Pruverbi siciliani

Sta vuci cunteni n'alencu di Pruverbi siciliani scrivuti sicunnu lu sicilianu standard.

• A bonu cavaddu nun cci ammanca sedda.
• A matina non ni vogghiu e a sira spaddi l'ogghiu.
• A bonu cunigghiu nun màncanu tani, a bonu criatu nun manca patruni.
• A bonu è ca si mori.
• A bonu ntinnituri picca palori.
• A cacaredda nun cci voli culu strittu.
• A cavaddu datu nun circari sedda.
• A cavaddu siccu Diu cci manna muschi.
• A chiantu di bagasci nun criditi e mancu a juramenti di latruni.
• A cui duna e a cui prumetti.
• A cui ti duna na cuddura nun cci addumannari na vastedda.
• A cui ti pò pigghiari chiddu ca hai, dacci chiddu ca t'addumanna.
• A cui vi parra di cuscenza spissu, nun cci criditi, vucàtici arrassu.
• A cunfissuri, mèdici e avvucati, si cci hà diri la viritati.
• A cursa longa lu bon cavaddu pari.
• A dda zita ca nun si' nvitatu nun attrovi seggia unni t'assetti.
• A dillu a mia pòviru afflittu, comu dicissi bona sira a 'n mortu.
• A facci irata teni la vucca sirrata.
• A gattu vecchiu surci tinnireddu.
• A l'ortu e a lu mulinu vacci matinu.
• A l'ùrtimu si cùntanu li peddi.
• A la calma, bunazza e letu jiri, ogni cuccheri sapi navicari.
• A la casa di l'appisu nun cci appèniri l'ugghialoru.
• A la casa di lu patruni ogni jornu è festa.
• A la limarra nun cci pò tacca.
• A la tàvula nun s'anvecchia.
• A la tàvula si mancia senza affruntu.
• A li corpi di marteddu si canusci la magagna.
• A li nozzi d'avaru attruvaticci.
• A li vicchizzi cutiddati.
• A locu di vadagnu fari detta.
• A locu unni nun si' canusciutu, comu si' vittu si' raffiguratu.
• A lu cantari l'aceddu e lu parrari lu ciriveddu.
• A lu fini si canta la Gloria.
• A lu malatu ca nun cc'è cura, vacci la sira quannu scura.
• A lu maniari la palitta si vidi siddu ni gratta.
• A lu paisi di l'orvi biatu ccu havi un occhiu.
• A lu peju nun cc'è fini.
• A lu pruvatu cchiù nun lu pruvari, ca cchiù provi cchiù tintu l'attrovi.
• A lu riccu nun ammàncanu amici.
• A lu riccu ricchizzi, a lu pòviru piducchi.
• A lupu vecchiu nun s'anzigna tana.
• A manu di prufissuri nun si perdi càusa.
• A misi ca nun tiri sordu nun dumannari quannu veni.
• A muru vasciu ugnunu si cci appoja.
• A nu minzugnaru nun ammàncanu scusi.
• A omu malu e donna senza unuri dacci sempri lu sò, làssali jiri.
• A paisi unni ca vai, comu vidi fari fai.
• A pignata ca vugghi nun cci ancùgnanu muschi.
• A quattru cosi crèditu nun dati, sirinitati di mmernu e nùvula di stati, amuri di donni e caritati di frati.
• A spizziali nun tastari, a firraru nun tuccari.
• A Taurmina quantu su' li muntati su' li pinnina.
• A tempu di carduni lu cuteddu servi a lu patruni.
• A tempu di china tutti li strunza nàtanu.
• A tutti cosi cc'è lu rimediu, fora di la morti.
• A un tintu cani bona cuda.
• A Zafarana cc'è lu malunatu, siddu nun chiovi è annuvulatu.
• Abballa mentri la furtuna sona.
• Accatta e pèntiti.
• Accatta e vinni quannu si' priatu.
• Accatta vigna di cui nun hà chiantatu, accatta casa di cui nun hà fabbricatu.
• Accatti di appisu e vinni d'ammazzatu.
• Accussì voli Diu: tu manci e iu talìu.
• Acqu'acqua ca la fatta nun pari.
• Acqua, cunzigghiu e sali, senza addumannatu nun n'hà dari.
• Acqua e suli fa lauri, acqua e ventu fa frummentu.
• Acqua davanti e ventu darreri.
• Acqua e focu, dacci locu.
• Acqua e focu, nun cci pigghiari mprisi.
• Acqua passata nun macina mulinu.
• Ad àrburu cadutu accetta accetta.
• Ad àrburu cadutu ugnunu curri e fa ligna.
• Ad àrburu siccu e càulu ciurutu zoccu cci faciti cc'è pirdutu.
• Ad ogni santu veni la sò festa.
• Addatta e chianci.
• Addevi lu scursuni dintra la mànica.
• Addùbbiti bagascia ccu menzu ovu.
• Agghiunci pipi a li càvuli.
• Agresta cc'è ntra la pastizza.
• Ajùtiti ca t'ajutu.
• Almenu ca nun pozzu accattari pattìu.
• Ama a cui t'ama e a cui nun t'ama làssalu.
• Ama l'amicu tò ccu lu vizziu sò.
• Amara a pecura ca a dari a lana.
• Amari a cui nun ama è tempu persu.
• Amatu nun sarai siddu a tia sulu pinzirai.
• Amici ca nun ti duna, parenti ca nun ti mpresta, fùili tutti comu la pesta.
• Amici e vadditi.
• Amicu ccu tutti e fidili ccu nuddu.
• Ammatti a lu curreri sgarrari la strata.
• Ammàtula t'allisci e fai cannola, cci voi vèniri bedda di natura.
• Ammàtula tu fai lu mussu a funcia, ca prima si travagghia e appui si mancia.
• Ammuccia ammuccia ca tuttu pari.
• Ammucciari lu suli ccu la riti.
• Amuri di mamma, sirvimentu di mugghieri e carizzi d'annamurata.
• Amuri e Signurìa nun ponnu stari 'n cumpagnìa.
• Amuri, prinizza e dinari nun si ponnu ammucciari.
• Amuri riturnatu è comu càvulu rivugghiutu.
• Amuri voli fatti e no palori.
• Aperta è la porta ppi chiddu ca porta.
• Àrburu ca nun fa ciuri e nun fa frutti, tagghiàtilu di sutta a quattru botti.
• Aria e tuppè e dinari nun cci n'è.
• Aricchia di mircanti, mussu di purceddu e spaddi di sciccareddu.
• Ariu nettu nun si scanta di li trona.
• Arridducìrisi 'n càjula e 'n cammisa.
• Arristasti vecchia 'n casa.
• Arrivannu li vecchi a certa etati, addivèntanu di novu picciriddi.
• Arrivau lu mulu a lu fùnnacu.
• Aspittari e nun viniri, jiri a tàvula e nun manciari, jiri a lettu e nun durmiri, sunnu tri cosi di muriri.
• Attacca lu sceccu unni voli lu patruni.
• Attizza liti ca ppi accordiu nun manca.
• Àudimi sòggira e sèntimi nora.
• Àutru cravacca e ju ferru.
• Àutru fici l'errori e ju lu chianciu.
• Avanti di canùsciri n'amicu ti poi manciari na sarma di sali.
• Avìa novantanovi mali e vinni vaddaredda e fici centu.
• Avisti l'alligrizza 'n sonnu.

