Jon Voight

Jon Voight
Voight in Oktober 2011 in Los Angeles.
Geboortenaam	Jonathan Vincent Voight
Geboorte	29 Desember 1938 (1938-12-29) (85 jaar oud) Yonkers, New York, VSA
Nasionaliteit	Amerikaans
Beroep(e)	Akteur
Aktiewe jare	1963-hede
Internet-rolprentdatabasis-profiel

Jon Voight (geb. 29 Desember 1938) is ’n Amerikaanse akteur. Hy is vir vier Oscars benoem, waarvan hy een gewen het, en vir nege Golden Globes, waarvan hy drie gewen het. Voight is die pa van die aktrise Angelina Jolie en akteur James Haven.

Voight het in die laat 1960's internasionaal bekend geword danksy sy rol as ’n aspirant-gigolo in Midnight Cowboy (1969). In die 1970's vertolk hy ’n sakeman wat met moord deurmekaar raak in Deliverance (1972), ’n paraplegiese Viëtnam-veteraan in Coming Home (1978), waarvoor hy ’n Oscar vir beste akteur wen, en ’n platsak oud-bokskampioen in The Champ (1979).

Hoewel hy in die 1980's en 1990's in minder rolprente gesien is, het hy groot lof gekry vir sy spel as ’n meedoënlose bankrower in Runaway Train (1985) en ’n gewetenlose prokureur in The Rainmaker (1997). In die 2000's het hy uitstekende spel gelewer as Howard Cosell in Ali (2001), die Nazi-offisier Jürgen Stroop in Uprising (2001) en pous Johannes Paulus II in die TV-minireeks met dieselfde naam (2005).

Voight is in Yonkers, New York,^[1] gebore as die seun van Elmer Voight (gebore Voytka) en sy vrou, Barbara.^[2] Voight sr. was ’n professionele gholfspeler. Jon het twee broers, Barry en Wesley. Laasgenoemde is bekend as die sanger en liedjieskrywer Chip Taylor. Voight sr. se ouers was Slowaakse immigrante van Košice, toe nog deel van Oostenryk-Hongarye. Barbara se grootouers was van Duitse afkoms.^[2]

Voigt jr. het die Hoërskool Aartsbiskop Stepinac in White Plains, New York, bygewoon waar hy die eerste keer in toneelspel belanggestel het en in die skool se jaarlikse musiekblyspel, The Song of Norway, gespeel het. Hy het in 1960 ’n B.A.-graad met kuns as hoofvak aan die Katolieke Universiteit van Amerika in Washington, D.C. behaal. Daarna is hy na New York, waar hy begin toneelspeel het.

In 1962 is Voight met die aktrise Lauri Peters getroud, saam met wie hy in die oorspronklike Broadway-produksie van The Sound of Music gespeel het. Hulle is in 1967 geskei en 1971 is hy met Marcheline Bertrand getroud. Hulle is in 1976 van bed en tafel geskei en in 1980 finaal geskei. Angelina Jolie en James Haven is sy kinders by Bertrand. Voight was verskeie jare lank vervreem van sy kinders, maar ná Bertrand se dood in 2007 het hulle versoen geraak.^[3]

’n Paar van sy bekende rolle was:

• Jon Voight in die Internet-rolprentdatabasis
• Wikimedia Commons het meer media in die kategorie Jon Voight.
• Hierdie artikel is vertaal uit die Engelse Wikipedia