Panay

Panay
øy
Land	Filippinane
Del av	Visayaøyane
Areal	12 011 km²
Folketal	4 477 247 (2015)[1]
Panay 11°09′00″N 122°29′00″E / 11.15°N 122.48333333333°E / 11.15; 122.48333333333
Plasseringa til Panay (blodraud) i Filippinane.
Wikimedia Commons: Panay

Panay er ei øy i Filippinane, vest i landsdelen Visayas. Ho ligg søraust for øya Mindoro og nordvest for øya Negros, skild frå denne av Guimarassundet. Nord for Panay er Sibuyanhavet og Romblon-øyane; i søraust breier Suluhavet seg. Panay har om lag 3,4 millionar ibuarar og ei flatevidd på 12 011 km². Folket på øyane talar språka aklanon, hamtikan og hiligaynon.

Langs vestkysten av Panay strekker seg ei fjellkjede med toppar opp til 2 117 meter over havet. På øya er det mange elvar; dei største er Akean, Halaur, Banica, Iloilo og Panay.

Administrativt er øya delt opp i dei fire provinsane Aklan, Antique, Capiz og Iloilo. Største byen på øya er Iloilo.

Landbruk og gruvedrift er hovudnæringar på Panay. Dyrking og hausting av ris, kokosnøtter, bananar, kveite, mango, sukker, tobakk og abacá, det siste tidlegare kjend som råstoff for manillatau, sysselset hovuddelen av ibuarane.

I gruvene vert utvunne gull, sølv, kopar, mangan, marmor, kol, krom, magnetitt, kaolin, saltstein, sand og stein.

Panay var frå 1200-talet sete for Madja-as-sambandet, ei statsdanning i Visayas. Statssambandet var på høgda av si makt på 1400-talet. Gjennom fredslutningar og traktar vart Madja-as innlemma i det spanske imperiet kring 1569.

Commons har multimedium som gjeld: Panay