• Bagi, bagasci e muli di carrozza, na bona juvintuti, trista vicchizza.
• Bannera vecchia unura capitanu.
• Batti lu bonu ca migghiura, batti lu tristu ca pijura.
• Batti lu ferru mentri ca è càudu.
• Bedda carta mi canta dintra un cannolu.
• Beni di furtuna, pàssanu comu la luna.
• Beni e mali, 'n cira pari.
• Bisogna prima masticari feli, cui voli doppu agghiùttiri lu meli.
• Bisogna suffriri lu statu prisenti ppi nun aviri lu mali avviniri.
• Bonu pilotu a la timpesta pari.
• Bonu studiu e bona cura càccianu e arrùmpinu mala vintura.
• Bonu tempu e malu tempu nun dùranu tuttu lu tempu.
• Bonu vinu, cavaddu e mugghieri, sapi ugnunu ca nun s'hà ludari.

• Càliti juncu ca passa la china.
• Cani c'abbaja assai ammùzzica picca.
• Cani ca dormi nun lu scuitari.
• Cani e pueti abbàjanu a la Luna.
• Canta ogni gaddu a lu sò munnizzaru.
• Carni fa carni, pani fa panza, vinu fa danza.
• Cappa di povir'omu nun pigghiari, ca ti la duna e appui la voli arreri.
• Càrzira, malatìa e nicissitati, ddocu si canusci lu cori di l'amici.
• Casa di lu suli nun è viduta, di lu mèdicu è spissu visitata.
• Cavaddu bonu si vidi a cursa longa.
• Cavaddu gastimatu cci luci lu pilu.
• Cavaddu grossu ti leva di lu fangu.
• Cavaddu schifiusu màuru mori.
• Cavaddu, spata, scupetta e mugghieri nun si mprèstinu vulinteri.
• Cc'è avvezzu lu lupu a li gridati.
• Cc'è cchiù jorna ca sasizza.
• Cci appizzasti lu sceccu e li carrubbi.
• Cci appizzavi lu ferru e lu carvuni.
• Cci dissi lu gadduzzu a la puddastra: tuttu lu munnu è comu casa nostra.
• Cci dissi lu Signuri a San Giuvanni: di li singaliati vardatinni.
• Cci dissi lu surci a li nuci: dàtimi tempu ca vi spirtusu.
• Cci hà fattu caddu e crusta.
• Cci hà pinzari Jinnaru quannu hà chiòviri.
• Cci voli lu ventu 'n cresia, ma no pp'astutari li cannili.
• Cci voli sorti e cci voli furtuna nzinu a lu stissu friìri di l'ova.
• Cci vonnu zucchi di milli cantara, ca lu focu di pagghia pocu dura.
• Cchiù picca semu e megghiu ni la passamu.
• Cchiuttostu sinnu ca ricchizza.
• Ccu cui nun ti pò fari dottu e riccu, nun ti fari né pòviru né sceccu.
• Ccu cui pràttichi t'arrissimigghiu.
• Ccu ddu ventu ca porta cernu e spagghiu.
• Ccu l'occhi chini e li manu vacanti.
• Ccu li fìmmini mancu lu diàvulu cci potti.
• Ccu lu gaddu o senza lu gaddu Diu fa lu jornu.
• Ccu lu tempu e ccu la pagghia ogni frutta si matura.
• Ccu lu vìnniri e l'accattari nun cc'è né amicu e né cumpari.
• Ccu parenti e ccu vicini nun cci accattari e nun cci vìnniri.
• Centu latri nun spògghianu un nudu.
• Centu manu Diu binidissi, ma fora di lu mè piattu.
• Centu ppi unu cui duna un dinaru.
• Cerca lu beni e aspetta lu mali.
• Chi cci manca l'oriu o la pagghia.
• Chiàcchiri e scatuli di lignu, lu munti dici nun mi mpignu.
• Chiaramunti, munti d'oru: ogni fìmmina vali un tisoru.
• Chidda è la bedda ca a lu cori piaci.
• Chiddu ca primu nasci primu pasci.
• Chiddu ca si simina s'arricogghi.
• Chissi chissi ca t'avissi.
• Chistu e nenti, m'è parenti.
• Cint'anni di amuri, un mumentu di sdegnu.
• Cint'anni di malincunìa nun ponnu pagari nu granu di detta.
• Citati ti civa e casali ti scasa.
• Ciumi ca duna acqua a dui vadduni, o l'unu o l'àutru a mancari ni veni.
• Cogghi l'ogghiu supra lu maccu.
• Comu havi la facci accussì havi lu cori.
• Comu lu cani di la vuccirìa, mortu di fami e lavatu di sangu.
• Comu mi canti ti sonu.
• Comu si campa accussì si mori.
• Contru a la furtuna nun vali sapiri.
• Cori cuntenti e li vèrtuli 'n coddu.
• Cori forti cunzuma la tinta sorti.
• Corna e vastunati cui l'havi si li porta.
• Cosi cuntati cridìtini mitati: siddu menu ni criditi, megghiu faciti.
• Cosi ppi forza nun hannu valìa.
• Crìscinu l'anni e crìscinu li malanni.
• Cu' si metti 'nta lu perìculu, cci cadi.
• Cui a spranza d'àutru la pignata metti nun si scanta di lavari li piatti.
• Cui àbbita, àbbita, e cui nun àbbita mori.
• Cui ad àutru anzigna, acquista cchiù sapiri.
• Cui ad ogni dittu cridi ed è currivu, comu pigghiassi l'acqua ccu lu crivu.
• Cui ammuccia zoccu fa, è sinnu ca mali fa.
• Cui arrisorvi nun mori.
• Cui arriva primu macina a lu mulinu.
• Cui arrobba fa un piccatu, ni fa centu cui è arrubbatu.
• Cui arrobba ppi manciari nun fa piccatu.
• Cui bedda voli pariri tanti vai hà patiri.
• Cui bonu si vardau, bonu s'attruvau.
• Cui nun accatta e nun vinni, nun acchiana e mancu scinni.
• Cui ama Diu campa filici.
• Cui arrobba fa un piccatu e cui è arrubbatu ni fa centu.
• Cui assai avvrazza nenti stringi.
• Cui assai voli nenti havi.
• Cui bedda voli pàriri, peni e vai havi a suffriri.
• Cui bonu attacca megghiu sciogghi.
• Cui camina nun strazza quasari.
• Cui campa, tutti li festi l'annu vidi.
• Cui cancia la vecchia ppi la nova, peju attrova.
• Cui casca e si spingi nun si chiama cascata.
• Cui casca 'n puvirtati perdi l'amicu.
• Cui cchiù spenni menu spenni.
• Cui cerca parenti cerca corna.
• Cui d'invidia campa dispiratu mori.
• Cui di li robbi d'àutru si vesti prestu si spogghia.
• Cui di libbirtati è privu odia d'èssiri vivu.
• Cui di natura nasci niari nun pò.
• Cui di sceccu fa cavaddu lu primu càuci è lu sò.
• Cui di vinti nun sapi, di trenta nun fa, di quaranta nun hà fattu e nun fa.
• Cui dintra lu murtaru l'acqua pista, ccu li stizzi si vagna e stancu arresta.
• Cui dintra metti, fora caccia.
• Cui disìa e cui sfrazzìa e cui mori disiannu.
• Cui disìa lu mali d'àutru lu sò è vicinu.
• Cui disprizza accatta.
• Cui è malu, malu penza.
• Cui è minnali sta 'n casa sò.
• Cui è picciutteddu nun è puvireddu.
• Cui è prena hà figghiari e chiddu ca havi hà pajari.
• Cui duna pani a cani stranu perdi lu pani ccu tuttu lu cani.
• Cui fa cridenza senza aviri pignu perdi la robba, l'amicu e lu gnegnu.
• Cui fa lu vilenu, la prima tazza è la sò.
• Cui fa mbrogghi e li sbrogghia nun si chiama mbrugghieri.
• Cui fa spisi grassi fa tistamentu màuru.
• Cui fida in Diu nun peri mai.
• Cui havi cchiù sali conza la minestra.
• Cui havi facci si marita.
• Cui havi libbirtati la tinissi cara: ca ju la persi ppi la mè mala cura.
• Cui havi lingua arriva a Roma.
• Cui havi lu lupu ppi cumpari purtassi a lu cantu nu cani.
• Cui havi na mala donna ppi cumpagna havi lu priatoriu e a stu munnu.
• Cui havi nimicizzia nun dormi.
• Cui havi picca dinari sempri cunta e cui havi bedda mugghieri sempri canta.
• Cui havi putìa aperta nun mi gabba.
• Cui joca sulu mai si ncagna.
• Cui la fa l'aspetta.
• Cui leva lu dinaru a lu nutaru cci leva lu pani a li sò figghi.
• Cui lìbbiru pò stari nun s'ancatina.
• Cui lìbbiru pò stari nun si facissi ncantari.
• Cui mali fa mali aspetta.
• Cui mali fa la sò peddi vasta.
• Cui mancia crisci, cui nun mancia sparisci.
• Cui mancia fa muddichi.
• Cui mancia sulu a dui anchi s'affuca.
• Cui manìa nun pinìa.
• Cui mi vidi m'addumanna chiddi.
• Cui mori paga a tutti.
• Cui muta locu muta vintura.
• Cui n'appi n'appi cassati di Pasca.
• Cui nasci tunnu nun mori quatratu.
• Cui nesci arrinesci.
• Cui nqueta ad àutri ccu manera trista ad iddu stissu pricìpita e mulesta.
• Cui nun è letu d'iddu stissu nun è letu d'àutru.
• Cui nun hà ricotu pècuri a st'ura, nun ricogghi né pècuri né lana.
• Cui nun perdi a stu munnu assai vadagna.
• Cui nun sapi l'arti chiudi la putìa e cui nun sapi natari s'annea.
• Cui nun ti canusci caru t'accatta.
• Cui paga la sira, è francu la matina.
• Cui paga lu pisci avanti si lu mancia fitenti.
• Cui pati gilusìa arrùsica favi e cui havi raggia di cori mancia nivi.
• Cui pati ppi amuri nun senti duluri.
• Cui pècura si fa, lupu si mancia.
• Cui perda cappa e ricùpira mantu nun perdi tantu.
• Cui perdi ppi justizzia la mugghieri curnutu affattu nun si pò chiamari.
• Cui picca avi caru teni.
• Cui piggghia primu nun è gabbatu mai.
• Cui porta 'n gruppa è cacciatu di sedda.
• Cui pò fari e nun fa campa scuntenti e va cunnannatu a li peni di lu nfernu.
• Cui ppi figghi e niputi si sfazza pozz'èssiri pigghiatu ccu na mazza.
• Cui pràttica ccu zoppi a l'annu zuppìa.
• Cui preggia e nun paga nun si chiama priggirìa.
• Cui primu dissi donna nti stu munnu quantu era megghiu assai ca dicìa dannu.
• Cui pùnciri si senti nesci fora.
• Cui scappa la cunta.
• Cu picca parrau,mai si pintiu.
• Cui scecchi caccia e fìmmini cridi, facci di paraìsu nun ni vidi.
• Cui servi a pòpulu e a Signuri mancia di l'ùrtimu ed è appisu ntra li primi.
• Cui sfurtunatu nasci accussì mori.
• Cui si marita sta cuntenti un jornu, cui ammazza un porcu sta cuntenti un annu.
• Cui si pigghia ppi doti la mugghieri dulurusu fa lu sò campari.
• Cui si preja di capiddi e denti si preja di nenti.
• Cui si scusa senz'èssiri dumannatu, iddu stissu s'accusa.
• Cui si vardau si sarvau.
• Cui sparti havi la megghia parti.
• Cui sputa a l'aria cci torna 'n facci.
• Cui strigghia lu sò cavaddu nun si chiama carusu.
• Cui suspira nun è cuntenti, cui santìa nun hà dinari; cui di vecchi s'annamura, si la pinna la vintura.
• Cui t'accarizza cchiù di quantu soli, o t'hà ngannatu o ngannari ti voli.
• Cui tant'àutu lu sò carru teni, tantu cchiù prestu la pinnina pigghia.
• Cui tantu si fidau arristau ngannatu.
• Cui tarda e nun manca, nun si chiama mancaturi.
• Cui tardu arriva attrova l'ossa.
• Cui tardu arriva tristu alloggia.
• Cui tasta nun spinna.
• Cui tempu aspetta tempu perdi.
• Cui ti voli beni ti fa chiànciri e cui ti voli mali ti fa arrìdiri.
• Cui travagghia a mànnira mancia quagghiata.
• Cui travagghia nun vadagna.
• Cui troppu la stira, prestu la spezza.
• Cui va a la festa senza lu tarì, va ccu na dogghia e ritorna ccu tri.
• Cui va a ligna a mala parti si li nesci 'n coddu.
• Cui varda lu tempu mori pòviru.
• Cui veni appressu cunta li pidati.
• Cui voli puisìa vinissi 'n Sicilia.
• Cui voli tila simina linu.
• Cui vunta vara.
• Culu ca mai vitti vraca, quannu li vidi tutti si li caca.
• Cuntenti e gabbatu.
• Cunti spissu, amicizzia longa.
• Cura, scrittura e firmatura sunnu li vardiani di la casa.
• Cuscenza lesa fa l'omu timurusu.
• Custau caru lu figghiu parrinu.

