Batalha de Jemappes
La batalha de Jemappes se debanèt lo 6 de novembre de 1792 durant la Guèrra de la Premiera Coalicion (1792-1797). Opausèt lei fòrças de la França revolucionària a aqueleis d'Àustria e s'acabèt per una victòria francesa importanta qu'entraïnèt la conquista dei País Bas Austrians.
Après la victòria francesa de Lilla e l'abandon dau sètge de la vila, una armada francesa de 40 000 òmes e 100 canons comandats per Dumouriez ataquèt lei fòrças austrianas presentas dins lo nòrd de França. Dirigits per Albert de Saxe-Teschen, leis Austrians èran en dificultat car en situacion d'inferiotat numerica importanta ambé solament 14 000 òmes e 56 canons. La batalha foguèt una succession de salvas d'artilhariá e de cargas de l'infantariá revolucionària — que mancava encara d'experiéncia — que finiguèron per rompre lei linhas dei soudats regulars austrians que deguèron se retirar.
Lei Francés perdiguèron 650 tuats e 1 300 bleçats e leis Austrians, 300 tuats, 500 bleçats, 400 presoniers e 5 canons. Aquela victòria èra estada costosa per lei Francés e li donava inicialament gaire d'avantatges. Pasmens, entraïnèt rapidament la revòuta d'unei vilas de Belgica que foguèt totalament abandonada per leis Austrians permetent son ocupacion per lei Francés.
Lo futur rèi de França Loís-Felip Ièr (1830-1848) participèt a aquela batalha dins lei rengs revolucionaris onte comandèt l'ala drecha.