Prasencia

Prasencia
Entidad subnacional
Bandera Escudo
Ubicación de Prasencia
Coordenadas	40°01′39″N 6°05′27″O / 40.0275, -6.0908333333333
Capital	Prasencia
Entidad	Monicipiu d'España y Ciá
• País	España
Superficii
• Total	217,94 km²
Altol
• Media	415 m s. n. m.
Puebración (2023)
• Total	39412 hab.
• Densidá	180,84 hab/km²
Gentilíciu	Pracentinu
Huso horario	UTC+01:00
Código postal	10600[1]
Sitio web oficial
[editar datos en Wikidata]

Prasencia es una ciá assitiá nel norti la província de Caçris, a orillas de riu Xerti, n'Estremaúra, España.

Conocía comu la Pelra el Valli,^[2] cuenta con una puebración de 39558 abitantis (INE 2021) i es el segundu núcliu urbanu la província i el quartu la región. Ejerci de capital pal norti d'Estremaúra i acogi selvícius del Estau i de la Junta, tantu pala puebracion qu'amberga comu pala zona norti la region.

Es un destinu turísticu de primel ordin endrentu d'Estremaúra, dau el caraiti menumental i estóricu la ciá, assín comu pola su cercania a los recursus turísticus las comarcas vezinas.

Es tamien la sé la Diócesi del mesmu nombri.

Prasencia s'alcuentra a 83,4 km al norti de Caçris, 150 km al norti de Méria, 126,4 km al sul de Salamanca, 245,2 km al oesti de Mairil, a unus 70 km del arrayu con Portugal i a una artitú de 352 metrus sobri el nivel del mari. Endrentu d'Estremaúra quea assitiá al norti, nel úrtimu tramu el Valli del Xerti i asentá sobri la falla Estremeñu-Alentejana, ena confluéncia de riu Herti con el regachu Ñeblas.

El cascu urbanu arraya al oesti conas sierras del Gordu i Berenguel, que pretenecin a la su vezi a los montis de Traslasierra, i al esti pola Sierra de Santa Bárbara, que holma parti la Sierra de Tormantus. Siendu la cimera el Gordu el puntu ondi el términu monicipal alcança mayol artitú, con una cota de 997 m d'artitú sobri el nivel del mari.

Cuenta con una puebración de 39.558 abitantis sigún los datus del Estitutu Nacional d'Estaística, pal añu 2021,^[3] siendu el segunderu núcleu urbanu mas puebrau la província e Caçris i el cuartu d'Estremaura.^{[Nessecita huenti]}

El su términu monicipal tiini un grandol de 217,94 qm²,^[4] siendu pol tantu unu los monicípius mas estensus de la Comuniá Autúnoma. A ella pretenecin tamién otras dos puebracionis catalogás nel pasau cumu bárrius de la ciá i uguañoti cumu entiais menoris: San Hil i Prauchanu.

La región heugráfica ena que s'alcuentra assitiá Praséncia presenta un climi continental suavi, con vranus cálurosus i ibielnus suavis. Enos mesis mas frius del añu rala vezi la temperatura baja los 0 °C i enos mesis mas cálius en cuentás ocasionis se superan los 40 °C. Rustri pol tantu unas temperaturas menus calurosas qu'el restu de ciais estremeñas. El climi nesta zona está mu enfruenciau pol micruclima el Valli el Herti i la cercana Sierra de Greus, que pol un lau suaviçan las temperaturas i evitan los valoris estremus que se dan en otrus puntus de la península i pol otru, dá la orografia lonjitudinal de la Sierra e Greus, hazin que se den mayoris precipitacionis que nel restu la meseta central.

Las llúvias son abundantis i s'assitian nuna orquilla qu'oscila entri los 800 i los 1000 mm anualis, siendu escasas duranti la epoca estival, peru superioris a las que se rustrin en otras capitalis estremeñas.

Oservatóriu e Praséncia[5]
1971-2000	Ene	Heb	Mar	Abr	May	Hún	Húl	Ago	Se	Otu	Nov	Dic	Añu
Temperatura máissima meya (°C)	10	12	16	19	23	30	34	34	29	20	14	10	21
Temperatura ménima meya (°C)	3	4	6	8	10	15	18	18	16	11	8	4	10
Precipitación (mm)	135	126	119	68	62	40	8	11	60	100	112	109	950

Sigún el sistema e crasificación climática e Papadakis, la mayol parti el términu monicipal de Praséncia s'encrui endrentu los climas mediterráneu sutropical i mediterráneu continental templau. Enas sierras que bordean Praséncia el clima correspondi colas crasificacionis de mediterránuo templau i mediterráneu frescu.

El nombri la ciá provieni el lema dau pol rei Alfonso VIII nel escú otorgau a la mesma, estu es: "Ut placeat Deo et hominibus", es izil: Pa que agrai a Dios i a los ombris. Praséncia senifica, pol tantu, Ciá d'Embaigu u Pracel.^[6]

Nu ostanti, la hundación de Praséncia se hizu sobri un asentamientu anteriol albondu mas antigu, qu'era conociu con el nombri d'Ambracia u Ambrós.^[7]Desisti algotra enterpretación del Ut placeat Deo et hominibus: Pal pracel de Dios i e los ombris.