• D'ammasciaturi m'attruvavi zitu.
• Dammi sorti e jèttami a mari
• Dari ppi dari ntra parenti e strani, la cammisa va cchiù di lu jippuni.
• Dda casa ca nun c'è omu nun hà nomu.
• Ddu donu ca ni duna la natura ni lu purtamu dintra la sipurtura.
• Ddu santu ca hà pruvidutu hà pruvìdiri.
• Detti e mugghieri dintra stu munnu cui nun ni voli nun n'havi.
• Di ciumi mutu pàssacci luntanu, ma quannu grida pàssilu sicuru.
• Di cui sunnu li figghi si l'annaca.
• Di Diu e di li vicini nun ti poi ammucciari.
• Di jornu 'n jornu s'inguaggia ssa zita.
• Di la rosa ni nasci la spina e di la spina ni nasci la rosa.
• Di la vucca a lu nasu nun si pò sapiri la viritati.
• Di li nimici nun pigghiari cunzigghiu.
• Di lu dittu a lu fattu cc'è 'n gran trattu.
• Di lu mali spissu ni nasci lu beni.
• Di lu malu pagaturi o oriu o pagghia.
• Di lu mortu si n'havi na vota, ma di lu vivu sempri.
• Di lu nimicu nun pigghiari cunzigghiu.
• Di lu pizzu si canusci lu marvizzu.
• Di mali robbi su' vistutu.
• Di na figghia ni fai centu jènniri.
• Di nu cani mutu e di n'omu ca nun parra stàticci arrassu e jittàticci terra.
• Di nvernu ogni ficateddu di musca è sustanza.
• Di mbriachi, di pazzi e di spirdati stàtini arrassu ducentu pidati.
• Dici la mama Rocca, si guarda e nun si tocca.
• Dicìticci a la zita ca si spara, giacchì lu matrimoniu sfallìu.
• Dinari e santitati cridìtini mitati.
• Dintra li tempi filici s'attròvanu amici, dintra li calamitati nun spìanu comu stati.
• Dintra nu biccheri d'acqua t'anniasti.
• Discursu fattu a tàvula mai si pigghia: hà arristari sutta la tuvagghia.
• Disìa beni a lu tò vicinu, ca quarchi ciàuru ti ni veni.
• Diu a cui voli beni manna cruci e peni.
• Diu manna lu friddu sicunnu li lani.
• Diu manna viscottu a cui nun havi ganghi.
• Diu ni scanzi di li calamitati, d'òmini spani e fìmmini varvuti.
• Diu ti scanzi di malu vicinu e di principianti di viulinu.
• Donna senza unistati nun fa mai bedda.
• Donni e cavaddi, pìgghiali di li vicini.
• Doppu ca Jaci s'arsi nivicau.
• Doppu cuntintizza veni morti.
• Doppu lu fattu lu cunzigghiu è vanu.
• Dormi patedda ca lu granciu vigghia.
• Dui cosi nun potti addrizzari lu Signuri: cucuzzi longhi e testi di viddani.
• Dui re dintra nu regnu e dui cori dintra nu pettu, stari nun ponnu mai 'n paci e uniti.
• Dui tizzuni astutati nun ponnu appiccicari.
• Dùnami n'arti e nun mi dari parti.
• Duru ccu duru nun fàbbrica muru.

