Cancro de ovario

Cancro de ovario
Clasificación e recursos externos
Tumor mucinoso de ovario visto baixo o microscopio.
DiseasesDB	9418
MedlinePlus	000889
Advertencia: A Wikipedia non dá consellos médicos. Se cre que pode requirir tratamento, por favor, consúltello ao médico.

O cancro de ovario é un tumor maligno que nace en calquera das partes do ovario. O ovario é un órgano moi complexo que pode ser asento de numerosos tumores de moi distinto rango morfolóxico, algúns dos cales están dotados de función hormonal, o que xustifica a gran variedade de clasificacións. A localización máis frecuente é no epitelio que recobre o ovario.^[1] Tamén se desenvolve a partir das células xerminais ou do tecido conectivo arredor do ovario.^[2] O risco de padecer cancro de ovario relaciónase directamente con anomalías nos xenes BRCA1 e BRCA2.^[3] Polo xeral, o cancro de ovario non produce síntomas.^[4] É por isto que a maioría dos casos detéctanse cando a doenza xa está avanzada e continuada, pero se se detecta en etapa temperá pode mellorar o prognóstico.^[5]

Ten unha alta incidencia nos países industrializados de Europa Occidental, Israel, o Canadá e os Estados Unidos. É o sexto tumor maligno máis frecuente nas mulleres tralo de cancro de mama, intestino groso, pulmón, útero e linfomas.