De Europese Unie es een polletiek-economische êeneid van 27 verschillende landn in Europa. De Unie es't er gekoomn achter de Twiddn Weireldôorloge om de vrede in Europa te bewoarn, en es geleidelik an uutgegroeid tot êen van de belangrikste economische machtn in de weireld.
Europa, moe van ol dat ge-oorlog en gestook, besloot om mêer soamn te weirken. Uut die intentie es de Europese Unie onstoan by de oundertêkenienge van et Verdrag va Rôme ip 25 moarte1957. Da verdrag wos oundertêkend deur 6 landn: de 3 Benelux-landn (België, Luxemburg en Olland), Itoalië, Vrankryk en West-Duutsland. 't Wos gin toeval da die landn tôpekwaamn, omdat ze in 1952 ol de Europese Gemêenschap vo Kooln en Stoal (EGKS) oan gevormd. Et verdrag va Rôme zorgde in êeste instantie vo de iprichtienge va de Europese Economische Gemêenschap (EEG), dus de noadruk lag nu ip de hele economie.
1967: Der weird beslist om de drie aparte organisoaties (EEG, EGKS en Euratom) soamn te voegn en de noame Europese Gemêenschap (EG) te gebruukn.
1993: In werkienge tredienge van et Verdrag van Maastricht, goegekeurd in 1992, weirdn de bevoegdeedn van de EG verder uitgebreid. Vanof ton klappn we van de Europese Unie (EU). Êen van de belangrikste beslissiengn wos et invoern van een gemêenschappelikke munte, en et invoern va een begrôtiengsdiscipline, de Moastrichtnorm genoamd. Die bepoalt da een land, om dêel uut te meugn moakn van de Economische Monetaire Unie (EMU), et begrôtiengstekort nie boovn de 3% van et Bruto Binnenlands Product (BBP) mag loatn koomn, en dat de totoale schuld nie mêer mag bedroagn dan 60% van et Bruto Nationoal Product (BNP).
