Slacht fon Tjootern

Ju Slacht fon Tjootern ap n 27. Septämber 1426 waas die Ounfang fon do aastfräiske Befräiengskriege juun ju Haudlingsfamilie tom Brok.

Ätter dät ju Groafenfamilie tom Brok in dät 14. Jierhunnert immer moor ju Heerskup in Aast-Fräislound uurnuumen hiede un truch Hilkeräi do Heerskupsgebiede immer gratter wuuden, skul bie ju Slacht fon Tjootern ju Heerskup fon do tom Broks breeken wäide.

Ju Slacht geen fon do aastfräiske Buurensuldoaten fon Focko Ukena un Sibet von Rüstringen juun do Suldoaten fon dän Haudling Ocko II. tom Brok un do Suldoaten fon do Ooldenbuurger, dän Ärtsbiskup fon Bremen, do Groafen fon Hoya, Diepholz un Tecklenbuurich, do Tjootern beleegerden.

Ju Slacht wuud fon Focko Ukena wonnen. Groaf Johann fon Rietberg (die twaide Suun fan Otto II. fon Rietberg) un Konrad X. fon Diepholz wuuden dooded un Aartsbiskup Nikolaus fon Ooldenbuurich-Delmenhorst wuud gefangen nuumen, oawers ätters wier fräilät.

Dät waas n wichtigen Äärfoulch juun do tom Broks un n Jier leeter ap 28. Oktoober 1427 wuud Ocko II. tom Brok bie ju Slacht ap do Wüülde Äkkere bie Marienhafe noch moal wier fon Focko Ukena sloain un gefangen nuummen. In 1435 is Ocko II. tom Brok as lääsde fon ju Haudlingsfamilie dan stuurwen.

• Klaus Dede: An Weser und Jade – 1400–1429
• Heinrich Schmidt: Politische Geschichte Ostfrieslands. Rautenberg, Leer 1975 (Ostfriesland im Schutze des Deiches, Bd. 5), S. 85.