Nothing Special   »   [go: up one dir, main page]
Vai al contenuto

Judas Priest

Da Wikipedia.

C'l artìcul chè 'l è scrit in Miranduléś Emiliàn


«
There I was completely wasting, out of work and down, all inside it's so frustrating as I drift from town to town, feel as though nobody cares if I live or die so I might as well begin to put some action in my life, breaking the law, breaking the law.»
(EN)(Breaking the law, 1980)
«
A séra lè, stlâ dal tut, sénsa lavōr e a tèra, un quèl da vilìr-as dabòṅ, mènt'r a guìd da na sità a cl'atra a m sènt cuma se a ninsòṅ a gh'impurtìs gnint s'a sòṅ viṿ o mòrt alóra a gh'arév da cumpurtàr-um acsè in dla vita, dar còntra a 'l règhli, dar còntra a 'l règhli.»
(MUD)


I Judas Priest (Prevòstar ad Giùda) i èṅ un grup heavy metal britànic mis sù in dal 1969 in dla sità ad Birmingham. I èṅ cunsiderâ di espunènt dimóndi impurtànt dal gènar e un muć ad grup i aṅ ciapâ sù da chi lōr. In dal sò caréra i aṅ vindû da piò ad 45 migliòṅ ad còpi in tut al móndi, meritànd-as al scutmàj ad „Metal Gods“ (Dio dal Metàl).

I Judas Priest da 'l viṿ a San Paulo in dal Nuvémbar dal 2008

Biugrafìa

Gl'inìsi (1969-1975)

Al palc finlandéś di Judas Priest dal 2011

La banda la nas in dal 1969 par mèrit dal chitarìsta K. K. Downing e dal basìsta Ian Hill. In séguit chi lōr i tōśan sèg al baterìsta John Ellis e al cantànt Al Atkins.

'L è stâ pròpria chi lò a sarnìr al nóm ad Judas Priest da 'l tìtul dna canta ad Bob Dylan ciamàda "The Ballad of Frankie Lee and Judas Priest".

Al grup al taca a sunàr in soquànt lucài ingléś, cambiànd da spés al baterìsta. In dal 1973 a s śònta a 'l grup Rob Halford, cantànt di "Hiroshima" e fadèl ad Susan Halford, murōśa 'd Ian Hill (in séguit la dvintarà pò sò mujér par pò divursiàr-as in dal 1984).

Cun John Hinch stabilmènt da drē da la baterìa, i Judas Priest i s faṅ i òs faghénd da spala a di grup Hard rock famóś in alóra cuma UFO e Thin Lizzy.

Par via dal bèli eśibisiòṅ dal viṿ, i quàtar i gh la càvan a firmàr in dal 1974 un cuntràt cun la Gull Records e pò, cun Glenn Tipton ch'a s śònta in séguit dand inìsi a la mòda di grup metal ad druàr dū chitarìsta, i daṅ vita a 'l prim disc, Rocka Rolla. 'L àlbum, che in cupertìna al gh'à un tap cun scrit in sima al tìtul a la manéra dla Coca-Cola, al vèṅ pôc cunsiderâ dal pùblic e anc da i crìtic, e 'l è ligâ a 'l hard rock cun di riferimènt a 'l rock prugrèsiv, un misćiùs minga purtâ avànti in séguit in chi àtar lavōr.

I Judas Priest però i n ś bùtan minga śò e i tàcan incóra a sunàr dal viṿ, insém a 'n nóṿ baterìsta, Alan Moore. I próan anc di pès nóṿ e in dal 1975 i s śibìsan a 'l festival ad Reading faghénd na bèla impresiòṅ.

Sad Wings of Destiny

Halford dal viṿ in di paéś Basc in dal 1984

In chi an lè i muśicìsta dla prima generasiòṅ dl'heavy metal i éran custrét a vìvar insém a l'undàda punk rock ch'l'éra drē a rivàr e ch'la muciàva sù dal cunsèns sèmpar da piò. 'L è par quàl lè ch'i Judas Priest i èṅ stâ custrét a cambiàr in méj al sò stîl muśicàl e a pascàr sèmpar di idéi nóvi.

Al 23 ad Mars dal 1976 a véd la luś Sad Wings of Destiny (Gl'ali tristi dal destîṅ), difarènt dal precedènt e più davśèṅ a l'heavy metal, cun dèntar di braṅ clàsic dal grup cuma Victim of Changes, The Ripper (ch'al dascór ad Jack Al Tajagóli) , Tyrant, Genocide e Dreamer Deceiver (un lènt in stîl prugrèsiv). 'Sta vòlta, al disc al fà sèntar e al dvènta in présia un lavōr cunsiderâ dimóndi, tant ch'al dà inìsi a 'l muvimènt ciamâ New Wave Of British Heavy Metal (Nóva undàda d'l Heavy Metal britànic).

«
You'll soon shake with fear, never knowing if I'm near, I'm sly and I'm shameless, nocturnal and nameless except for "The Ripper" or if you like "Jack The Knife". Any back alley street is where we'll probably meet, underneath a gas lamp where the air's cold and damp, I'm a nasty surprise, I'm a devil in disguise, I'm a footstep at night, I'm a scream of the fright, all hear my warning, never turn your back on the ripper.»
(EN)(The ripper, 1976)
«
Prèst at tarmarà ad scarésa, ta n savrà mai s'a t sòṅ davśèṅ, a sòṅ fùrub e sénsa vargóggna, a viṿ ad nòt e a n gh'ò briśa un nóm ma i m ciàman "Al tajagóli" o, s'at piàś da piò, "Jack al curtèl". In un vìcul basta ch'a sia a s pōl dar ch'a s catarém, sóta a 'n lampiòṅ a gas in dua l'ària l'è fréda e umda, a sòṅ na bruta surpréśa, a sòṅ un diàvul mascrâ, a sòṅ un pas furtìṿ in dla nòt, a sòṅ un sig ad terōr, scultâ tut quél ch'a v dig, minga dar al spali a 'l tajagóli.»
(MUD)

Al diségn ch'al cumpàr in dla cupertìna d'l àlbum, intitulâ Fallen Angels (Àngil cascâ śò), 'l è òpra ad Patrick Woodroffe e 'l è dvintâ famóś parchè a ś véd par la prima vòlta al sìmbul dal grup, un furcàr ciamâ "Judas Priest Cross" purtâ adòs cuma na cadnìna da 'n àngil.

Glenn Tipton al sòna chè anc al piàṅ, cuma in dal braṅ Epitaph in dua a n s sènt minga la chitàra.

Par dar 'n apòǵ a 'l disc, i sinc i tàcan un tour europeo, vèrt e sarâ da dū cuncèrt in cà sua. Dit quést, Halford e chi àtar i s càtan incóra in buléta par via ad cundisiòṅ ecunòmichi minga stabìi anc parchè la Gull Records la gh dava sōl di bòṅ p'r i past in ménsa. In sò ajùt la riva la CBS/Columbia ch'la gh fà firmàr un cuntràt lung ma faghénd acsè al grup al pèrd i dirìt dal canti di prim dū disc e al registrasiòṅ di démo ch'i rèstan in maṅ a la vècia cà discugràfica.

