Тициуса-Бодеова регула

Тициуса-Бодеова регула, даколи попросто звана тыж законом планетных одстоянь^[1] — математичный выраз приблизных величин середньой оддалености (великой полуоси орбиты) планет сонѣчной системы в астрономичных единках (AU) их шора

a = 0,4 + 0,3×2ⁿ (n = −∞, 0, 1, 2, …).^[2][3]

Регуларность во величинах середньой оддалености замерковав в року 1766 нѣмецкый математик Йоганн Даниел Тициус, а по шести роках тот закон опубликовав тогдышный ведучый берлинской звѣздарнѣ Йоганн Елерт Боде. Як видко з поданой таблицѣ, тото правило цѣлком добрѣ выдовольовало про вшиткы познаты планеты, окрем того, же у Сатурна была векша одхылка, а про величину n=3 не екзистовала жадна позната планета.

Як была объявлена перва планетка Церера, видѣло ся, же быв найденый тот хыблячый член шора; але скоро за тым объявили далшы подобны планеткы, котры тото опровергли.

Цѣлком до того шора не штимуе планета Нептун, а напротив, добрѣ штимуе Плутон, котрый быв в року 2006 вылученый з класа планет, кебы он быв на семой позиции, а не было бы Нептуна.^[3]

Тициуса-Бодеова регула ся донедавна поважовала астрономами лем за куриозиту,^[4] Але найновшы астрономичны объявлѣня воскресили интерес ку той регулѣ, бо ся указало, же она добрѣ описуе закономѣрность оддалѣня сателитох ай в иншых планетарных системах.^[2]