Praséncia cuenta a 1 d'Eneru e 2021 con una puebración de 39.558 abitantis sigún los datus del Estitutu Nacional d'Estaística.^[3]

Puebración de Praséncia nel periu (1797 – 2010)
1797	1842	1857	1860	1877	1887	1897	1900	1910	1920	1930	1940	1950	1960	1970	1981	1991	2001	2010	2021
4.950	6.026	6.844	6.206	7.090	8.044	8.351	8.208	9.459	10.002	12.418	16.255	18.203	21.297	27.174	32.178	36.826	37.690	41.447	39.558

Nacionaliais foriatas con mas de 50 resientis en Praséncia
Asiahamientu	Nacionaliá	Puebración
1ª	Marruecus	318
2ª	Bolívia	182
3ª	Rumania	153
4ª	Colómbia	114
5ª	China	99
6ª	Ecuaol	87
7ª	Portugal	align=right|61

Al igual qu'el restu d'España, Praséncia nu es ahena al fenómenu la enmigración, inque cumu aconteci con otras partis d'Estremaura, la cifra e nacius en otru pais i resientis en España entovia esté largu e las alcançás pol otras zonas de la península.

La puebración foriata nel añu 2007 suma en Praséncia 1.527 presonas, representandu pol tantu el 3,64% de la puebración de la ciá, de los que 328 son marroquís; 182, bolivianus; 153, rumanus; 114, colombianus; 99, chinus; 87 ecuatorianus i 61 purtuguesis. Ai pol tantu una gran diversiá en cuantu a la proceéncia los foriatus que vivin en la Ciá el Herti i es una las localiais con mayol cantiá e foriatus d'Estremaura, inque sin alcançal las cifras de otrus puntus de la rehión talis cumu Talayuela, Almendralehu u Baajós. Nu ostanti, la cifra e foriatus nel padrón monicipal se ve encrementá anualmenti entri 100 i 300 nuevus resientis de nacionaliá nu española. Tamién ai que tenel en cuenta que los datus barahaus son los de los resientis censaus, siendu mu probabli que la cantiá rial de foriatus seya superiol a las cifras almientás.^[8]

Ondi está assitiá la ciá, s'án alcuentrau restus dun castru celta. Hue duranti el Empériu Romanu campamentu melital de las lehionis romanas, i alcaçal árabi hata que hue reconquistá pol Alfonso VIII i rehundá cumu Ciá Libri en 1186. Nesi mesmu añu s'enceto la costrución de la su muralla defensiva.

Nel añu 1196, ebiu a la Batalla d'Alarcus, hue conquistá polos almohadis, al mandu d'Abén Jucef, inque aluspués dun añu, gorveria e nuevu a manus del rei castillanu, quien ordenó acabihal el su amurallamientu (finalizau en 1201).

Dendi 1188 Praséncia es sé episcopal con hurisdición sobri Béhal, Medellín i Truhillu. Pol deseu el su obispu, Don Juan de Carvajal, huerun criaus los Estuyus d'Umaniais, siendu los primerus estuyus heneralis de rangu universitáriu que tuvu Estremaura, en 1446.

Nel Hueru e Praséncia se manifiestan de horma espresa los dos pueris qu'ebin gobelnal ena ciá i el su concehu: pol una parti el Correhiol, cumu representanti el Monarca i los rehioris; i pol otra, el Cabildu catedralíciu, a la cabeça la Diócesis pracentina.

Praséncia hue ciá e rialengu hata 1442, cuandu se dió a Pedro de Zúñiga, pol concesión del rei Juan II de Castilla con el entítulu e Condau. En 1488, grácias a la presión del concehu, i de la nobleça que hormaba el gobielnu monicipal (contrárius al Duqui Álvaro de Zúñiga), la ciá pasó a manus de los Reis Católicus.

Entri 1529 i 1531 residió en Praséncia el compositol Cristóbal de Morales, que hue allí maestru e capilla.

La ciá á participau en angunus hechus emportantis ena estoria d'España a lo largu los sigrus, cumu la Batalla de las Navas de Tolosa, la rebelión de los "Comunerus de Castilla" i las campañas de Flandis i Itália.

La Ciá de Prasencia tuvu votu en Cortis i, cumu preba d'ellu, costa qu'envió dos precuraoris a las Cortis celebrás en Mairil en 1391, peru en 1442 el rei Juan II dió la ciá a don Pedro de Zúñiga, con el entítulu e Condau.^[9] Esa decisión hue pocu aluspués revocá pol consideral-si escesiva i contrária a la voluntá el rei. Peru el revocaeru nu se llevó a cabu, i acontinarun goçandu el señoriu e la ciá el Duqui Don Álvaro, ihu el Condi Don Pedro, i el Duqui Don Álvaro, el su ñetu.

En 1488, enhormá Isabel la Católica e la enconveniéncia d'esi condau i el revocaeru ordenau, acordó restituil la ciá al señoriu rial, peru al bel siu desprendia Praséncia e la corona, perdió el su votu en Cortis, ya qu'era el condi quien alministraba hustícia, los oficialis de la ciá i el arcaidi la su fortaleça; i nu biendu concehu libri, nu se puia nombral precuraoris palas Cortis. Praséncia recobró la su libertá, peru nu el votu, i acontinó palrandu pol ella en Cortis la ciá e Salamanca.^[10]

En 1502 surgin las primeras 18 províncias de Castilla, en hunción de las ciais que tinian votu en Cortis, no abiendu ninguna eno que ogañu es la Comundiá, que pretenecía ena su mayol parti a la província de Salamanca. Nel añu 1653 Prasencia decidi mercal por 80.000 ducaus el votu en Cortis que anteriolmenti abia tiniu, i preponi una aliança alas ciais de Baajós, Méria i Trugillu i las villas de Caçris i Alcántara pa mercal coletivamenti essi votu i conhormal d'esti mó la província d'Estremaúra. Nesta província s'entegran los partius de Trugillu, la província de Lión de la Ordin de Santiagu, assín cumu Cória i Granailla colas sus tierras.^[10]

Se puei izil pol tantu qu'es en Prasencia ondi naci la Estremaúra atual.^[10]

Al sel Praséncia la capital de fatu el norti la rehión, la economia la ciá se basa prencipalmenti nel comérciu i nel setol servícius, prehentandu éstus un 63% l'ativiá económica. Tamién es mestel destacal el setol la costrución, i la endústria, contandu la ciá con tres polígonus endustrialis i unu mas en proyeutu.

