日本

36°0′0″N 138°0′0″E / 36.00000°N 138.00000°E / 36.00000; 138.00000

日本國 日本国 にほんこく、にっぽんこく（日文）
通稱：日本
旗 徽
國歌： 『君が代（きみがよ）』 《君之代》
屬地（實轄）
幅員 國土：377,973.89[1]平方公里（世界第62名） 水域：1.4[2]%
首都	無，不過好多政府機構喺東京都[3]
中央政府 所在地	東京都千代田區
最大行政區	北海道
最大城市	東京都區部[4]
至高地	富士山[4]
至長河	信濃川[4]
至大湖	琵琶湖[4]
海岸線長	29,751公里[5]
時區	日本標準時間：UTC+9
國民
人數	以下係2024年3月嘅估計數字 人數： ▼ 123,970,000[6]（世界第11名） 人口密度：330人/km2（世界第44名）
官方語言	日本話[7]
官方文字	日文[註 1]
民族	大和族（98.5%） 朝鮮族（0.5%） 漢族（0.4%） 其它民族（0.6%）[註 2][8]
主要宗教	神道、日本佛教
曆法	公曆、和曆
主要節日	建國紀念之日、天皇誕生日
行車方向	靠左行駛
家用電源 電壓：100 V[9] 插座：A、B 頻率：東日本：50Hz、西日本：60Hz[9]
政制
國家憲法	日本國憲法
國家結構形式	單一制
國家政權	議會制君主立憲制
政制	議會民主制
法律體系	歐陸法系
主要領袖 國家元首（天皇）：德仁 政府首腦（內閣總理大臣）：石破茂
其他領袖（三權分立） 行政（內閣總理大臣）：石破茂 立法（國會）：関口昌一、額賀福志郎 司法（最高法院長官）：今崎幸彦
經濟
GDP（購買力平價） 以下係2024年嘅估計數字 總計：▲ $6.721兆[10]（第4名） 人均：▲ $54,184[10]（第34名）
GDP（國際匯率） 以下係2024年嘅估計數字 總計：▼ $4.110兆[10]（第4名） 人均：▼ $33,138[10]（第30名）
HDI 以下係2022年嘅估計數字 ▼ 0.920[11]（第24名）－極高
中央銀行	日本銀行
貨幣	日圓（JPY，¥）
堅尼系數	▼ 0.334（中 ，2018年[12]）
資訊
立國歷史 立國日期： 前660年2月11號（傳說） 1890年11月29號（大日本帝國） 1947年5月3號（現代日本國） 立國事件： 建國紀念日（前660年2月11號） 大日本帝國憲法生效（1890年11月29號） 日本國憲法生效（1947年5月3號）
國家象徵	天皇（國家象徵） 菊花（皇室象徵） 櫻花 富士山 綠雉
國家代碼	JPN
國際域名縮寫	.jp
國際電話區號	81
現役軍人數	▬ 255,135[13]（第21名）－2022年

日本國（粵拼：jat6 bun2 gwok3；日文：日本国／にっぽんこく／にほんこく ^{Nippon-koku／Nihon-koku */?}），簡稱日本（粵拼：jat6 bun2），係東北亞一個島國，地處太平洋，毗鄰中國、朝鮮半島、俄羅斯等，領土由北海道、本州、四國、九州同六千幾個小島組成。第二次世界大戰後頒布嘅日本國憲法規定日本司法、行政、立法三權分立，天皇得象徵意義，國家大權由內閣總理大臣（首相）同國會掌握。

日本經濟規模排世界第三，只係細過美國、中國，而且人均收入係先進國家水平。舊時佢學咗中國唔少嘢，明治維新後轉而向西方取經。經過好多代人嘅努力，而家佢喺亞洲以至世界政治、經濟同文化上，都有唔少影響力。

