Stemmeband

Stemmebanda eller røyst(e)banda er to band som strekkjer seg horisontalt gjennom strupehovudet. Når luft frå lungene passerer stemmespalta, som er mellomrommet mellom stemmebanda, oppstår det lyd når bestemte krav er oppfylt. Til dømes må ikkje stemmebanda vere for hardt stramma, og dei må vere fuktige. Stemmebanda til born er tynne og slanke, difor har dei lysare røyst enn vaksne. Når gutar kjem i stemmeskiftet, veks stemmebanda og blir tjukkare og lengre. Då blir røysta mørkare.