Praséncia es amás una las dos sés que tiini Caja de Extremadura, al bel siu la Caja de Ahorros de Plasencia una e las dos entiais bancárias hormaoras de la ogañu Caja de Extremadura.

Está previstu que nesta localiá s'asiahi la sé el Centru Nacional d'Agricurtura Ecolóhica]],^[11] ependienti el Estitutu Nacional d'Envestigación i Tenulohia Agrária el Ministériu d'Eucáncia (INIA), cuyas obras encetarán duranti el añu 2007.

Praséncia es ciá e servícius de la comarca el Valli el Herti, La Vera, Valli el Ambrós, Las Hurdis i parti las Vegas del Alagón, es izil, las Sierras del Norti d'Estremaura, atuandu cumu prencipal centru sociueconómicu e las mesmas i basandu gran parti la su economia nel prestaeru e servícius a tol norti estremeñu. Es, de fatu, la capital del norti la rehión.

Comprendi un ária comercial que supera en mas de tres vezis la puebración de la ciá,^[12] estu es, unas 130.000 presonas de horma direta i mas de 200.000 de horma endireta, contandu cola parti mas ociental de la província cacriña i el sul de Salamanca, pa quien Praséncia resurta tamién un lugal atrativu pal comércio. Iziu comérciu s'esarrolla e horma predominanti, inque no esclusiva, enas callis intramurus que llevan a la Praça Mayol, prencipalmenti enas de El Rey, Talavera, Trujillo, Rúa Zapatería, Los Quesos, Pedro Isidro, Vidrieras i Calle del Sol, siendu ésta úrtima huntu cola calli Menacho en Badahó, la zona comercial d'Estremaura que tiini los précius mas artus pol metru cuairau.^[13] Otras zonas comercialis d'emportáncia son: Avenida de la Vera, Sor Valentina Mirón i Alfonso VIII.

En zonas mu prósimas, u enclusu ena su hurisdición, se proucin i/u elaboran proutus con denominación d'orihin: Ternera d'Estremaura, Carni d'Ávila (proucieru i elaboraeru), Pimentón de la Vera, Hamón Hesa d'Estremaura (proucieru), Hamón de Güerva (proucieru) i la denominación d'orihin "Zerezas del Herti". Angunus d'estus proutus se trashorman pal su embalahi i consumu enas zonas endustrialis pracentinas.

Al estal assitiá nuna helmosa zona natural i con un enteresanti patrimoñu estóricu-artísticu, de hechu es la ciá estremeña con mas patrimoñu, Praséncia enceta a destacal cumu destinu turísticu. Entovia quea largu e las cifras de vesitas que tiinin otras ciais estremeñas cumu Méria, Truhillu u Caçris, peru nu ostanti, pocu a pocu la ciá va creciendu nel númiru e turistas que s'ospedan ena ciá. Las vesitas turísticas se centran enos mesis primaveralis i otoñalis, i son especialmenti entensas duranti la Semana Santa, puestu que nella sueli coincidil el güen tiempu cola festiviá el Zerezu en frol, declará Fiesta d'Enterés Turísticu, i cola Semana Santa pracentina. Tamién es especialmenti entensa l'ativiá turística duranti la celebración del Martis Mayol, ena primel semana d'Agostu.

Posei una güena infraestrutura otelera, con otelis de tolas categorias, dendi alberguis huvenilis i ostalis, hata otelis de cuatru estrellas, destacandu pola su categoria i helmosura el Parador Nacional, el otel Ciudad del Jerte i el otel Alfonso VIII, tós ellus assitiaus nel centru la ciá.

A pocus quilómetrus de Praséncia s'alcuentran várius enclavis termalis i balneárius, cumu son los balneárius del Valli el Herti, los Bañus de Montimayol i las Termas de Monfortinho.

Uguañoti, l'arcaldesa e Praséncia es Elia María Blanco. El Ayuntamientu e Praséncia está hormau pol 21 concehalis. La corporación monicipal resurtanti tras las elecionis monicipalis de 2007 es la siguienti:

• Partido Socialista Obrero Español (PSOE) : 10 concehalis
• Partido Popular (PP): 10 concehalis
• Unión del Pueblo Extremeño (UPEX): 1 concehal

Praséncia es unu los sieti miembrus que horman el Consehu las Grandis Ciais d'Estremaura, cuyu fin es el de mehoral i ahilizal las relacionis entri los grandis monicípius de la rehión i el gobielnu e la mesma.