Sin After Sin

Tipton tòlt śò in dal 1984

Al 23 'd Avrìl dal 1977 'l è al tùran ad Sin After Sin (Un pcâ a drē a c'l àtar), al prim disc dal grup registrâ par la major CBS e un lavōr ad pasàǵ fra 'l hard rock e 'l heavy metal ad quéi sucesìṿ. Al registrasiòṅ i védan la partecipasiòṅ dal baterìsta Simon Phillips, in alóra dimóndi śóvan e dascgnusû, che però cun al pasàr di an al s farà spasi in dal mónd dla mùśica sunànd cun di pès da nuànta cuma Mike Oldfield, Joe Satriani, Toto e àtar. In cal disc chè al dróa la casa dópia.

Al sìngul tirâ fóra dal disc 'l è na cover ad Joan Baez, Diamonds & Rust, e 'l è stâ sarnî parchè al s spuśàva méj cun al rèst di pès diretamènt p'r al prudutōr Roger Glover (famóś p'r i sò lavōr cun i Deep Purple, cuma a s pōl sintìr scultànd al braṅ ch'al vèra al disc, Sinner). La cansòṅ la gh'à un sèrt sucès in dal Régn Unî. Al gh fà pòst al braṅ Race With The Devil, cover di The Gun, ch'al n figùra briśa in dla versiòṅ uriginària dal disc ma sōl in quéla rimasteriśàda dal 2001 cun dèntar anc la canta sunàda dal viṿ Jawbraker.

In dal disc i gh'èṅ di pès sunâ a sò vòlta da di àtar grup in sèguit, cuma Dissident Aggressor cantàda p'r i Slayer o Starbreaker registràda p'r i Arch Enemy.

«
All alone, no one cares, so much to give to you all out there, take me now, in your arms, let me rest, safe from harm, ohhh... I want to be loved, I need to be loved, won't somebody love me, here they come, here come the tears.»
(EN)(Here come the tears, 1977)
«
A sòṅ da par mè, a n interésa gnint a ninsòṅ, a gh'ò ascè tant da dar a tut vuàtar là fóra, tó-'m adès, in di tò bras, lasa ch'a pònsa, a 'l sicûr da 'l mâl, ohhh... a vój ès'r amâ, a gh'ò biśógn 'd ès'r amâ, gh sarà mai qualchidòṅ ch'a m vurà bèṅ? Ca-li chè ch'i rìvan, ca-li chè al làgarmi.»
(MUD)

Cal disc chè, cun un tìtul tirâ fóra diretamènt da na canta dal disc precedènt, Genocide, al dróa par l'ultma vòlta al lógo di Judas Priest scrit cun di caràtar gòtic.

Subìt dòp la surtìda dal disc, al grup al partìs p'r un tour péś ch'al fà tapa anc in di Stat Unî par la prima vòlta par na vintìna ad cuncèrt.

Stained Class

Al mémbar fundadōr K.K.Downing

Cun al nóṿ baterìsta Les Binks in di rang (ma 'l iva bèla sunâ sèg durànt al tour ad Sin After Sin) i Judas Priest i pùblican in dal Favràr dal 1978 al lōr quàrt disc in studi, prudót insém a James Guthrie, Stained Class (Clas Śvargugnàda, registrâ in d'l Aṿtòṅ d'l an prima), un lavōr gnû sù cun al cuntribùt ad tut i mémbar a livèl ad scritùra di pès. In dla cupertìna ad Roslav Szaybo (na fàcia ad metàl insfilsàda p'r un quèl da 'l òć sinìstar a 'l póls dla tèsta da in du al vèṅ fóra, a pâr na sćiuptàda [1]) a s véd par la prima vòlta al lógo nóṿ dal grup.

Stained Class al mùcia sù dimóndi sucès fiṅ da subìt, purtànd in élt al grup in dal panuràma d'l heavy metal mundiàl (in dal 2004 la rivìsta ingléśa Metal Hammer al al badśrà cuma 'l disc metal più péś ad tut i tèmp). In dal gir ad pôc méś al vénd duśèntsinquantamìla còpi in dl'Amerìca dal Nord. Al disc al gh'à na màrcia in piò in fat ad puténsa, cun al sò druàr da spés la casa dópia cuma in dal pès Exciter, òṅ di prim braṅ in stîl speed metal.

I sìngui i èṅ dū: Better by You, Better Than Me (cover di Spooky Tooth) e Evening Star. Àtar braṅ clàsic dal grup ch'i s càtan chè i èṅ Beyond the Realms of Death (un lènt cun dal śgranfgnàdi metal, sunâ da spés dal viṿ), Saints in Hell (dimóndi dura) e Heroes End (pîna ad riff dal duo Tipton/Downing).

«
Stare blank into space, no sign of life would flicker on his face until one day he smiled, it seemed as though with pride, the wind kissed him, goodbye... and then he died. Yeah! I’ve left the world behind, I’m safe here in my mind, free to speak with my own kind, this is my life, this is my life, I’ll decide not you, keep the world with all its sin, it’s not fit for livin’ in, yeah! I will start again, it can take forever, and ever and ever and ever, but I’ll still win.»
(EN)(Beyond the realms of death, 1978)
«
Śguàrd fis in dal spasi vōd, gnanc un ségn ad vita al ś móṿ in dal sò grugn in fiṅ tant che un dè 'l iva ridû, al parìva dagnóra urgujōś, al vènt 'l al baśò, a sa vdém... e pò al murì. Sè! A m sòṅ lasâ al mónd da drē da mè, a sòṅ a 'l sicûr chè in dla mè mènt, lìbar ad dascórar cum a m pâr, quésta chè l'è la mè vita, la mè vita, a decidarò mè minga tè, tgnir da cat al mónd cun tut i sò pcâ, al n è briśa bòṅ par viv'r-ag, sè! A vrév tacàr incóra, psér-al tōr par sèmpar, par sèmpar, ma a vinsarò incóra.»
(MUD)

La tournée di Judas Priest cla vòlta chè la riva in Agóst infìṅ in Giapòṅ ma 'l è in dal tour americàṅ che Rob Halford e K. K. Downing i tàcan a cumparìr in sal palc in na manéra più uriginàla, miténd-as adòs di giachét ad pèla négra e dal bòrchi, dand inìsi a na mòda ad vistìr-'s acsè, ch'la sarà pò druàda in di an Utànta da dimóndi muśicìsta heavy metal sò para.

Killing Machine

Hill durànt un cuncèrt dal 2009

In dal Nuvémbar dal 1978 a véd la luś Killing Machine, ch'a vōl dir Màchina dla mòrt (ma in di Stat Unî i al cgnósan cuma Hell Bent For Leather parchè a la Columbia la n gh piaśìva briśa al tìtul uriginàri), un disc ch'al gh'à dèntar dimóndi di pès più bèi di Judas Priest cuma Delivering The Goods (cantàda da Halford anc insém a Sebastian Bach soquànt an dòp in d'l EP B-Side Ourselves di Skid Row dal 1992, e l'è na gara a chi siga da piò), Hell Bent For Leather, Running Wild e la ballad Before The Dawn. Da arcurdàr anc la cover di Fleetwood Mac The Green Manalishi (With the Two-Pronged Crown) sunàda da spés dal viṿ, a 'l inìsi misa dèntar sōl p'r al marcâ americàṅ. Al disc 'l è un cicinèṅ più cumerciàl di precedènt ma al gh'à anc di tèst più scûr e sintî. La cupertìna l'è sèmpar ad Rozslav Szyabo.