• È bona donna chidda ca nun parra.
• È bona la lavata di ventri?
• È cchiù lu nolu di la mircanzìa.
• E chi mi servi a mia l'amari tantu, ca zappu a l'acqua e siminu a lu ventu!
• E cui ti pari ca dormi e riposa, chiddu porta la cruci cchiù gravusa.
• E d'unni vaju ju, lu mari vota, dissapita si fa l'acqua salata.
• È fatta l'agghiotta.
• È megghiu fora ntra lampi e surruschi ca stari dintra a scutulari ciaschi.
• È megghiu na brunetta grazziusa ca na janca dissapita.
• È megghiu n'òpira nun l'accuminciari ca accumincialla e appui nun la finiri.
• E n'hà manciatu, vucca mia, pastizzi! Ed ora t'addubbi a ramurazzi.
• È persu l'ogghiu santu a li Judei.
• È veru ca l'arrubbari è santu e giustu, ma no ntra nuatri latri.
• È veru ca lu fuìri è virgogna, ma è sarvamentu di vita.
• È veru ca quattr'occhi fannu vista, ma sempri è bonu l'ajutu di costa.
• E siddu peju nun è chistu nun è nenti.
• È tanta la mè rètica furtuna, ca siddu vaju a lu nfernu arrestu fora.
• E tuttu oru nun è chiddu ca luci.
• E unni mai si ntisi, viddanu gintili e marinaru curtisi?
• Ed è lu sali e fa vermi! Penza chi voli fari lu furmaggi!
• Èssiri amicu di li cani e di li gatti.
• Èssiri lu gnuranti e la morti.
• Èssiri lu sicchiu e la corda.
• Èssiri nun si po', cchiù di na vota.
• Èssiri pani duru e cuteddu ca nun tagghia.

• Fa beni a la gatta ca ti gratta.
• Fa beni e gabba a tutti.
• Fa beni e nun vardari a cui.
• Fa beni e scurdatillu, fa malu e pènzacci.
• Fa comu poi siddu nun poi fari comu voi.
• Fa dui facci comu Lintini.
• Fa l'arti ca sai, si nun arricchisci campirai.
• Fa zoccu hà fari, li fatti d'àutru nun vardari.
• Fàbbrica e liti nun finìscinu mai.
• Fàbbrica nti li strati, ncigneri e architetti 'n quantitati.
• Facci di sdineja dèbbiti.
• Facci senza culuri, o fintu, o tradituri.
• Facemu cuntu ca chioppi e scampau e la nostra amicizzia finìu.
• Facemu cuntu ca fu lignu e s'arsi e la propia sò cìnniri si persi.
• Facci ca nun è vitta è disiata.
• Falla comu voi sempri cucuzza è.
• Fari a cui figghi e a cui figghiastri.
• Fari la varva di stuppa.
• Fatti la nòmina e va' cùrchiti.
• Fici un viaggiu e dui sirvizzi.
• Fidi ni sarva, no lignu di varca.
• Figghiau la muntagna e fici un surci.
• Fìmmina ca t'avvrazza e stringi, o t'ha tinciutu o cerca mi ti spingi.
• Fìmmina di tilaru, gaddina di puddaru e trigghia di Jinnaru.
• Fìmmina e burritta, tènila stritta.
• Fìmmina senza amuri è ciuri senza uduri.
• Fora cani e picciotti.
• Forti burrasca, pocu dura.
• Forti malincunìa, forti cuvernu.
• Friquenta chiddi megghiu di tìa e appìzzacci li spisi.
• Fudda e mala vìnnita.
• Furia di capitanu novu.
• Futti, futti, ca tantu Diu pirduna a tutti.

• Gaddina vecchia fa bonu brodu.
• Gaddina ca camina porta la vozza china.
• Gatta ca nun pò arrivari a lu primuni dici ca feti.
• Gatta pisciarola fa li figghi orvi.
• Gàudiu di fora e trìvulu di casa.
• Geniu e cùrchiti 'n terra.
• Geniu fa biddizza.

• Hà vittu lu voi? Né jancu né nìuru.
• Hai la facci a prova di bumma.
• Hai lu setti di mazzi ncasciatu.
• Hai nu mali, dillu a tutti.
• Haju fattu la minestra ppi li gatti.
• Haju la minchia malamparata, la mannu a caccia e mi veni firuta.
• Haju nu cori di sceccu e nu cori di liuni.
• Haju nu maritu c'annavanza, c'accatta a quattru scuti e vinni a n'unza.
• Haju suffrutu li vai di lu linu.
• Haju tanta racina appisa ca mi casca lu tettu di la casa.

• Iddiu ni scanza di mali vicini e di livata d'òmini dabbeni.
• 'I cosi cch'e cosi, e i ciaramiri supra i casi.

• Jochi ccu dui favi e na luppina.
• Ju dinari vogghiu e no cunzigghiu.
• Ju macari ca t'amu e ti portu rispettu mai mi scordu chiddu ca m'hà fattu.
• Ju ppi tia nun pagavi mammana.
• Jùnciti ccu li megghiu di tia e facci li spisi ppi la vìa.
• Jurnata rutta, pèrdila tutta.
• Juvintuti disurdinata fa vicchiania tribbulata.

