Felice Borel

Felice Placido Borel (Nissa Marìtima, 5 avril dël 1914 - Turin, 21 gené dël 1993) a l'é stàit un fotbaleur e antreneur piemontèis dël campionà italian e a l'ha vagnà un mondial con la selession italian-a dël 1934.

A l'era 'l frel pì cit d'Ald Giusep e për sòn, ant j'armanach ëd fótbal, a l'é marcà con ël nòm ëd Borel II.

Atacant fin da sùbit, a l'ha ancaminà motobin giovo ant la Juventus dij sìnch ëscudèt an sìnch ani (ant j'ani '30); ant la prima stagion a l'ha marcà 29 grije an 28 partìe, con na mojen-a ëd grije che a l'é stàita la mej për 70 ani (costa mojen-a a l'ha peui batula nomach Christian Vieri).
N'ani dòp, dël 1933-34 a l'ha marcà 31 grije an 34 partìe. Ai 22 d'otóber dël 1933 a l'é stàit ciamà për la prima vira da l'antreneur ëd la selession italian-a për giughé na partìa contra l'Ungherìa, anté che chiel a l'ha marcà la grija dla vitòria.

A l'ha partecipà ai mondiaj dël 1934 an giugand na bon-a partìa contra la Spagna.

Dventà campion italian për la tersa vira 'd fila, a l'ha ancaminà a avèj 'd problema al ginoj e parèj ant la sgondà metà dj'ani '30 a l'ha giugà e marcà sempre 'd meno con la maja dla Juve e a l'é peui passà al Turin ant la stagion 1941-42, an butand-se mach për n'ani la maja granata.

Dël 1942-43 a l'é andàit torna a la Juventus, an fasend na stagion franch bon-a dël 1945-46. Con la maja bianca e nèira a l'ha giugà 308 partìe an marcand 164 grije (125 an Serie A, 5 ant ël campionà Àuta Italia dël 1944, 12 ant la Division Nassional dël 1945-46, 10 an Copa Italia e 12 an Copa Euròpa).

A l'ha furnì soa cariera al Nàpoli an Serie B.

Coma antreneur a l'ha guidà la Juventus, ël Lissandria e 'l Nàpoli; a l'ha'dcò antrenà la Ternan-a an Serie C ant ël campionà 1966-67.

• Campionà italian: 3 (Juventus: 1932/33, 1933/34, 1934/35)
• Copa Italia: 1 (Juventus: 1937/38)
• Campionà dël Mond: 1 (Nassional Italian-a 1934)
• Mèj marcador dla Serie A italian-a: 2 (1932/33: 29 grije-; 1933/34: 31 grije)