Glenn Tipton al taca chè a druàr un stîl ad sunàr la chitàra un tuchèṅ difarènt, quél ad tgnir strichi al còrdi cun òt dida durànt i sò asōi (al tapping). Par Binks invéci a s trata ad 'l ùltim lavōr cun i Judas Priest.

«
Black as night, faster than a shadow, crimson flare from a raging sun, an exhibition of sheer precision, yet no one knows from where he comes. Fools! Self destruct cannot take that crown. Dreams! Crash one by one to the ground. Hell bent, hell bent for leather, Hell bent, hell bent for leather. There's many who tried to prove that they're faster but they didn't last and they died as they tried.»
(EN)(Hell bent for leather, 1978)
«
Négar cum la nòt, più śvélt dl'òra, al crèmas 'd un sōl arliâ al luśa, n'eśibisiòṅ dimóndi precìśa, ninsòṅ al sà incóra 'd in du al daśvéggna. Insiminî! Quéi ch'i ś bùtan śò da par lōr i n pōlan mia purtàr cla curóna lè. Sógn! A fag crudàr par tèra incòsa. Inféran pigâ, Inféran pigâ cun al curàṁ. Quist chè i èṅ soquànt ad quéi ch'i aṅ pruâ a far védar 'd èsar più śvélt ma i n èṅ mia durâ e pruànd-ag i èṅ mòrt.»
(MUD)

I Judas i ìvan bèla tacâ a druàr na manéra ad pōr-as tuta par cònt suo: un muć ad curàṁ, bòrchi, scarpòṅ militàr e mòti. I tèst i éran impinî ad riferimènt lugâ e minga ciàr a la religiòṅ o al sès, dal vòlti spurcaciòṅ e sénsa ritégn, specialmènt p'r i bigòt ch'i tacaràṅ a dar-ag còntra a partìr da i an Utànta, cuma la Parents Music Resource Center americàna (Sèntar 'd infurmasiòṅ muśicàla p'r i genitōr), n'asuciasiòṅ ad censùra dimóndi cgnusùda in d'l àmbit d'l Heavy metal, purtàda avànti par la mujér 'd Al Gore (vèć vicepresidènt americàṅ a i tèmp ad Bill Clinton), Tipper.

Bristish Steel

Rob Halford al mònta sù in sal palc cun la sò mòta

In d'l Utóbar dal 1979 a vèṅ fóra al prim disc dal viṿ dal grup, registrâ in Giapòṅ, Unleashed in the East (In d'l Est cun al diav'l adòs), e al dvénta al lavōr dal grup più vindû ad tut fiṅ a cal mumènt lè e anc al prim live heavy metal ad sèmpar. In séguit Halford al dirà pò che la sò vóś in dal disc l'è stada registràda ad nóṿ (a ś diś ch'al gh'is al fardōr).

Subìt dòp la fiṅ dal tour mundiàl, i Judas Priest i tōśan 'n àtar baterìsta, al Dave Holland di Trapeze. Cun chi lò in di rang, al grup al pùblica al 14 'd Avrìl dal 1980 òṅ di sò disc più famóś, British Steel (Aśàr britànic), un lavōr impinî ad braṅ sìmbul cuma Breaking the Law, United, Living After Midnight (tri sìngui), Rapid Fire e Metal Gods. Quést chè al sarà anc 'l ùltim di sò lavōr prudót par Tom Allom.

'L àlbum 'l è stâ incìś a 'l Tittenhurst Park, al pòst in du al stava Ringo Starr di Beatles.

P'r al fat ch'al n eśistìs briśa al campinamènt in alóra, al grup al regitrò al sòṅ fat śbragànd dal butìgli ad lat par pò mét'r-al dèntar a la canta Breaking the Law. Stésa ròba anc par Metal Gods ma, in cal caś chè, i ìvan druâ dal stéchi ad bijàrd e un cabarè ad furchéti e cuciàr.

Par la prumusiòṅ dal disc (che in cupertìna al gh'à na maṅ ch'la ślunga na laméta par far-as la barba, o àtar?, cun scrit in sima al lògo dal grup), i Judas Priest i partìsan p'r un tour purtànd-as sèg gl'Iron Maiden, un grup ch'l éra drē a far-as i òs ma ch'al s farà cgnósar dabòṅ fiṅ da subìt dal pòpul metal.

«
My pulse is racing, I'm hot to take, this motor's revved up, fit to break. Living after midnight, rockin' to the dawn, lovin' 'til the morning, then I'm gone, I'm gone. I'm aiming for ya, I'm gonna floor ya, my body's coming all night long. The air's electric, sparkin' power, loaded, loaded, I'm getting hotter by the hour, loaded, loaded, I set my sights and then home in, the joint starts flying when I begin.»
(EN)(Living after midnight, 1980)
«
Al mè pulsasiòṅ i èṅ drē a crésar, a sòṅ bujènt da tōr, cal mutōr chè 'l à fat la reviśiòṅ, al tira drit. A viṿ dòp meśanòt, a fag al rock in fiṅ a l'alba, a fag l'amōr in fiṅ ch'a riva 'l dè e pò a vag via, a m in vag. A sòṅ drē a vgnir a catàr-at, a t butarò in sal pavimènt, al mè còrp al vgnarà tuta nòt. L'ària l'è lètrica e al sò putēr 'l imbarbàja, a sòṅ càrag, càrag, più 'l tèmp al pasa, più a dvènt dûr, a sòṅ càrag, càrag, a m mèt a pòst e pò a végn dèntar, al pòst al taca a vulàr quànd a tac.»
(MUD)

Point Of Entry

Al grup da 'l viṿ a 'l Summerfest ad Milwaukee

Al sètim lavōr in studi dal grup 'l è Point of Entry (Punt 'd ingrès), vindû in di negòsi a partìr dal 26 ad Favràr dal 1981 cun dū cupertìni difarènti, una p'r al marcâ americàṅ e giapunéś e una p'r al rèst dal mónd. A s trata 'd un prudót piutòst cumerciàl, cun tri sìngui adàt p'r èsar traśmìs a la ràddio: Heading Out to the Highway, Don't Go e Hot Rockin’. Al braṅ più heavy ad tut 'l è Solar Angels méntar Desert Plains l'è sunàda da spés dal viṿ e la véd na bòna próva 'd Holland da drē da la baterìa.

Anc s'al disc al n riva minga a i livèi dal precedènt, al vénd bèṅ listés.

«
Where is the spark that kicks the air? Where is the energy that charges everywhere? I see the crowd, I hear the roar! I feel my body to leave the ground and soar! I wanna go, I wanna go, I wanna go Hot Rockin’!»
(EN)(Hot rockin’, 1981)
«
In du è-la la silta ch'la dà 'n cals a l'ària? In du è-la l'energìa ch'la carga dapartùt? A véd la fóla, a sènt al róǵ! A sènt ch'al mè còrp 'l è drē a lasàr la tèra p'r andàr sù! A vój andàr via, a vój andàr via, a vój dvintàr bujènt ad Rock!»
(MUD)

I Judas Priest i èṅ prònt par tacàr un tour lung ciamâ World Wide Blitz Tourin: in di Stat Unî i faṅ trénta-sinc cuncèrt in sōi dū méś, Śugn e Luj, purtànd-as sèg gl'Iron Maiden. In di cuncèrt in dal nòstar cuntinènt invéci i sònan sèg prima i Saxon e pò gl'Accept.

