Alfred Dreyfus

Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.

Alfred Dreyfus (Mulhouse, 9 oktober 1859 – Paries, 12 juli 1935) waor 'ne joods-Fraanse officier, dae väöral bekènd waoërt dör de nao häöm geneumde Dreyfus-affaire.

Dis affaire heel 't volgende in:

Dreyfus waoërt op 15 oktober 1894 gearresteerd op groond va vaalsje documaente oeë-oet zow blieke dat-e verraod zow ha gepleegd (e zow 'ne sjpion zieë väör Duutsjlaand); 't feit dat-e 'ne jood waor how met dit alles te make. E waoërt op 5 januari 1895 oet z'ne rang gezat en veroordeeld töt laeveslang gevangenissjtraof, oet te zitte op 't beruchte Duivelseiland.

Z'n veroordeling veroorzaakte väöl ambras en versjèjje perzoeëne haant zich d'r aan meuj gemakd öm 'm vrie te kriege. Dit kreeg z'n beslag op 19 september 1899 wie Dreyfus waoërt vrijgelaote. Pas op 12 juli 1906 waoërt-e gaans vriegesjpraoëke van de aanklachte oeë me 'm van besjöldègde.

Oonder aandere d'r bekaande Fraanse sjriever Emile Zola haat zich väör z'n vrielaoting en rehabilitatie ingezat mèt z'n beroemd pamflet uit 1898 getiteld J'accuse...! of Ich klaag aan...!