• 國旗：日之丸（白色底，中間有個紅色圓形，代表太陽）。
• 電壓：100V，50Hz（東部）／60Hz（西部）

由於日本響中國嘅東面，而太陽就響東面升起，所以古人就認為太陽係來自呢個東面嘅地方。日本人叫自己嘅國家做「日本」，係「太陽嘅根」嘅意思。日本有好多種古稱或者異稱，好似自稱嘅葦原中國（《古事記》、《日本書紀》）、水穗國（《古事記》）、瑞穗國（《日本書紀》）、大八洲國（《日本書紀》）、磯輪上秀真國、細矛千足國、玉垣內國（《神皇正統記》）、浦安國、藤根國（《詞林采葉抄》）、日出處、大和國、和州、大日本帝國等。中國亦都用過倭國、大倭國、倭奴國、倭人國、扶桑、蓬萊、東海姬氏國、東海女國、君子國、若木國、日東、日下、烏卯國、阿母鄉、東瀛、東洋等叫法。

• 繩文時代
• 彌生時代（約公元前300─約300)
• 古墳時代（大和時代）（約300─710）
• 奈良時代（710─794）
• 平安時代（794─1185）
• 鎌倉時代（1192－1334）
• 南北朝時代（1335－1392）
• 室町時代（1393－1575）
• 戰國時代（1467－1575）
• 安土桃山時代（織豐時代）（1576－1600）
• 江戶時代（德川時代）（1604－1867）
• 明治時代（1868－1911）
• 大正時代（1912－1925）
• 昭和時代（1926－1989）
• 平成時代（1989－2019）
• 令和時代（2019－）

秦朝秦始皇派徐福搵長生不老藥，據野史所講佢就係帶咗啲童男童女去到日本。

喺日本神話入面，太陽神天照大神嘅後裔神武天皇响公元前660年建立日本國，做咗天皇^[14]。今日嘅考古學證據發現，古代日本除咗原住民之外，其他都係由亞洲搬過嚟嘅各民族融合埋一齊嘅。大約喺公元前一萬年開始，日本進入新石器時期，又可以分做繩文時代同彌生時代。

1894年，日本吞併朝鮮，又逼朝鮮國王后請求皇軍將清國勢力趕出朝鮮半島。8月1號，日本向清國宣戰，打開咗中日甲午戰爭嘅戰幔。1895年2月，殲滅清國嘅北洋艦隊，4月17號同清政府晌日本馬關簽訂《馬關條約》。

1900年，日本派出咗2.5萬軍隊加入八國聯軍。嗰年8月14號，八國聯軍攻陷北京。

1904年參與日俄戰爭，重贏埋，攞晒俄國响東北地區嘅利益。

1916年8月13號，關東軍進駐鄭家屯，同奉天廿八師衝突，史稱鄭家屯事件。

1928年，日本進攻中國濟南。皇軍晌濟南姦淫擄掠，屠殺中國軍民五千幾人，是為濟南慘案。

第二次世界大戰嗰陣，日本係「軸心國」之一，目的係要喺東亞建立「大東亞共榮圈」。

1931年9月18號，關東軍炸咗瀋陽郊外柳條湖嘅「南滿」鐵路，老屈係中國做嘅，起勢咁進攻附近嘅北大營同瀋陽城，是為九一八事變。

1932年3月9號，日軍捧返滿清皇帝愛新覺羅溥儀出返嚟做傀儡皇帝，晌長春成立滿洲國，年號大同。1934年，滿洲國改稱滿洲帝國，改年號康德。

1937年7月7號，關東軍發起蘆溝橋事變（又叫七七事變），借口唔見咗個士兵，砲轟蘆溝橋，中國展開咗八年抗戰。嗰年12月，日軍佔領南京，即刻展開屠殺，中國政府估計話日軍殺咗30萬人，史稱南京大屠殺。