Screaming for Vengeance

Rob Halford
I Judas Priest da 'l viṿ a Cardiff, 1981
K K Downing tòlt śò in dal 1985

'L an dòp, al 17 ad Luj dal 1982, i Judas Priest i daṅ vita a 'n disc dimóndi più rabî dal precedènt, Screaming for Vengeance (Sigànd par vendéta), sèmpar registrâ in Spaggna a Ibìśa e mixâ a i Beejay Recording Studios e a i Bayshore Recording Studios in Flòrida.

In dla cupertìna dal disc a s véd n'àquila ad metàl ch'la vèṅ śò a tut andàr cun da drē un sōl rós su sfónd śal. Invéci da cl'atra banda a s pōl lèśar ad sóta a i tìtui dal canti: «From an unknown land and through distant skies came a winged warrior. Nothing remained sacred, no one was safe from the Hellion as it uttered its battle cry... Screaming for Vengeance» (Da na tèra ch'a n s cgnós briśa e pasànd par di ciēi luntàṅ 'l è rivâ un cumbatènt alâ. Gnint 'l è armàst sàcar, ninsòṅ 'l éra al sicùr dal Leòṅ Infernàŀ mèntar 'l éra drē a dir al sò śbraj ad batàja... Sigànd par Vendéta).

Al disc (al più vindû dal grup avénd ciapâ un dòpi disc ad plàtin in dal 2001) al gh'à dèntar soquànt di braṅ stòric dal grup: i sìngui You've Got Another Thing Comin’ e Electric Eye (sunàda da spés dal viṿ), la rabìda title track (druàda anc in dal śōg vìddeo Brütal Legend in dua Rob al fà dū part, quéla dal catìṿ ma anc quéla dal bòṅ), Bloodstone e Riding On The Wind. Anc p'r al pòpul metal quést chè 'l è un lavōr sìmbul dal gènar: la IGN (Imagine Games Network) la 'l à mis a 'l 15śum pòst di disc più influént (su vint-sinc), Metal-Rules.com a 'l dècim pòst di disc metal più bèi ad sèmpar mèntar par la rivìsta Kerrang! al s mèrita al 46śum pòst.

«
In this world we're livin' in we have our share of sorrow, answer now is don't give in aim for a new tomorrow, oh so hot, no time to take a rest yeah, act tough ain't room for second best, real strong got me some security, hey I'm a big smash I'm goin' for infinity yeah. If you think I'll sit around as the world goes by, you're thinkin' like a fool cause it's a case of do or die, out there is a fortune waitin' to be had, you think I'll let it go you're mad, you've got another thing comin'.»
(EN)(You've got another thing comin’, 1982)
«
In cal mónd chè in du a vivém a gh'ém tut i nòstar dulōr, la rispòsta la n è minga dar-ag sù e purtàr-as vèrs un dè nóṿ, oh a sòṅ acsè cald, a n gh'è mia tèmp par punsàr, sè, cumpurtàr-as da dûr a vōl dir briśa lasàr spasi a quéi ch'i rìvan secónd, 'l èsar fòrt dabòṅ al m à dat sicurésa, vê, a sòṅ 'n óm ad sucès, a rivarò dimóndi in élt, sè. S'at pèns ch'a starò che sintâ a far gnint mènt'r al mónd al và avànti, at sē drē a pinsàr da stùpid parchè a m śóg incòsa, là 'd fóra a gh'è la furtùna ch'l'aspèta sōl 'd èsar ciapàda e s'at pèns ch'a m la lasarò scapàr via at sē sōl 'n insiminî, 'l è drē a sucédar-'t quèl àtar.»
(MUD)

Defenders of the Faith

In dal Setémbar dal 1983 i Judas Priest i tórnan a Ibìśa par registràr quél ch'al dvintarà al lōr nòn disc da studi, Defenders of the Faith (Difensōr dla fēd), dispunìbil in di scafài dal 4 ad Śnar dal 1984. In cupertìna (pinsàda par Doug Johnson ch'l iva anc fat al diśégn d'l Hellion ad Screaming for Vengeance) la figùra na tigra ad metàl cun i còran ciamàda Metallian, pina 'd arlìa e prònta a śgranfgnàr, insfilsàda dèntar a 'n car armâ. Da drē dal disc a gh'è un mesàǵ: «Rising from darkness where Hell hath no mercy and the screams for vengeance echo on forever. Only those who keep the faith shall escape the wrath of the Metallian... Master of all metal» (A végn sù dal scur in dua 'l Infèran al n gh'à cumpasiòṅ par gnint e i sig ad vendéta i gh rèstan par sèmpar. Sōl quéi ch'i tînan dacàt la fêd i pōlan paràr via l'arlìa dal Metallian... Al Sgnór ad tut i metài).

Tri i èṅ i sìngui tirâ fóra da cal lavōr chè: la rabìda Freewheel Burning, Some Heads Are Gonna Roll e Love Bites. Àtar clàsic dal grup 'l è anc The Sentinel (i Machine Head i l'aṅ sunàda in dl'edisiòṅ speciàla dal disc Unto the Locust dal 2011) ma 'l è 'n àtar al braṅ ch'al fà al stus: Eat Me Alive. Difàti l'urganiśasiòṅ PMRC, ch'la gh'iva butâ i òć adòs da 'n pès, la gh dà còntra insfilsànd cla canta lè a 'l tèrs pòst in dla lista di braṅ da mét'r al band dit „Filthy Fifteen“ (I Quìndas Spurcaciòṅ) parchè i dgìvan ch'la dascurìs ad sès fat cun la bóca.

«
Your wild vibrations got me shooting from the hip, crazed and insatiable let 'er rip, eat me alive. Sounds like an animal, panting to the beat, groan in the pleasure zone, gasping from the heat. Gut-wrenching frenzy that deranges every joint, I'm gonna force you at gun point to eat me alive. Bound to deliver as you give and I collect, squealing impassioned as the rod of steel injects. Lunge to the maximum, spread-eagled to the wall, you're well equipped to take it all.»
(EN)(Eat Me Alive, 1984)
«
I tò muvimènt salvàdag i m faṅ gnir un śgriśōr lung la gamba, ta m fà gnir mat, ta gh 'n à mai a basta, magn'um viṿ. At par na bèstia ch'la tîṅ a drē a la batarìa dal cōr, at bacàj in dal pòst dal piaśér, al cald al t tōś al fiâ. L'è na śmagna ch'la m fà 'rvultàr al stómag, a t custrinśarò a mét'r-at in śnòć par magnàr-um viṿ. At sē prònta a far al tò duvér, tè at dà e mè a tóg, at sig ad piaśér mént'r al bastòṅ 'd asàr al sprica. Fà tut quél ch'at pó, vèra 'l gambi e mét-at còntra 'l mur, at gh'à tut quél ch'a gh vōl par tōr-al tut.»
(MUD)

Turbo

In dal mèś di an Utànta 'l éra drē a far-as strada al pop metal un gènar 'd hard rock bòṅ p'r èsar traśmìs a la ràddio e par sfundàr in dal marcâ americàṅ. 'L è acsè ch'al nóṿ disc dal grup, Turbo, dal 31 ad Mars dal 1986, al vèṅ registrâ in cla manéra lè, cuma 'l braṅ Wild Nights, Hot & Crazy Days o Parental Guidance, cantàda in unōr dla PMRC e tèrs sìngul sarnî par gnir fóra da par lò dòp Turbo Lover e Locked In, dū di pès fat méj insém a Out In The Cold. Par la prima vòlta i Judas Priest i dróan chè di sintetiśadōr.