• L'acidduzzu nti la caggia nun canta ppi amuri, canta ppi raggia.
• L'acqua e la morti, aspèttila ca veni.
• L'acqua ntra Austu duna ogghiu, meli e mustu.
• L'amici si canùscinu a li tempi di lu bisognu.
• L'amicu veru servi a li bisogni.
• L'amuri è comu lu citrolu, accumincia duci e appui finisci amaru.
• L'amuri è misuratu: cui lu porta l'havi purtatu.
• L'anni pàssanu supra di nui.
• L'àrburu mentri è tènniru s'addrizza.
• L'àrburu picca e la rama arricivi.
• L'arma a Diu e la robba a cui aspetta.
• L'avaru quannu avara, avara tuttu.
• L'occhiu di la sarausana fa nèsciri li serpi di la tana.
• L'occhiu di lu patruni ngrassa lu cavaddu.
• L'omu anvecchia cchiù ppi li pinzeri ca ppi l'anni.
• L'omu ca havi dinari e l'amicizzia nun temi la justizzia.
• L'omu ca nun arrispunni a prima vuci è sinnu ca dda cosa nun cci piaci.
• L'omu ca nun si fa li fatti soi ccu la lanterna va circannu vai.
• L'omu ca si marita nasci e mori.
• L'omu ca teni fidi a li bagasci, perdi l'arma, lu corpu e mpuvirisci.
• L'omu di la sò casa trascuratu, succedi spissu ca mori curnutu.
• L'omu di vinu nun vali un carrinu.
• L'omu diunu havi lu diàvulu 'n culu.
• L'omu fintu, eccu lu ritrattu: lu meli 'n vucca e lu diàvulu 'n pettu.
• L'omu quannu nesci di la porta lu cori si lu fa quantu na sporta.
• L'omu senza dinari siddu camina cumpari mortu doppu na simana.
• L'omu senza furtuna va sempri a la piduna.
• L'omu sullìcitu nun mori puvireddu.
• L'uccasioni fa l'omu latru.
• L'unuri ca si perdi nti un minutu, nti cint'anni nun è ricumpinzatu.
• La carni di l'omu si mancia ccu lu meli.
• La casa leggia ìnchila di spini.
• La cira squagghia e lu santu nun camina.
• La còllira di la sira sàrvala ppi la matina.
• La cuda è la cchiù forti di scurciari.
• La cursa di lu sceccu ti facisti.
• La fami è bagascia e latra.
• La fami fa nèsciri li serpi di la tana.
• La frevi abbatti lu liuni.
• La gaddina chi hà fattu l'ovu nun si chiama cchiù puddastra.
• Lu gilusu mori curnutu.
• La leta maritata arrassu di sòggira e cugnata.
• La lingua nun havi ossu e arrumpi l'ossu.
• La lingua va unni lu denti doli.
• La luntananza nun cunzuma amuri.
• La mala erva sempri va avanti.
• La massara cerni e mpasta, ma lu furnu conza e vasta.
• La matinata fa la jurnata.
• La megghiu parola è chidda ca nun si dici.
• La mugghieri d'àutru sempri pari cchiù bedda.
• La paci di lu cori vali cchiù di li ricchizzi di lu munnu.
• La pignata 'n cumuni nun vugghi mai.
• La stizzera cuntinua percia la petra.
• La suggizzioni è peju di na cutiddata'.
• La troppu cunfidenza fa pèrdiri la crianza.
• La vacca quannu è vecchia mai si coci.
• La viritati va' 'n summa comu l'ogghiu.
• La vurpi ca nun pò arrivari a la racina va' dicennu ca è àvura.
• La vutti china e la mugghieri mbriaca.
• La zara è a cui tocca.
• Lassa purtari lu mustazzu a lu gattu.
• Lassau dittu la pòvira nanna: lu risu ccu li vai vannu a vicenna.
• Lavari la testa a lu tignusu.
• Li beni di furtuna càncianu ccu la luna.
• Li corna sunnu comu li denti: dòlinu quannu spùntanu ma appui sèrvinu ppi manciari.
• Li cosi longhi addivèntanu serpi.
• Li cosi vecchi mòrinu 'n casa di lu pazzu.
• Li difetti di la zita s'ammùccianu ccu la doti.
• Li disgrazzi mei sunnu tantu spissu ca chiddi d'àutru mi pàrinu spassu.
• Li fìmmini quarchi vota dìcinu lu veru, ma nun lu dìcinu 'nteru.
• Li gattareddi hannu aperti l'occhi.
• Li megghiu parenti sunnu li spaddi.
• Li mura nun hannu aricchi e sèntinu.
• Li palori sunnu comu li cirasi, una ni pigghi e ni vèninu centu.
• Li picciriddi hannu a parrari quannu piscia la gaddina.
• Li robbi na vota usati pèrdinu prezzu cchiù di la mitati.
• Li vai di la pignata li sapi la cucchiara.
• Li veri amici e li veri parenti sunnu li quattru tarì ccu l'ali janchi.
• Libbirtati e saluti cui l'havi: è riccu e nun lu sapi.
• Loda lu mari e tèniti la terra.
• Lu bonu nomu vali cchiù di li ricchizzi di lu munnu.
• Lu bonu pagaturi è patruni di la vurza d'àutru.
• Lu bonu pannu nzinu a la pezza, lu bonu vinu nzinu a la fezza.
• Lu celu e la terra l'hà juratu, nun si fa cosa ca nun s'hà saputu.
• Lu corvu ppi li tanti pinzeri anniricau.
• Lu culu ca arrobba la cammisa.
• Lu curnutu quannu nun mancia cci màncianu li corna.
• Lu cuteddu arrivau a l'ossu.
• Lu cuviu fa li corpa e nun è timutu.
• Lu diàvulu nun è tantu bruttu ppi quantu si dipingi.
• Lu dinaru fa cantari a l'orvi.
• Lu dottu a pedi e lu sceccu a cavaddu.
• Lu ferru mentri è càudu si stira.
• Lu fìngiri è bedd'arti, l'amari è curtisìa.
• Lu focu vicinu a la linazza sùbbitu appigghia.
• Lu friddu, la mistizzia e lu pinzeru sunnu nimici di lu corpu umanu.
• Lu gabbu arriva e la gàstima no.
• Lu granciu dici a la tartuca c'havi li pedi storti.
• Lu jimmirutu ammenzu di la vìa nun si vardava lu jimmu c'avìa.
• Lu jornu nun ni vogghiu e la sira spardu l'ogghiu.
• Lu latru è boja e lu rubatu appisu.
• Lu lignu stortu lu focu l'addrizza.
• Lu lupu di mala cuscenza zoccu òpira penza.
• Lu malu ferru si ni va a la mola.
• Lu malu pagaturi e l'usuraju si jùncinu prestu.
• Lu malu passu pàssilu prestu.
• Lu manciari senza vìviri è comu l'annuvulatu senza chiòviri.
• Lu mèdicu c'insigna ciucculata e baccalaro ê picciotti schietti.
• Lu megghiu mali è lu menu mali.
• Lu minzugnaru hà aviri bona mimoria.
• Lu minzugnaru nun è crittu mai.
• Lu munnu assai prumetti e nenti duna.
• Lu munnu è scala: cui scinni e cui acchiana.
• Lu panaru siddu nun s'inchi si vagna.
• Lu patiri fa spirtiri.
• Lu picca m'abbasta, l'assai mi superchia.
• Lu picuraru vistutu di sita, sempri feti di latti e di lacciata.
• Lu piru quannu è chiumputu casca sulu.
• Lu pisci feti di la testa.
• Lu porcu sempri jànniri si nzonna
• Lu riccu è riccu ppi lu bonu bon'è, lu pòviru è pòviru ppi lu chistu ch'è?
• Lu saccu di cch'è chinu spanni.
• Lu santu è di màrmuru e nun suda.
• Lu sazziu nun cridi a lu diunu.
• Lu sceccu lu purtau e lu sceccu si lu manciau.
• Lu sceccu tannu arragghia, quannu voli l'oriu o la pagghia.
• Lu Signuri chiudi na porta e grapi un purticatu.
• Lu Signuri duna viscotta a cui nun havi ganghi.
• Lu sinatu si sciarrìa e mastru Accurziu va' carziratu.
• Lu superchiu arrumpi lu cuverchiu.
• Lu tempu persu nun è di nuddu.
• Lu travagghiu d'àutru nun si senti.
• Lu vadagnu arrisvigghia lu vurdunaru.
• Lu vadagnu di la bedda si ni va a jachettu.
• Lu veru surdu è chiddu ca nun voli sèntiri.
• Lu viddanu nascìu cchiù prima di lu Signuruzzu.
• Lu viddanu siddu avissi un trisoru 'n coddu sempri havi l'occhi di mitaddu.
• Lu vinu sia bonu, la tazza sia di lignu.
• Lu vizziu appigghia comu amenta.
• Lu voi ca dici curnutu a lu sceccu.
• Lu voi ppi li corna e l'omu ppi la palora.
• Lu voi nun parra, c'havi la lingua grossa, ma siddu parrassi gran cosi dirrìa.
• Lu vucciri vannìa la carni ca havi.
• Luntanu d'occhi, luntanu di cori.

