කෝමද මේ දවස්වල දවල්ට රස්නේ...සනීපයිනේ..ඉරිදා ගෙදර ඉන්නකොට දවල්වෙද්දී ටික ටික රත්වෙන්න ගත්තා.කරුමෙට ගෙදරටම තියෙන්නේ ෆෑන් එකයි.දැන් ඉතින් මේ හදිසියට කොහෙන් ෆෑන් හොයන්නද...ඔහොම හිතනකොට තමයි මතක් වුනේ අපේ ගෙදර ඉස්සර තිබිච්ච National ෆෑන් එක.කලින් හොදට වැඩකලත් ටික කාලෙකට ඉස්සර වැඩ කරන්නැතුව ගිය නිසා පැත්තකට දාලා ගබඩා කාමරේ මුල්ලක තියලා තිබුනා.මේක හදලා ගන්න පුලුවන්නම් හරිනේ කියලා හිතුනු නිසා ඔන්න මං වැඩේට අත ගැහුවා.ෆෑන් එක ඒකෙ පාදමෙන් වෙන්වෙලා තිබුනේ.මං ඒකයි මගේ අඬුමිටි ටිකයි අරන් අපේ ගෙදර ගරාජ් එකට ගියා.ඔන්න තියෙනවා මහා ෆෑන් රාජයා තිබුණු විදිහ....



පේනවනේ ගොඩ දාන්න තියා හිතන්නත් අමාරුයි.ඒත් එහෙම කියලා පුළුවනෑ.මේක මුලින්ම මස් කරලා ඉන්නෙපයි..මම වැඩේට බැස්සා...



වැඩේ ලේසි නෑ..ඒත් අත ඇරියෙත් නෑ....

ඔන්න ඔහොම මුලින්ම ඔළුව ගලොගත්තා.දැන් බලමුකෝ කඳ පැත්ත.වයර් දිරලා,බල්බ් පිච්චිලා.දන්න ඉලෙක්ට්‍රොනික් දැනුමෙන් මදේ හදාගත්තා.ආ...ඊට කලින් ගෙදර ළඟ හාඩ්වෙයාර් එකෙන් වයර්නුයි,බල්බ්නුයි ගෙනාවා.....



දැන් කඳ පැත්ත හරි නිසා ඔළුව පැත්ත බලමු.ඔළුවේ ඉතින් වැදගත්ම මොලේනේ.මං ඉතින් ඔපරේෂන් එකෙන් ෆෑන් එකේ මොලේ [මෝටරේ]එලියට ගත්තා.මේ තියෙන්නේ ඒක...



දෙය්යන්ගේ පිහිටෙන් ඒක වැඩ.ඒක නිසා ලොකු බරක් හිතෙන අයින්වුනා.නැත්නම් වැඩේ ඔක්කොම වතුරේ....ඒ අතරේ ෆෑන් එකේ අතපය මූණ එහෙම හෝදලා හොදට අව්වේ වේලා ගත්තා...



දැන් ඉතින් අත පය හයිකරගන්න තමයි තියෙන්නේ.ඔන්න මුලින්ම කකුල පැත්ත හයිකරා...



හොදටම මලකඩ කාලා නේ...ඇල්ලුවා වැලිකොලයක්...දුන්නා පොඩි ස්ප්‍රේ පේන්ට් පාරක්...
කෝමද ලස්සන...

දැන් කොහොමද.....

දැන් ඉතින් කොහොම වුනාම මොකද.අපිට ඕවා වලක්වන්න බෑනේ.අපි කිව්වය කියලා ඕවා වෙනස්වෙන්නෙත් නෑ.ඇමෙරිකාවේ ජනාධිපතිකමට බ්රූස් ලී පත්වෙනකොටම අපි ඕක හිතුවා.මොකද අපේ රටෙත් නැහැනේ හරි හැටි කතාවක් කරගන්න එකෙක්.ඔන්න ඉතින් හූ ජින්තාවොනම් නම් ඉන්නවා.මිනිහා මහනුවර නගරසභාවට ඉල්ලනකොට අපි හිතුවේ නෑනේ මෙහෙම දෙයක්වෙයි කියලා.අනිත් එක මං අහන්නේ අපේ මිනිස්සුන්ට මොලයක් නැද්ද ඔය තුට්ටු දෙකේ ගායකයෝ පස්සේ යන්න.හොදට සින්දු කියන්න ඇහැකි වුනු පලියට මන්මෝහන්සින් හිතං ඉන්නේ ඌ තරම් පොරක් තවත් මේ ලෝකේ නෑ කියලා.වෙලාවට ස්ටීවන් ස්පිල්බර්ග් ටයිටැනික් හැදුවේ.නැත්නම් ඉතින් අපිට වෙන්නේ ඊලග අවුරුදු 6 ත් පිටසක්වල ජීවියෙක් එක්ක ගනුදෙනු කරකර ඉන්න.අනිත් එක මං අහන්නේ පාරේ හෙළුවෙන් දිව්වාය කියලා සොක්‍රටීස්ට පුළුවන් වුනාද ගුරුත්වාකර්ශනේ මගහැරගන්න.ඔන්න ඕකයි මං හැම තිස්සෙම කියන්නේ.හැබැයි එතනදී මං මැන්ඩේලාත් එක්ක එකගයි.මිනිහා කාර් එක හොයා නොගන්න අපිට වෙන්නේ පොලවේ පස් කකා ඉන්න.මං තාමත්....

මට පේන්නේ ඔහෙට.......

අපිට වැඩිපුර කතාකරන්න ඇස් දෙකකුත් චුට්ටක් බලන්න එක කටකුත් දීල තියෙන්නේ නිකමට නෙවෙයි.ඕකෙන් හරි ප්‍රයෝජනයක් ගත්තු මිනිහෙක්ට මං දැකලා තියෙන්නේ අයින්ස්ටයින් විතරයි.මිනිහා ඉස්කෝලෙන් අවුට් වුනුදා ඉදලම සීටීබී එකේ වැඩට ගිය හින්දා මිනිහට පුළුවන් වුනා හයියෙන් දුවන්න.මිනිහත් එක්ක කරට කර හිටියේ ඉතින් අපේ ජේම්ස් බොන්ඩ් විතරයි.මිනිහා අර පහළවෙළේ පින්ලිඳ ගාව නාන්න එන ගෑනු දිහා හොරෙන් බලන හිටියා තමයි.ඒත් ඉතින් එහෙම හිටියාය කියලා  අපිට පුලුවන්ද රුසියන් කාරයෙක්ට පරදින්න.ලංකාවයි එංගලන්තෙයි අතරේ තිබිච්ච එල්ලේ තරගෙකදී නරබන්නෙක් දමාගසපු සෙරෙප්පුවක් වැදිලා චේ ගුවේරට හොදටම අමාරුලු.මේක අහපු ගමන් හරිහමන් මිනිහෙක්නම් මං කියන්නේ ෂර්ලොක් හෝම්ස්ට තිබුනේ නැද්ද තමන්ගේ ගෙදර තාප්පේ ටිකක් උස් කරලා හදාගන්න.අපි කිව්වොත් තමයි ඉතින් හැමෝටම අමාරු.මේක කිව්වේ.....

කට පොඩ්ඩක් වහන්.....

කට පොඩ්ඩ පොඩ්ඩ දාගෙන තමයි ඉතින් හැම එකාම මේක අස්සේ රිංගන්න එන්නේ.මුලින්නම් හිටියේ නිව්ටනුයි,ජයසුරියයි විතරයි.ඒක දැකපු හැම එකාටම ඕන වුනා චර්චිල්වගේ වෙන්න.අනේ ඉතින් මේ වෙලාවට තමයි හිතෙන්නේ චාලි චැප්ලින් හිටියනම් කියලා.එහෙනම් මේ ඔක්කොම සුන්නද්දූලි වෙන්න ගහලා.මිනිහටත් ඉතින් ඉන්න බැරිවුනානේ බොම්බයි මොටයි නොකා.මං අහන්නේ බඩිගින්නක් තිබුණු පලියට මොන මිනිහද කුඹුරට තෙල් ගහන්න යන්නේ.ඔන්න ඉතින් මේ ගිය සතියෙත් මං දැක්කා රයිට් සහෝදරවරු අපේ ගෙවල් ගාව පෝස්ටර් වගයක් අලව අලවා ඉන්නවා.ඉගෙනගත්තට වැඩක් නැහැනේ අපිට පාඩුවේ ඉන්න නැත්නම්.මහලොකු ඩිග්රි නොගැහැව්වට පොල්පොට් කියන්නෙත් ලේසිපාසු මිනිහෙක් නෙවි.නැත්නම් මං අහන්නේ එක දවසට පොල්ගස් සීයක ගෙඩි කඩන්න පුළුවන් මොන මිනිහටද.ඕවා කිව්වමනම් අපි ඉතින් නරක මිනිස්සු වෙන්නත් පුළුවන්.හැබැයි ඉතින් එහෙමවුනාය කියලා අපි ලෙනින්ව අමතක කරලා දාන එක වැරදි.මිනිහා නොහිටින්න ගමේ පාරට කොන්ක්‍රීට් ටිකවත් වැටෙන්නේ නැහැනේ.ඔන්න ඕකයි මං හැමතිස්සෙම.........

ගිය සතියට සාපේක්ෂව තත්වේ......

සාපේක්ෂතාවාදේ ඉදිරිපත් කරනකොටම ඔහොමවෙයි කියලා මම ලින්කන්ට කිව්වා.කොහෙද මිනිහා ඕවා ඇහුවේ නැහැ නොවැ.එයයිත් එක්ක හිටපු මයිකල් ජෝර්ඩනුයි,සිල්වෙස්ටර් ස්ටලෝනුයි ගිය සතියේ ආගිය අතක නැතිළු.ඕක කියාගෙන පාරේ දිගේ යනවා කියලා පරණවිතාන මහත්තයා මට ටෙලිපොන් කරලා හොදට දොස් කිව්වා.හැබැයි ඉතින් මං කියන්නේ උද්දමනය ඉහලගියයි කියලා අපි මහවැලි ගඟේ ඔරු පදින්න යන එක වැරදි.මොකද බැරිවෙලාවත් ඇන්ජලීනා ජොලී දැක්කොත් ඕවා කොහෙන් කෙලවර වෙයිද කවුද දන්නේ.අනේ අපිටනම් බැහැ ඕවාට වගකියන්න.මං කවුද කියලා ඇහුවොත් හොදට අහගන්න ඇහැකි කපිල් දෙව්ට කතාකලොත්.පොඩි කාලේ ඉදලම එයයි මායි ඉස්පිතාලේ ලග තැඹිලි කපලා විකුන්නා.ඒවා විකුන්නය කියලා අපිට පානුයි කිරිහොදියි නොකා ඉන්න බෑනේ.මං කාල තියෙන රසම කට්ට සම්බෝලේ හදලා දුන්නේ මැඩෝනා.එයයිගේ අතින් උයාපු කෑමකට ලංවෙන්න තියා.........

හිතුවට වඩා බොහොම බරපතල....

බරපතල රෝගේ ඇතිකරන කෘමියා හොයාගත්තය කියලා ඇරිස්ටෝටල්ට නොබෙල් සාම ත්‍යාගේ දුන්න එකටනං මං එකෙන්ම විරුද්ධයි.මෙහෙම හිටියට අපිත් කවදාවත් හිට්ලර්ට දෙවනිවුණු මිනිස්සු නෙවෙයි.එයයිට කවදාවත් බැරිවුනා අපි තරම් හොදට හඳට ගල්ගහන්න.මං කිව්වය කියලා කාටවත් කියන්න යන්න එපා,ඔය ඇලන් බෝඩර් ඉන්නවා නේද ..අප්පෝ මහා කුණා.තමන්ගේ ලග ඉන්න කිරිහරකෙක් ඉල්ලපු ලුවී පාස්ච්ර්ට මිනිහා නොසෑහෙන්න අපහාස කරලා තියෙනවා.ඕක ඉතින් දෙමව්පියන්ගේ වැරැද්ද.පොඩි කාලෙම පාරේ වමෙන් ගමන් කරන හැටි පොඩිවුන්ට කියලා දෙන එක තමන්ගේ යුතුකමක් කියලා මොහොමඩ් අලි කවදාවත් හිතුවේ නෑ.එහෙම හිතුවනම් පිදෙල් කස්ත්‍රෝ කවදාවත්ම හොදම නළුවා වෙන්නේ නැහැ.නළුවෝ ඉන්නේ ඉතින් දේශපාලනේ කරන්නනේ.
මං හැම තිස්සෙම කියන දෙයක් තමයි එක්සත් ජාතික පක්ෂේ නායක කමනම් වෙනස්වෙන්න හොද නෑ කියන එක.ඒ වගේ ලෝකේ පිළිගන්න නායකයෙක් අපිට වෙන ඉන්නවද.චන්ද 27ක් පැරදුනා කියලා නායකයා වගකියන්න ඕන කියන අයගේ මොලේ තියෙන්නේ කොහෙද කියලා හොදට හොයලා බලන්න ඕන.අනිත් එක ලෝකේ මොන රටේද චන්දයක් පැරදුනා කියලා පක්ෂේ නායකයාට බනින්නේ.මමනම් කියන්නේ සදාකාලික නායකයා විදිහට රනිල්.....