«
Where are you now, hear me calling, I need you I’m so cold, can’t you hear my heart beat, out in the cold, please rescue me, give me a chance baby, there’s nothing I wouldn’t do to make it alright, just for one more chance baby, I need all your lovin’ tonight, where are you now, the fears are comin’ back to me once again, oh, I wish you were here, takin’ good care of me, I want you, I feel as though I’m out in the cold.»
(EN)(Out In The Cold, 1986)
«
In du sē't adès? Scólt'um a sòṅ drē a ciamàr-at, a gh'ò biśógn ad tè ch'a sòṅ ślâ, pó't mia sintìr la mè batarìa ad cōr? fóra a 'l fréd, jut-um par piaśér, dà'm n'ucaśiòṅ amór, a farés incòsa par mét'r al ròbi a pòst, sōl par n'ucaśiòṅ da piò, a m vōl tut al tò amór stanòt, in du sē't adès? al scarìi i èṅ drē a turnàr da mè incóra na vòlta, oh, a vrév ch'at fus chè mèg, a tgnir-um a drē, a t vój, a m sènt cuma s'a fus ad fóra in dal fréd.»
(MUD)

La canta Reckless ch'la sèra 'l disc la gh'iva da finìr dèntar a la culòna sunóra dal film Top Gun ma i Judas Priest i n aṅ minga vlû parchè i pinsàvan ch'al sarés stâ un flop. Incóra na vòlta la cupertìna l'è stada fata par Doug Johnson e la véd na maṅ dna dóna cun gl'ungi lunghi cun al śmalt róś ch'la tîṅ sòdi un joystick.

Al disc al vénd bèṅ dvintànd 'd òr in dal Śugn dal 1986 e pò ad plàtin 'l an dòp, tucànd al 33śum pòst in dal Régn Unî e al 17śum in di Stat Unî ma dimóndi sutenidōr i èṅ dascuntènt. In n'intervìsta a Kerrang! dal 2008, dascurénd ad Turbo, Halford al diś che cal disc chè 'l è stâ fat tgnénd a drē a quél ch'a s respiràva in alóra e ch'l al sà ch'l è un lavōr ch'l à divìś dimóndi ma però par lò al gh'iva dèntar listés di pès bòṅ.

Prudót par Tom Allom, in dal 1987 a vèṅ fóra al secónd disc dal viṿ dal grup, Priest...live!, cun dèntar al canti sunàdi in dal tour dal 1986 ciamâ Fuel For Life Tour.

Ram It Down

Halford in di prim an Utànta

Turnâ in stùddio, i Judas Priest i daṅ vita a Ram It Down (Spapl'al), al lōr undicéśum lavōr publicâ al 17 ad Maǵ dal 1988. In di cunfrònt dal disc precedènt, in quést chè al sòṅ al tórna a èsar più dûr, turnànd dal bandi d'l heavy metal clàsic (dèntar a gh'è anc un braṅ ch'al s ciama acsè). Anc se soquànt pès i èṅ gnû fóra bèṅ (òṅ par tut, la Blood Red Skies ch'l'arciàma la vècia Victim of Changes), dal punt ad vista cumerciàl al disc 'l è na mèśa deluśiòṅ (anc s'al ciàpa al disc 'd òr dū méś dòp, vindénd sincsèntmìla còpi). Sōl un sìngul al gh la cava a gnir fóra da par lò, la cover ad Chuck Berry Johnny B. Goode, pinsàda par finìr dèntar a 'l film umònim.

«
Between the eyes I hear it screaming and it electrifies your inner feelings, hot shock waves charge the air, all heads are banging, fists pumping everywhere, guitars are cranking. Heavy Metal, Heavy Metal what do you want.»
(EN)(Heavy metal, 1988)
«
In mèś a i òć a 'l sènt sigàr e dar energìa a i tò sentimènt ch'at gh'à dèntar, óndi 'd urt bujénti i càrgan l'ària, tut al tèsti i sa squàsan, pugn stric dapartùt, al chitàri i èṅ drē a preparàr-as. Metàl Pēś, Metàl Pēś csa vō't?»
(MUD)

La cupertìna (un diśégn 'd un bras celèst ch'al tira un marùc par spaplàr al mónd) l'è un lavōr ad Mark Wilkinson.

Dòp dimóndi tèmp, al baterìsta Dave Holland al lasa al grup (al finirà pò in parśòṅ in dal 2004 p'r avér butâ i òć adòs e avér mulestâ sesualmènt un ragasōl ad darsèt an ch'al tulìva dal lesiòṅ da lò). Al sò pòst al vèṅ tòlt par Scott Travis ch'l iva laurâ cun i Racer X e i The Scream. Al s in và anc al prudutōr Tom Allom ch'al lasa al pòst a Chris Tsangarides.

A śuntàr-as a i prubléma dal grup p'r al mèś falimènt ad Ram It Down a sucéd un fat ch'al i mét in cundisiòṅ 'd èsar custrét a diféndar-'s in frònt a la lég quand i sinc i gh'aṅ 'd andàr in tribunàl par na càuśa còntra 'd lōr misa in pē da i genitōr ad dū baghét ch'i s éran tòlt la vita al 23 ad Dicémbar dal 1985. Quist chè, i śóvan Raymond Belknap e James Vance ad daśdòt e vint an, i s éran tirâ na sćiuptàda davśèṅ a na cēśa dòp avér bvû dimóndi bira, fumâ dla marijuana e scultâ 'l disc Stained Class dal 1978. Belknap 'l éra mòrt subìt, invéci Vance 'l éra scampâ a fadìga ma al gh'iva al grugn spaplâ dal tut e 'l éra stâ custrét a patìr na lunga uperasiòṅ par pò murìr listés tri an dòp p'r i dan a 'l sarvèl. P'r i genitōr la cólpa l'éra dal grup ad Birmingham parchè i dgìvan che la canta Better By You, Better Than Me sunàda al cuntràri la gh'is un mesàǵ lugâ („Do It!, Do It!“ ch'a vōl dir „Fà'l! Fà'l!“ in miranduléś) ch'l arév cuciâ i dū a masàr-as. P'r i giùdas gl'acùśi i éran sénsa fundamènt ma 'l epiśòdi al i à sgnâ listés e 'l à fat in manéra ch'al nóṿ disc, Painkiller, al n gnis minga fóra secónd i sò tèmp.

