Apocalypto

Apocalypto is a Actionfuim und Historiendrama vom Regisseur Mel Gibson ausm Joa 2006. Da US-amerikanische Fuim is am 8. Dezemba 2006 in de duatign Kinos kema und hod glei in da easchtn Wochn de Hitlistn ogfiaht.

Da Fuim spuit um 1500 im Reich vo de Maya in Mittlamerika, kuaz vua da spanischn Kolonialisiarung. Im Fuim wead nua de Maya-Sproch "Mayathan" gredt, de wo mit Untatitln iwasetzt wead.

De Zeitschrift Cinema hod en Fuim ois „bildgewaltig, emotionsgeladen und voller Anmut“ bschriem.^[1]

Da Fuim spuit im mittlamerikanischn Dschungl im Reich vo de Maya. Da Indiana Pranke vom Jaguar lebt mit seina Frau Sieme, seim Kind Rennade Schuidkrot und seim Vodan Blitzenda Himme in ana Dorfgmoaschoft im Rengwoid. An am Dog, zeiti in da Fruah, wead de Siedlung vo Menschnjagan aus ana Mayastod ogriffa. Nochm Kampf wean Pranke vom Jaguar und vui ondare gfonga gnumma. Sei Voda wead voa seine Aung umbrocht, sei Frau und sein Buam hod a grod no in am Eadloch vastecka kena.

De Gfongana wean nacha gfesslt und wia Viecha zammbundn ausm Dschungl in a Maya-Stod gfiat. Afm Weg ealems weidane Grausomkeitn. Se wean drangsaliat und brutal otriem, de wo ned midhoidn kena, wean glei umbrocht. Se kema duach Oatschoftn, de wo duach de Pest vaseicht san und seng nix wiar Elend. A kloans Diandal, des wo de Pest hod und vo de Menschjaga mit an Steggn vatriem wead, prophezeit nacha: Wenn da Dog zua Nocht wead, wead da Mo, dea wo an Jaguar bringt, de Menschnjaga zua am fian, dea wo Eadn und Himme ausleschn wead.

In da Stod wean de gfonganan Weiwaleit ois Sklavina vakafft und de Monna vo Kopf bis Fuaß blau ogmoit und voa de Aung vo vui Zuaschaua auf a Stufnpyramidn triem. Om okema wead oana nochn ondan ois Opfa fian Sunnagod obgschlocht. Weia da Pranke vom Jaguar drokimmt, vafinstad si de Sun. De Leid san vaängstigt. Nua da Hochepriesta und da Kini wissn Bescheid. Da Hochepriesta nutzt des ois Mochtdemonstration und duat so ois ob a mitn God Kukulkan redn kanntat. Ea sogt: Bittma drum, dass da Sunnagod wiedakimmt, wenn a koana weidan Menschnopfa meara wui. Kuaze Zeit spada is de Sunnafinstanis voabei und s Menschnopfa wead obrocha.

De Gfongana, de wo iwalebt hom, wean nacha vom Leitwoif und seine Menschnjaga aufn Spuiplotz triem. Duat miassns boaweis um eana Lem renna. Dabei wean auf eana mit Pfein, Spean und Stoana gschossa. De wo s bis zum End vom Spuiplotz kema, wean vom Buam vom Leitwoif daschlong, dea wo do aufpasst. So wean olle obgmuakst bis Pranke vom Jaguar drokimmt. Ea schoffts bis kuaz voam End vom Spuiplotz, nacha wead a vo am Pfei troffa und foit. Wia da Bua vom Leitwoif higeht und eam daschlong wui, reisst si da Jaguar in Pfeu aussa, dea wos eam troffa hod und duachboat damit in Menschnjaga-Buam. Daun haut a in an Dschungl ob, gfoigt vo da gonzn Menschnjagagruppm.

Obwoira vawundet is, kona in seim vatrautn Rengwoid-Terrain oan nochm ondan Vafoiga ausschoitn, bis auf zwoa. Wias nacha zum Mearesufa kema, sengs de spanischn Konquistadoan londn. Den Iwaroschungsmoment nutzta aus, um de letztn zwoa Vafoiga obzhänga.

Nocha rettata sei Frau und seine Kinda aus an iwaflutetn Schacht und suacht mit seina Familie an neien Ofong im Rengwoid.

Da Fuim hod an Hauffa Auszeichnunga gwunna und is fia vui weidane nominiat gwen. Wichtige Auszeichnunga san z. B.:

• Central Ohio Film Critics Association – COFCA Award for Best Cinematography (2007) – Dean Semler
• Dallas-Fort Worth Film Critics Association Awards – DFWFCA Award for Best Cinematography (2006) – Dean Semler
• First Americans in the Arts – FAITA Award for Outstanding Performance by an Actor (2007) – Rudy Youngblood

1. ↑ Kritik zum Film in der Zeitschrift Cinema (Memento des Originals [1] vom 10. Óktówer 2007 im Internet Archive)  Info: Der Archivlink wurde automatisch eingesetzt und noch nicht geprüft. Bitte prüfe Original- und Archivlink gemäß Anleitung und entferne dann diesen Hinweis.@1@2Vorlage:Webachiv/IABot/suche.cinema.de.

• Hoamseitn zum Fuim
• Apocalypto in da Internet Movie Database
• Apocalypto in da Online-Filmdatenbank
• Apocalypto auf Rotten Tomatoes
• Presseartikl zu Apokalypto auf film-zeit.de
• „Montezumas Rache“, Artikl vom 13. Dezemba 2006 in da telepolis vo Rüdiger Suchsland