Dau el asiahamientu heugráficu la ciá, a meyu caminu entri las dos capitalis ibéricas, Madril i Lisboa, i práticamenti ena metá la mas emportanti via e comunicación que vertebra el oesti español cumu es la Via la Prata, Praséncia s'á convertiu nun emportanti ñú e comunicacionis i várias son las autuvias i carreteras qu'uñin Praséncia con el restu d'España i Uropa, teniendu angunas el su orihin ena ciá i siendu tamién angunas de las que mas tráficu soportan de la Comuniá, cumu son l'Autuvia A-66 al su pasu pol Praséncia, la Ex-A1 i la carretera entri Praséncia i Malpartia e Praséncia.^[14]

CLAVI	DENOMINACIÓN	CATEGORIA
Norti
A-66	Autuvia la Prata	AUTUVIA NACIONAL
N-630	Ruta la Prata	CARRETERA NACIONAL
N-110	De Praséncia a Sória	CARRETERA NACIONAL
Esti
EX-203	de Praséncia al arrayu la província d'Ávila, pol Haraís de la Vera	CARRETERA LA HUNTA D'ESTREMAURA
CC-36	de Praséncia a Malpartia e Praséncia	CARRETERA LA DIPUTACIÓN PROVINCIAL DE CAÇRIS
EX-208	de Praséncia a Çorita	CARRETERA LA HUNTA D'ESTREMAURA
EX-A1	Autuvia e Navalmoral de la Mata a Purtugal	AUTUVIA AUTUNÓMICA
Sul
A-66	Autuvia la Prata	AUTUVIA NACIONAL
N-630	Ruta la Prata	CARRETERA NACIONAL
EX-304	Cercunvalación Sul de Praséncia	CARRETERA LA HUNTA D'ESTREMAURA
Oesti
EX-A1	Autuvia e Navalmoral de la Mata a Purtugal	AUTUVIA AUTUNÓMICA
EX-108	de Navalmoral de la Mata a Monfortinho (Purtugal), pol Cória	CARRETERA LA HUNTA D'ESTREMAURA
EX-370	de Praséncia a Poçuelu e Çarçón	CARRETERA LA HUNTA D'ESTREMAURA
N-630	Ruta la Prata	CARRETERA NACIONAL

Pa bandeal el cauci e riu Herti nel su pasu pol Praséncia, la ciá cuenta colas siguientis puentis:

• Puenti e Truhillu: es el mas antigu i tamién el que bandea una mayol artura endi la su pratahorma hata el cauci el riu. Á tiniu emportantis rehormas a lo largu la su via útil.
• Puenti Nueva: es una puenti típicamenti meyeval, con una holnaha la Vilhin de la Guia nel su puntu mas artu i era la entrá prencipal a Praséncia endi las comarcas de La Vera i el Valli el Herti.
• Puenti e San Láçaru: unta la ermita el mesmu nombri i nel antigu caminu a la ciá e Cória. Es tamién una típica puenti meyeval, de singulal helmosura.
• Puenti d'Adolfo Suárez: de recienti criación, es el de mayol longol i unu los que mas tráficu soporta, especialmenti enas oras punta.
• Puenti e San Miguel u el Heneral Gutiérrez Mellado: el mas nuevu e tós i uñi el centru la ciá con el bárriu e San Miguel.
• Puenti e Hierru: ena via e ferrucarril entri Praséncia i Astorga.

El servíciu e trasporti púbricu que presta el Ayuntamientu e Praséncia encetó a furrulal enos añus 70 el sigru pasau. Uguañoti (2007) Praséncia cuenta con tres línias d'autobús urbanu y una frota compretamenti renová d'autubusis ecolóhicus, con comodiais pal trasporti e viaherus cumu son las ramblas d'acesu pa minusválius.

Línia	Recorriu	Parás
L1	Polígonu endustrial – Grabiel i Galán	19
L2	Ospital Vilhin del Puertu – Colónia Guadalupi	21
L3	Cerculal	22

Las tres línias tiinin puntus en común:

• L1 i L2 tiinin 9 parás comunis.
• L1 i L3 tiinin 5 parás comunis.
• L2 i L3 tiinin 5 parás comunis.

La estación d'autubusis s'alcuentra assitiá ena calli Tornavacas, uñiendu regulalmenti Praséncia con otras ciais d'España, asín cumu con localiais cercanas.

Praséncia cuenta con una estación de trenis endrentu el su cascu urbanu i otra mu cercana, assitiá a unus 10 qm: la estación de Monfragüi, enantis conocia cumu estación de Palaçuelu-Empalmi, endrentu el términu monicipal de Malpartia e Praséncia.

Las vias férreas la uñin con Madril pasandu pol Talavera de la Reina i con Sevilla pasandu pol Méria. Hata meyaus los añus 80 estuvu en servíciu la línia que la uñia con Salamanca, qu'ogañu está en desusu, inque s'está pranteandu la su reapertura, pol sel el tramu Praséncia-Salamanca el únicu que remaneci afechau endi Hihón hata Sevilla.

Está en procesu el proyeutu la línia d'arta velociá qu'uñirá Madril con Lisboa i que, contará con una estación ena ciá, probabrienti nel parahi conociu cumu Huentidueñas.^[15]

Praséncia es la sé d'una las 8 Árias de Salús enas qu'el Servíciu Estremeñu e Salús devii Estremaura, i comprendi a l mesmu tiempu 14 Zonas de Salús, prestandu atención sanitária a una puebración de 115.000 abitantis. El ospital de referéncia d'esta Ária e Salús es el Ospital Vilhin del Puertu, el cual encetó a furrulal nel añu 1978 i que tamién es el centru e referéncia palos ospitalis de Cória, Navalmoral de la Mata i las sus respetivas Árias de Salús.^[16] Endrentu la ciá ai tres Centrus de Salús i está en proyeutu un cuartu assitiau ena zona norti la ciá.

En Praséncia hunciona tamién otru ospital: el Ospital Psiquiátricu, unu e los dos únicus centrus d'ésti tipu que desistin en Estremaura. Amás ai cuatru ambulatórius del Servíciu Estremeñu e Salús, un ospital privau i angunas clínicas tamién privás.