නර්ස්...මේ ලෙඩාගේ තත්වෙනම් එන්න එන්නම නරක අතට හැරෙනවා.විකාර කියවන එක හොදටම වැඩි.ඒකනිසා මම ගිය සතියේ නියම කරපු බෙහෙත්ම තුන්ගුණයක් කරලා දෙන්න......

ඔන්න ඉතින් කාලෙකට පස්සේ චිත්තරපටියක් ගැන විස්තරයක් දෙන්න හිතුනා.අද මං කියන්න යන්නේ Shawshank Redemption චිත්‍රපටිය ගැන.මේක බලපු අයත් ඉන්න පුළුවන්...කතාව ටිකක් කියන්නම්කො....

Andy Dufresne කියලා බැංකුවක වැඩකරන කෙනෙක් තමන්ගේ බිරිඳ සහ ඇයගේ අනියම් සැමියා මරා දැමීමේ වරදට ජීවිතාන්තය දක්වා සිර දඬුවමකට ලක්වෙනවා.කතාව පටන් ගන්නේ එතැනින්.ඉතින් මෙහෙම හිරගෙදරට එන Andyට හමුවෙනවා හොද යහළුවෙක්.ඔහුගේ නම red.එයාගේ විශේෂත්වය වෙන්නේ ඔහුට තියෙනවා බලධාරීන්ට හොරෙන් හිරගේ ඇතුලට යම් පොඩි පොඩි දේවල් ගෙන ඒමේ හැකියාවක්.ඉතින් ටික දවසකින් මේ Andy සහ red හොඳ යහළුවෝ වෙනවා.

Andy ගේ ප්‍රියතම විෂයක් තමයි භූ විද්‍යාව.ඒ වගේම ඔහුගේ ප්‍රියතම ක්‍රීඩාව වෙන්නේ චෙස්.ඉතින් red ට කියලා පොඩි ගල් කැටයම් කරන මිටියක් ගෙන්නා ගන්න Andy ඒකෙන් චෙස් ඉත්තෝ කපන්න පටන් ගන්නවා.මේ අතරේම Andy සහ red වටා යහලුවෝ ටිකකුත් එකතුවෙනවා.මේ අතරේ Andyට නොසිතුවිරු ඉරණමකටත් ගොදුරුවෙන්න සිදුවෙනවා.හිරේදී තමන්ට පැමිණෙන හැම බාදකයක්ම ජයගන්න Andy සමත්වෙනවා.ඒ වගේම තමන්ගේ සහෝදර හිරකරුවන්ට පොත් කියවන්න පුස්තකාලයක් ඇති කරන්නත් Andy සෑහෙන්න මහන්සි වෙනවා.මේ අතරේම තමන්ගේ බැංකු දැනුම යොදවලා හිරගෙදර පාලකයා සහ ජේලර්ලා අල්ලගන්නත් Andy සමත් වෙනවා.

ඒත් ඉතින් Andy ගේ බැංකුකටයුතු පිලිබඳ දැනුමත් ඔහුගේ නිදහසට සීමාමායිම් ගෙන එනවා.මේ විදිහට අවුරුදු 20 ක් විතර ගතවුණු තැන එක දවසකදී Andy හිටිහැටියේම අතුරුදහන්වෙනවා කාටත් හිතාගන්න බැරිවිදිහට.ඇත්තටම Andyට වුනේ මොකක්ද කියලා දැනගන්නනම් ඔයාලට ෆිල්ම් එක බලන්නම වෙනවා. 

මෙහි andy ගේ චරිතයට පනපොවන්නේ Tim Robbins විසින්. මේ චිත්‍රපටියේ විශේෂත්වයන් කිහිපයක්ම තියෙනවා.එකක් තමයි මෙහි කිසිම දෙයක් අතිශයෝක්තියෙන් දක්වලා නොතිබීම.හිරගෙදරක [ලංකාවේ ආකාරයට නොවේ] සාමාන්‍යයෙන් දක්නට ලැබෙන සමලිංගිකත්වය,සැර පරුෂ ජේලර්වරු මෙහි දක්නට පුළුවන්.අනිත් එක තමයි අපි අවසානෙදි වෙන්නේ මොකක්ද කියලා අපිට හිතාගන්න බැරිවීම.මොකද අපි හැමදේම දැක්කත් Andy ගේ සිතුම්පැතුම් අපිට තේරුම් ගන්න බැහැ.චිත්‍රපටිය බැලුවොත් ඔයාලටත් ඒක තේරේවි.මේ චිත්‍රපටිය ගලායන්නේ red ගේ මතකය අවදිකිරීමක් විදිහට.සුප්‍රකට නළු Morgan Freeman තමයි red ගේ චරිතයට [narrator] පනපොවන්නේ.ඔහුගේ ගැඹුරු කටහඬ චිත්‍රපටියට එකතුකරන්නේ අමුතුම ශක්තියක්.

අනිත් එක තමයි සැලකියයුතු කිසිදු සම්මානයක් දිනා නොගත්තත් මේ චිත්‍රපටිය මේ වෙනකොට IMDB සිනමා දර්ශකයේ මුල් ස්ථානය දිනාගෙන ඉන්නෙත් මේ චිත්‍රපටිය.ඇත්තටම කියවනම් ඒකෙ පුදුමවෙන්න දේකුත් නෑ කියලා ඔයාලට මේ චිත්‍රපටිය බැලුවාම තේරේවි.මේක මාත් මේ වෙනකල් බලලා තියෙන හොඳම චිත්‍රපටිය කියලා මටත් බයනැතිව කියන්න පුළුවන්.ඉතින් ඒක නිසා මං ආරාධනා කරනවා බලලා නැති අයට මේ චිත්‍රපටිය බලන්න කියලා....

මෙතනින් ගිහින් චිත්‍රපටිය බාගන්න පුළුවන්.....[360 mb විතර]

චිත්‍රපටියේ trailer එක...



ගෙහුං එන්නං ..ටටා...

ඒ 1891 වර්ෂයේ ජනවාරි මාසයේ දිනයක් බව මාගේ සටහන් පිරික්සා බැලුවිට මට පෙනීයයි.කවුළුවෙන් පිටත බලාගෙන සිටි මාහට බේකර් වීදියේ එහා මෙහා යන මිනිසුන් පෙනුනේ එක්වරම මීදුමෙන් මතුවී මීදුමේම සැගවී යන අවතාර මෙනි.මේ හෝම්ස් සහ මා ගතකල ඉතාමත්ම අවිවේකී කාලයක් බව මට සිහිකළ හැකිය.වසර කිහිපයක්ම එකදිගට පරීක්ෂණ කටයුතුවල නියුතුවීම හෝම්ස්ගේ ශරීර සුවතාවයටනම් කෙසේවත් සුබදායී ලෙස බලපෑවේ නැත.අවසානයට අපි යෙදුනු පරීක්ෂණ වුයේ රතු හිසකෙස් කල්ලියේ ගැටලුව,නිල දියමන්ති අභිරහස සහ කොපර් බීච්ස් සිද්ධියයි.

"ඔබ හරි වොට්සන් ,මේ මීදුමයි මගේ අසනීප තත්වෙනම් මොරියාටිලාට අපරාධවල යෙදෙන්න හොදම කාලයක්" තමන්ගේ කාමරයෙන් පිටතට පැමිණෙමින් හෝම්ස් කිව්වේය."දෙය්යෝ සාක්කි හෝම්ස්,කොච්චර අසනීප වුනත් ඔබේ නිරීක්ෂණ හැකියාවනම් පොඩ්ඩක්වත් අඩුවෙලා නෑ"නැත්නම් මේ වෙලාවේ මගේ හිතේ පතුලේ තිබුණු අදහස කොහොමද ඔබ එකපාරටම කිව්වේ....

ඒක හරි සරලයි වොට්සන්,මං දැක්කා ඔබ දැන් සෑහෙන වෙලාවක් තිස්සේ කවුළුවෙන් පිටත බලාගෙන හිටියා ඊට පස්සේ ඔබේ දෑස යොමුවුණේ ඊයේ අපි හාර්ලි වීදියේ සර්වාංග වෛද්‍ය ජෙනින්ග්ස් හමුවෙන්න වෙලාව වෙන්කරගත් කාඩ්පත වෙත,ඉන්පස්සේ ඔබේ දෑස යොමුවුණේ පොත් රාක්කයේ මං සකස්කරලා තියෙන අපරාධකරුවන්ගේ සුචියේ M අකුර තියෙන පොත දිහාවට.ඉතින් මේ ඔක්කොම දැකලත් ඔබේ හිතේ තිබෙන අදහස කියන්න බැරිනම් මම ඇත්තටම අදක්‍ෂයෙක්.

ඉතින් දැන් අපේ නිරීක්ෂණ නවත්තලා අපි යමු  දොස්තර ජෙනින්ග්ස් හමුවෙන්න.මං කතාකල අශ්ව කරත්තයත් දැන් ටිකකට කලින් ආවා.අනික මේ අධික ශීතල සහිත මීදුමේ පයින් ඇවිදගෙන යන්න පුළුවන් තත්වෙක ඔබ කොහොමටවත් නෑ.

මාගේ බලවත් පෙරැත්තය නිසාම වෛද්‍ය පරීක්ෂණයට යෑමට අවසානයේදී හෝම්ස් එකගවිය.වෛද්‍ය ජෙනින්ග්ස් විවිධ පරීක්ෂණ රැසකට පසු අප අමතා මෙසේ පැවසීය.හෝම්ස් මහතාට බරපතල රෝගාභාදයක් වැළදිලා නැතිබව මට කියන්න පුළුවන්.ඒත් පහුගිය කාලයේ දිගින් දිගටම අවිවේකීව සිටීම,නිදි මැරීම සහ ශරීරයට කොකේන් එන්නත් කරගැනීම නිසා ස්නායු පද්ධතියනම් දැඩි කම්පනෙකට පත්වෙලා තියෙන්නේ.ඒක නිසා මනසට අවශ්‍ය විවේකය ලබානොදුන්නොත් ඔබේ ජීවිතේට පවා අවධානමක් තියෙනවා.

තවදුරටත් දොස්තර ජෙනින්ග්ස් පැවසුවේ බෙහෙත් ගන්නවාට වඩා දීර්ඝ මුහුදු ගමනක යෙදිය හැකිනම් එය හෝම්ස්ගේ ස්නායු කම්පනය යථා තත්වයට ගනු ඇති බවයි.බේකර් වීදිය දක්වා අපේ ආපසු ගමන තනිකරම වාදවිවාද වලින් පිරී තිබුණි.කෙසේනමුත් අවසානයේදී මුහුදු ගමනක යෙදීමට හෝම්ස් එකග කරවාගැනීමට මම සමත්වීමි.

වැඩි දවසක් නොගොසින්ම ලන්ඩන් වරායෙන් "Duke Argyll" නම් වාෂ්ප නැවෙන් ඈත පෙරදිග සිලෝන් දක්වා යෑමට අපි නැව් නැග්ගෙමු.ඉන්දියන් අර්ධද්වීපයට පහලින් පිහිටි කුඩා දූපතක් වුනු සිලෝන් එවකට කවුරුත් හදුනාගෙන සිටියේ "ලිප්ටන්ගේ තේ වත්ත" නම් අන්වර්ථ නාමයෙනි.කලකට පසුව වුවද ඝර්ම කලාපීය දේශගුණය අත්විදින්නට ලැබීම මා නම් ප්‍රමෝදයට පත් කළේය.ඒඩ්න් බොක්කේදී මුහුණ පෑ සුලිකුනාටු කිහිපයක් හැරෙන්නට අපේ ගමන විශේෂ සිද්ධිවලින් තොරවිය.හෝම්ස්නම් මේ වෙනස ගැන සතුටට පත්වී සිටියායි කිව නොහැක.ඔහුගේ ලන්ඩන් වලින් පිටවීම පවා රහසක් ලෙස තබාගත යුතු බව ඔහු පැවසුවේ මොරියාටිලාගේ වැඩ ගැන දන්නා නිසාය.විටින්විට මේ මැසිවිලි නැගුවත් හෝම්ස්ගේ ශරීර සුවතාවය යහපත් තත්වයකට පැමිණීම මා සතුටුකරවන්නක් විය.කෙසේවුවත් සති 3 ක පමණ මුහුදු ගමනකට පසු සිලෝන්හි ගෝල් නම් වරායෙන් අපි ගොඩබැස්සෙමු.

