Mèrcuro (planèta)

Cél articllo est ècrit en arpetan supradialèctâl / ORB lârge.

Por los articllos homonimos, vêde Mèrcuro.

Mèrcuro (simbolo: ) est la planèta la ples prôche du Solely et la muens massiva du Sistèmo solèro^{[N 1]}. Sa luentior u Solely est tegnua entre-mié 0,31 et 0,47 unitât astronomica (ou ben 46 et 70 milyons de kilomètros), cen que corrèspond a n’èxcentricitât de la corba de 0,2 — més de doze côps ples grôssa a cela de la Tèrra, et de luen la ples hiôta por na planèta du Sistèmo solèro. El est visibla ux uelys nus dês la Tèrra avouéc un diamètre aparent de 4,5 a 13 secondes d’arc, et pués na magnituda aparenta de 5,7 a −2,3 ; portant son obsèrvacion est rendua mâlésiêe per son èlongacion adés desot 28,3° que la nèye lo ples sovent dedens l’ècllat du solely. En pratica, cél vesenâjo avouéc lo solely demande que pôt étre viua ren que prés de l’horizont cuchientenc aprés lo cuchiê de solely ou ben prés de l’horizont levantenc devant lo levâ de solely, en g·ènèral a la tombâ de la nuet. Mèrcuro at la particularitât d’étre en resonence spin-corba 3:2, son temps de rèvolucion (~88 jorns) que vâlt tot justo 1,5 côps son temps de rotacion (~59 jorns), adonc la mêtiêt d’un jorn solèro (~176 jorns). D’ense, relativament a les ètêles fixes, verote dessus son axo drêt três côps totes les doves rèvolucions u tôrn du Solely.

Mèrcuro est na planèta tèlurica, coment lo sont étot Vènus, la Tèrra et Mârs. El est prés de três côps ples petiôta et quâsi vengt côps muens massiva que la Tèrra mas quâsi asse pesanta que lyé. Sa densitât remarcâbla — dèpassâye solament per cela de la Tèrra, que lyé serêt d’alyor en-desot sen l’èfèt de la comprèssion gravitacionâla — est diua a l’importance de son noyél mètalico, que reprèsenterêt 85 % de son rè, contre vers los 55 % por la Tèrra.

Coment Vènus, Mèrcuro est quâsi sférica — son aplatament que pôt étre considèrâ coment zérô — a côsa de sa rotacion brâvament lenta. Dèporvua de veré atmosféra por la protègiér de les mètèorites (ègziste ren qu’un’ègzosféra qu’ègzèrce na prèssion a râs tèrra de muens de 1 nPa ou ben 10⁻¹⁴ atm), sa surface est rudo fôrt cratèrisâye et pués gllobalament pariére u lât cachiê de la Lena, qu’endique qu’est g·eologicament pas activa dês des milyârds d’ans. Cel’absence d’atmosféra combinâye u vesenâjo du Solely fât de tempèratures en surface que vant de 90 K (−183 °C) a fond des cratèros polèros (yô que los rès du Solely avenjont jamés) tant qu’a 700 K (427 °C) u pouent sot-solèro u pèrihèlio. La planèta est d’ôtra pârt dèporvua de satèlitos naturâls.

Solament doves sondes espaciâles ant ètudiyê Mèrcuro. Mariner 10, que survôle a três côps la planèta en 1974–1975, mapografie 45 % de sa surface et pués dècôvre l’ègzistence de son champ magnètico. La sonda MESSENGER, aprés três survôls en 2008-2009, sè bète en corba u tôrn de Mèrcuro en mârs 2011 et pués rèalise n’ètuda dètalyêe notament de sa topografia, son histouère g·eologica, son champ magnètico et son ègzosféra. La sonda BepiColombo at por fin de sè betar en corba u tôrn de Mèrcuro en dècembro 2025.

La planèta Mèrcuro dêt son nom u mèssagiér des diôs dens la mitologia romèna, Mèrcuro. La planèta est nomâye d’ense per los Romens a côsa de la vitèsse que sè dèplace dens lo cièl. Lo simbolo astronomico de Mèrcuro est un cèrcllo pôso dessus na crouèx et que pôrte un mié-cèrcllo en fôrma de côrnes (Unicode : ☿). O est na reprèsentacion du caducèo du diô Hèrmês, èquivalent de Mèrcuro dens la mitologia grèca. Mèrcuro at asse-ben balyê son nom u trêsiémo jorn de la semana, demécro (« MERCURII DIES »).