Landak

Landak
Landak Éropah
Klasifikasi ilmiah
Karajaan: Animalia Fila: Chordata Kelas: Mammalia Ordo: Inséktivora Kulawarga: Erinaceidae Subfamili: Erinaceinae
Genera
Atelerix Erinaceus Hemiechinus Mesechinus

Landak téh hartina mamalia cucukan leutik anggota subfamili Erinaceinae jeung ordo Inséktivora. Aya 15 spésiés landak nu kabagi ka opat genera, sumebar di Éropah, Asia, Afrika, jeung Selandia Baru. Di Amérika jeung Australia mah aslina euweuh landak.^[1]

Landak gampang pisan dibédakeun ti sato séjén ku ayana cucuk, nu sabenerna mah bulu ronggaan nu diheurasan ku keratin. Cucukna euweuh racunan sarta teu gampang dicabut modél porcupine. Aya éta gé ganti cucuk, nyaéta nalika cucuk "anak" diganti ku cucuk "sawawa" dina umur sataunan. Ogé nalika setrés atawa gering, cucuk landak téh sok murudul.

Landak paling deukeut ka gymnure jeung inséktivora lianna, kaasup cucurut, beurit mondok, jeung solénodon.

Paripolah landak pikeun ngajaga diri ti pamangsa nyaéta ku ngaréngkol sahingga sakabéh awak katutup ku cucukna. Tapi, matih henteuna mah gumantung ka jumlah cucukna. Landak padang pasir, pikeun conto, awakna hampang sarta leuwih ngaheulakeun kabur atawa miheulaan nyerang pamangsana. Ngaréngkol jadi "bal cucuk" mah jadi jurus pamungkas. Pamangsa landak gé rupa-rupa, gumantung wewengkonna: landak leuweung pamangsa utamana bangsa manuk (bueuk) jeung ganggarangan, spésiés nu leuwih leutik kawas Landak Panjangceuli dimangsa ku careuh, srigala, jeung cerpelai.

Sakabéh landak sacara umum mah kasebut nokturnal, najan aya sababaraha spésiés nu bisa kaluar pabeubeurang. Landak saré ampir sapanjang poé di handapeun rungkun, jukut, kolong batu, atawa na liang dina taneuh.

Najan kaasup kana kulawarga inséktivora, landak mah méh baé omnivora. Kadaharanana nyaéta serangga, kéong, bangkong jeung bancét, oray, endog manuk, bangké, suung, akar jukut, bérri, mélon, jeung samangka.

Gumantung spésiésna, mangsa keureuneuh landak téh 40-58 poé, rata-rata ngaborojolkeun 3-4 anak (spésiés badag) atawa 5-6 (nu leutik). Spésiés landak badag di alam hirupna 4-7 taun (cenah mah kungsi kacatet aya nu nepi ka 16 taun), sedengkeun nu leutik ukur 2-4 taun (4-7 mun na kandang).

Spésiés landak nu pang ilaharna dikukut nyaéta hibrid landak bodasbeuteung atawa landak kukuopat (Atelerix albiventris) jeung landak Aljazair (A. algirus). Ukuranana leuwih leutik batan landak Éropah, sahingga kadang sok disebut landak katé Aprika. Spésiés séjénna nu sok dijadikeun ingon-ingon nyaéta landak panjangceuli Mesir (Hemiechinus auritus auritus) jeung landak panjangceuli India (H. collaris). Tilu spésiés ieu leuwih cocog di hawa haneut (luhureun 72 °F/22 °C) sarta teu ngalaman hibernasi.

Landak mangrupa salah sahiji bentuk kontrol hama, sapeutingna bisa ngahakan nepi ka 200 gram serangga. Ku kituna, di Inggris mah geus ilahar pager-pager buruan téh dibolongan saukuran landak, sahingga landak bisa asup sarta ngahakanan hama serangga.

Masalahna, serangga kiwari mah loba nu geus ngaakumulasi inséktisida jero awakna. Najan landak mah kawilang weduk tina rupa-rupa racun, pestisida nu kakandung dina awak serangga mah bisa parna balukarna, nepi ka paéhna

Di wewengkon nu ngadatangkeun sarta miara landak, kayaning di Selandia Anyar jeung kapuloan Skotlandia, landak téh kalah jadi hama. Di Selandia Anyar, landak téh ngancam populasi spésiés pituin, kayaning serangga, kéong, sarta manuk nu nyayang na taneuh.

Subfamili Erinaceinae (Landak)

• Genus Atelerix (Landak Afrika)
  • Landak Opatramo (Atelerix albiventris)
  • Landak Afrika Kalér (Atelerix algirus)
  • Landak Afrika Kidul (Atelerix frontalis)
  • Landak Somali (Atelerix sclateri)
• Genus Erinaceus (Landak Leuweung)
  • Landak Amur (Erinaceus amurensis)
    • Landak Koréa (Erinaceus amurensis dealbatus)
  • Landak Éropah Wétan (Erinaceus concolor)
  • Landak Éropah Kulon (Erinaceus europaeus)
• Genus Hemiechinus (Landak Stépa, Landak Padang Pasir)
  • Landak Padang Pasir (Hemiechinus aethiopicus)
  • Landak Panjangceuli (Hemiechinus auritus)
    • Landak Afgan (Hemiechinus auritus megalotis)
  • Landak Panjangceuli India (Hemiechinus collaris)
  • Landak Brandt (Hemiechinus hypomelas)
  • Landak India (Hemiechinus micropus)
  • Landak beuteung botak (Hemiechinus nudiventris)
• Genus Mesechinus (Landak Stépa)
  • Landak Daurian (Mesechinus dauuricus)
  • Landak Hugh (Mesechinus hughi)

• Hedgehog, Wikipédia édisi basa Inggris per 26 Januari 2006.

Wikimedia Commons mibanda média séjénna nu patali jeung Hedgehog.

• Landak DMOZ (Ingon-ingon) Archived 2006-12-09 di Wayback Machine
• Landak DMOZ (Spésiés)
• Asosiasi Landak Finlandia
• Séntra Landak
• Rujukan ngeunaan landak ti Musium Zoologi Universitas Michigan
• Hedgehog Welfare Society Archived 2006-12-13 di Wayback Machine
• Dunya Landak
• Hedgies.com
• Asosiasi Landak Internasional
• Régister Landak Internasional Archived 2005-12-22 di Wayback Machine
• NLD Landak ti USENET Archived 2005-12-23 di Wayback Machine