Painkiller

I Judas Priest da 'l viṿ (Mars 2005)

Lasâ a 'l sò spali tut i prubléma, al grup al taca a lauràr a 'l nóṿ disc Painkiller a 'l inìsi dal 1990 in Frància a Brignoles. Dòp ch'l è stâ rimixâ in Ulànda, al 3 ad Setémbar dal 1990 'l àlbum (al prim cun Scott Travis di Racer X da drē da la baterìa) al pōl gnir fóra finalmènt in tut i negòsi. Al disc, cunsiderâ òṅ di più impurtànt dal gènar heavy metal ad sèmpar, al vèṅ numinâ a i Grammy Awards dal Favràr dal 1991 cuma Best Metal Performance.

Al sòṅ ad cal 12śum disc chè, prudót par Chris Tsangarides, 'l è òṅ di più catìṿ ad sèmpar dal grup, i riff ad chitàra i èṅ dimóndi crûd, dirèt e putènt e Travis al pìcia cum un mat. I sìngui tirâ fóra i èṅ tri: Painkiller (al braṅ più rabî ad tut, insém a All Guns Blazing, vèrt p'r un asōl ad baterìa dvintâ stòric e sunàda in séguit anc dal grup di Death), al lènt dimóndi sintî A Touch of Evil e Night Crawler.

In dal 2001 l'è gnùda fóra na versiòṅ arfàta e masteriśàda ad nóṿ cun dū pès da piò: 'l inèdit lènt Living Bad Dreams e na cantàda dal viṿ dal braṅ Leather Rebel.

Al tìtul dal disc Painkiller (ch'a vōl dir Madśìna p'r al dulōr) al s riferìs a 'n àngil ad metàl cascâ śò (cuma al figuràva in dal vèć disc Sad Wings of Destiny) che chè al gira in dal cēl a cavàl 'd un dragòṅ fat a mòta cun dū séghi a sérć a 'l pòst dal rōdi e al tōś ispirasiòṅ dal madśini ch'l iva tòlt Halford a i tèmp ad Turbo in dal tentatìṿ ad masàr-as p'r al fat 'd èsar un fnòć.

«
Faster than a bullet, terrifying scream, enraged and full of anger, he's half man and half machine, rides the Metal Monster, breathing smoke and fire, closing in with vengeance soaring high. He is the Painkiller, this is the Painkiller. Planets devastated, mankind's on its knees, a saviour comes from out the skies in answer to their pleas, through boiling clouds of thunder, blasting bolts of steel, evil's going under deadly wheels. He is the Painkiller, this is the Painkiller. Faster than a laser bullet, louder than an atom bomb, chromium plated boiling metal, brighter than a thousand suns.»
(EN)(Painkiller, 1990)
«
Più śvélt 'd un prujètil, un sîg da scarésa, arliâ e pîṅ 'd ràbia, lì lò 'l è un mèś óm e na mèśa màchina, al và a cavàl dal Móst'r ad Metàl, tirànd fiâ ad fum e fōg, daśvinànd-as cun vindéta alvànd-as sù da tèra. Lò 'l è la madśìna p'r al dulōr, qvést chè 'l è la madśìna p'r al dulōr. Pianēd devastâ, al gèn'r umàṅ 'l è in śnòć, un salvadōr al salta fóra da i cēl par rispónd'r a 'l sò dmandi, in mèś a dal nuvli bujénti ad tròṅ, silti 'd asàŀ fati par śbragàr, al mâŀ 'l è drē a finìr ad sóta a dal rōdi ch'i màsan. Lò 'l è la madśìna p'r al dulōr, qvést chè 'l è la madśìna p'r al dulōr. Più śvélt 'd un prujètil làśèr, più fòrt dna bómba atòmica, crôṁ placâ, metàl bujènt, più luśènt ad mila sōi.»
(MUD)

La tournée in apòǵ a 'l àlbum ch'la vèṅ dòp la vèṅ fata insém a i Megadeth, a i Sepultura e a i Pantera. Durànt la data ad Turònt, Rob Halford al s fà mâŀ mèntar 'l éra drē a salìr in sal palc cun la sò mòta stablénd-as atàc a 'n spìgul dla strutùra cun in sima la baterìa, facilmènt p'r al fat che, in cal mumènt lè, a gh fus dimóndi fum in gir fat par spetàcul cun dal giàs séc. Al cantànt al finìs listés al cuncèrt e pò al và a 'l uśdàr par far-as curàr.

Finî al tour, Halford al s quistiòna cun al rèst dal grup e al i mòla par fundàr un sò grup da par lò, i Fight, insém a Scott Travis (al prim disc 'l è dal 1993 e al s ciàma War Of Words e al sòna a la manéra di Pantera), pròpria mènt'r i tacàvan a giràr dal vóś sul fat ch'a gh piaśìs i óm (al sarà pò lò in dal 1998 a cunfirmàr al quèl).

Dal cant lōr i Judas Priest i rèst'n al pâl par sinc an a 'l incìrca, faghénd gnir fóra sōl la racòlta Metal Works: '73-'93.

«
Stab! Bawl! Punch! Crawl! Hooks to my brain are well in. Stab! Bawl! Punch! Crawl! I know what I am, I'm Berlin. Through cracked, blackened memories of unit dispersal, I face the impregnable wall.»
(EN)(Dissident aggressor, 1977)
«
Curtèla! Siga! Tira di marùc! Traśa par tèra! I rampèṅ i èṅ bèla in dal mè sarvèl. Curtèla! Siga! Tira di marùc! Traśa par tèra! A 'l sò quél ch'a sòṅ, un Berlinéś. Sćiancâ, arcòrd lugâ e stramnâ via, a m mèt còntra ch'al mur chè ch'al n s pōl minga śbàtar śò.»
(MUD)

'L éra ad Tim Owens

Owens in di Iced Earth

Dòp soquànt tèmp in dua i Judas Priest i gh'ér'n armàś, i quàtar i decìdan pò ad tōr 'n àtar al sò pòst, e quàl lè 'l è Tim Owens, 'n americàṅ d'l Ohio dit Ripper, un fan dal grup ch'al sunàva in na cover band cantànd di braṅ dal grup ad Birmingham. 'L è stâ Travis a catàr-al mèntar 'l éra impgnâ dal viṿ. Al baterìsta al s è pò fat dar òṅ di sò demo da purtàr-as sèg par far-al sintìr a chi àtar dal grup. Dòp un pruèṅ fat bèṅ, invidâ apòsta in dal Régn Unî par cantàr in studi i braṅ Victim of Changes e The Ripper, Owens al vèṅ tòlt subìt. 'L è al 1996 e sōl 'l an prima Halford 'l iva lasâ lè al prugèt di Fight.

Al destìṅ particulàr 'd Owens, al sò pasàǵ a la śvélta da fan sfegatâ dal grup a frontman in un cólp sōl, 'l à pò dâ ispirasiòṅ p'r al sugèt dal film Rock star dal 2001, cun la sò part dada a Mark Wahlberg mènt'r al grup lè al s ciamàva Steel Dragon (Dragòṅ 'd asàl). La prudusiòṅ la s éra misa in cuntàt anc cun i Judas Priest stés par far-ag far quèl in dla culòna sunóra ma pò a n s è fat gnint.