• M'hai fattu vìdiri li stiddi di menz'jornu.
• Ma siddu ppi sorti stu pedi camina, tradituri vardàtivi la vita.
• Macari siddu dintra lu cantaru tu pischi, pigghi trigghi e linguati li cchiù vaschi.
• Magara cerca para e latruni cumpagnuni.
• Mali nun fari, scantu nun aviri.
• Mancia sanu e vivi malatu.
• Manna cui voli e cui nun voli manna.
• Mariti, mariti c'abbenti, ti menti a lu caternu di li vai.
• Matrimoni e viscuvati di lu celu sunnu calati.
• Mbriachi e picciriddi Diu l'ajuta.
• Mè patri si chiama cucciddatu e ju moru di fami.
• Mèdicu piatusu fa la chiaja virminusa.
• Megghiu accatta 'n diàvulu cint'unzi e no nu minnali cincu grana.
• Megghiu accordiu magru ca sintenzia grassa.
• Megghiu aviri un maritu nipitedda ca un garzu mpiraturi.
• Megghiu pani e cipudda a la tò casa ca 'n casa d'àutru na cena sfrazzusa.
• Megghiu dogghia di urza e no dogghia di cori.
• Megghiu fuìri ccu unuri ca arristari ccu virgogna.
• Megghiu oggi l'ovu ca dumani la gaddina.
• Megghiu nvidiatu riccu ca fallutu cumpassiunatu.
• Megghiu mòriri ca mali campari.
• Megghiu mòriri e lassari ca mòriri e disiari.
• Megghiu na vota arrussiari ca centu voti agghiarnari
• Megghiu picca gòdiri, ca assai trivuliari.
• Megghiu pugna ntra l'occhi ca sgracchi a li mura.
• Megghiu sulu ca malu accumpagnatu.
• Megghiu taverna ca spizziaria.
• Megghiu testa di lucerta ca cuda di sirpenti.
• Mentri ca semu papa papiamu, cui sapi siddu n'àutra vota papa semu.
• Mentri lu mèdicu studìa lu malatu si ni mori.
• Mi fai vìdiri la luna dintra lu puzzu.
• Mi misi lu cessu dintra e l'acqua fora.
• Morsi cui morsi e cui amava persi.
• Mortu lu cani finisci l'arragghiu.
• Morti nun veni mai senza scaciuni.
• Mugghieri ladia, cappottu novu e mula ca n'arrenna sunnu saluti ppi n'omu ca camina.
• Munti ccu munti nun si junci mai.
• Murìu cridenza, lu malu pagaturi l'ammazzau.
• Mùzzica e vivi ca è latti di crapa.

• N'àrburu a primu corpu nun si tagghia.
• 'N tempu di caristìa ogni pirtusu è gallirìa.
• 'N corpu a lu circu e 'n corpu a lu timpagnu.
• 'N sulu mancu è bonu 'n Paraìsu.
• Na bona palora costa nenti e vali assai.
• Na dogghia di cchiù, basta ca è màsculu.
• Na fìmmina e na pàpira fannu na fera.
• Na manu lava l'àutra e tutti dui la facci.
• Na vota si gabba la vecchia.
• Né jusu ccu li vèrtuli, né susu ccu la visazza.
• Né tònica fa mònacu, né cricca fa parrinu.
• Né vistu né pigghiatu, nun pò jiri carzaratu.
• Nenti sunnu li travagghi, peni e sunti, quannu cc'è la saluti nun cc'è nenti.
• Nfilari troppu carni a lu spitu.
• Ni vìnninu vìzzichi ppi lanterni.
• Nìuru ccu nìuru nun tinci.
• Ntra dui liticanti lu terzu godi.
• Ntra greci e greci nun si vìnninu avvrazzi.
• Ntra l'anta e la paranta, amaru cui la manu cci chianta.
• Ntra sciarri di maritu e di mugghieri, cui cci curri ppi spàrtiri è un sumeri.
• Nu mali è passatu e l'àutru è juntu.
• Nuddu è cuntenti di la sò sorti.
• Nuddu prufeta a la sò patria è accettu.
• Nuddu sapi li vai di la pignata, siddu no la cucchiara ca l'arrimina.
• Nuddu si pigghia siddu nun s'arrussumigghia.
• Nuddu ti grapi siddu nun ti sapi.
• Nun accattari la gatta dintra lu saccu.
• Nun arrisvigghiari lu cani ca dormi.
• Nun avìa nasciutu e si chiamava Cola.
• Nun caca ficu e pàssuli lu celu.
• Nun sai caminari e voi cùrriri.
• Nun si duna l'arti a cui l'addumanna.
• Nun camini e lassi la fatta.
• Nun cc'è mortu senza cantu, nun cc'è zita senza scantu.
• Nun cci acchiana stu vermu 'ncunocchia.
• Nun diri quantu sai, nun fari quantu poi, nun spènniri quant'hai.
• Nun dura tuttu lu tempu la biddizza.
• Nun è tutt'oru chiddu ca luci.
• Nun è viddanu cui viddanu nasci, viddanu è cui fa la viddanìa.
• Nun fari beni ca l'hai rinnutu mali.
• Nun fari farina modda.
• Nun hai capiddi e cerchi ntrizzaturi.
• Nun hai chi fari pettini a lu cani.
• Nun jissi scàusu cui simina spini.
• Nun jucati di manu, liparoti, ca lu jocu di manu sempri feti.
• Nun la senti Musarra sta canzuna.
• Nun lassari lu propiu ppi l'appillativu.
• Nun ludari la jurnata siddu nun scura la sirata
• Nun mi fai pigghiari un pùlici a l'anca.
• Nun mi lassu pèrdiri la birritta dintra la fudda.
• Nun mi ni curu siddu mori mè figghiu, basta ca vidu tinta a mè nora.
• Nun mpristari, nun priggiari, nun fari beni ca l'hai rinnutu mali.
• Nun poi a lu sceccu e duni a lu varduni.
• Nun sempri arridi la mugghieri di lu latru.
• Nun si fa festa senza tammurinu.
• Nun si fa passari na musca a lu nasu.
• Nun si làuda jornu siddu nun scura.
• Nun si movi fogghia d'àrburu siddu nun cc'è la vuluntati di Diu.
• Nun si pò contra ventu navicari.
• Nun tantu duci ca ugnunu ti suca, nun tantu amaru ca ugnunu ti caca.
• Nun ti fidari ca la corda è grossa, quantu è cchiù grossa cchiù prestu si lassa.
• Nun ti fidari ca ti vogghiu beni, ca sdegnu tutti cosi fa scurdari.
• Nun ti lavari, no, ca allurdi l'acqua, bedda cci voi vèniri di natura.
• Nun tiniri amicizzia ccu li sbirri, ca cci perdi lu vinu e li sicarri.
• Nun tuccari lu culu a la cicala.
• Nun tutti li mali vèninu ppi nòciri.
• Nun vinissi mai la mala nova.

• Occhi hatu fattu chiànciri? Chianciti!
• Ogni acqua leva siti.
• Ogni disìu veni 'n fini.
• Ogni fatica lu sò premiu aspetta.
• Ogni lignu havi lu sò fumu.
• Ogni mircanti parra di la sò mircanzia.
• Ogni pitrudda servi a la murami.
• Ogni santu havi li sò divoti.
• Ogni santu spruvistu Diu pruvidi.
• Ora ca cchiù nun haju, sfurtunatu! La mè propia carni mi disana.
• Ora ca ngranaru li fasoli nun mi cci curcu cchiù mortu di fami.
• Ora ca stancau santificau.