Pa dal cobertura a las neseziais especialis d'angunus grupus la puebración, tantu pracentina cumu el norti la rehión estremeña, la ciá cuenta con:

• Resiéncia i centru e dia pa maletus d'Alzheimer, con una capaciá e 90 camas i centru e terápia ocupacional. Es el centru e referéncia provincial pa esta malotia.^[17]
• Hogal de Nazaret, ena Sierra e Santa Bárbara i unta la carretera e cercunvalación sul de la ciá. Es un hogal de mayoris que cuenta con 90 praças, asín cumu un centru d'acohia e transeúntis i albondus servícius asistencialis.^[18]
• Asilu las Helmanitas de los Probis, con 80 praças.
• Resiéncia mesturá San Franciscu, pretenecienti a la Hunta d'Estremaura i que disponi e 110 praças.
• Centru d'Emudiálisis.

La euducacion en Praséncia dependi a la su vezi e la Conseheria d'Educacion la Hunta d'Estremaura, que asumi las competéncias d'eucáncia a nivel regional. Praséncia contaba en 2007 con:

• 18 Centrus d'Eucáncia Infantil i Primária.
• 5 Estitutus d'Ensiñança Secundária.
• Un Semináriu Menol i otru Mayol.
• Un Centru d'Educacion Especial.
• Escuela Hogal.
• Conservatóriu.
• Escuela Monicipal de Música.
• Univelsiá Populal.
• Escuela Oficial d'Idiomas, ondi se dan crasis de: Ingrés, Francés, Alemán, Purtugués, Italiana i ingrés a distáncia.
• Centru e Profesoris i recursus.

• Escuela Superiol de Cozina Ciá e Praséncia, siendu una e las de mas prestihiosas d'España i a la que van estuyantis de diversas nacionaliais.

• La Universiá d'Estremaura tien aquí unu los sus campus, nel que se dan 4 entitulacionis: Enfermeria, Impresarialis, Enhenieria Ténica Forestal i Podulohia.

• Tamién la UNED mantieni unu los sus centrus, nel que se impartin 29 carreras.

• Amás nel Semináriu Mayol se dan crasis de Teulohia huntu con el Estitutu e Céncias Religiosas Santa Maria de Guadalupi, ascritu a la Univelsiá Pontifícia de Salamanca.

Praséncia es la sé el partiu hudicial del mesmu nombri, siendu el partiu hudicial d'Estremaura con una mayol cantiá e monicípius al su cargu, concretamenti 59. Es tamién el segunderu partiu judicial mas puebrau la província e Caçris i el que mayol densiá d'abitantis pol quilómetru cuairau tiini. La puebración de la ciá e Praséncia arrepresenta el 35,5% de la puebración total del partiu hudicial.^[19]

Disponi dun jusgau e lo penal, cuatru jusgaus de primel estáncia i un jusgau e lo social.

El cascu antigu e Praséncia correspondi a una estrutura radial, alreol la Praça Mayol i al Paláciu Monicipal, eificau nel sigru XVI con estilu e transición del góticu a la Renacéncia, con una dobri arcá renacentista ena su fachá i nel su costau un escú de Carlos V. Nunu los lateralis del Ayuntamientu s'asiaha la Carci Antigua, que hue costruia nel sigru XVII i presenta una fachá e silleria ondi fegura un escú del rei Felipe IV.

Las callis llevan el nombri las puertas prencipalis de la ciá a la que llevan, siendu frecuenti al mesmu tiempu qu'estas tomin el nombri de la ciá a la que se orientan: calli i puerta e Truhillu, de Cória, de Talavera. Algotras vezis, el nombri está relacionau con ahentes físicus: calli i Puerta el Sol, calli Las Peñas, calli Arenillas. Angunas s'asócian a ativiais gremialis: calle Çapateria, de las Lecheras, Caldererus, de los Quesus, de Podaoris. Tamién quean espresaus los antigus bárrius de las minorias relihiosas, cumu es el chascu de l'alhama hudia: calli de Xelitón (ogañu de Vidrieras) u de la moreria i calli las Morenas.

Praséncia preteneci i colabuta colas siguientis redis de ciais:

• Ciais ena Ruta la Prata, asociación de ciais españolas assitiás ena Ruta la Prata i nel su ária d'enfruéncia, que pretendi defendel i promocional conhuntamenti los sus recursus, tantu turísticus cumu estóricus, curturalis i tamién económicus. L'asociación nació nel añu 1997 i Praséncia esminció a holmal parti d'ella a partil del añu siguienti, 1998.^[20]
• Ciais Catedralícias, la cual posei una sé ena ciá. Es una asociación cuyu fin es promovel i conserval el legau curtural, estóricu, arquitetónicu i ambiental de las ciais que la holman, especialmenti nel su patrimoñu catedralíciu, i a entrichambal esperiéncias nel desarrollu i hestión d'esas ativiais.^[21]
• Ciais Amurallás, asociación que tamién tiini la su sé ena ciá e Praséncia.
• El Foru Ibéricu de Ciais Amurallás, holmau pol 43 localiais españolas i 73 purtuguesas, tiini cumu ohetivus desarrollal ativiais i acionis en pro l'arrecuperación, conservación i sensibilización ciaana al tentu el patrimoñu amurallau que mos á chegau hata anguañu. Tamién pretendi crial redis de proutus turísticus enos que a los ciaanus se les enviti a vesital las ciais amurallás de la península, asín cumu la promoción de los sus bienis patrimoñales i d'esi mó, conseguil la reabilitación del patrimoñu estóricu meyanti hondus i proyeutus europeus.^[22]
• Redi de Huderias d'España, ena que Praséncia participa cumu miembru de plenu derechu dendi Hebreru de 2008.^[23] Esta asociación tiini cumu ohetivus prencipalis la defensa del patrimoñu urbanísticu, arquitectónicu, estóricu, artísticu i curtural del legau sefardí en España, así cumu la promoción de las ciais que integran l'asociación i la muestra d'esposicionis itinerantis al tentu el legau hudiu en España.^[24]
• Triurbir, huntu con Castelo Branco, Portalegre i Caçris.
• Redi Española de Ciais pol Climi, cuya ativiá está encauçá al impulsu i hestión de pulíticas derihias en pro del desarrollu sostenibri i a la promoción de pulíticas de runcha contra el cámbeu climáticu que possibilitin la redución d'emisionis de gasis d'efetu envelnaeru i el cumprimentu del protocolu de Kyoto.^[25]