මා සමග ඇෆ්ගනිස්ථානයේ සේවය කල කපිතාන් වුඩ්ලන්ඩ් ඒ වනවිටත් ගෝල් වරායට අප පිළිගැනීමට පැමිණ සිටියේ කල්තබා මා විසින් එවනලද කේබල් පණිවිඩය අනුවය.අපට ඔහුගේ වාසස්ථානය කරා යෑමට සපයා තිබුනේ හරකෙකු විසින් ඇදගෙන යන්නාවූ බක්කි නම් කරත්තයකි.ලන්ඩනයේදී අශ්ව කරත්තවලින් පමණක් ගමන්ගොස් තිබු අපට මේ අත්දැකීම වෙනස්ම අත්දැකීමක් විය.කපිතාන් වුඩ්ලන්ඩ්ගේ නිල වාසස්ථානය පිහිටා තිබුනේ ගෝල් නැතිනම් ස්වදේශිකයින් පවසන ආකාරයට ගාලු කොටු පවුර තුලය.මේ කොටු පවුර පෘතුගීසි ජාතිකයින් විසින් ගොඩනගන ලදුව පසුව ලන්දේසීන් විසින් විශාල කොට තනනු ලැබුවකි.ඉන්පසු රැජිනගේ කිරීටයට නතුවූ මෙම කොටු පවුර මුහුදුබඩ පිහිටි මනරම් නිර්මාණයක් බව පැවසිය යුතුය.

එදින විවේකීව ගතකල අප පසුදින කොටු පවුර සහ මුහුදුබඩ ඇවිදීමට යොදාගත්තෙමු.මේ වෙනසින්නම් හෝම්ස් අතිශය ප්‍රමෝධයට පත්වී ඇති අයුරු මට දක්නට ලැබිණි.සමුද්‍ර ජීව විද්‍යාව සහ පුරාවිද්‍යාව යන විෂයන් දෙකම හෝම්ස්ගේ ප්‍රියතම අංශ දෙකක් බව මින් පෙර මා ඔබට සදහන් කර ඇත.දවස් කිහිපයක්ම මේ අන්දමින් ගතවී ගිය අතර එක් දිනක් සන්ධ්‍යාවේදී අපගේ සුපුරුදු ඉරණම පලදුන්නේය.මෙයින් මා නම් අතිශය කම්පනයට පත්වූ අතර හෝම්ස්නම් අළුත් සෙල්ලම් බඩුවක් ලද කුඩා දරුවෙකු මෙන් අතිශය සන්තෝෂයට පත්විය.

එම දිනයේ සන්ධ්‍යාවේදී කපිතාන් වුඩ්ලන්ඩ්ස්ගේ ඇරයුමක් අනුව ගාලු උසාවිය අසල පිහිටි අවන්හලක් වෙත පියනැගුවෙමු.මුළුමනින්ම වාගේ විදේශිකයින් පමණක් දක්නට සිටි අතර ඉදහිට ස්වදෙශිකයකුද දක්නට සිටියේය.ටික වේලාවකට පසු අපෙන් සමුගෙන මදක් ඉවතට ගිය වුඩ්ලන්ඩ් නැවත පැමිණියේ ස්වදේශික මහතෙකු කැටුවය.කළු පැහැති යුරෝපීය ඇදුමින් සැරසී සිටි ඔහු ඉහල පන්තියේ ස්වදේශික මහතෙකු බව මට පෙනී ගියේය.මේ ඉන්නේ මිස්ටර් පෙරේරා ,ගාලු උසාවියේ වැඩකරන පෙරකදෝරු මහත්තයෙක්,මගේ හොද මිත්‍රයෙක්.ඔහු හදුන්වා දෙමින් වුඩ්ලන්ඩ්ස් පැවසුවේය.

මිස්ටර් පෙරේරා ලග තියෙනවා ටිකක් අමුතු ආකාරයේ කතාවක්.සමහරවිට හෝම්ස් මහතා කැමතිවෙයි ඔහුගේ කතාවට සවන්දෙන්න.මෙය ඇසුවිට මෙතෙක් නිදාගෙන මෙන් සිටි හෝම්ස් එක්වරම ජීවය ලද්දකු මෙන් පුටුවේ හරි බරි ගැසී ඉඩගත්තේය.

මේ සිද්දිය වුනේ පහුගිය පාසල් නිවාඩු කාලයේදී.අප අසලින් අසුන් ගත් පෙරේරා මහතා තම කතාව පටන් ගත්තේය.පුරුද්දක් විදිහට හැම නිවාඩු කාලෙදිම වගේ මාත් මගේ බිරිඳත් දරුවෝ දෙන්නාත් විනෝද චාරිකාවක යෙදෙන්න අමතක කරන්නේ නෑ.ඉතින් ඒ විදිහට පහුගිය නිවාඩු කාලෙදී අපි ගියේ ගාල්ලෙන් සැතපුම් 8 ක්‌ විතර දකුණු පැත්තට වෙන්න තියෙන කොග්ගල කියන ගමට.ඒ ගමේ තියෙනවා ලස්සන ඔයක්.ඉතින් ඔන්න ඔය ඔයේ ඔරුවක්‌ පදින්නත් ගමවටා පොඩ්ඩක් ඇවිදින්නත් තමයි අපි සැලසුම් කරලා තිබුනේ.ඔය ගමේ කෙනෙක් නිතර ගාලු එන කෙනෙක් ඉන්නවා පොඩි ගමරාල කියලා.ඉතින් ඒ දැනහැදුනුම්කම මත තමයි අපි මේ ගමන යොදා ගත්තේ.අපි හිතපු විදිහටම අපි පොඩිගමරාලත් එක්ක ඔරුවෙන් යන අතරේ ඒ ඔයේ මැද තියෙන කඩොලාන වලින් හැදුනු දූපතකටත් ගොඩවුනා.

පොඩි ගමරාලගේ හිතවත් ළමයි දෙන්නෙක් මේ දූපතේ එක් පැත්තක වගා කටයුතු කරනවා.ඉතින් අපි මේ දෙන්නත් එක්ක කතාවට වැටුනා.හරිම හොද ළමයි දෙන්නෙක්,ඇත්තටම මේ කතාව කිව්වේ ඒ ළමයි දෙන්නා.ඒ දූපතේ අනිත් පැත්තෙන් හැම අමාවක පෝය දවසටම [සද නැති දිනවල] ඉහල පහල යන එළියක්‌ හොඳින් දිස්වෙනවනවලු.අනිත් දවස් වලටත් හඳ වලාකුළුවලින් වැහුනම ඔය එලිය දකින්න පුළුවන්ලු.කොහොමත් ඒ දූපත ඉස්සර ඉදලම හොල්මන්වලට ප්‍රසිද්ද දූපතක්.ඔය ළමයි දෙන්නා ඕකේ හිටියට මාළු මරන්න ඔරුවෙන් යන කෙනෙක්වත් ඒ දූපත පැත්ත පලාතෙන් ඔරුව පදින්නේ නෑ.පොඩි ගමරාලත් ඔය කතාව අපිට කිව්වා.ඉතින් ආයෙත් ඒ ගැන හොයන්න එනවා කියලා ඒ ළමයි දෙන්නට පොරොන්දුවෙලා තමයි මම ආවේ.

මෙතෙක්වෙලා සාවදානව කතාව අසාසිටි හෝම්ස් අතිශය ප්‍රමෝධයට පත්වී ඇති බව මට පෙනෙන්නට තිබුණි.එහෙත් අප මෙතෙක් කටයුතු කල සෑම පරීක්ෂනයකම ගැටී තිබුනේ ලෙයින් මසින් සැදුනු මිනිසුන් සමගය.හොල්මන් අවතාර සමග ඇයි හොදයියක් පැවැත්වීමට අපට මෙතෙක් අවස්තාවක් ලැබී නොතිබුණි.අනිත් අතට හෝම්ස් මතක තියා ගත යුත්තේ මේ අපේ සුපුරුදු ලන්ඩනයවත් ,අඩුම තරමේ එංගලන්තයවත් නොවන බවයි.මේ ආසියාතික රටවල මිනිසුන් අපට වඩා නොපෙනෙන බලවේග සමග සම්බන්දකම් පවත්වති.අනෙත් අතට සිලෝන්හි අනිත් පෙදෙස්වල ජනයා මේ දකුණු ප්‍රදේශයේ ජනතාව සැලකුයේ හදිහුනියම් කටයුතුවලට චිරප්‍රසිද්ද අයවලුන් හැටියටය.මේ කරුණු මම හෝම්ස්ට පෙන්වාදුන්නත් පලක්වුයේ නැත.පෙරේරා සමග ඒ දූපතට යාමට හෝම්ස් කැමැත්ත පළකළේය.

ඉන් දින දෙකකට පසු අමාවක පෝය දිනය යෙදී තිබුණු බැවින් එදින අපි බක්කි කරත්ත දෙකකින් කොග්ගල බලා පිටත්වීමු.මුලින් අපේ ගමනට එක්වීමට වුඩ්ලන්ඩ්ස්ද කැමැත්තෙන් සිටියද හදිසියේ යෙදුනු කටයුත්තක් නිසා ඔහුට මේ ගමනට එක්වීමට නොහැකිවිය.
පෙරේරා, හෝම්ස් සහ මා දහවල් වනවිට කොග්ගලට ලගාවුණු අතර අපට නුපුරුදු බක්කි කරත්තයේ ගමන් කිරීම අපට කිසිසේත්ම ලෙහෙසිපහසු වුයේ නැත.අනිත් අතට දුම්රිය මගද ගාල්ලෙන් නිමවී තිබු නිසා මේ ගමනට බක්කිය හැර වෙනත් විකල්පයක්ද නොතිබුණි.අප මුලින්ම පොඩි ගමරාලගේ නිවසට ගොස් පොඩි ගමරාල හමුවූයෙමු.මෙහිදී පොඩි ගමරාලගෙන් කරුණු කිහිපයක් විමසා සටහන් කරගැනීමට හෝම්ස්ට අවශ්‍යවිය.අපගේ භාෂා පරිවර්තක ලෙස පෙරේරා කටයුතු කළේය.

පොඩි ගමරාල මහත්තයා අපට කියන්නකෝ මේ එලිය කොච්චර කාලෙක ඉදලද පේන්නේ කියලා,හෝම්ස් කතාව පටන්ගත්තේය.

මහත්තයට කියන්න අපි පොඩිවුන් සන්දියේ ඉදලා ඔය දූව පැත්තට මෙලොව මනුසයෙක් යන්නේ නෑ.ගියත් යන්නේ වත්තේ පිටියේ ඉදලා අහුවෙන සතා සරුපයෙක් මල්ලක දාලා ගිහින් අතාරින්න විතරයි.ඒ තරම් ඔය දූව හොල්මන්වලින් පිරිලා තියෙන්නේ.හැබැයි ඔන්න ඔය කියන එළියනම් ඉහල පහල යන්න අරන් ඒ හැටි කාලයක් නෑ.මයේ හිතේ අවුරුද්දක් විතර ඉදලා තමයි.හැබැයි ඉතින් අමාවක දවසට තමයි ඔය එලිය හොදට පේන්නේ.මගේ ගාව වැඩකරපු කොලු ගැටව් දෙන්නෙක්නම් දැන් ඔය දූවේ මෙහාපැත්ත වගා කරනවා.ඇස්වහක් කටවහක් නෑ මහත්තයෝ උන් දෙන්නනම් යකෙක්ටවත් බයනැති කොල්ලෝ දෙන්නෙක්.උන්ගෙන් ඇහුවොත්නම් වැඩිවිස්තරයක් දැනගන්න පුළුවන්වෙයි.

වැඩිදුර විස්තර සෙවීමට දූපතට යාමට අවශ්‍යයයි හෝම්ස් පැවසු බැවින්,මම, හෝම්ස් ,පෙරේරා සහ පොඩි ගමරාල ඔහුගේ ඔරුවෙන් දූවට යාමට පිටත්වීමු.ඔය හරහා හමායන සුළං ප්‍රවාහය නිසා ඔරුව පැදීම කෙසේවත් ලෙහෙසිපහසු වුයේ නැත.පැයක පමණ ගමනකින් පසු අපි දූවට ලගාවීමු.එක් තැනක තොටුපලක් ලෙස සදා තිබුණු තැන ඔරුව නැවතූ අපි දූපතට ගොඩවුනෙමු.

