Ël palass dël Vicari dël VëscoËl topònim Carzòu a peul avèj na dobia orìgin: s'as pensa a le orìgin ligurin-e, la radis Car- e 'l sufiss -san a peulo significhé "leugh àut", s'as pensa a le orìgin roman-e, ël nòm a podrìa indiché un podej agrìcol apartenù al patrissi Carisius. Qual ch'a sìa l'orìgin dël topònim, le doi borgià 'd Carzòu Superior e 'd Carzòu Inferior o Magior a son atestà con certëssa mach a parte da l'Età 'd Mès. An particular, dal sécol ch'a fa XIV Carzòu Magior a ven a esse 'l sènter dël podèj temporal dël Vëscovà Tortonèis, valadì l'ansem dij possediment goernà dal vësco-cont ëd Torton-a. Ant ël Palass dël Vësco a-i era la sede dël Vicari dël Vësco, ël tribunal, la curia e la përzon. Contut ch'a ven sogetà al Ducà 'd Milan e peuj a jë Spagneuj, ël Vëscovà a manten soa autonomìa aministrativa. Dël 1713, an séguit al Tratà d'Utrecht, Carzòu e 'l Tortonèis a passo a l'Imper Austrìach. Dël 1735 Torton-a e ij sò anviron a passo sota la Cà 'd Savòja ëd Carl Emanuel III ant ël Regn ëd Sardëgna. A ven creà la Contà 'd Torton-a antestà al re, ma 'l Vëscovà a ven ancora anfeodà al vësco 'd Torton-a. A l'é mach dël 1786 ch'ël vësco Carl Morissi Peyret a ced ël Vëscovà al re, an cambi d'ën neuv tìtol prinsipesch.
D'apress a l'época dla dominassion fransèisa ëd Napoleon Bon-a-part, Carzòu a torna al Regn ëd Sardëgna, ant la Divison (peui Provinsa) ëd Lissandria, ant la Provinsa (peui Sircondari) ëd Torton-a e ant ël Mandament ëd Vila Vèrnia. Dal 1928 ij doi comun Carzòu Inferior e Carzòu Superior, ch'a l'avìo mantnù l'autonomìa fin anlora, a ven-o unì për formé l'atual comun.