1941年12月8號，軍部首領、內閣總理大臣兼內務大臣、陸軍大臣東條英機發動偷襲夏威夷珍珠港嘅軍事暴行。9號，令原本表示中立嘅美國正式向日本宣戰。

1945年8月，美國掟咗兩粒原子彈落日本嘅廣島同長崎，15號，日本宣佈無條件投降，16號，裕仁天皇發放停戰詔書。9月2號，日本嘅外交同軍方代表喺投降書上面簽字，第二次世界大戰正式結束。之後，日本制訂和平憲法，入面嘅第九條就規定咗日本唔可以擁有軍隊。但喺1950年代日本嘅警察部隊逐步發展成一支專守防衛嘅自衛隊。

日軍喺第二次世界大戰嗰陣嘅暴行，令被日本侵略嘅一啲亞洲各國對日本有個幾壞嘅印象。

戰後嘅日本經濟迅速發展，呢段時期就叫「日本戰後經濟奇蹟」。日本喺韓戰後十幾年分別出現神武景氣、岩戶景氣等多次嘅經濟發展高潮。1956年12月18號，日本加入聯合國^[15]。1964年，東京成功舉辦奧運會，帶嚟咗奧林匹克景氣，同年日本加入經濟合作與發展組織，國內生產總值重喺其後4年超越英、法，德，成為咗全球第二大經濟體，正式躋身於先進國家之列^[16]。

1973年，第一次石油危機爆發，日本經濟增長每年得4%左右，低過六十年代初嘅9%，日本高速經濟成長時期宣告結束，但日本喺世界經濟體中仍然排第二^[17]。1990年代初期，日本泡沫經濟崩潰，經濟陷入長期不景氣階段。呢個時期失業攀升，國債同赤字龐大，加上1995年奧姆真理教發動嘅一系列恐怖攻擊同阪神大地震，社會陷入不安。進入21世紀初期，日本經濟透過向新興市場出口，出現小波段復甦嘅伊邪那美景氣^[18]，但係2008年發生全球金融海嘯，索尼同豐田呢啲指標性大企業紛紛爆出巨大虧損^[19]，被人叫做「失落的二十年」困境^[20]。

戰後嘅日本自1955年起長期由自民黨執政，因而出現「55年體制」^[21]，直到1993年由於部份自民黨黨員退黨，導致自民黨喺嗰年國會眾議院選舉後暫時冇咗組閣權約10個月，但係短短一年後自民黨同社會黨聯手，借村山富市內閣嘅組建重返執政地位^[22]。

2009年，執政共計長達54年嘅自民黨落台，但就嘅短短三年後，由於民主黨施政失當，加上福島核災令日本經濟再次跌落困境，造就自民黨再次上台嘅機會^[23]。2012年12月，自民黨攞到壓制性勝利，黨總裁安倍晉三重新上任首相。安倍晉三在任期間推行咗一大堆經濟改革措施，包括推動日圓貶值、實行量化寬鬆等^[24]，被稱為「安倍經濟學」^[25]，帶動日本產業出口量同國內消費需求攀升，令日本終於可以擺脫長達15年咁耐嘅通縮陰影^[26]，亦都令到失業率創6年新低^[27]，日經平均指數升到近六年高位^[28]。

地理上，日本位於北太平洋同日本海之間，中國東北面、朝鮮半島東面、俄羅斯東南面、台灣東北面。主要包括本州、北海道、九州、四國四大島域，再加上三千幾個小島組成，全國面積細過美國嘅加州少少。

而家日本同中國、俄羅斯、南韓呢啲國家有領土爭議，例如釣魚台（日本叫佢做尖閣諸島）。

日本係君主立憲國，憲法寫明「主權在民」，而天皇只係「日本國同人民團結嘅象徵」。同世界上多數君主立憲制度一樣，天皇響日本只係得元首嘅名義，並冇任何政治嘅實權。日本內閣總理大臣（首相）由國會選出嚟，天皇任命，作為政府首腦領導內閣。