දූවට ගොඩවුණු අප පිලිගනු ලැබුයේ උපාලි සහ ජිනපාල විසිනි.කල්වේලා ගතනොකර ඔවුන්ගෙන් මේ පිළිබඳව විමසීමටද හෝම්ස් අමතක නොකළේය.අනේ මන්දා මහත්තයෝ අපිනම් හිතන්නේ නෑ ඒ හොල්මනක් කියලා,ඒත් ඒ මොකක්ද කියලා කියන්න අපිත් දන්නේ නෑ.අපිත් සැරින් සැරේ ඔය එලිය ඉහල පහල යනවා දැක්කා.අපි වගාවටම කාලය යොදවලා හිටපු නිසා ඒ ගැන හොයා බලන්න වුනේ නෑ.උපාලි පැවසීය.

එදා රෑ අපි දූවේ සිටියයුතුයි කියා හෝම්ස් යෝජනා කළේය.හොල්මන් සමග ඇයිහොදැයි පැවැත්වීමට ප්‍රතික්ෂේපකල පොඩිගමරාල ඔරුවෙන් තම නිවස බලා ගමන්කළේය.රාත්‍රිය උදාවීමත් සමගම අප එලිය දකින බලාපොරොත්තුවෙන් ගල්පොත්ත උඩට වී කල්ගතකලෙමු.රාත්‍රිය උදාවීමත් සමගම දූපතේ අනිත් පසින් එම එලිය දකින්න ලැබුණි.එම එලිය දකින්න තිබුනේ දූපතේ අනිත් පසින් ගස්වලට උඩිනි.කෙසේනමුත් එය දුටු හෝම්ස්ගේ මුහුණේ ඇතිවුණු හැගීමනම් මට වටහාගත නොහැකිවිය.එදා රැය ගෙවී පසුදින උදාවිය.ළමුන්ගෙන් සමුගත් අපි නැවත ගොඩබිමට පැමිණ ගාල්ලට යනතුරුත් හෝම්ස් වචනයක්වත් අප සමග කතාකලේ නැත.

කම්මුලේ අත තබාගෙන අතිශය කනස්සල්ලෙන් පසුවුණු ස්වරූපයක් හෝම්ස් වෙතින් දිස්විය.හෝම්ස් මෙසේ කතාබහ කිරීමෙන් වළකින්නේ ඔහුට නිගමනයකට එලබීමට නොහැකිව පරීක්ෂණය අසාර්ථක වනවිටය.අපි යෙදුනු පරීක්ෂණ අසාර්ථක පරීක්ෂණ කිහිපය අතරට මෙයත් එකතුවන බවට දැන් මට සැකයක් නොමැත.ගාල්ලට පැමිණි පසු පෙරේරා මහතාද අපෙන් සමුගත්තේය.පෙරේරා සමුගත්පසු මම හෝම්ස් අමතා "එහෙනම් හෝම්ස් ඔබ අන්තිමේදී පිළිගත්තා හොල්මන් කියලා දේකුත් තියෙනවා කියලා,ඇත්තටම ඔය ඉහල පහල යන එලිය මොකක්වෙන්න පුලුවන්ද හෝම්ස්"

පිස්සුද වොට්සන්,ඔය ගිය අවුරුද්දේ open කරපු දෙවිනුවර lighthouse එකේ එලියනේ.....

------------------------------------------------------------------------------------
සටහන-මම ඉතා අසාකරන මඩොල් දූවේ චරිත සහ ශර්ලොක් හෝම්ස් චරිත ඇසුරින් මා කල නිර්මාණයකි.ඇත්ත වශයෙන්ම මඩොල්දූව වැනි විශිෂ්ට ගනයේ ග්‍රන්ථ කියවීම අද පරපුරේ ළමුන අතරින් ඈත්වීමනම් අතිශය කනගාටුදායක කරුණකි.මඩොල් දූව වැනි නිර්මාන බිහිකළ මාටින් වික්‍රමසිංහ ශූරීන්ට අපි සියල්ලන්ම ස්තුතිවන්ත විය යුතුය.ඔබත් ඔබේ දරුවන්ට මඩොල්දූව වැනි විශිෂ්ට නිර්මාණ කියවීමට ලබාදෙන මෙන් ඉල්ලා සිටිමි,

අපේ බැංකුවයි ඔබයි පාඩම් එහෙම්මම නැවතුනානේ.ඔන්න ඒක නිසා අද මං අලුත් පාඩමක් ලියන්න හිතුවා.අද මං කියලා දෙන්න යන්නේ බැංකු ණය ගැන.ඉතින් වෙනදට වඩා වෙනස් විදිහකට ලියන්න හිතුනා.මගෙන් ගණුදෙනුකරුවන් නගපු ප්‍රශ්න සහ ඒවාට මං දුන්නු උත්තර විදිහට මේ පොස්ට් එක ලියනවා.බලන්න මේ ප්‍රශ්න ඔයාලටත් තියෙන ඒවාද කියලා....

බැංකු ණයක් ගන්න තියෙන්න ඕන සුදුසුකම් මොනවද?

මේක ගොඩක් අයට තියෙන ප්‍රශ්නයක්.ඔබ ස්ථිර රැකියාවක් කිරීම ණයක් ගැනීමේදී අත්‍යාවශ්‍ය කාරණයක් නෙමේ.ඒත් ඔබේ ආදායම බැංකුවට පිළිගතහැකි ආකාරයට තහවුරු කලහැකිවිය යුතුයි.ඔබ ස්වයං රැකියාවක නියුතුවෙනවානම් ඔ‍බට ලැබෙන ආදායම බැංකු ගිණුමක් හරහා පෙන්නන්න පුලුවන්නම් ගොඩක් හොදයි.නැත්නම් තමන්ගේ ආදායම ගමේ ග්‍රාම සේවක මහත්තයාට කියලා තහවුරුවක් ගන්න පුළුවන්.ස්ථිර රැකියාවක් කරන කෙනෙක්ට තමන්ගේ වැටුප්පත පෙන්වන්න පුළුවන්.ව්‍යාපාරයක් කරන කෙනෙකුට තමන්ගේ ලාබඅලාබ ගිණුම් ප්‍රකාශ ඉදිරිපත් කරන්න පුළුවන්.වැටුප් ලබන අයට තමාගේ වැටුපින් අඩුකිරීම් නියමිත සීමාව නොයික්මවා තිබීම වැදගත් වෙනවා.

ඔබ දැනටත් වැටුප් ලබන කෙනෙක්නම් ඔබේ වැටුප බැංකු ගිණුමක් හරහා ලබාගන්න කටයුතුකරන්න.එවිට ඔබ ණය මුදලක් ලබාගන්නට යාමේදී බැංකුවට ඔබේ ආදායම් තත්වය පිලිබඳ පැහැදිලි චිත්‍රයක් ලැබෙනවා වගේම ණය මුදල ලබාගැනීමේදී වැටුප බැංකුවට හැරවීමට වෙන අමතර කාලයත් ගතවීම වලක්වා ගන්න පුළුවන්.

ඊට අමතරව බැංකු හෝ වෙනත් මුල්‍ය ආයතන වෙතින් ලබාගත ණය පැහැරහැර නොතිබීමත් වැදගත්.CRIB එහෙමත් නැත්නම් ශ්‍රී ලංකා ණය තොරතුරු කාර්යාංශයේ වාර්තාවක් ලබාගැනීමෙන් මේක කරන්න පුළුවන්.මොකද ගොඩක් අය දන්නේ නැතුව තමන් ඇප වෙච්ච ණය හිගහිටීම නිසා CRIB එකේ රිපෝර්ට් වෙලා තියෙනවා.ඕන කෙනෙක්ට රුපියල් 250 ක වගේ මුදලක් ගෙවලා ඕනෑම වාණිජ බැංකුවක් හරහා තමන්ගේ CRIB Report එකක් ගන්න පුළුවන්.

ඒ වගේම ඔබට වයස 60 ට වැඩිනම් තමන්ගේ දරුවෙක් හරි වයස 60 ට අඩු කෙනෙක් බද්ධ කරලා තමයි ණය අයදුම්කරන්න වෙන්නේ.

ඔන්න ඔය කියන මුලික සුදුසුකම් සම්පුර්ණ කරලා තියෙනවනම් ඕනෑම කෙනෙකුට බැංකු ණයක් ගන්න අයදුම්කරන්න පුළුවන්.

ලක්ෂ 10ක් වටිනා ඉඩමක් [උදාහරණයක්] බැංකුවට තියලා කොච්චර ණයක් ගන්න පුලුවන්ද?

ගොඩක් අය පටලවාගන්න තැනක් ඕක.ඔබ ණය මුදලක් අයදුම් කිරීමේදී ණය මුදලේ ප්‍රමාණය තීරණය වෙන්නේ ඔබේ ආදායම මත මිසක් ඔබ ඇපයට තබන සුරැකුම මත නොවේ.[රන් භාණ්ඩ ණයවලදී මෙම තත්වය වෙනස්වෙනවා,එහිදී සලකා බලන්නේ රන්භාන්ඩවල තක්සේරු වටිනාකම විතරයි ].ඔබ කොච්චර වටිනා සුරැකුමක්‌ බැංකුවට දුන්නත් ණය මුදලේ වාරිකය ගෙවන්න ඔබේ ආදායම ප්‍රමාණවත් නොවේනම් ඔ‍බට එම ණය ප්‍රමාණය ලබාගන්න බැහැ.ඒත් අපේ රටේ සමහර මුල්‍ය ආයතන මේ මුලික සංකල්පයෙන් බැහැරව ණය ප්‍රදානය කිරීම නිසා මේ වෙනකොට රටේ ජනතාව සෑහෙන පිරිසක් ණය බර නිසාම තමාගේ ආර්ථිකය විනාස කරගෙන තියෙනවා.විශේෂයෙන්ම වාහන ලීසිං/ෆිනෑන්ස් වලදී මේ තත්වය දකින්න තියෙනවා.

ණය වාරිකය ගෙවන්න ඔබේ ආදායම ප්‍රමානවත්නම් බැංකුව කරන ස්වාධීන තක්සේරුවකින් පසු ඔබට ණය මුදලේ ප්‍රමාණය තීරණය කල හැකියි.

ණය මුදලක් ගන්නකොට පොලිය කොහොමද ?

ඔබ ණය මුදලක් ගන්නවානම් හොදටම හොයා බැලිය යුතු කාරණේ තමයි මේක.ඔබ රැකියාවක් කරන කෙනෙක්නම් ඔබට ගන්න වෙන්නේ සමවාරික ණය මුදලක්.එතකොට ඔබේ වාරිකය එකම ගණනක් තමයි හැමදාම ගෙවන්න වෙන්නේ.මේ ණය මුදලක මුල් කාලයේ වැඩිපුර මුදලක් යන්නේ පොලියට.කාලයත් එක්කම ණය මුදලට ගෙවෙන ප්‍රමාණය වැඩිවෙනවා.ඔබත් රැකියාවක් කරමින් ණය මුදලක් ගන්න අදහස්කරනවානම් මෙතනින් ගිහින් ඔබ ගන්න අදහස්කරන ණය මුදලේ වාරිකය ගණනය කරගන්න පුළුවන්.

ඔබ ව්‍යාපාරිකයෙක්නම් ඔබට ලැබෙන ණය මුදලේ මුදලින් ගෙවෙන්නේ සැමදාම එකම මුදලක්.උදාහරණයක් විදිහට ලක්ෂ 30 ක ණයමුදලක් අවුරුදු 5 කින් ගෙවන්න ගත්තොත් හැම මාසෙම ණය මුදලින් රුපියල් 50,000/- ගානේ ගෙවන්න ඕන.ඊට අමතරව පොලිය ගෙවන්න ඕන.ණය මුදල ගෙවෙද්දී පොලිය අඩුවෙන නිසා මුල් වාරිකයේ ඉදලා හැම වාරිකයම අඩුවෙමින් තමයි යන්නේ.

ණය පොලිය ගැන කිව්වම අපේ රටේ සමහර මුල්‍ය ආයතන කොලේ වහලා ගැහිල්ලක් කරනවා.ඒකටනම් අහුවෙන්න එපා.ඔවුන් ගන්න ණය මුදලට පොලිය සම්පුර්ණ කාලයටම ගණනය කරලා මුදලත් සමග එකතු කරලා වාරික ගණනින් බෙදලා තමයි වාරිකය ගණනය කරන්නේ.පැහැදිලිවෙන්න උදාහරණයක් දෙන්නම්.
                   
