Malvern, Johannesburg
Malvern | |
|---|---|
  Malvern Malvern se ligging in Gauteng | |
| Koördinate: 26°12′4″S 28°6′7″O / 26.20111°S 28.10194°O | |
| Land |  Suid-Afrika |
| Provinsie | Gauteng |
| Munisipaliteit | Stad Johannesburg |
| Oppervlak | |
| • Totaal | 1,62 km2 (0,63 vk. myl) |
| Bevolking (2011)[1] | |
| • Totaal | 10 525 |
| • Digtheid | 6 497/km2 (16 830/vk. myl) |
| Rasverdeling (2011) | |
| • Wit mense | 5.6% |
| • Indiërs/Asiërs | 1.4% |
| • Bruin mense | 6.3% |
| • Swart mense | 86.0% |
| • Ander | 0.7% |
| Taal (2011) | |
| • Zoeloe | 39.7% |
| • Engels | 19.2% |
| • Afrikaans | 5.9% |
| • Xhosa | 5.8% |
| • Ander | 29.3% |
| Skakelkode | 011 |
Malvern is 'n voorstad van Johannesburg, Suid-Afrika. Dit is in Johannesburg se F-streek geleë. Dit strek oor nagenoeg 27 straatblokke van Reynolds View by die Hoër Seunskool Jeppe se skoolterrein in die weste tot by Germiston in die ooste, 'n afstand van nagenoeg 4 km. Vanaf Kensington in die noorde tot by Denver in die suide is die afstand op sy langste net sowat sewe straatblokke, oftewel sowat 600 m.
Die voorstad is deur Malvern Estates Limited op die plaas Doornfontein aangelê en op 23 Junie 1904 geproklameer. Die meeste van die strate is genoem na resiesperde, onder meer Persimmon, St. Amant, St. David en St. Frusquin. Malvern-Wes is 'n klein voorstadjie wat aan die einde van Foxstraat begin en sowat 1 km wes van Malvern geleë is, waarvan dit geskei word deur Reynolds View en Belgravia. Dié voorstadjie huisves die Voorbereidende Skool Jeppe. Op sy beurt is Malvern-Oos 'n voorstad van Germiston, 6 tot 8 km oos van Johannesburg se stadsaal. Malvern self is oos van Belgravia geleë, noord van Denver en suid van Kensington. Dit bevat Fotheringhampark en Alexanderpark.
Julesstraat is besonder breed gemaak sodat dit as hoofstraat tussen Johannesburg en Germiston, oos van Malvern, kon dien, wat dan ook gebeur het. Maar die straat het berug geraak vir die hoë voorkoms van ongelukke weens spoed. Die voorstad is genoem na die dorp Malvern in Engeland, moontlik omdat 'n vroeë bewoner van die omgewing van daar af gekom het.
Malvern was eens die tuiste van 'n Afrikaanse gemeenskap wat groot genoeg was om 'n NG gemeente, Malvern, en 'n laerskool, die Laerskool Malvern, te onderhoud. Die gemeente het in 1992 met die NG gemeente Jeppestown saamgesmelt as die NG gemeente Kensington, wat gebruik maak van Malvern se kerkgebou en saal in Kingstraat, Malvern. Die laerskool het einde 1991 saamgesmelt met die laerskole Johan Rissik (Troyeville) en Kensington onder laasgenoemde se naam en in hul geboue op die grens van Bezuidenhoutsvallei en Kensington. Die Laerskool Malvern se laaste tuiste was in St. Frusquinstraat, nadat dit aanvanklik in Jeppestown was en daarna in Julesstraat. Die laaste geboue huisves die Malvern Primary School. Dié skool, Hillcrest Primary School (tradisioneel die Engelsmedium-laerskool van die buurt) en Malvern High School (tradisioneel die buurt se Engelsmedium-hoërskool) se leerders is reeds jare lank hoofsaaklik swart.
Bronne
[wysig | wysig bron]- (en) Potgieter, D.J. (ed.) 1972. Standard Encyclopaedia of Southern Africa, volume 7. Cape Town: Nasionale Opvoedkundige Uitgewery (Nasou).
Verwysings
[wysig | wysig bron]- ↑ 1,0 1,1 1,2 1,3 "Subplek Malvern". Sensus 2011.
Sien ook
[wysig | wysig bron]