ordenad di done diacon per lor o per un monaster, per esempi el Netari de Egina l'haveva fad. In la gesa catolega de incoeu se po minga ordenà una dona diacon, ma gh'è di dialegh denter a la gesa in sul tema.

• Enciclopedia Italiana

• Wikimedia Commons el gh'ha dent imagin o alter archivi su Orden sacher

• Orden minor