Planos Grande
La Planos Grande (comun nomida "la planos") es un estende vasta de tera plata, la plu parte covreda en la modo de savana o stepe, locada en la SUA e Canada. Lo es locada ueste de la Rio Mississippi, con sua prado de erba alta, e este de la Montes Rocosa.
La rejion es sirca 800 km este a ueste, e 3200 km norde a sude. Lo ave un area de sirca 1,300,000 km2. Lo inclui:
- tota de Nebraska, Dakota Norde, e Dakota Sude;
- partes de Colorado, Kansas, Montana, Mexico Nova, Oklahoma, Texas, e Wyoming;
- la partes sude de Alberta, Saskatchewan, e Manitoba en Canada.
La rejion es marcada par sua suporta de ranxos estendosa de boves, e per cultiva seca de trigo e otra sereales. Jeneral, la Planos Grande ave un varia grande de clima, con invernos multe fria e sever e estates multe calda e umida. Ventas es comun multe forte e rapida, spesial en inverno. La savanas orijinal no es bon protejeda, e multe de la prados es cambiada per per cultiva o pasto per boves.
La americanes orijinal prima ia ariva a la Planos Grande multe miles de anios a ante. Istorial, la Planos Grande ia es la abita de la pede-negra, cro, su, xeien, arapaho, comantxi, e otras. La partes este de la Planos Grande ia es abitada par tribus ci ia vive en viletas semi-permanente de casas partal sutera e covreda con solo, como la aricara, mandan, poni, e uitxita (tota linguas cadoan).
Multe de la rejion ia es abitada par la manadas de la bison american. Los ia es xasada asta los ia prosimi estingui en la sentenio 19 media e tarda, pos la introdui de la cavalos e fusiles introduida par europeanes.