• Pacenzia caru amicu a li burraschi, ca nun si mancia meli senza muschi.
• Palermu è omu dabbeni, cui va va e cui veni veni.
• Palori a vutari casacca.
• Pani e sacramentu cci n'è a ogni cunventu.
• Pani e vinu rinforza lu schinu.
• Pari ccu pari e joca ccu li toi.
• Parti la sfici Diu, parti Camastra.
• Passau ddu tempu ca Betta filava.
• Peddi ppi peddi megghiu la tò ca la mia.
• Penza la cosa avanti ca la fai, ca la cosa pinzata è bedda assai.
• Penza, taruni, quann'eri sarmentu.
• Persi li muli e cerca li capistri.
• Picca palori e vistuti di pannu.
• Piccatu vecchiu sintenzia nova.
• Pigghia munnizza di lu tò munnizzaru e siddu nun la poi aviri accàttila.
• Pigghia primu e pigghia ossu.
• Pìgghiala bedda e pìgghiala ppi nenti, ca di la bedda ti ni poi priari.
• Pìgghialu sulu e pìgghialu nudu.
• Pignata vardata nun vugghi mai.
• Pisti l'acqua dintra lu murtaru.
• Ppi li fìmmini e lu vinu l'omu perdi lu judizziu.
• Ppi lu pani e ppi lu vinu si cancia lu vicinu.
• Ppi lu tantu cùrriri sfrinatu cascavu e nun mi pozzu dari ajutu.
• Ppi mènnuli muddisi a l'Aragona, ppi picciotti beddi a la Favara.
• Ppi nu puntu di Martinu persi la cappa.
• Ppi nun dari un granu a nu varveri ti fai fari la testa scali scali.
• Ppi nun fari cuntenti a la morti, siddu moru arrestu ccu l'occhi aperti.
• Ppi tanti cunzigghi la navi si sfasciau ammenzu a li scogghi.
• Ppi timuri di ciàuli nun simina linu.
• Prima di parrari màstica li palori.
• Pueta, cantaturi e Pinci-santi, sira e matina càmpanu scuntenti.

• Quannu cc'è tanti cani supra n'ossu, fa di bisognu di vucari arrassu.
• Quannu davanzi v'avvrazza la donna, tannu darreri vi tradisci e nganna.
• Quannu joca lu nicu ccu lu granni a mala parti li vèrtuli appenni.
• Quannu l'amuri voli attrova locu.
• Quannu l'ossu cc'è la carni verni.
• Quannu la fìmmina stranuta, nun cci hà diri saluti, ma scupittata.
• Quannu lu chiovu di la rota è sutta, ddà cci spunta lu jornu e ddà cci annotta.
• Quannu lu diàvulu jìa a la scola lu miu era addutturatu.
• Quannu lu funnu pari servi a nenti lu sparagnari.
• Quannu lu pòviru duna a lu riccu lu pòviru si ni ridi.
• Quannu nun cc'è la gatta li surci abbàllanu.
• Quannu ppi tanta scarsizza di lazzu, quannu ppi tanta funnizza di puzzu.
• Quannu si cùrcanu li lauri spìncinu la testa li massara.
• Quannu tu manci chiùditi la porta e quannu parri vòtiti darreri.
• Quannu tu vidi ca lu passu è malu, pìgghialu ppi la retina lu mulu.
• Quannu vìnciri nun poi cerca la paci.
• Quantu amici si pèrdinu, tanti scaluni si càlanu.
• Quantu palori perdi cui va a caccia chiamannu la sò cani cuccia cuccia!
• Quantu sapi lu pazzu 'n casa sò, lu saviu 'n casa d'àutru nun lu sapi.
• Quantu vali n'amicu 'n chiazza, nun vàlinu cint'onzi nti la cascia.
• Quannu viditi nèspuli chianciti, chistu è l'ùrtimu fruttu di la stati.
• Quattru cosi nun si ponnu ammucciari: amuri, tussi, fumu e gravitanza.

• Raccumannai la pècura a lu lupu.
• Robba di Chiesa nun ti vegna 'n casa.
• Rimiti, ciumi e nduvini sunnu li mali vicini.
• Rìsinu nun inchi isterna.
• Rizzi, pateddi e granci, spenni assai e nenti manci.

• Saccu vacanti nun pò stari addritta.
• Sanitati senza dinari è menza malatìa.
• Sbirri, bagasci e cani quannu sunnu vecchi mòrinu di fami.
• Scecchi e picciriddi Diu l'ajuta.
• Sceccu e maritu, accàttilu pudditru.
• Sceccu mortu, puleju a lu nasu.
• Sceccu puta e sarmentu fa racina.
• Sciarra ntra parenti picca dura.
• Sciarri di maritu e mugghieri dùranu nzinu a lu lettu.
• Scrusciu di carta e cumpàita nenti.
• Sedi sedi ca bona fata veni.
• Sempri si ni pintìu cui parrau assai, cui stesi mutu nun si ni pintìu mai.
• Senza dinari nun si canta missa e mancu senza stola si cunfessa.
• Senza lu tavirnaru fai lu cuntu.
• Si' picciriddu ma capi assai.
• Si' vera gatta di firraru.
• Si sapi unni si nasci, ma nun si sapi unni si mori.
• Si varda lu cani ppi rispettu di lu patruni.
• Sicunnu l'asta porta la bannera.
• Sicunnu la trasuta fa la spisa.
• Siddu a ogni cani c'abbaja cci jetti na petra nun t'arrèstanu vrazza.
• Siddu amuri novu si pigghia lu locu, scurdari nun si pò l'amuri anticu.
• Siddu cci dati lu iditu a lu viddanu, si pigghia tutta la manu.
• Siddu la nvidia vàddira sarrìa, fùssimu tutti vaddirusi.
• Siddu la superbia fussi nfirmitati ni murìssimu cchiù di la mitati.
• Siddu lu mprèstitu fussi bonu si mpristàssiru li mugghieri.
• Siddu lu munnu fussi fattu di sasizza, lu mònacu n'avissi sempri dui caddozza.
• Siddu Marsala avissi lu portu, Trapani fussi mortu.
• Siddu 'n gabbella la chiazza si dassi, na gabbella cchiù grossa nun cci fussi.
• Siddu ntra sta terra voi lu Paraìsu, campa quantu cchiù poi riliggiusu.
• Siddu nun hai dinari jetta coppi.
• Siddu nun voi ca ti tradisci tò mugghieri di li preggi d'àutru nun cci parrari.
• Siddu nun voi gilusa la mugghieri li tò cosi passati nun cuntari.
• Siddu stassi a lu sceccu a jiri a lu mulinu, pani nun mancirìa lu corpu umanu.
• Siddu t'ancocciu a vanedda ca nun spunta ti lu fazzu cuntari di quaranta.
• Siddu tutti li spicchi jìssiru a l'aria, nun cci fussi cchiù riccu di lu massaru.
• Siddu veni mala nova e veni sula, dicci bonvegna.
• Siddu voi arricchiri fa fizziu vili.
• Siddu voi ca tò mugghieri nun ti ruina nun curari a li smorfi quannu è prena.
• Siddu voi campari 'n paci, ascuta, senti e taci.
• Siddu voi gabbari lu tò vicinu, cùrchiti daura e sùsiti matinu.
• Siddu voi pruvari li peni di lu nfernu: lu nvernu a Missina e la stati a Palermu.
• Siddu voi sapiri cui nun havi corna: cui camina a lu suli e nun fa ùmmira.
• Siddu voi stari bonu lamèntiti.
• Siti li tri di la vaniddazza: chiummu, ferru e cacazza.
• Siti unu lampu e unu tronu.
• Soni e canzuni sunnu cosi di ventu, lu tavirnaru voli li dinari.
• Sparagna la farina mentri la cascia è china.
• Spugghiamu a Cristu e vistemu a Maria?.
• Stenni pedi quantu teni.
• Sticchiu è beddu, minchia fa burdellu.
• Stòmacu granni e vucca picciridda.
• Stuppa mi dasti e stuppa ti filai, tu mi tincisti e iu t'ammarracai.
• Sugnu addivinutu cantunera, ca cui arriva mi piscia e dunca vota.
• Sugnu comu lu scravagghiu dintra la stuppa.
• Sugnu tantu castiatu di l'acqua càuda ca di l'acqua fridda mi ni scantu.
• Sugnu tantu disgrazziatu ca vaju ppi fàrimi la cruci e mi cacciu l'occhi.
• Sunari lu caddu a martoriu.
• Supra lu ngannaturi casca lu ngannu.
• Supra pastu minnulicchi.
• Supra vàddira cravunchiu.
• Sutta peddi d'agneddu lupu rapaci.