                    හීනවන ශේෂය මත පොලිය              කොලේ වහලා ගැහිල්ල
ණය මුදල                         100,000/-                                      100,000/-

පොලී අනුපාතය [වාර්ෂික]            15 %                                            15%

කාලය                               අවුරුදු 3                                     අවුරුදු 3

මුළු කාලයට පොලිය              24795.08                                       45000.00

වාරිකය                             3466.53                                         4027.77

සඵල පොලී අනුපාතය [වාර්ෂික]   8.27%                                             15%


වැඩේ පැහැදිලියි නේ.ඒක නිසා තමන් ගන්න ණය මුදලේ පොලී ගණනය වෙන ආකාරය ණය මුදල ගැනීමේදීම විමසා බලන්න.

අනිත් එක තමයි ණය මුදලක් නියමිත කාලයට පෙර පියවීමේදී එම ණය මුදලට අදාළ මුළු කාලයටම පොලිය අයකිරීම වැනි සදාචාරාත්මක නොවන ක්‍රම සමහර මුල්‍ය ආයතන අනුගමනය කරනවා.ඒවා ගැන දැනුවත් වී සිටීම වැදගත්.මොකද අවුරුදු 10 කින් ගෙවන්න ණය මුදලක් අරගෙන සතියකින් ගෙවා අවසන් කලත් අවුරුදු 10 ම පොලී ගෙවන්න වෙනවනම් කොච්චර අපරාදයක්ද ....

පොලී ගැන කියනකොට දඩ පොලියත් වැදගත් කාරණයක්.වාරික නියමිත කාලයට ගෙවීම් නොකලාම දඩ පොලියක් අයකිරීම සිදුවෙනවා.ණය මුදල ගැනීමේදී මේ දඩ පොලී අනුපාතය,දඩ පොලිය අයකරන්නේ වාරිකය පැහරහැරියාට කොපමණ කාලෙකට පසුද යන්නත් ණය මුදල ගන්නා අවස්ථාවේදීම විමසා දැනගැනීම නුවනට හුරු කාරණයක්.

අනිත් එක තමයි සුළු හා මධ්‍ය පරිමාන ව්‍යාපාරවල නියුතු වුවන්ට අඩු පොලී යටතේ ණය මුදල් ගැනීමේ හැකියාව තියෙනවා.සොයා බැලීමයි වඩා වැදගත් වෙන්නේ.

ඇප අත්සන් කරන්න රජයේ සේවකයෝම ඕනද?

ගොඩක් බැංකු වලින් ඇපවලට රජයේ සේවකයෝ ඉල්ලනවනේ.ඒකට පොඩි හේතුවක් තියෙනවා ඒ තමයි බැරිවෙලාවත් ණයමුදල ගෙවීම පැහැරහැරියොත් උසාවි නියෝගයක් මගින් රුපියල් 500 ක් හැර ඉතිරි වැටුප තහනමට ලක්කරලා බැංකුවට ගෙන්වා ගැනීමේ හැකියාවක් තියෙනවා.ඒ වගේම ඇපකරුවන් ණයකරුට බලපෑමක් කල හැකි අයවලනුත් වියයුතුවීමත් මෙයට හේතුවක්.

එහෙම නැතුව ඇපකරුවන් රජයේ සේවකයන් වීම අත්‍යාවශ්‍ය කාරණයක් නෙවේ.බැංකුවට පිළිගත හැකි අය ඉදිරිපත් කිරීම ප්‍රමාණවත්.

ණය මුදල් ගත්තම Tax වලට අහුවෙනවද ?

කෙටිම උත්තරේ නැත.Tax වලට අහුවීම කෙසේවෙතත් ණය මුදලක ගෙවීම ආදායම් බදු සහන පවා ලබාගැනීමට හේතුවක් කරගන්න පුළුවන්.

මොන මොන අවශ්‍යතා වලටද ණය මුදල් ලබාගන්න පුළුවන්?

නීතිවිරෝධී නොවන ඕනෑම කටයුත්තක් සදහා ණය මුදල් ලබාගන්න පුළුවන්.තමන් ණය මුදලක් ලබාගැනීමේදී ඔබගේ නියම අවශ්‍යතාවය බැංකුවට දැන්වීම ඔබගේ යුතුකමක්.ඒක ඔබටත් උදව්වක් වේවි.බැරිවෙලාවත් නොහිතන කාරණයක් උඩ ණය මුදල ගෙවාගන්න බැරිවුනොත් ණය මුදල  නියමාකාරයට යොදවා නැත්නම් බැංකුව ඔබ ගැන ඇතිකරගන්නා ආකල්පය වැරදි එකක් වේවි.

නිවාස අවශ්‍යතාවකට ණය මුදල් ලබා ගන්නවනං ණය මුදල කොටස් කිහිපයකින් ඔබේ අතට ලැබෙන්න පුළුවන්.මුල් ණය කොටස්වල වැඩ නියමාකාරයට නිමනොකලොත් ණය මුදලේ ඉතිරි කොටස් ලබාගැනීම ප්‍රමාද විය හැකියි.එවිට ඔබට නිරපරාදේ පොලියක් ගෙවන්න වෙන්නත් පුළුවන්.

ණය මුදලක් රක්ෂණය කරනවා කියන්නේ මොකක්ද?

මේ රක්ෂණය දෙයාකාරයකින් තියෙනවා.ඔබට ණය මුදල වගේම ලබාදී ඇති සුරැකුමත් රක්ෂණය කල හැකියි.ඕන ණය මුදල රක්ෂණය කරනවානම් එය ඔබ විසින් කලයුත්තක්.එවිට ඔබට හදිසි අනතුරක් ආපදාවක් වුනොත් ණය මුදල ගෙවීම රක්ෂණය මගින් සිදුවෙනවා.

ඊට අමතරව ඔබ ඇපයට තබා ඇති දේපල [ඉඩම්,වාහන,යන්ත්‍රෝපකරණ] සදහා රක්ෂණ ලබාගතයුතුනම් අදාළ මුල්‍ය ආයතන මගින් ඒ ගැන ඔබ දැනුවත් කරනු ඇති.එවිට ඒ දේපලට හානියක් වුනොත් රක්ෂණය මගින් අදාල හානිය ප්‍රතිපුරනය කරනවා.මෙහිදී ණය මුදල ගෙවීමක් සිදුවෙන්නේ නෑ.ඔබ විසින් ණයමුදල ගෙවිය යුතු අතර ඔබේ දේපලට වන අලාබය රක්ෂණය මගින් ගෙවනවා ඇති.

ඒ වගේම දේපලක අයිතිය පිළිබද ගැටළු ඇති අවස්තාවකදී හිමිකම් රක්ෂණයක් ලබාගන්නත් ඔබට සිදුවෙන්න පුළුවන්.ඒ වගේම වගා ණයක්නම් කෘෂි රක්ෂණය ලබාගැනීමත් වැදගත්.රක්ෂණය ලබාගැනීමේදී කුමන ආයතයෙන් ලබාගන්නවද තීරණය කිරීමේ අයිතිය ගනුදෙනුකරුවා සතුවෙනවා.ඒක නිසා තමන්ට ගැලපෙන රක්ෂණයක් සොයාබලා අරගන්න.


ඔන්න මං සාමාන්යේන් වැඩිපුරම නැගෙන ප්‍රශ්න දැම්මා.මීට අමතරව ඔයාලට තියෙන ගැටළු comment කරන්න.හොද ප්‍රශ්න පොස්ට් එකට ඇතුලුකරන්නත් ඒවාට උත්තර දෙන්නත් කටයුතු කරනවා.ඒ වගේම ණයමුදලක් ගෙවීමේදී කටයුතු කලයුතු ආකාරයත් සාධාරණ හේතුවක් උඩ ණයමුදල ගෙවන්නට බාධා පැමිණුනොත් ඒකට ගතහැකි පියවර ගැනත් තවත් දවසක කියලා දෙන්නම්.බැංකුවයි ඔබයි කලින් ලිපි කියෙව්වේ නැති අය ඉන්නවනම් මෙතනින් ගිහින් ඒවා කියවන්න පුළුවන්.

මගේ ජීවිත කතාව හොදින් මුද්‍රා තබන ලද පොතක් වැනිය.එහි සමහර කොටස් මාගේ සමීපතමයින් පවා හරිහැටි නොදනී.එහෙත් මගේ බ්ලොග් අඩවියට ගොඩවදින ඔබ වෙනුවෙන් මගේ ජීවිත අත්දැකීම් ලියාතැබිය යුතුයැයි මම තීරණය කලෙමි.ඒ අනුව අද ලියවෙන්නේ එහි කොටසකි.

කුඩා කල පටන්ම සඳ තරු ගැන මට තිබුනේ අමුතුම කියවීමකි.කුඩා කල ආච්චී සස ජාතකයේ පරිදි හඳේ හාවා ගැන කියූ කතා මගේ සිතේ මුල් බැසගත්තේය.තරු අහසේ තියෙන්නේ කොහොමද ?ඇයි ඒවා පොලවට කඩාගෙන වැටෙන්නේ නැත්තේ??ආදී වශයෙන් සාමන්යෙන් කුඩා දරුවෙකුට නොසිතෙන ප්‍රශ්න මගේ හිතේ මුල් බැසගත්තේය.අම්මලාට වද කොට කොළඹින් මිලදී ගත් කුඩා ටෙලෙස්කොපය අපේ ගෙදර කොන්ක්‍රීට් හුඩ් එක මත අටවා එයින් අහස නිරීක්ෂණය කල දවස තරම් සතුටු වුනු දවසක් මට අදටත් මතක කල නොහැක.

කෙමෙන් කෙමෙන් වැඩිවිය පත්වුණු මා උසස්පෙළ සදහා ගණිත විෂය ධාරාව හැදෑරීමට හේතුවුනේද පසුකාලෙක අභ්‍යවකාශ විද්වතෙකු වීමේ ආසාව ඇතිවය.එහෙත් උසස්පෙළ ප්‍රතිපල ලැබුනේ මගේ ආසාවන්ට තිත තබමිනි.මම ජීවිතය ගැන කලකිරුනෙමි.වැඩි වැඩියෙන් ආගම දහමට නැඹුරුවුනෙමි.මස් මාංශ කෑම අත්හැරියෙමි.වැඩිවැඩියෙන් සිත එකග කරගැනීමේ භාවනාවන්ට යොමුවුනෙමි.

අද මෙන් එකල එතරම් අන්තර්ජාලය ව්‍යාප්ත වී නොතිබුණි.මට මුල්වරට අන්තර්ජාලයට පිවිසෙන්නට අවස්ථාව ලැබුනේ මාතර නගරයේ පරිගණක පන්තියකට බැඳුනු පසුය.දිනක් අන්තර්ජාලයේ සැරිසරනතුර Nasa ආයතනයේ වෙබ් අඩවියට පිවිසෙන්නට මට අවස්තාව ලැබුණි.එහි තිබු එක් ලින්කුවක් ඔස්සේ ගොස් ශිෂ්ෂත්වයක් සදහා මම අයදුම් කලෙමි.එහි විශේෂත්වයට දකින්නට තිබුනේ අපගේ අධ්‍යාපනික සුදුසුකම්වලට වඩා පුද්ගලික ආසාවන්,විශ්වාසයන් ගැන විමසා තිබීමයි.මමත් මගේ ජීවිත දැක්ම අනුව එහි විස්තර සදහන් කලෙමි.විස්තර පිරවුවාට ඒ පිලිබඳ කිසිදු බලාපොරොත්තුවක් මගේ සිත තුල නොතිබුණි.

මාසෙකට පමණ පසු මාහට විදෙස් ලියමනක් ලැබුණි.එය විවෘත්ත කරබැලූ මට මාගේ ඇස් අදහාගත නොහැකිවිය.මම අයදුම් කල එම ශිෂත්වය සදහා මා තෝරාගත්බව එහි සදහන්වී තිබුණි.එහි සදහන් කර තිබු ලියවිලි සමග ඇමෙරිකානු තානාපති කාර්යාලයේ නිලධාරියෙකු හමුවන මෙන් එහි දන්වා තිබුණි.පසුදිනම එම ලියවිලිත් අරගෙන තාත්තා සමග ඇමෙරිකානු තානාපති කාර්යාලයට ගියෙමි.දිගු කතාවක් කෙටියෙන් කියනවානම් මට ඊලග සතියෙම ඇමෙරිකාව බලා ගමන්කිරීමට සිදුවිය.ගෙදරින් පිට පවුලේ අය නොමැතිව ජීවත්වීමට සිදුවීම මා කිසිසේත් බලාපොරොත්තුවුවක් නොවේ.එහෙත් මාගේ අනාගතය වෙනුවෙන් මම එම තීරණයට එලබුනෙමි.කෙනඩි ගුවන්තොටුපළෙන් මා එරටට ගොඩබසින විටම Nasa ආයතනයේ බලධාරියෙකු පැමිණ මා භාරගෙන මා හෝටලයකට ඇරලුවේය.

