Avatår, li dierin mwaisse di l' air (fime d' imådjes)

Pol discramiaedje des årtikes avou l' mot « Avatår », loukîz cial.

Avatår, li dierin mwaisse di l' air (co pus sovint lomé courtinnmint: Avatår), c' est on fime d' imådjes veyåve a môde di fouyton so sacwants waibes di strimigne.

C' est on produjhaedje amerikin (da Michael Dante DiMartino and Bryan Konietzko) mins ki trevént dins on cotoû aziyatike.

• 
  Dante DiMartino
• 
  Bryan Konietzko

Elle a rexhou sol tchinne di tévé estazunyinne «Nickelodeon» troes anêyes å long, do moes d' fevrî 2005 å moes d' djulete 2008. Mins nerén, so les varyistés francès-cåzantes d' èç tchinne inla, cisse fime d' imådjes ci a stî rexhou disk' al atake del dijhnêye 2010.

C’ est l’ istwere di cwate peupes, li ci d’ l’ Aiwe, li ci d’ l’ Air, li ci del Tere et li ci do Feu. C' est don on vicant rprezintaedje des cwate elemints.

Li tinme est håyné al prumire secwince: les cwate peupes viként e påye. Mins a on metou moumint, li peupe do Feu a yeu l’ idêye di fé l’ guere ås ôtes. Gn aveut k’ ene djin capåbe di mete ahote a ces margougnaedjes la. C’ esteut Avatår (on l’ voet ki håsplêye tot ådzeu d’ on hôt tiene dins l’ epizôde d’ adrovaedje). Mins nerén, tot d’ on côp, il a disparexhou.

Li peupe di l’ Air a stî pår dizindjné dins les macsådreyes des cis do Feu. I n’ dimeure pus k’ ene mierdjin po l’ riprezinter, c’ est djustumint nost « Avatår ». C’ esteut co èn efant d’ 10 ans, adon, et il a stî schapé pask’ i s’ a rtrové edjalé dins èn isbiè. Cwand il a rligné, i n’ aveut todi k’ 10 ans. Mins, di sogne ki les cis do Feu nel volénxhe apicî, i s’ fwait lomer Ink.^[1]

• 
  djouwant Ink
• 
  djouwant on guerî do feu
• 
  djouwant Kitara

Avatår est ricnoxhou pa les cis do Feu, ey esse fwait prijhnî. Mins i parvén a schaper, tot s' enûlant disca padrî les guerîs do Feu ki l' volét broûler tot hinant des blames sol lu.

Kitara^[2] et s’ fré, c' est des efants do peupe di l' Aiwe. Leu mame a stî touwêye al guere. Mins l’ glawene a-st erité do don di cmander a l’ aiwe. Metans : fé monter des boles d’ aiwe dins l’ air (avou on pexhon dvins). Si pout ele fé del glaece cwand ele vout.

Avatår est avou Kitara et s' fré, et i les moenne a l' ancyin timpe des cis d' l' Air, la k' i toumèt so ene posteure do grand mwaisse ki l' aveut scolé. On l' rivoet k' aprind tos les toûs po mwaistri l’ air, li shofler pouxhanmint, et s’ enûler avou.

Nickelodeon aveut eto fwait ene shûte d' èç fime d' imådjes dins les anêyes 2010, ki s' lome : Li ledjinde di Korra.^[3]

Tecse sol fime (d' après Souzane Mahin), so Wikisourd, riprins del Li Rantoele l° 97, bontins 2021.

I gn a so les cmons Wikipedia des imådjes ou fitchîs son a vey avou ç' fime la .

1. ↑ «Aang» dins l' mwaisse modêye, riscrît insi pa Souzane Mahin, shuvant l' prononçaedje, a môde ortografike do walon.
2. ↑ «Katara» dins l' mwaisse modêye, ribatijhaedje pa Souzane Mahin a pårti do prononçaedje dins l' ratournaedje e-n arabe (li voyale divantrinne «i» dene del ledjirté a ç' persounaedje femrin la (estô des troes «a (parfonde voyale)») del mwaisse alomåcion.
3. ↑ https://fr.wikipedia.org/wiki/La_Légende_de_Korra