La ciá e Praséncia participa ena iniciativa e helmanamientu de ciais promovia, entri algotras estitucionis, pola Uñón Uropea.

	Pais		Rehión / Estau		Ciá
	Itália		Emilia-Romagna		Plasencia
	España		Castilla-La Mancha		Talavera de la Reina[26]
	España		Castilla-La Mancha		Escalona
	Chili		Región Metropolitana de Santiago		Santiago de Chile[27]
	España		Canárias		San Miguel de Abona
	Fráncia		Languedoc-Rosellón		Nimes
	Purtugal		Beira Baixa		Castelo Branco
	España		Castilla-La Mancha		Cuenca[28]

• El alcuerdu de helmanamientu con Talavera de la Reina se suscribió el 27 de Noviembri de 1248.
• El alcuerdu de helmanamientu con Escalona está en vigol dendi1248 ^[29].
• El helmanamientu con Nimes estuvu vihenti hata 1978.

Compartiendu el mesmu nombri que la Ciá el Herti ai otras localiais nel mundu:

• Prantilla:Geodatos Itália Plasencia
• Placencia de las Armas
• Plasencia de Jalón
• Plasencia del Monte
• Prantilla:Geodatos Fráncia Plaisir
• Prantilla:Geodatos Purtugal Prazeres (Lisboa)
• Prantilla:Geodatos Purtugal Prazeres (Calheta)

Dos son las rutas Hacobeas que bandean la ciá e Praséncia:

• Caminu de Santiagu de la Prata, esti caminu sigui aprosimadamenti el mesmu recorriu que la lehendária Via la Prata.
• Caminu de Santiagu de Levanti: Ruta endi Alicanti, que tiini la su nacéncia ena ciá alicantina, mentris que acabiha ena ciá e Praséncia, acontinandu pol Caminu de Santiagu de la Prata.

• La primel referéncia escrita que se tiini duna corria e torus s'alcuentra enas Cantigas de Santa María de Alfonso X el Sabihondu, nel llamau "Toro de Plasencia" ena que se narra lo aconteciu nuna corria celebrá ena praça mayol de la ciá i ondi grácias a la entervención milagrosa de la Vilhin un ombri sarva la su via d'espenal a manus dunu de los torus que se estaban lidiandu nesi momentu.^[30]
• Dendi la su hundación, Praséncia hue ciá e rialengu, es izil, que era propieá esclusiva de la corona. Se le otolgaba el su domiñu a las réinas de Castilla, cumu pol sabulugal a Violante de Aragón i Ungria, esposa de Alfonso X, Doña María de Molina u a María de Aragón.^[31]
• Una de las puertas de la ciá e Córduba se llama "Puerta de Plasencia", puestu que tras la reconquista de la ciá los primerus caballerus que entrarun pol ella procedian de la capital del Herti.^[32]
• La Réina de Castilla Juana la Beltraneja i Alfonso V de Purtugal, se casaron ena Praça Mayol de la ciá, ondi huerun procramaus reis de Castilla i Purtugal.
• El rei Enrique IV hue depuestu en Praséncia el 27 d'Abril de 1465, cumu soberanu de Castilla. Más tardi, el Condi de Praséncia tomó parti ativa ena Farsa d'Ávila arrebatandu la espada, símbolu de la hustícia, a la estatua de maera que arrepresentaba al rei castellanu i procramandu cumu tal al infanti Alfonso.^[33]
• En Praséncia se reunió pol primel vezi Bartolomé de las Casas con el rei Fernando el Católico, pa esponeli la su postura anti el estau de los endíhenas en América.^[34]
• Praséncia hue el lugal recomendau polos médicus de la corti a Fernando el Católicu cumu lugal más saludabri de tolos sus réinus i ondi ebia fihal la su resiéncia. El monarca se muó a vivil a Prasécia enos sus úrtimus dias. De hechu, espenó en Madrigalehu cuandu viahaba endi Praséncia a Guadalupi pa asistil al capítulu de las órdenis de Calatrava i Alcántara nel Rial Monastériu de Guadalupi.^[35]
• La biblioteca del paláciu rial del Monastériu del Escorial se crió colos librus pretenecientis al Paláciu Episcopal de Praséncia, que huerun trasladaus al monastériu madrileñu pol ordin del rei Felipe II. Más tardi, el obispu pracentinu Pedro Ponce de León donó al Escorial parti de la su biblioteca, entri cuyas obras s'alcuentraba entri otras el Códice Emilianense, procedenti del Monastériu de San Millán de la Cogolla, i ondi s'alcuentran las primeras parabras escritas en castellanu.^[36]
• Ena Praça Mayol se ahustició a la anombrá Serrana de la Vera.
• Nel añu 1917 el pintol valencianu Joaquín Sorolla enmortaliça la ciá nunu los sus cuairus: El Mercado, nel que pinta el Paláciu Episcopal, la Catedral i muheris hateás con el hatu de Montilmosu, i pol encargu del manati Archer Milton Huntington, pinta una seri de 14 grandis liençus, entitulá 'Visiones de España', cola entención de decoral la grandiosa sala de la Hispanic Society, de Nueva York.
• Miguel de Unamuno se refirió a ella cumu la Capital sin província.
• Es conocia populalmenti cumu La Pelra el Valli.^[37]
• En Praséncia se matriculó el primel veículu de la província e Caçris el 18 de Noviembri de 1900, siendu el segunderu veículu matriculau d'España.^[38]
• En Praséncia s'alcuentra la casa cola fachá más pequeña d'España.