• Tannu la donna sta ferma ccu unu, quannu lu turcu si fa cristianu.
• Tannu lu veru amicu chiancirai, quannu lu perdi e nun lu vidi cchiu.
• Tannu n'amicu si chianci di cori, quannu si perdi e nun si pò cchiù aviri.
• Tant'è granni l'amuri ca ti portu ca si ti vidu càdiri t'ammuttu.
• Tanta lana menza pisa.
• Tanti lesti, tanzi mazzi.
• Tantu è lu disìu di lu ramu ca la sputazza mi pari carrinu.
• Tantu lu parpagghiuni firrìa a lu lumi nzinu ca s'ardi.
• Tantu va la quartara a l'acqua nzinu ca s'arrumpi.
• Tarda malannu e appui veni.
• Tempi di verra, minzogni ppi terra.
• Terra ca nun vesti ad idda nun vesti ad àutru.
• Terra vacanti nun paga patruni.
• Ti fazzu fari lu latinu a cavaddu.
• Ti ni fai burritta di notti.
• Ti rassumigghiu a la fàusa vacca, ca inchi la cisca e cc'un pedi l'abbucca.
• Ti scanti di la sbrizza di lu latti e un crastu sanu di l'agghiutti.
• Tinta dda casa c'ogni sira la gaddina cci canta.
• Tinta dd'agnedda ca hà dari la lana.
• Tinta dda robba ca veni in dinari.
• Tinta fu Tuzza ca persi lu mantu.
• Tintu cui casca ppi chiamari ajutu.
• Tintu cui havi li grànnuli a la vigna.
• Tintu cui perdi ppi jiri circannu.
• Tintu ddu corpu ca trasi nti n'àutru corpu.
• Tira cchiù un pilu di fìmmina di centu parigghi di voi.
• Tistuni e un diàvulu ca ti porta.
• Torna parrinu e ciuscia.
• Travagghiu sempri e nun arricchisciu mai.
• Tra amici e parenti nun cattari e nun vinniri nenti.
• Tri sunnu li boni muccuna: ficu, pèrsichi e miluna.
• Tri sunnu li boni vuluti: buffuni, ruffiani e gran curnuti.
• Tristu fuìri fa cui pignu lassa.
• Triulu Malanova e scuntintizza e u quattu u jetti n'ta munnizza.
• Trìvulu cumuni è menzu gàudiu.
• Trìvulu ppi trìvulu mi tegnu a mè maritu ch'è diàvulu.
• Tu chi nascisti di l'anchi d'Anchisi?
• Tu fai pirtusa ed iddi cavigghi.
• Tu nun fili, nun 'n canni e nun tissi. D'unni ti vinni stu ghiummarà?
• Tutta Roma nun potti fari vìviri nu sceccu ppi forza.
• Tutti li gruppa vèninu a lu pèttini.
• Tutti òmini nun sunnu chiddi ca pìscianu a lu muru.

• Ugnunu di l'arti sò ni campa scarsu.
• Ugnunu tira bracia a lu sò cudduruni.
• Un annu si fa ntra un pizzu di petra.
• Un chiovu caccia n'àutra chiovu e un diàvulu caccia n'àutru'.
• Un muzzuni ruttu dura cchiossai di na quartara nova.
• Un pugnu d'oru scassa na porta di ferru.
• Un pumu fràcitu vasta tutti l'àutri.
• Un voi quannu si porta a lu maceddu ugnunu curri ccu lu sò cuteddu.
• Unni arrivi nun cci metti scala.
• Unni cc'è dinaru nun cci va' vita d'omu.
• Unni cc'è forza e dinari la raggiuni nun vali.
• Unni cc'è libbra nun cci vonnu labbra.
• Unni hà fattu la stati va' fatti lu nvernu.
• Unni hà parrari lu voi parra l'aratu.
• Unni maggiori cc'è minuri cessa, dissi lu puddicinu dintra la nassa.
• Unni manca Diu cuverna.
• Unni nun si' ntisu nun parrari.
• Unni vìnciri nun poi cerca la paci.
• Unu nun leva pitanza.
• Unu mentri havi è salutatu.

• Va' lèviti davanti ca ti sacciu, si' comu na lumera senza micciu.
• Va' lèviti davanti spurapàulu, ca l'amuri ppi forza sempri è trìvulu.
• Vacca figghiata a mànnira l'aspettu.
• Vacchi e voi scìppacci quantu poi.
• Vadagnu fattu ccu l'usura picca dura.
• Vai ccu la pala e morti mai.
• Vai e maccarruni si màncianu càudi.
• Vai ppi tùnniri e t'attrovu tusu.
• Vaju n'arreri comu lu curdaru.
• Vali cchiù lu bonu nomu di tutti li ricchizzi di lu munnu.
• Vàrdati di un suverchiu scrupulusu.
• Vardu li robbi di cui nata.
• Vasa dda manu ca tu voi tagghiata.
• Vecchiu annamuratu di tutti è trizziatu.
• Vesti nu zuccuni ca nu baruni.
• Viaggi spissu cunzùmanu lu voscu.
• Vidi Nàpuli e appui mori.
• Vinisti ppi fùttiri e arristasti futtutu.
• Vivu nun ti potti vìdiri e mortu ti mannava salutannu.
• Voi ca nun va a l'aratu e vacca ciunca, sòlinu spissu muriri a la chianca.
• Voi campari quantu voi, mancia suppa avanti poi.
• Voi canùsciri a l'omu quannu è tintu, quannu è misu a lu suli a lu straventu.
• Voi nzignari a mpuviriri, pigghia òmini e nun cci jiri.
• Voi sapiri quali è lu megghiu jocu? Fa beni e parra pocu.
• Voli èssiri di patti la pignata, ppi fari la minestra sapurita.
• Vucca amara feli jetta.
• Vucca ca mai parrau mai fu riprisa.
• Vucca ca s'avanta càchila.
• Vucca ca si vanta, travagghiu ca non veni.
• Vucca sì e palora no.
• Vucca vasata nun perdi vintura.

• Zita e tammureddu, ppi li primi tri jorna pari beddu.
• Zoccu fa ppi li mè denti, nun fa ppi li mè parenti.
• Zoccu nun fai ppi tia ad àutru nun fari.
• Zoccu nun s'hà fattu ntra Mèrcuri e Jovi, nun si fa ntra Vènniri e Sàbbatu.
• Zoccu sburdi la vicchiania nun cc'è mastru ca l'aggiusta.
• Zòcculi zòcculi ccu li tò.
• Zùccaru nun vasta vivanna.

• Raccolta di proverbj siciliani ridutti in canzuni di l'abbati Santu Rapisarda, Catania, 1842.

• Pruverbiu, difinizzioni.
• Pruverbi catanisi, scrivuti nti la parrata catanisi.
• Pruverbi nisseni, scrivuti nti la parrata nissena.
• Parimiuluggìa, la scienza ca studìa li pruverbi.
• Santu Rapisarda, l'abbati ca scrissi la Raccolta di proverbj siciliani ridutti in canzuni.