Union Astronòmica Internassional

L'Union astronòmica internassional (UAI, o dcò IAU da l'anglèis e d'àutre lenghe) a uniss le sossietà astronòmiche dël mond; a l'é 'n mèmber dël Consèj Internassional për la Siensa. A l'é l'autorità arconossùa për deje ël nòm a le stèile, ij pianeta, j'asteròid e d'àutri còrp celest. Sò ufissi prinsipal a l'é a Paris, an Fransa. L'UAI a l'ha 'dcò 'l ròl ëd gestì ij comunicà UAI ch'a aviso j'astrònom sij fenòmen improvis. L'UAI a l'é stàita fondà dël 1919 'me union ëd vàire proget internassionaj, dont la Carte du Ciel, l'Unione solare e l'International Time Bureau. Sò prim pressident a l'é stàit Benjamin Baillaud.

L'UAI së spartiss an 40 grup ëd travaj specialisà ant ij diferent setor dont as òcupa l'asociassion. Ij 40 grup a son arcujì an 12 division.

Division	Soget
I	Astronomìa fondamental
II	Ël Sol e l'eliosfera
III	Siense dij Sistema planetari
IV	Le stèile
V	Le stèile cangiante
VI	La materia intersteilar
VII	La Stra ëd San Giaco
VIII	Le galassie e l’univers
IX	Técniche òtiche e infraross
X	Radioastronomìa
XI	Astrofìsica dj'àute energìe e dle técniche spassiaj
XII	Atività comun-e ëd tute le comission

Dal 1922 as fa na ciambrea general dl'UAI minca tre agn, gavà 'l perìod ëd guèra dal 1940 al 1945.

Ciambree Generaj dla UAI

N°	Ann	Sità	Nassion
I	1922	Roma	Italia
II	1925	Cambridge	Regn Unì
III	1928	Lèida	Pais Bass
IV	1932	Cambridge	Stat Unì
V	1935	Paris	Fransa
VI	1938	Stocòlma	Svessia
VII	1948	Zurigh	Svìssera
VIII	1952	Roma	Italia
IX	1955	Dublin	Irlanda
X	1958	Mosca	Union Soviética
XI	1961	Berkeley	Stat Unì
XII	1964	Amborgh	Almagna
XIII	1967	Praga	Cecoslovachia
XIV	1970	Brighton	Regn Unì
XV	1973	Sydney	Australia
XVI	1976	Grenoble	Fransa
XVII	1979	Montréal	Canadà
XVIII	1982	Patrass	Grecia
XIX	1985	New Delhi	India
XX	1988	Baltimòra	Stat Unì
XXI	1991	Buenos Aires	Argentin-a
XXII	1994	L'Aja	Pais Bass
XXIII	1997	Kyōto	Giapon
XXIV	2000	Manchester	Regn Unì
XXV	2003	Sydney	Australia
XXVI	2006	Praga	Repùblica Ceca
XXVII	2009	Rio de Janeiro	Brasil
XXVIII	2012	Pechin	Cin-a
XXIX	2015	Honolulu	Stat Unì
XXX	2018	Vien-a	Austria

• Sit ufissial
• Lista dij 68 Stat mèmber