Tim "Ripper" Owens

Se par lò far part dal grup 'l éra al sógn dal sò vita, par soquànt di fan al fat ch'l is tòlt al pòst 'd Halford al n gh'éra mia tant andâ śò. In dal 1997 a vèṅ fóra al prim disc cun lò a la vóś, Jugulator, un lavōr dimóndi péś (basta scultàr la canta Blood Stained ch'la fà anc part dla culóna sunòra dal film ad scarésa La bambola assassina 4: La sposa di Chucky, quàrt capìtul dla saga dla Bàmbula ch'la cópa) ch'al s śluntanàva dimóndi dal stîl clàsic dal grup, stricànd i òć invéci a 'l metal mudéran cuma al speed metal, al thrash metal o al groove metal, cun di pès dimóndi lung ad sinc o siē minùt 'l òṅ e cun sōl un sìngul gnû fóra: Bullet Train. I tèst i èṅ crûd, Death Row, tant par dir-'n una, la dascór 'd un śuvnòt cundanâ a mòrt.

«
Oh, no! They're taking me slow, one way ticket to death row, so what's the matter son, too young to die, take it like a man, don't cry, ah ah! Oh, no! I won't go, you'll never get me down to death row. Say a prayer, best beware, it's not very nice in the electric chair.»
(EN)(Death Row, 1997)
«
Oh, no! I èṅ drē a tōr-um piàn piaṅ, un bijét ad sōla andàda p'r al bras dla mòrt, in du è'l al prubléma baghét? Cumpórt-at da óm, minga piànśar, ah ah! Oh, no! A n vój briśa andàr, ta n gh la cavarà mai a gnir śò da 'l bras dla mòrt. Dì na preghiéra, vèra i òć, a n è minga tant bèl in sima a na scrana lètrica.»
(MUD)

Jugulator al mùcia sù un sért sucès e al grup al decìd in dal Setémbar dal 1998 ad far gnir fóra un disc dal viṿ dópi, '98 Live Meltdown cun Owens ch'al fà la sò figùra.

In dal Luj dal 2001 l'è la vòlta ad Demolition (Demulisiòṅ) un disc pîṅ ad braṅ ma ch'al n cata briśa quél giùst (i sìngui Machine Man e Lost and Found i n faṅ minga sèntar). Glenn Tipton chè al scriv tut al canti (soquànti insém a K.K. Downing e una cun Scott Travis, Cyberface) e al tîṅ a drē anc a la prudusiòṅ, faghénd in manéra ad catàr un sòṅ nóṿ p'r al grup (dal vòlti a par 'd ascultàr al nu-metal di Fear Factory). Al disc però al dvintarà quél vindû ad méno ad sèmpar, a part Rocka Rolla ad 27 an prima. Dòp la publicasiòṅ 'd 'n àtar live (Live in London dal 2002), Owens al fà al valìś e al mòla al grup p'r andàr a sunàr insém a gl’Iced Earth e a Yngwie Malmsteen.

Al ritóran 'd Halford

Halford insìma a la sò mòta, tòlt śò in sal palc ad Plymouth in dal Régn Unî al 31 ad Mars dal 2005

A cal punt lè dimóndi di sustenidōr dal grup i dmandàvan a vóś élta al ritóran ad Rob Halford a 'l sò pòst. I sò sógn i càtan rispòsta finalmènt in dal 2003 quànd al cantànt ad Birmingham al tórna in dal grup. Far festegiàr al fat, la cà discugràfica Columbia la fà catàr in di negòsi na racòlta ad piò ad ssanta canti in quàtar CD cun anc al DVD Live Vengeance '82 dèntar.

In dal 2004 i Judas Priest i partìsan p'r un tour europeo insém a i tedésc Scorpions. Al grup al sòna anc da headliner a 'l Ozzfest, un fèstival mis in pē da Ozzy Osbourne e Halford al gh'à anc la manéra ad tōr al sò pòst in di Black Sabbath perchè lò al gh'iva la brunchìte.

Al 1 ad Mars dal 2005 al grup al fà gnir fóra par la Sony, dòp dód'ś an, 'n àt'r àlbum cun Halford a la vóś, Angel of Retribution (Àngil dal castìg), cun un ritóran a 'l stîl clàsic di an Utànta. Al disc, prudót par Roy Z ch'al scriv insém a 'l grup anc la canta Deal with the Devil, al gh la cava a rivàr a 'l 13śum pòst dla Billboard e al prim pòst in Grécia.

Al sìngul sarnî par gnir fóra da par lò 'l è Revolution. Al finirà a 'l 23śum pòst in di Stat Unî (in dla Mainstream Rock Tracks chart), un quèl ch'al n sucidìva minga da i tèmp ad Night Crawler (1992).

In dal disc i s càtan anc i braṅ Judas Rising, dimóndi rabî, l'arliàda Hellrider e al lènt Angel. In soquànti canti a gh'è anc di riferimènt a di tìtui vèć, cuma in Demonizer in dua a s dascór d'l Hellion o cuma in Deal with the Devil (na sòrta ad biugrafìa di tèmp antìg) ch'al gh'à in dal tèst al pès Under blood red skies.

Al grup al partìs pò p'r un tour in gir p'r al mónd, ciamà Retribution World Tour, e al tōś anc l'ucaśiòṅ par far gnir fóra un DVD dal viṿ, Rising in the East, rigistrâ a Tokyo in dal Maǵ dal 2005.

«
We built our world of metal, watched it grow, fuelled the fury solid to the bone, gotta deal with the devil, ’cause you know that it’s real, done a deal with the devil, from a heart made of steel, rollin’ down the m-way, took it to the smoke, bangin’ heads there ’til we all went broke, when we don the leather and the whips and chains, nothing matters more, we can’t be tamed.»
(EN)(Deal With The Devil, 2005)
«
A-j-ém mis sù al nòstar mónd ad metàl, a 'l ém vdû crésar, dâ còrda a l'arlìa rindénd-la fòrta cuma 'n òs, a-j-ém un pat cun al Diàvul, parchè at sà ch'l è véra, a-j-ém fat un pat cun al Diàvul, da 'n cōr fat 'd asàl, andànd in diresiòṅ dl'Autostràda M, a s sém mis a fumàr, squàsand-as la tèsta in fiṅ tant che a sa sém scavśâ, quànd a s ém mis dal curàm adòs, e al scùrj e al cadéni, gnint àtar a cuntàva, i n s pōlan briśa tgnir schis.»
(MUD)

La sperimentasiòṅ ad Nostradamus

Na maṅ la śibìs la laméta dal disc British Steel durànt un cuncèrt d'l Agóst dal 2009 in Spaggna

Al 16 ad Śugn dal 2008 la banda la dà vita a 'n concept album dópi ad vint-a-tri braṅ, Nostradamus, ch'al dascór interamènt dal pruféta, astròlug e farmacìsta francéś. A s trata 'd un lavōr dal tut difarènt da chi àtar fat prima e par cal mutìṿ lè 'l à divìś la critìca e i fan. Par l'ucaśiòṅ i tōśan sèg al tasterìsta Don Airey par sunàr al parti urchestràli ch'i 'mpinìsan dal tut 'l àlbum. I n màncan minga i pès rabî cuma la title-track Nostradamus (in dua Halford al fà òṅ di sîg a la sò manéra) e Persecution. In dla canta Pestilence and Plague pò Rob al canta al riturnèl in itagliàṅ, ma cun 'n asènt ingléś dimóndi pēś.