1. ↑ Worldpostalcodes.org, código postal n.º 10600.
2. ↑ «"Plasencia, la perla del valle del Jerte" de Sánchez de la Calle, José. Antonio». Archivado desde el original el 30 de diciembre de 2007. Consultado el 2 de abril de 2008. 
3. ↑ ^{3,0 3,1} Instituto Nacional de Estadística de España, "Alteraciones de los municipios en los Censos de Población desde 1842"
4. ↑ «PLASENCIA - COMARCAS - Aturnex - Turismo Norte Extremadura». www.turismonorteextremadura.es. Consultado el 17 de enero de 2023. 
5. ↑ Rustrihus estóricus del oservatóriu e Praséncia (1971-2000) Datus de valoris climatulóhicus proceentis del Estitutu Nacional de Meteurolohia estratu la pubricación Guía resumida del clima en España 1971-2000.
6. ↑ Extremadura y sus topónimos
7. ↑ Google Libros: Diccionario geográfico-estadístico-histórico de España
8. ↑ Artículu del diáriu Hoy colas cifras de foriatus resientis en Praséncia
9. ↑ «Eá Meya e Praséncia.». Archivado desde el original el 15 de diciembre de 2009. Consultado el 3 de abril de 2008. 
10. ↑ ^{10,0 10,1 10,2} «Resumin d'estória e las Tierras de Granailla cumu parti entegranti d'Estremaura». Archivado desde el original el 6 de mayo de 2006. Consultado el 3 de abril de 2008. 
11. ↑ Resolución de la Direción Heneral del INIA pola que s'ahudica el contratu d'obras del Centru Nacional d'I+D d'Agricurtura Ecolóhica
12. ↑ Artículu nel diáriu Hoy al tentu la enfluéncia comercial de las ciais de la província e Caçris
13. ↑ Précius pol metru cuairau en zonas comercialis d'Estremaura
14. ↑ Cifras d'aforu enas carreteras estremeñas.
15. ↑ Aprebau el estuyu d'impatu ambiental del correol del AVE entri Caçris i Talayuela.
16. ↑ Pran de Salús d'Estremaura 2004-2008
17. ↑ Descrición la Resiéncia de maletus d'Alzeimer
18. ↑ «Inauguración del Hogal de Nazaret». Archivado desde el original el 24 de septiembre de 2015. Consultado el 9 de abril de 2008. 
19. ↑ «Númiru e puebrus que atiendin los jusgaus la província e Caçris». Archivado desde el original el 23 de julio de 2011. Consultado el 12 de abril de 2008. 
20. ↑ «Ciais miembru de la Redi de Ciais ena Ruta la Prata.». Archivado desde el original el 30 de diciembre de 2007. Consultado el 27 de junio de 2008. 
21. ↑ «Nota de prensa el Ayuntamientu de Praséncia al tentu el creaeru la Redi de Ciais Catedralícias.». Archivado desde el original el 12 de febrero de 2008. Consultado el 27 de junio de 2008. 
22. ↑ Atu de costitución del Foru Ibéricu de Ciais Amurallás, celebrau en Praséncia nel añu 2006.
23. ↑ Praséncia ingresa cumu miembru de plenu derechu ena redi e huderias
24. ↑ Relación de ciaus pretenecientis a la Redi de huderias
25. ↑ Mapa de ciais españolas ena Redi de Ciais pol Clima
26. ↑ Ratificación del helmanamientu entri Praséncia i Talavera
27. ↑ «Praséncia i Chili asientan las basis del su helmanamientu.». Archivado desde el original el 20 de diciembre de 2008. Consultado el 9 de abril de 2008. 
28. ↑ «Praséncia i Cuenca reafirman la su voluntá de helmanamientu». Archivado desde el original el 7 de septiembre de 2019. Consultado el 9 de abril de 2008. 
29. ↑ Carta e helmandá entri Praséncia i Escalona
30. ↑ «Cantigas de Santa María, Toro de Plasencia». Archivado desde el original el 6 de enero de 2008. Consultado el 24 de junio de 2008. 
31. ↑ Praséncia cumu concesión a las réinas de Castilla
32. ↑ Puerta de Praséncia en Córduba.
33. ↑ Farsa d'Ávila, tesis dotoral al tentu la mesma
34. ↑ «Esproraoris, cronistas u estoriaoris españolis u al servíciu d'España, polos territórius del Nuevu Mundu i el Pacíficu.». Archivado desde el original el 21 de octubre de 2007. Consultado el 21 de octubre de 2007. 
35. ↑ «Libru de hechus del Rei Fernando el Católicu, capítulu eicau a la su muerti.». Archivado desde el original el 21 de octubre de 2007. Consultado el 21 de octubre de 2007. 
36. ↑ Hundación de Yusti, Asociación de Bibliófilus Estremeñus.
37. ↑ «"Praséncia, la pelra el valli el Herti" de Sánchez de la Calle, José. Antonio». Archivado desde el original el 30 de diciembre de 2007. Consultado el 2 de abril de 2008. 
38. ↑ Colóquius Estóricus d'Estremaura.