日本係世界上主要嘅生產國，生產技術先進，生產規模亦好廣，工業範疇主要包括汽車、電子儀器、機械、鋼鐵、造船、化工、成衣、食品同埋演藝（譬如動漫同成人電影）。

日本人信奉好多宗教，重要嘅有本土嘅神道敎，崇拜自然，將自然萬物視為神，重有經海路傳入嘅佛敎，呢兩個宗教共佔84%。基督敎曾經有過相當之多嘅信徒，因為葡萄牙嘅天主敎傳敎士喺16世紀嚟到日本，主要響九州一帶宣道。不過經過幕府鎮壓，而家敎徒唔夠三百萬。當代最大嘅日本新宗敎團體係創價學會。

• 北海道
  • 札幌、函館、知床、富良野、新雪谷（二世古）
• 東京
  • 東京鐵塔、芝公園
  • 澁谷、原宿、銀座、池袋、新宿、六本木、秋葉原（東京嘅購物中心）
  • 臺場、富士電視台、彩虹大橋
• 千葉
  • 東京迪士尼樂園(日本最多人嘅樂園)
• 神奈川
  • 橫濱、箱根、熱海、鎌倉
• 栃木
  • 日光
• 靜岡
  • 富士山（全國最高嘅睡火山，海拔3776米）
• 愛知
  • 名古屋
• 京都
• 大阪
• 奈良
• 兵庫
  • 神戸、姬路城
• 廣島
• 福岡
• 熊本
• 長崎
• 沖繩
• 縱橫交錯嘅鐵路系統（日文：鉄道）

日本首都係東京都（通稱東京），亦係世界上最大都市圈。東京都23個區人口去到2012年中大約有900萬人，成個東京都人口大約有1323萬人，用東京都做中心，包埋神奈川縣、埼玉縣、千葉縣嘅首都圈人口有大約3670萬人咁多。日本嘅皇居、國會議事堂、內閣、最高裁判所、各省廳、各國駐日大使館、大企業本部、日本銀行、証券公司、百貨店、報社同電視台都集中響東京。

計埋東京，日本一共有12個城市人口超過咗一百萬，當中除咗川崎市之外，其他全部都係都道府縣廳嘅所在地。

2010年 總務省人口統計[29]	城市	行政區	區域	人口數	人口密度 每平方公里
1	東京	東京都	關東地方	8,949,447	14453
2	橫濱市	神奈川縣	關東地方	3,689,603	8414.8
3	大阪市	大阪府	近畿地方	2,666,371	11902.5
4	名古屋市	愛知縣	中部地方	2,263,907	6922.2
5	札幌市	北海道	北海道地方	1,914,434	1700.2
6	神戶市	兵庫縣	近畿地方	1,544,873	2768.2
7	京都市	京都府	近畿地方	1,474,473	1770.0
8	福岡市	福岡縣	九州及沖繩地方	1,463,826	4244.3
9	川崎市	神奈川縣	關東地方	1,425,678	9710.0
10	埼玉市	埼玉縣	關東地方	1,222,910	5450.3
11	廣島市	廣島縣	中國地方	1,174,209	1230.0
12	仙台市	宮城縣	東北地方	1,045,903	1300.8

1964年東京舉行夏季奧林匹克運動會，係奧運會第一次喺亞洲舉行。

1972年札幌舉行冬季奧林匹克運動會，亦都係第一次喺亞洲舉行嘅冬季奧運會。除咗之外，1998年長野又舉行冬季奧運會。

2002年日本同南韓一齊主辦世界盃，係世界盃第一次喺亞洲舉行，亦係第一次由兩個國家合辦。

日本職業足球聯賽（J-League）自從1993年5月開始啟動，分J1、J2兩級，參賽球會包括鹿島鹿角、名古屋八鯨、F.C.東京、磐田山葉、橫濱水手、清水心跳、浦和紅鑽、大阪櫻花等等，由於歷年嚟吸引咗唔少國腳級嘅球員效力，歷史短短但係已經發展成為東亞地區較為成功嘅職業足球聯賽之一。