හෝටලයක් කීවාට මෙය පිහිටා තිබුනේ හූස්ටන්හි Nasa ආයතනය තුලමය.මෙහි නවාතැන්ගෙන සිටි සියල්ලන්ම Nasa ආයතනයේ සේවය කළවුන්ය.මෙහිසිටි මුලුකාලය තුලම මින් මිදී පිටත සමාජයට යාමට මට අවස්ථාව නොලැබුණි.පසුදින මා ඇතුළු ලොවවටා තෝරාගත් සිසුන් 5 දෙනෙකු සමග එම පාඨමාලාව හැදෑරීමට මා හට සිදුවිය.මා සමග ජපනෙකු,පෝලන්ත ජාතිකයෙකු,නයිජීරියා සිසුවෙකු,ජෝර්දාන සිසුවෙක් අපගේ කණ්ඩායමේ විය.ලොව පතල මහාචාර්යවරු අපට ඉගැන්වීමට සිටි අතර.ඒ අතර මහාචාර්ය විල්සන්,මහාචාර්ය ජොන්සන් වැන්නන්ද වුහ.අපගේ කණ්ඩායම භාරව කටයුතුකලේ මහාචාර්ය ක්‍රික්ටන්ය.වසරක් මේ ආකාරයෙන් අවශ්‍ය දේ හැදෑරීමෙන් පසු එක් දිනකදී අපි පස්දෙනා රැස්කළ මහාචාර්ය ක්‍රික්ටන් අපහට දන්වා සිටියේ අපගේ මුලික පාඨමාලාව අවසන් බවත් මින් පසු පැවැත්වෙන වැඩසටහනෙන් තෝරාගන්නා අයට අභ්‍යවකාශගාමියෙකු වීමේ අවස්ථාව පවා හිමිවිය හැකි බවයි.

ඇත්ත වශයෙන්ම මා ඔබහට කියන්නට යන කතාව පටන් ගන්නේ දැන්ය.ඉන්පසු අපහට මුහුණ දීමට තිබුනු පරීක්ෂණ ඉතා අපහසු ඒවා විය.ශුන්‍ය ගුරුත්වයේ පුහුනුවීම් වලට අමතරව කට්ට කරුවල කාමරවල සතියක් පමණ තනිව ගතකිරීම.අද්භූත ශබ්ද වලට සවන්දෙමින් කල්ගතකිරීම වැනි දේ ඒවාට ඇතුලත්විය.ඇත්තවශයෙන්ම මේ පරීක්ෂණවල අරමුණ කුමක්දැයි අපට වැටහුනේ නැත.ඒ පිලිබඳ ප්‍රශ්න කිරීමත් අපහට තහනම් විය.අපට ඒ පිලිබඳ ප්‍රශ්න කිරීමට අවශ්‍යයත් නොවීය.කන්න බොන්න වෙලාවට ලැබේනම්,ගෙදරට යවන්නට මිලමුදල් ලැබේනම් ඇත්තටම ප්‍රශ්න ඇතිවන්නේ නැත.කෙසේවෙතත් එම පරීක්ෂණවල අතුරුඵලයක් ලෙස අවසානයේ මා හැර අනිත් හතර දෙනාම මානසික ප්‍රතිකාර සදහා යොමුකිරීමට සිදුවිය.ඒ සමගම මා හට දැනගන්නට ලැබුනේ Nasa ආයතනයේ අභ්‍යවකාශ ගමනක් සදහා මාද තෝරාගෙන ඇති බවය.මට මෙය දරාගැනීමට බැරිතරම් ප්‍රීතියක් විය.

අභ්‍යවකාශ ගමනට පෙර දින සුපුරුදු පරිදි රාත්‍රී ආහාරගත් [දොස්තරවරුන්ගේ නිරීක්ෂණය යටතේ] මම නින්ද සදහා මට ලබාදී තිබු විශේෂ කුටියට පිවිසුනෙමි.ටික වෙලාවකින් කවුදෝ දොරට තට්ටුකළේය.දොර හැරබලන විට අපගේ වැඩසටහනේ ප්‍රධානී මහාචාර්ය ක්‍රික්ටන් දොර අසල සිටගෙන සිටියේය.

මට පුතාත් [වැඩසටහනේදී මහාචාර්යතුමා අපි ඇමතුවේ පුතා කියාය] එක්ක ටිකක් කතාකරන්න පුලුවන්ද?

පුළුවන් සර්...

කොහොමද හෙට ගමනට සුදානම් නේද?

අනිවාර්යෙන්ම සර් ....

මට ඒ ගැන පුතාට පොඩි දැනුවත් කිරීමක් කරන්න තියෙනවා.පුතා දන්නවා ඇතිනේ අපි 1969 තරම් ඈතකදී මිනිහෙක් හඳට යැව්වා කියන එක.ඇත්තම කියනවනම් පුතා ඒක අපි ඒ වෙලාවේ කල පොඩි රැවටීමක්.රුසියාවට කලින් මිනිහෙක් හඳට යවලා පෙන්නන්න අපිට ඕන වුනා.ඒත් ඒ වෙනකොට අපේ තාක්ශනේ ඒ වගේ දෙයක් කරන්න තියා ඒ අහලකටවත් ඇවිල්ලා තිබුනේ නෑ.හැබැයි අපි ඒ ප්‍රෝඩාව කලාට පස්සේ රුසියාව වැඩේ අත හැරියා.ඉතින් අපේ ඒ වෙලාවේ අරමුණ සාර්ථක වුනා.ඒත් අපි අපේ තාක්ශනේ දියුණු කරගන්න එක හොරරහසේම කරගෙන ආවා.ඔන්න ඔහොම වෙනකොට මීට අවුරුදු 5 කට විතර කලින් මිනිහෙක් හඳට යවන්න තරම් අපේ තාක්ශනේ දියුණු වුනා.

ඇත්තම කියනවනම් සර් ...මේක අහලා මම පුදුම වුනේ නෑ.....

බොහොම හොදයි පුතා.මගේ කතාවේ ඊලග කොටසට එන්න දැන් ඔයා කිව්ව කාරණේ වැදගත්වෙනවා.අපි එහෙම දෙතුන්පාරක්ම අපේ මිනිස්සු හඳට යැව්වා.ඔන්න එතකොට තමයි අපිට ඊළඟ ප්‍රශ්නෙට මුහුණ දෙන්න වුනේ.අපිට හිතාගන්න බැරිවිදිහට අපි යවපු මිනිස්සු හඳේදී උන්මත්තක තත්වෙට පත්වුනා.මේකට හේතු හොයාගෙන බලද්දී අපිට පෙනුණු කාරණේ තමයි අපේ ඇමෙරිකානු සමාජ අත්දැකීම් එක්ක අපේ මිනිස්සුන්ගේ හිත් දුෂණය වෙලා කියන එක.ඒ අයගේ හිත්වල යටපත්වෙලා තියෙන ආශාවන් හඳේදී ඉස්මතුවීම නිසා ඒ අය ඒ තත්වෙට පත්වෙලා තිබුනේ.ඒ නිසා අපි තීරණේ කළා ලෝකේ වෙන රටවලින් කට්ටිය ගෙනල්ලා අපේ අරමුණ ඉෂ්ටකරගන්න.ඒ විදිහට තමයි ඔයා ඇතුළු අනිත් අයට මේ වැඩසටහනට සම්බන්ධ වෙන්න ලැබුනේ.ඔයාට මතක ඇතිනේ අපි මේකට අයව තෝරාගන්නකොට පුද්ගලික ආසාවන් වගේ දේවල් ගැන ගොඩක් හොයලා බැලුවා කියලා.ඉතින් පුතාවගේ ගොඩක් දේ ගැන ආසාවන් අත්හැරලා ඉදපු අයව තමයි අපි හෙව්වේ.

ඇත්තටම සර් ...මේ වැඩසටහනට සහභාගීවෙන්න ලැබීම තමයි මට ජීවිතේ ලැබුණු ලොකුම තෑග්ග.....

ඉතින් පුතා ඔයා විතරයි අපේ පරීක්ෂණ ඔක්කොගෙන්ම සමත්වුනේ.ඒ නිසා අපි තීරණේ කළා හඳේ තියෙන තත්වයන් යටතේදී ඔයා කොහොමටවත් පිස්සු වැටෙන්නේ නෑ කියලා.ඔයා වගේ නිරවුල් මනසක් තියෙන කෙනෙක් අපේ වැඩසටහනට ලැබුනේ අපේ පෙර වාසනාවකට.මොකද ඔයාගේ මනස නිරවුල්ව තිබීම මත තමයි අපේ මේ වැඩසටහනේ පර්යේෂණවල සාර්ථකත්වය රඳා පවතින්නේ.මොකද මේක සාර්ථකවුනොත් හඳේ මිනිස්සු පදිංචි කිරීම ගැනත් අපිට සලකලා බලන්න පුළුවන්.

මං ගැන කල සඳහනට බොහොම ස්තුතියි සර්....සර්ලට පුළුවන් මං ගැන සම්පුර්ණ විශ්වාසය තියන්න ....

පුතා....දැන් තමයි මට මේ කතාවේ බැරෑරුම් කොටසට එන්න තියෙන්නේ.අපි මුලින් තුන්දෙනෙක් මේ ගමනට ඉන්නවා කිව්වත් ඇත්තටම අපි යවන්නේ ඔයා විතරයි.යානයේ පාලනය අපි මෙහෙ ඉදන් මෙහෙයවන නිසා ඔයාට වැඩිය කරන්න දෙයක් නෑ.ඒ වගේම පුතා........... අපිට යානය හදට යවන්න පුළුවන් වුනත් නැවත පොලවට ගෙන්වාගැනීම පිළිබද එතරම් විශ්වාසයක් තියන්න බෑ.මොකද පහුගිය අවස්ථා දෙකේදීම අපි අසාර්ථක වුනා.....

ඒකට කමක් නෑ සර්.....මගේ ජීවිතේ පුදලාහරි ලෝකෙට අලුත් දෙයක් කළා කියන එක අහන්න ලැබෙන එකත් කොච්චර ලොකු දෙයක්ද ....අනිත් එක ඒක මගේ පුංචි රටට කොච්චර ලොකු ආඩම්බරයක්ද ............

ඇත්තටම පුතා මට අදහාගන්න බෑ ඔයාගේ මේ කතාව.මේ වගේ දෙයක් ඇහුවම වෙනකෙනෙක්නම් පිස්සුවැටෙනවා.ඉතින් පුතාගේ මේ නිර්භීතභාවය සහ උසස් මානුෂික ගුණාංග නිසා අපි තීරණය කළා පුතා කැමති දෙයක් හඳට ගෙනියන්න දෙන්න.ලොකු දෙයක් නම් ගෙනියන්න බැහැ.අනිත් එක මේක මේ අන්තිම කැමැත්තක් කියලා වැරදියට වටහාගන්නත් එපා...


ම්ම්ම්ම්........සර් මට හඳේ ඉන්න හාවට දෙන්න කැරට් ටිකක් ගෙනියන්න පුළුවන් වෙයිද??????....

------------------------------------------------------------------------
වහාම ක්‍රියාත්මක වන පරිදි Nasa බලධාරීන් විසින් එම සඳ ගමන අවලංගු කරන ලදී.....

ඔන්න ඔය පහුගිය සතියේ පොඩි අසනීප ගතියකින් හිටපුනිසා ගේ ඇතුලටමවෙලා තමයි ඉන්න වුනේ.ඔහොම ඉදිද්දී ඉතින් නානාප්‍රකාර දේවල් හිතෙනවනේ.මට හිතුනා අපේ ගෙදර පැත්තකට දාලා තියෙන පරණ රේඩියෝ එකට ආයෙත් පණ දෙන්න පුලුවන්ද කියලා බලන්න.මේක මේ 1960 විතර පරණ රේඩියෝ එකක්.හරියටම නිෂ්පාදිත අවුරුද්ද දන්නේ නෑ.වර්ගය Siemens.Model එක Batteriesuper  440b.ආ .....මේක මේ ජරුමන් රටේ හදොපු එකක්.සිංහලෙන් කිව්වොත් Made In Germany.ඔන්න ඔය විස්තර විතරයි මට හොයාගන්න පුළුවන් වුනේ මේකේ පිටිපස්ස පැත්ත බලලා.මේ කාලේ ඔය Fm අහලාවත් නෑ නොවැ.ඒක නිසා මේකේ වැඩකරලා තියෙන්නේ sw විතරයි.බැටරි කරන්ට් එකෙන් තමයි වැඩකරලා තියෙන්නේ.ඔන්න ඔහොමයි අතීත කතාව.

