Otto von Struve

Otto von Struve
Gebuer	12. August 1897 Charkiw
Gestuerwen	6. Abrëll 1963 Berkeley
Nationalitéit	Russescht Keeserräich, USA
Educatioun	University of Chicago
Aktivitéit	Astronom
Member vun	Royal Society, American Academy of Arts and Sciences, Koninklijke Nederlandse Akademie van Wetenschappen, International Astronomesch Unioun, American Astronomical Society, Académie des sciences, Schweedesch Akademie vun de Wëssenschaften, National Academy of Sciences

Den Otto von Struve (oder: Otto Struve; gebuer den 12. August 1897 zu Charkow, deemools Russescht Keeserräich; a gestuerwen de 6. Abrëll 1963 zu Berkeley (Kalifornien), USA) war e russesch-US-amerikaneschen Astronom vun däitsch-baltescher Ofstamung.

De Struve war de Jong vum Mathematiker Ludwig von Struve an den Neveu vum Hermann von Struve. No senger Schoulzäit huet de Struve vun 1914 un ugefaangen, Astronomie op der Universitéit Charkow ze studéieren. Säi Studium gouf duerch de russesche Biergerkrich ënnerbrach, bei deem hien op der Säit vun der Wäissen Arméi gekämpft huet. No Krichsenn huet hie säi Studium ofgeschloss an huet kuerz Zäit als Dozent geléiert.

Am Joer 1921 ass hien no den USA ausgewandert an huet als assistant for stellar spectroscopy um Yerkes Observatory zu Williams Bay, Wisconsin, geschafft. Den Observatoire huet zu der University of Chicago gehéiert. 1923 huet de Struve promovéiert an am nächste Joer war hien zum Dozenten zu Yerkes avancéiert. 1925 huet hien d'Mary Martha Lanning bestuet. D'Bestietnes war ouni Kanner bliwwen, sou war den Otto von Struve de leschte Spross vun der grousser Astronomefamill Struve.

1927 gouf hien zum assistant professor ernannt an nach am selwechte Joer krut hien déi US-amerikanesch Staatsbiergerschaft. 1930 war hien zum associate professor avancéiert a 1931 zum assistant director. An de Jore vun 1932 bis 1947 war de Struve Direktor vum Yerkes Observatoire a gläichzäiteg Professer fir Astrophysik op der Universitéit vu Chicago.

Wéi 1939 d'Universitéit vun Texas hire McDonald Observatory an den Davis Mountains opgemaach huet, gouf de Struve mat der Leedung betreit.

1950 huet de Struve dann seng Ämter wéinst gesondheetleche Grënn zu Austin an zu Chicago niddergeluecht an huet e Ruff vun der University of California, Berkeley ugeholl. Do huet hien un der astronomescher Fakultéit geléiert an den Leuschner Observatory geleet, deen zu der Fakultéit gehéiert huet.

1952 gouf de Struve zum President vun der Internationaler Astronomescher Unioun gewielt. Déi Plaz hat hie bis 1955. Véier Joer méi spéit gouf de Struve zum Direkter vum National Radio Astronomy Observatory beruff. Hei blouf hie bis säi Liewensenn.

Nieft senger Aktivitéit als Editeur vum Astrophysical Journal huet hie sech mat ëmfangräiche spektroskopeschen Observatiounen an theoreeteschen Ënnersich iwwer Stäre mat enorme Gashülle, iwwer Verännerlech Stären, Duebelstären an interstellar Matière beschäftegt.

1942 gouf de Struve an d'American Academy of Arts and Sciences gewielt.^[1] 1954 gouf hien als Member ("Fellow") an d'Royal Society opgeholl.

• 1944: Goldmedail vun der Royal Astronomical Society
• 1948: Bruce Medal vun der Astronomical Society of the Pacific
• 1954: Jules-Janssen-Präis
• 1957: Henry Norris Russell Lectureship
• De Moundkrater Struve, den Asteroid (2227) Otto Struve an en Teleskop Otto Struve Telescope si no him genannt.

• Stellar evolution – an exploration from the observatory. Princeton University Press, Princeton 1950.
• Elementary Astronomy. 1959.
  • (de): Astronomie – Einführung in ihre Grundlagen. 2.Oplag. de Gruyter, Berlin 1963.
• The universe. M.I.T Press, Cambridge 1966.

• Margherita Hack et al.: Modern astrophysics – a memorial to Otto Struve. Gauthier-Villars, Paris 1967.

Portal Astronomie

• Homonymie Struve

Commons: Otto Struve – Biller, Videoen oder Audiodateien

• Publikatioun vum O. Struve am Astrophysics Data System
• Noruff op den O. Struve am Astrophysics Data System
• The Bruce Medalists
• Otto Struve Bibliography Sonoma State University
• Otto Struve, Astronomy: Berkeley University of California
• Guide to the Otto Struve Papers, 1837-1966 Online Archive of California

1. ↑ Members of the American Academy. Listed by election year, 1900–1949 (PDF). Gekuckt den 29. September 2015