• Fortaleza del Rey Morales, Miguel, Caracterización agroclimática de la provincia de Cáceres Ministériu d'Agricurtura, Pesca i Alimentación, Madril 1986 I.S.B.N. 84-7479-441-2
• Vicente Calle, Rafael. Cabezas Fernández, José. Escudero García, José Carlos. Estudio Termométrico de la Provincia de Cáceres Univelsiá d'Estremaura I.S.B.N. 84-7723-162-1
• SORIA, Enrique (2008): "Farsa de Ávila: los nobles contra el rey de Castilla", en Historia National Geographic, Nº 49. ISSN 1696-7755D, páhs. 20-23

• Web Oficial del Ayuntamientu e Praséncia
• Univelsiá Populal de Praséncia
• Centru e Profesoris i Recursus de Praséncia

v • d • e Monicipius de Caçris L'Abadía · L'Abertura · L'Аciúchi · El Adrillal · L'Agrijuela · Alagón · Albalá · Alcántara · Alcollarín · Alcuesca · Aldea el Canu · L'Aldea · Aldea-Nueva dela Vera · Aldea-Nueva del Caminu · Aldiuela · Alía · L'Alisea · Almarás · Almorín · L'Arroyu-dela-Lus · Arroyu-Molinus · Arroyumolinus de la Vera · Azetuna · El Azevu · Los Bañus · Barrau · Belvís · Benquerencia · Berçocana · El Berrocaleju · El Bonal d'Ibol · Botija · Las Broças · Cabañas del Castillu · Cabeça-Vellosa · Cabeçuela el Valli · Cabreru · Caçorrilla · Caçris · El Cahalsu · Calçaílla · Caminu-Moriscu · El Campillu de Delitosa · El Campu · Cañameru · Cañaveral · El Carcavosu · Carrascaleju · El Carvaju · Casal de Caçris · Casangomi · El Casal de Palomeru · Los Casaris · Las Casas de don Antoniu · Las Casas de Millán · Casas de Miravete · Las Casas del Castañal · Las Casas del Monti · Casa-Tejá · Casillas de Coria · El Castañal · Ceclavín · Ceillu · El Cerezu · Cillerus · El Collau · La Conquista dela Sierra · Coria · La Cumbri · La Çarça de Granaílla · La Çarça de Montanchi · Çarça la Mayol · Çorita · Delitosa · Descargamaría · Las Eljas · Ervás · El Escurial · Fresnedoso de Ibor · Galisteu · Garciás · La Garganta · Garganta-la-Olla · Gargantilla · Gargüera · Garrovillas · Garvín · Gata · El Gordu · La Granja · Guadalupi · El Guijitu · El Guiju de Coria · El Guiju de Granaílla · El Guiju de santa Bárbara · Herramperi · Herrera d'Alcántara · Herreruela · Higuera · Hoyus · La Igal · Los Inojalis · Logrossán · El Losal · Madrigal · Madrigaleju · Mairoñera · Majás · Malpartía de Caçris · Malpartía de Prasencia · Marchegás · La Mata · Membríu · Las Mesas · Miajás · Millanis · Mirabel · Monroi · Montanchi · Montermosu · Moraleja · Morcillu · Muedas · Nava'l-Conceju · Navalmoral de la Mata · Nava'l-Villal · Las Navas · Naveçuelas · Nuñu-Moral · Olguera · La Oliva de Prasencia · Palomeru · Passarón · El Pedrosu · La Pescueça · Peralea dela Mata · Peralea de san Román · Peralis · La Pesga · Piedra-Salva · El Pinu · El Piornal · Prasencia · Prasençuela · Poçuelu e Çarçón · Portagi · Porteçuelu · El Puertu · Quacus · Rebollal · Ríu-Lobus · Robleíllu de Gata · Robleíllu dela Vera · Robleíllu de Trugillu · El Robleu · Román Gordu · Rosaleju · Ruanis · Salorinu · Salva-Tierra de Santiagu · San Martín de Treveju · Santa Crus dela Sierra · Santa Crus de Paniagua · Santa Marta de Magasca · Santana · Santiagu d'Alcántara · Santiagu del Campu · Santivañi el Altu · Santivañi el Baxu · Sauceílla · Segura de Toru · La Serraílla · Serrejón · Sierra-Fuentis · Talaván · Talaveruela · Talayuela · Texea · Tieta · El Toril · Tornavacas · El Tornu · Torrecilla delos Ángelis · Torrecillas · Torrejón · La Torri de don Miguel · La Torri de santa María · Torromenga · Torromocha · Torrojoncillu · Torrorgás · Torriquemá · Trugillu · Uélaga · Val-d'Estillas · Val-de-Cañas · Val-de-Fuentis · Valdehúncar · Val-de-Moralis · Val-dela-Casa · Valli-Obispu · Valencia d'Alcántara · Val-Verdi del Fresnu · Val-Verdi dela Vera · Viandal · Villa'l-Campu · Villa'l-Rei · Villa-Mesías · Villa-Miel · Villa-Nueva dela Sierra · Villa-Nueva dela Vera · El Villal de Prasencia · El Villal del Pedrosu · Villas-Güenas · Vivarnandu · Xaraís · Xaraizeju · Xarandilla · Xarilla · Xerti