Arsenal FC

L'Arsenal Football Club, o nomach Arsenal, a l'é na società 'd fótbal anglèisa.
A l'é un dij 13 club ëd Londra. Soa sede as treuva a Holloway, dëstrèit dël London Borough of Islington. A l'é un dij club anglèis pì vèj (a l'é fondasse dël 1886) e a gieuga ant la Premier League.

L'Arsenal a l'é la squadra 'd Londra ch'a l'ha vagnà 'd pì e la tersa sota la mira nassional, dòp ël Liverpool e 'l Manchester United, da già che a l'ha vagnà 13 vire 'l campionà, 10 Cope anglèise, 2 Cope 'd Lega e 12 SuperCope anglèise.

An Euròpa a l'ha nen otnù ij midem arzultà: a l'ha vagnà mach na Copa dle Cope (1994) e na Copa dle Fere (1970) e a l'ha perdu vàire àutre final an tute e tre le competission europenghe, dont l'ultima dël 2006 an Champions League a Paris contra ël Barslon-a. A l'é un-a dle 13 squadre che a son rivà a tute le final ëd le competission europenghe: Champions League (2006), Copa UEFA (2000) e Copa dle Cope (1980 e 1995).

Ij color tradissionaj a son: maja rossa con mànie bianche, braje bianche e caussòt ross.
La società a l'ha cangià stadio vàire vire an soa stòria: al prinsipi la squadra a giugava a Woolwich, dël 1913 a l'é tramudasse ant ël borgh ëd Highbury, andoa a l'é restà fin-a al 2006, quand a l'ha cangià soa veja "ca" për ël motbin neuv Emirates Stadium ëd Holloway.

L'ansëgna dël club a l'é cangià vàire vire, ma andrinta tute le ansegne l'Arsenal a l'ha sempre avù un o pì canon. Për lòn ij giugador e ij tifos ëd l'Arsenal a l'han lë stranòm ëd "Gunners", valadì "ij canonié".

L'Arsenal a l'ha mila 'd tifos, con dle rivalità motobin fòrte con ij "supporter" dël Tottenham, àutr club dël nòrd ëd Londra.
L'Arsenal a l'é un dij club pì rich dël fótbal anglèis e con soa tradission a fa part ëd la coltura britanica.

• Sit ofissial