而本身起源於日本嘅體育活動包括相撲、柔道、劍道同空手道等等。國內比較受歡迎嘅體育活動就包括足球、棒球、馬拉松等等。

日本喺大型國際綜合運動會嘅成績
賽事	金牌	銀牌	銅牌	總數	亞洲排名	全球排名
夏季奧運會	130	126	142	398	2	13
冬季奧運會	9	13	15	37	3	17
亞洲運動會	910	913	835	2658	2	-
世界運動會	37	29	43	109	2	8
夏季大運會	240	238	299	777	2	4
冬季大運會	72	76	74	222	2	4
室內運動會	19	18	26	63	9	-
夏季青奧會	8	5	3	16	3	7
冬季青奧會	2	5	9	16	3	8
亞洲冬運會	111	123	89	323	1	-
亞洲武運會	9	2	3	14	5	-
世界武運會	6	12	7	25	2	6
沙灘運動會	6	7	8	21	6	-
亞洲青運會	5	6	4	15	6	-

日本嘅交通以公路、鐵路同水路為主。各種交通運輸方式嘅技術水平同運輸量都係世界前列——鐵路同航空運量排全球頭三位，港口數量亦都好多，係世界海運大國。首都東京係日本公路、鐵路、水路同航空總樞紐，亦係世界重要嘅航空港同港口。東京地下鐵係世界上流量最大嘅地下鐵系統。日本重係世界上最多地下街嘅國家。

• 壽司（鮨、鮓、すし）
• 生魚片（魚生/刺身/沙西米）（さしみ）
• 麵食，包括日式拉麵、日式炒麵、蕎麥麵、烏冬麵、素麵、沖繩麵等等
• 火鍋，包括斯蓋瓦蓋、力士火鍋、砂煲砂煲、石狩鍋、湯豆腐等等
• 京風料理，包括懷石料理、有職料理、精進料理等等
• 日式串燒、爐端燒
• 天麩羅
• 日式咖喱
• 炸豬扒、炸肉串、炸大蝦等
• 鐵板燒
• 日式餃子
• 街頭小食，包括關東煮、御好燒、燒八爪魚丸、團子、糯米粢等等
• 綠茶、玄米茶等

和服，日本嘅傳統衫

• 地震
  • 1730年北海道地震
  • 1896年三陸地震
  • 1923年關東地震
  • 1994年八戶地震
  • 1995年阪神地震
  • 2007年能登半島地震、新潟縣中越沖地震
  • 2011年日本東北地震
  • 2016年熊本地震
  • 2024年能登半島地震
• 海嘯
• 颱風
• 雪害

• 日本皇室

官方

• 內閣府
• 宮內廳
• 總務省統計局
• 外務省
• 眾議院
• 國會圖書館

媒體

• NHK
• 共同社
• 讀賣新聞
• 産経新聞
• The Japan Times
• 中日之窗

觀光

• 日本國家旅遊組織
• 日本旅遊資訊-日本呦
• 日本旅遊

其他

• 〈国家概况 — 中华人民共和国外交部〉 (簡體中文)。中華人民共和國外交部。
• 〈日本 Japan - 亞太地區 - 中華民國外交部 - 全球資訊網 Ministry of Foreign Affairs, Republic of China (Taiwan)〉 (繁體中文)。中華民國外交部。
• "Japan - United States Department of State" (英文). 美國國務院.
• 日本喺中央情報局《世界概況》嘅資料 （英文）
• "Japan - Department of Foreign Affairs and Trade" (英文). 澳洲外交貿易部（英文：Department of Foreign Affairs and Trade (Australia)）.
• 《大英百科全書》日本專題（英文）
• Guardian Unlimited—「特別專題：日本」
• 古騰堡計劃：日本政府嘅作品，包括1889年同1946年憲法
• 日本影片-儲存日本當地嘅相關影片