«
Nella tentazione, cercando la gloria, il prezzo da pagare è la caduta dell'uomo»
(IT)(Pestilence and Plague, 2008)
«
In dla tentasiòṅ, pascànd la glòria, al prèsi da pagàr 'l è 'l strabùc d'l óm.»
(MUD)

In dal prima stmana Nostradamus 'l à vindû 42.000 còpi in di Stat Unî, cavànd-gh-la a rivàr a 'l 11śum pòst dla Billboard 200, un rècurd par lōr.

Al 12 'd Avrìl dal 2008 la title track (numinàda cuma "Best Metal Performance" a i 51śum Grammy Awards) l'è stada misa in sal sò sit p'r èsar dascargàda a gràtis. La canta Visions invéci l'è stada sarnìda cuma sìngul, gnénd fóra al 4 ad Maǵ. Al grup al fà savér ch'a gh piaśrév purtàr al disc a teàtar ma al prugèt al finìs in gnint.

Sèmpar in dal 2008 i tōśan part a 'l Metal Masters Tour insém a Heaven & Hell, Motörhead e Testament. 'L an dòp invéci i sònan in gir p'r al mónd p'r intēr al disc British Steel a trint an da la sò surtìda. I vànan sèg i Whitesnake ma chi lōr i èṅ pò custrét a dar-gh a muć par n'infesiòṅ a 'l còrdi vucàli dal cantànt David Coverdale.

'L Arvédras ad K.K. Downing

Halford e Tipton in sal palc ad Madrid in dal Luj dal 2011

Al 14 ad Luj dal 2009 i faṅ vgnir fóra al disc da 'l viṿ A Touch of Evil: Live na racòlta ad braṅ sunâ live da 'l 2005 a 'l 2009, cun la dèntar na Eat Me Alive tiràda fóra da di scafài pîṅ ad pólvra. L'eśibisiòṅ ad Dissident Aggressor la vins al Grammy Award dal 2010 cuma Best Metal Performance.

Al 20 'd Avrìl dal 2011 K.K. Downing, ch'al n andàva piò 'd acòrd cun chi àtar e gnanc c'n al manager, al fà fagòt dòp na vita pasàda c'n i Judas Priest: 'l ingléś Richie Faulkner al tōś al sò pòst anc in ucaśiòṅ dal cuncèrt ad Mantṿa d'l 11 ad Maǵ dal 2012, 'l Epitaph tour d'l arvédras finàl. Al 25 ad Maǵ al grup al sòna par la prima vòlta sénsa al sò chitarìsta stòric durànt la puntàda finàla dal prugràma American Idol (stagiòṅ 10), faghénd Living After Midnight e Breaking the Law.

'L 11 'd Utóbar a véd la luś na racòlta ad 17 pès dal grup (The Chosen Few) sarnî diretamènt da di àtar mòstar dl'heavy metal mundiàla cuma Lars Ulrich e James Hetfield di Metallica, Ozzy Osbourne, Zakk Wylde, Alice Cooper, Vinnie Paul di Pantera, Slash di Guns N' Roses, Jonathan Davis di Korn e Lemmy di Motörhead ma 'l è un fiàsc clamuróś: sóli 1.300 còpi vindùdi in dla prima stmana in di Stat Unî. Sèmpar in dal méś Utóbar pò al grup al fà catàr in di negòsi un cufanét cun dèntar tut i vint sìngui publicâ da 'l Avrìl dal 1977 (Diamonds & Rust) a 'l Avrìl dal 1992 (Night Crawler), p'r un tutàl ad 52 braṅ, cuntànd anc al b-side.

A siē an da 'l ùltim disc in studi, in dal Luj dal 2014 al grup al fà catàr in di negòsi Redeemer of Souls, al darsetéśum lavōr di Judas Priest. A gh'l à cavàda a rivàr a 'l sèst pòst dla clasìifica americàna vindénd trénda-dū mila còpi in dla prima stmana.

Mémbar

Richie Faulkner tòlt śò in dal 2009

Quéi 'd adès

  • Rob Halford vóś (1973 - 1992, 2003 - incō)
  • Richie Faulkner chitàra (2011 - incō)
  • Glenn Tipton chitàra (1974 - incō)
  • Ian Hill bas (1969 - incō)
  • Scott Travis baterìa (1989 - incō)

Ex cumpunènt

  • Al Atkins vóś (1969 - 1973)
  • Tim "Ripper" Owens vóś (1996 - 2003)
  • K.K. Downing chitàra (1969 - 2011)
  • John Partridge baterìa (1969)
  • John Ellis baterìa (1969 - 1971)
  • Alan Moore baterìa (1971 - 1972, 1975 - 1977)
  • Chris Campbell baterìa (1972 - 1973)
  • John Hinch baterìa (1973 - 1975)
  • Simon Phillips baterìa (1977)
  • Les Binks baterìa (1977 - 1979)
  • Dave Holland baterìa (1979 - 1989)

Discugrafìa

Àlbum

Racòlti

Da 'l Viṿ

Sìngui

  • 1974 - Rocka Rolla
  • 1976 - The Ripper
  • 1977 - Diamonds & Rust
  • 1978 - Better by You, Better Than Me
  • 1978 - Evening Star
  • 1979 - Take on the World
  • 1979 - Rock Forever
  • 1980 - Living After Midnight
  • 1980 - Breaking the Law
  • 1980 - United
  • 1981 - Don't Go
  • 1981 - Heading Out to the Highway
  • 1981 - Hot Rockin'
  • 1982 - You've Got Another Thing Comin'
  • 1982 - (Take These) Chains
  • 1983 - Electric Eye
  • 1983 - Freewheel Burning
  • 1984 - Love Bites
  • 1984 - Some Heads Are Gonna Roll
  • 1986 - Turbo Lover
  • 1986 - Locked In
  • 1986 - Parental Guidance
  • 1988 - Johnny B. Goode
  • 1988 - Ram It Down
  • 1990 - Painkiller
  • 1991 - A Touch of Evil
  • 1992 - Night Crawler
  • 1997 - Burn in Hell
  • 2001 - Machine Man
  • 2005 - Revolution
  • 2008 - War

Videugrafìa

  • 1983 - Judas Priest Live Vhs
  • 1986 - Fuel for Life Vhs
  • 1987 - Priest...Live! Vhs
  • 1993 - Metal Works '73–'93 Vhs
  • 2001 - British Steel Vhs e Dvd
  • 2002 - Live in London Vhs e Dvd
  • 2003 - Electric Eye Dvd
  • 2005 - Rising in the East Vhs e Dvd
  • 2006 - Live Vengeance '82 Dvd
  • 2010 - British Steel - 30th Anniversary DVD Dvd

Culegamènt estéran

Nòti

  1. ↑ Cuma spìnśar a 'l suicìdi centrosangiorgio.com
Estratto da "https://eml.wikipedia.org/w/index.php?title=Judas_Priest&oldid=156758"