Oxotsk Bira

Oxotsk Bira ( rossiavon Охотское море ) tir bira ke Pacifika welfa, tigisa wale roneon Kamtcatka dega is geroneon Kuril tursia is geeon Hokkaido ewala is talteon Saxalin ewala is lenteon abrotcafi krimta ke Ronefa Sibiria.

Inaf yolt tir male Oxotsk widavama, i mal taneafo rossiafo boniaxo koe gola.

Oxotsk Bira va nilackafe midaze kene valentafa is valenttaltefa krimta dir. Toloya ara bareaca ke bata koetadavafa bira mialukon titsuyafa gu 1500 m- kal Kuril jumtak ( cug- 3400 m- ) lentugeon ticnid.

Antaf bostap artnis va Oxotsk bira tir sibiraf Amur bost. Va fultey vas tokodapa lent Tatarski vedil wale Saxalin ewala is Asia tadava vanburer. Ar krimtaf bostam va lavada ko Oxotsk bira djaved. Lavok ke Pacifika welfa koo konak numay wale ewala ke Kuril tursia konid. Gijarotif geulentaf salt nope bat welfaf lavok varononir. Batdume varonexo ke Oxotsk bira tir idulafa loon dam vataltexo lize ligijarotimaf salt gestun gan lavada ke Sibiria kevo asiafa tadava is Saxalin ewava geon pridur.

Tadavafa lidawicka gazasa vamoe Asia rodolunena gu tela ke Arktika welfa, va sazafa dura is tigira ke opra moe Oxotsk bira sogotur nume askir da bata bira tir tela lofentafa ke Asia.

Remi fentugal, elkafa oprabada moe valenttaltexo ke Oxotsk bira isu valentexo isu vataltexo. Voxen vageeon is varoneon, nope turestara ke lavok ke Pacifika welfa, abica opra tigir.

Vanburera va lavada ke bosteem is noafa xufa aotcera nope salteem is sukara va titunira ke aludevaf lavok kulaf gu sinkasa eipinda sowebed. Batdume Oxotsk bira gu tana bliopon lowarzesa bira zo torigir.

Remi abic aksat edje fent leeke dur, bli laizon nusizuntar. Vudimes kabay kazon zo malsaved, voxen bat sulemeem dere tir vrebaf gu blira ke konaka moukolafa sanelia keneon sokesa, dum spedol is piakudol. Lukoptaf megol ko Oxotsk bira ta malestura dere pujed.

Moe midaze valente Oxotsk bira, tolna is tie zo kosmayad, is dere telyoni lozolonafi vruni ke Tawava dem barytine kawot. Bat kawot dene edegopafa raba wetce nendara gu tutsoasa ayewara nelkon zo malfaver.

Sure, aneyasik va tanalnaxo leve ludevek kosmayad. Danexa va Oxotsk bira gu tana gola lokulafa gu lavagul ke tanalna nupilkomodad. Batkane va towara ke tawavafa lidawicka lovon co turestar.

Ivan Moskvitin vestasik isu Vasili Poyarkov tiyid taneaf taltekik artlapiyis va Oxotsk bira is dere Saxalin ewala, bak sanda mali 1640^-e. Taneafo rossiafo inkexo kene krimta tiyir Oxotsk molt. Azon bak XIX^-eafa decemda, Ayan moltam va kazafa is totasa tegira avplekuyur.

Toleafa brinuga van Kamtcatka stayana gan Vitus Bering wali 1733 is 1743, va liwotara va krimteem noveyer. La Pérouse francik is William Broughton englik koe bata bira azon totayad ise va liwotara is grupera va konak vedil isu ewaleem tukotrayad. Krusenstern bak 1805 va varonexo ke Saxalin ewala vestayar. Mamiya Rinzo niponik az Genadi Nevelskoy rossiik danediyid da Saxalin tire tiyir ewala kaike vedilam lente tadava. Taneaf pintakiraf munesteks va Oxotsk Bira gan Stepan Makarov bak 1894 zo kridjoveyer aze zo sanegayar.