දැන් වරුතමාන කතාවට එමුකො.ඔන්න මාත් ගෙදර ගබඩා කාමරේ තිබිලා මේක එලියට ගත්තා කියමුකෝ.වටේ පිටේ දුවිලි එහෙම පිහිදාලා ගත්තම මෙන්න මෙහෙමයි මේක තිබුනේ.

ඔන්න ඔහොමයි තිබුනේ.ඉස්සරහ Knob දෙක ආගිය අතක් නෑ.ඉස්ටිකර් දෙක නම් මගේම වැඩක්.පිටිපස්සේ පින්තුරේ බැලුවම පෙනේවි මං ඉස්සෙල්ලා කිව්ව විස්තර ටික.මේකේ එරියල් එක හයිකරන තැන තියෙනවා tap එකක පින්තුරයක්.මං හිතන්නේ ඒරියල් එකට අමතරව මේක ground wire එකකුත් ඕනකරන එකක් වෙන්නැති.

ඔන්න මං මගේ ඉස්කුරුප්පු නියන් ටිකත් අරගෙන ඔපරේෂන් එකට බැස්සා.මුලින්ම පිටකවරේ ගලවලා බැලුවා.මෙන්න එතකොට ඇතුල තිබුණු හැටි.



දූවිලි සාගරයයි.දැකුළු මලුත් තිබුනා.කොහොම නමුත් ටික ටික මං ඔපරේෂන් එක කිරියාත්මක කොලා.ඔන්න තියෙනවා පින්තුරටික.විස්තර අවශ්‍ය නෑ පින්වතුනි.රූපරාමු ටික බැලුවම අවශ්‍ය ටික තේරේවි.







ඇතුලේ circuit නම් ගන්න දෙයක් තිබුනේ නෑ.ඔක්කොම ඉවරයි.ඒ ඔක්කොම එම්බාම් කරලා කපලා අහක් කොරා.මේ තියෙන්නේ ඒ බඩවැල් ටික.



ඔන්න ඊටපස්සේ හොදට සුද්ද පවිත්තර කරලා ගත්තු කවරේ තමයි මේ තියෙන්නේ.



ඉරිදා දවල් වෙනකොට ටිකක්විතර සනීපවුණු නිසා මොටෝ බයිසිකලෙන් මාතර ගොහින් අවශ්‍ය කරන අඩුම කුඩුම ටික ගෙනාවා.ඔන්න ඉස්සෙල්ලාම හයිකොරේ ලොකු ඉස්පීකරේ...



ඊට පස්සේ ගෙනාපු amplifier circuit එකයි පොඩි ඉස්පීකර් දෙකයි පිටිපස්සේ කවරේට හයිකොරා මේ වගේ.



ඔන්න ඉතින් ඔයිට පස්සේ ගෙනාපු Usb kit එක හයිකරගන්න වැඩේ තමා තිබ්බේ.මං ඉතින් දන්න ඉලෙක්ට්‍රොනික් දැනුමෙන් ඕක ගොඩ දාගත්තා.කියන්න කනගාටුයි පින්වතුනි මේ වෙලාවේ ෆොටෝ ගන්න අමතකවුනා.මෙන්න තියෙනවා ඒ වැඩේ ඉවරවුනාට පස්සේ පෙනුණු විදිහ.



ඔන්න දැන් ඉතින් වැඩේ අවසාන අදියරේ.ඉස්සරහා මීටරේ ගාව ලස්සනට පේන්න ඇතුලෙන් ලස්සන LED බල්බ් පේලියක් හයිකරා.ඒවාට අමුතුවෙන් සර්කිට් ඕන නෑ.දැන් පොඩිගානකට හදපු ඒවා ගන්න පුළුවන්.මෙන්න ඉතින් තියෙනවා අන්තිමට තියෙන විදිහ.දැන් රේඩියෝ එකට අමතරව Pen Drive,Memory Chip වලිනුත් සින්දු අහන්න පුළුවන්.මොනවද ඉතින් පපුවට පයින් ගහනවා වගේ තමා ඉතින්.....




ආ ..කියන්න අමතකවුනා දැන් මේ රේඩියෝ එකට remote එකකුත් තියෙනවා නොවැ.Knight Rider සර්කිට් එක නම පින්තුර වල පැහැදිලිව පෙන්නේ නෑ.ඒකටනම් ඉතින් වීඩියෝ එකක්ම දාන්න වෙනවා.ඒකටනම් මගේහාව පහසුකම් නැත.ඒත් ඔන්න මේ පල්ලෙහා පින්තුරේ ඒක ටිකක් විතර පේනවා.



ඔන්න ඔහොමයි පින්වතුනි "නිකම් ඉන්න බැරුවට" ජාතකේ තොරණේ විස්තරේ...........

ප.ලි.- මගේ ඉලෙක්ට්‍රොනික් හැකියාව වගේම photoshop හැකියාවත් අන්තිම දුරුවලයි........අඩුම කුඩුම ටිකට මට වියදම් වුනේ රුපියල් දෙදාහකටත් අඩුවෙන්.මේ ටික කොළඹින් ගත්තොත් රුපියල් 1500 කින් විතර වැඩේ ගොඩදාගන්න පුළුවන් වෙයි.

මාත්තුරුකාව දක්කගමන් කලබල වෙච්ච අය සමාවෙන්නලා.අද මට ලියන්න හිතුනේ සින්දු ටිකක් ගැන.දැන් ඔය අපේ සිරිලන්කාවෙත් පැරණි ගීත නව පරපුරේ අය ගායනා කරනවා නොවැ.[ඔව්..ඔව්...ගායනා කරනවා කියලා තමයි එකට කියන්නේ].ඉතින් ඕවා අවසර ඇතුව නැතුව හරි ගායනාකරලා ඉතින් එයාලත් කීයක්හරි හම්බුකොරගන්වනේ.ඒ ගැන වැඩිය කියන්න ඕන නෑ පහුගිය කාලේ ඇතිපදම් ඔය අයිතියන් ගැන කතාවුනානේ.

ඉතින් මට අද මුණු පොතේ මං ආසාකරන පරණ ඉංගිරිසි සින්දු ටිකක් [පරණ කිව්වේ අපි ඉස්කෝලේ යන කාලේ] අහලා බලනකොට ඒ සින්දු ඒ උන්දලා කියලා තියෙන්නේත් තවත් උන්දලාගෙන් උස්සලා බව මට අහුවුනා.සමහරවිට අවසර ඇතුව වෙන්නැති.ඔන්න එහෙම මට අහුවෙච්ච සින්දු කීපයක් මම පල්ලෙහා දානවා.බලන්නකෝ ඔයාලත් දන්නා ඒවා ද කියලා.බයිට් සීමිත ඇත්තෝ කමාකරත්වා.

ඔන්න මුලින්ම අහුවුනේ Westlife සංගීත කණ්ඩායම ගායනාකරන I Have A Dream ගීතය.ඔයාලත් අහලා ඇතිනේ......


මේ සින්දුවේ මුල් අයිතිකාරයෝ තමයි abba සංගීත කණ්ඩායම.මෙන්න තියෙනවා ඒ අය මේ සින්දුව කියපු හැටි....



මෙන්න ඒ පිලිබඳ වැඩිදුර විස්තර.....
http://en.wikipedia.org/wiki/I_Have_a_Dream_(song)----------------------------------------------------------------

ඔන්න ඊලගට තියෙනවා Ronan Keating ගායනාකරන When You Say Nothing At All සින්දුව.....


මේ සින්දුව මුලින්ම කියලා තියෙන්නේ Keith Whitley කියන ගායකයා 1988 දී.මෙන්න තියෙනවා ඔහුගේ සින්දුව.....



මෙන්න ඒ පිලිබඳ වැඩිදුර විස්තර.....
http://en.wikipedia.org/wiki/When_You_Say_Nothing_at_All
මෙන්න ඒ පිලිබඳ වැඩිදුර විස්තර.....
http://en.wikipedia.org/wiki/You_Are_My_Sunshine
වැඩිදුර විස්තර මෙතැනින්.....
http://en.wikipedia.org/wiki/Seasons_in_the_Sun
සින්දුව ගැන වැඩිවිස්තර.......
http://en.wikipedia.org/wiki/Rivers_of_Babylon
මේකේ අයිතියටනම් ටිකක් අවුල්සහගත සිද්දි වෙලා තියෙනවා...
http://en.wikipedia.org/wiki/The_Lion_Sleeps_Tonight ඒ ගැන වැඩිවිස්තර.....
http://en.wikipedia.org/wiki/I_Can_See_Clearly_Now

අද මම මේ ඔබට කියන්නට යන්නේ මට වෙච්ච පුද්ගලික අත්දැකීමක්.මම මේ බ්ලොග් එක ලියන්න පටන් අරන් දැන් සැහෙන කාලයක්වුනත් මගේ ජීවිතේට සම්බන්ද පොස්ට් ලියලා තියෙන්නේ අතේ ඇඟිලි ගානටත් අඩුවෙන්.ඒකට විශේෂ හේතුවක් නැතිවුනත් කොහොම කොහොමහරි ඒවා කිසිම දෙයක් ලියවුනේ නෑ.පහුගිය දවස්වල මට බ්ලොග් පැත්තේ පයගහන්න වුනෙත් නෑ.ඒකට හේතුවුණු දේ තමයි මං අද මේ ඔයාලට කියන්න යන්නේ.කොහොමවුනත් මේවගේ දේකට පස්සේ ඇතිවෙන මානසික කැළඹිලි සහගත තත්වය නිසා බ්ලොග් එකක් ලියනවා වගේ දේකට කොහොමටවත් හිත යොමුකරන්න බෑ.

දැන් ඒ ඔක්කොම දේවල් යථාතත්වයට පැමිණුනත් මේ කතාව ඔයාලට කියනවද නැද්ද කියලා මං කල්පනා කර කර හිටියේ.කොහොමවුනත් දැන් මේ කතාව හංගගෙන හිටියා කියලා ඇතිවෙන විශේෂ වාසියකුත් නෑ.අනිත් අතට කිව්වය කියලා වෙන විශේෂ පාඩුවකුත් නෑ.ඒත් මේ සිද්දියෙන් ඔයාලගේ ජීවිතවලට ගොඩාක් ලොකු පාඩම් ටිකක් ඉගෙනගන්න පුළුවන්.ඉතින් ඒක නිසා මම තීරණය කළා මේ කතාව ඔයාලට කියන්න.ඔන්න මේකයි එහෙනං මට වෙච්ච දේ .............

"කරස්" .......නෙද්දකින් විතරක් මේ යක්කුන්ට බෑනේ අම්මපා කන බත්පතටවත් වැලි දාන්නේ නැතුව විකුනන්න.අනේ මුන්ටත් ඉතින් හරියනවනේ......

බත් එකේ තිබිලා හැපිච්ච ගල් කැටේ අරගෙන විසිකරනගමන් මට හිතුනා.අපේ බ්‍රාන්ච් එකේ ක්ෂේත්‍ර නිලධාරී [සිංහලෙන් කිව්වොත් ෆීල්ඩ් ඔෆිසර්] වුනු මට ඉතින් නිතරම ඉතින් ගම් ගානේ මොටෝබයිසිකලේ නැගලා කරක් ගහන්න වෙනවා.එලියට බැස්සොත් ඉතින් ආපහු එනවෙලාවක් ගැන කියන්න බැරිනිසා මං ඔහොම එලියට යනකොට බත් ගෙඩියත් උස්සගෙන තමයි එලියට බහින්නේ.කොහොමත් ඉතින් ෆීල්ඩ් ඔෆිසර් කියන එකාට සාමාන්යෙන් පිළිවෙලකට කන්න බොන්න ලැබෙනවා අඩුයි.ඒක ඉතින් ඔය තනතුරේ වැඩකරපු උන්දැලා දන්නවා ඇති.කොහොමහරි ටිකක් දුරබැහැර ගමකට ගිහින් එන ගමන් බඩිගින්න ඉවසන්න බැරිවුණු වෙලාවට හොද තැනක බලලා බයිසිකලේ නවතලා බත් එක දෙසාබාන එක තමයි කොරන්න තියෙන්නේ.ඔන්න ඔහොම ඉතින් එනමග තිබ්බ දොළ පාරක් ලග කෑම කකා තමයි මං හිටියේ.කකුල් දෙක දොළපාරේ ඔබාගෙන බත් ටික ගිලින එකත් ඒ හැටි නරක දෙයක් නෙවේ.කොහොමත් ඉතින් දවසපුරා සපත්තු දෙකේ කකුල් ඔබාගෙන කකුල් තම්බගන්නවාට වඩා මෙහෙම ෆන් එකක් ගන්න පුළුවන් එකත් අපේ රස්සාවේ හැටියට ලොකු දෙයක්.මෙන්න මං ඔබට දෙන පලවෙනි උපදේසේ....

ඔබ කෙතරම් ලොකු රැකියාවක් කලත් සොබාව සව්න්දර්ය විදින්නට අවස්තාවක් ඇතොත් එය මහනොහරින්න......

රයිටෝ ආයෙත් කතාවට....ගල් කැටේ හැපුනත් ඉතින් බඩිගින්න ඊටවඩා වැඩිනිසා මං කොහොමහරි බත් එකම දෙසාබාලා දොලපාරෙන්ම වතුර ටිකක් බිව්වා.ආ ...කලින් කියන්න බැරිවුනා...මේ දොළපාර නිල් කැටේට වතුර ටික දැක්කම ආස හිතෙනවා.ඒ විතරක්ය දොළපාර පුරාවටම බෝල බෝල ගල්කැට.මේක දැක්කගමන් මට මතක්වුනේ ගෙදර තියෙන මාළු ටැංකිය.විගහට විගහට හොද හොද බෝල ගල්කැට ටිකක් එකතුකරලා බෑග් එකේ දාගත්තා.හොද විල අරටු කෑල්ලකුත් ඇහිඳගෙන බයිසිකලේ සීට් එකේ පිටිපස්සට තියෙලා බැඳගත්තා.හනිහනිකට බයිසිකලෙත් ඉස්ටාට් කොරගෙන ආයෙම එන්න පිටත්වුනා.මොකද සොබාව සවුන්දර්ය වින්දා වගේ නෙවේ බොසාගේ බැනුම් අහනකොට ඒ සවුන්දර්ය නිකම්ම චොරවෙලා යනවනේ.

වැඩ ඉවරවෙලා ගෙදර ඇවිත් විල්අරටු කෑල්ල මාළු ටැංකියට දාලා අර ඇහිඳගෙන ආපු බෝල ගල් කැට ටිකත් එකින් එක මාළු ටැංකියට දාන්න පටන්ගත්තා.එතකොට තමයි මට මේක හරියටම දකින්න ලැබුනේ.මුලින් දකිනකොට එච්චර විශේෂයක් නොදැක්කා වුනාට මට මේක මාළු ටැංකියට දාන්න හිතුනේ නෑ.මේ ගල් කැටේ තිත්තම තිත්ත කළු පාටයි.ඒත් හොදට බැලුවම මොකක්දෝ දිස්නෙකුත් පේන්න තියෙනවා.ඔන්න ඔය පහල තියෙන ගල් කැටේ වගේ ....


කොහොමවුනත් මට මේක මාළුටැන්කියට දාන්න හිත දුන්නෙම නෑ.ඉතින් මං හිතාගත්තා මේක ඔෆිස් එකේ මගේ මේසේ උඩ paper weight එකක් හැටියට තියාගන්න.මේක මං මෙහෙම තියාගෙන ඉන්නකොට දවසක් මාව හම්බුවෙන්න ආපු කස්ටමර් කෙනෙක් මගෙන් අහනවා "මහත්තයාට මේක කොහෙන්ද හම්බුනේ කියලා" මං ඇහුවා "ඇයි මුදලාලි එහෙම ඇහුවේ කියලා" එතකොට මිනිහා කියපි "නෑ නිකං" කියලා.අපේ රස්සාවේ හැටියට අපිට සමාජයේ හැම ජාතියකම මිනිස්සු හම්බෙනවා.ඉතින් මිනිහා "නෑ නිකං" කිව්වට "නිකංම නිකං" නොවෙනවග මගේ මීටරේට එකපාරටම වැටුනා.මෙන්න මං ඔබට දෙන දෙවෙනි උපදේසේ......

කවදාහරි ඔබේ සහජ ඉවෙන් ඔබට දෙන ඉඟි නොසලකා හරින්නේපා....

මට වුනත් මේ ගල්කැටේ දක්කවෙලාවේ අමුත්තක් දැනුනු නිසා මං මේක සාක්කුවේ දාගෙන ගෙදර ඇවිත් ආපු ගමන්ම ඇහැලියගොඩ ඉන්න මගේ මිත්‍රයෙකුට කතාකරලා සිද්දිය කිව්වා.ඌත් මට කිව්වා විගහට නිවාඩුවක් දාලා එහෙ එන්නයි කියලා.මාත් ඔන්න දැන් උන්ගේ ගෙදර.අපි මේ ගල් කැටේත් අරගෙන මැණික් ගැන බොහොම හොද දැනුමක් තියෙන උන්ගේ මාමා හම්බුවෙන්න ගියා.උන්දෑ මේක දැක්කා විතරයි ඇස් දෙක උඩ ඉන්දෝගෙන නළලේ අත තියාගෙන කියපිනම් "දෙය්යෝ සාක්කි" කියලා.ඔන්න මෑන් ගෙන් දැනගත්ත විදිහට මේක ඉතාමත් දුර්ලභ මැණිකක්.හැබැයි ගල් කැටේ දිගටම පළුද්දක් තියෙනවා කිව්වා.මිනිහා අපිට දුන්නු උපදේසේ තමයි ඉක්මනට මේක කාටහරි විකුනන්න කියලා.ඒකෙත් නැත්තක් නැත්තෙත් නෑ.මොකෝ මහජන සම්පත වගේ පිටිපස්සේ ID නොම්මරෙයි නමයි ලියන්නය කියලයි.

අපි විගහට රත්නපුරේ ගිහින් තැන් දෙක තුනකටම ගියා.එක එක වුන් එක එක ගණන් කිව්වා.මටත් දැන් මේක දරාගෙන ඉන්න බෑ.මේවගේ දේකට මොකෝ කලින් මුණ දීලත් නෑනේ.කොහොමහරි ගල්කෑල්ල ලොකුවට තිබ්බට පළුද්ද නිසා සෑහෙන්න ගාන අඩුවුනා.කොහොමහරි ලස්ස 55 කට වැඩේ තීන්දුවුනා.මෙන්න මං ඔබට දෙන ඊලග උපදේසේ මේක නම් කිව්වේ යාළුවගේ මාමා.....

මේ වගේ ගනුදෙනුවක් කරද්දී පුළුවන්තරම් ඉක්මනට ඉවරකොරන්න ඕනා.ඒ වගේම අත්පිට මුදලට වැඩේ කෙරෙන්නත් ඕනා.

වැඩේ ඇත්ත.මොකෝ අපි දන්නවය ඕවා පස්සේ පස්සේ මොන මොන දේකට හැරේවිද කියලා.සල්ලි ටිකත් අරගෙන බැංකුවට ගිහිල්ලා ඉක්මනට පොතේ දැම්මා.මැනේජර් මහත්තයට විතරක් වැඩේ කිව්වා.නැත්නම් බලනවනේ එකපාර මේ වගේ මුදලක් අතට ආවේ කොහොමද කියලා.ඊට පස්සේ කල්පනා කොරන්න ගත්තා මොකද මේ සල්ලිවලින් කරන්නේ කියලා.ගේ හදනවද???? ඉඩම් ටිකක් ගන්නවද???? බස් එකක් අරගෙන පාරට දානවද????සල්ලි අතට ආවම ඔන්න ඔය වගේ ඔලුව විකාරවෙනවා.කොහොමවුනත් කිරලා මැනලා අන්තිමේදී මං මේ තීරනෙට ආවා.මෙන්න මං ඔබට දෙන ඊලග උපදේසේ....

මේ වගේ මුදලක් එකපාර අතට ආවොත් හිතෙන හිතෙන දේ කරන්න යන්නෙපා.හොදට හිතලා බලලා වැඩේට බහින්න.

ලස්ස 55 ක්ම තියෙන එකේ මුලින් කාර් එකක් ගන්නවා.මං කොහොමත් ඉතින් ගෙවල්දොරවල් වලට වඩා ඔය වාහනවලට මනාපයි නොවැ.ඔය කාර් සේල් ඉස්සරහින් යනකොට මගේ ඇහැ ඇදිලා ගියපු කාර් එකක් තියෙනවා.මේ තියෙන්නේ.....


රතුපාට Honda fit hybrid කාර් එක.එතකොට දැන් තියෙන එක.අළුත් එක ගත්තට පස්සේ දැන් තියෙන එක විකුනනවා.හදිසියේ විකුනන්න ගියොත් හරි මිලක් ගන්නත් බැරිවෙනවා.අනිත් එක ලොරිය ගන්න මුරුංගා ගහ කපපු එකාගේ කතාවත් අපි දන්නවා නොවැ.කාර් සේල් කිහිපෙකටම ගියත් ඒවායේ තිබ්බේ කලුපාට ඒවා විතරයි.මෙන්න එක තැනක තිබුනා රතුපාට එකක්.ඔන්න එතනම එහාපැත්තෙ තියෙනවා මේ වර්ගෙම කොලපාට එකකුත්.....


රතුපාට එකක් ගන්න ආවත් මේක දැක්කම මගේ හිත මේකට ඇදිලා ගියා.පේන්නැද්ද දිලිහි දිලිහි තියෙනහැටි....ඒ එක්කම මගේ ඔලුවට ආවේ ප්‍රසිද්ද නළුවෙක් වුනු jonny depp ගේ උපදේසයක්......

ඔබ එකවර දෙකකට ආසා කරයිනම් දෙවැනි එක තෝරාගන්න...මන්ද ඔබ පලවෙනි එකට නියම විදිහටම ආසානම් දෙවැනි එකක් ගැන ආසා වෙන්නේ නැත....

ඇත්තනේ කතාව....මං කොලපාට එක ගන්න තීරණේ කළා.ඔන්න එතකොට මට තව පිනා චෑන්ස් එකක් වැදුනා.මට මතක නැතිවුනාට මේ කාර් සේල් එක අයිති මහත්තයා අපේ ඔෆිස් එකට ආපුවෙලාවෙ මම උදව්වක් කරලා තියෙනවා.ඉතින් ඒකෙන් මිනිහට ගොඩක් වාසිවෙලත් තියෙනවා.ඉතින් ඒක නිසා මිනිහා එයාගේ ලාබෙනුත් සෑහෙන ප්‍රමාණයක් අඩුකරලා ගාන කිව්වා.මෙන්න මං ඔබට දෙන ඊලග උපදේසේ.....

ඔබට කවදාහෝ කිසියම් අයෙකුට උදව්වක් කරන්න ලැබුනොත් එය මගනොහරින්න.මන්ද කවදාහෝ දවසක එය ඔබට වෙස්වලාගත් ආශිර්වාදයක් වෙනු ඇත......

සල්ලි තිබුනටම බෑ.සෑහෙන ලියකියවිලි ටිකකුත් සම්පුර්ණ කරන්න තියෙනවා.ඒවටනම් ඒ කාර් සේල් එකේ ලස්සන ගෑනු ළමයෙකුත් ඉන්නවා.මේ දැරිවි ඉතින් මගේ ලගටම වෙලා කොලටික පුරෝලා දුන්නා.සීදේවි කෙල්ල...ආ.....ඒවා පස්සේ......ඉස්සෙල්ලා ගනුදෙනුව......
කොහොමහරි සල්ලි ටික පියෙව්වට පස්සේ කාර්සේල් එකේ මල්ලි කෙනෙක් කාරෙක ගැන නට්‍ එකේ ඉදලා බෝල්ට් එක දක්වාම කියලා දුන්නා.හම්මේ ඒවා ඇහුවම මේක පදින්නත් බයයි වගේ.ඒත් ඉතින් පපුව ගැහි ගැහිම කාර් එකට නැග්ගා.හප්පේ තියෙන සනීපෙ.යතුර දාලා නමෝ විත්තියෙන් ඉස්ටාට් කොරන්න යතුර කරකැව්වා.......

ට්‍රීන්......ට්‍රීන්......ට්‍රීන්.......ට්‍රීන්..........

මෙන්න මං ඔබට දෙන වැදගත්ම උපදේසේ

ඔබට මෙවැනි සුබ සිහින අතරමග කඩනොවී බලන්නට අවශ්‍යනම් කරුණාකර නින්දට යන්නටපෙර ඔබේ එලාම් ඔරලෝසුව නිවා දමන්න..........

ටටා......