Chakra

Chakra (frå sanskrit cakraṃ चक्रं, fonetisk uttale «chukr»; pali chakka; tibetansk khorlo; malaysisk cakera) er senter med intens, kvervlande energi som i følge tradisjonell indisk medisin ligg på spesifikke punkt i kroppen som ikkje kan sansast. Andeleg og emosjonell energi strøymer gjennom punkta. Ordet chakra kjem frå sanskrit og kan omsetjast med hjul.

Sju hovudchakra eller energisenter skal eksistere og liggje langs midten av overkroppen. Det skal i tillegg finnast nokre underchakra som er plassert nedover beinet. Austlege medisinske tradisjonar og meditasjonsformer meiner chakra påverkar kroppen både psykisk og fysisk. Sjølv om det i første rekkje er eit psykisk fenomen, er det ein oppfatning at dei ulike energipunkta korresponderer fysisk med bestemte endokrine kjertlar. Dei forskjellige chakra skal ha tyding for ulike delar av kroppen og styre ulike kjensler. Sansane knytast gjerne til bestemte chakra. Det har også vorte vanleg å forbinde dei ulike chakra med ein bestemt farge. I følge hinduistisk tradisjon er dei enkelte chakra knytte til ein gud. Dei ulike chakra vert òg gjerne knytte til eit element. Eit spesielt mantra kan knytast til dei ulike chakra, og kan seiast for å stimulere punktet.

Mykje av den opphavlege informasjonen om chakra kjem frå den hinduiske teksten Upanishad, som vart skriven ned 1200-900 f.Kr.

Nr	Lotus-symbol Farge	Namn Namn på sanskrit	Element	Kjertel	Funksjon	Sans	Hindugud	Mantra
7.	1000 blad fiolett	Kronechakraet Sahasrāra	Rom Universet1	Hjernevedhenget Hypofysen, Gl. pituitaria	Foreine kroppen med kosmos Visdom, medvit Øvre hjerne, sentralnervesystemet	Oversanseleg	Paramashiva	OM eller Pranava
6.	96 blad indigo	Pinealchakraet (Det tredje auget) Ājñā	Tid Sjela2 Manas	Konglekjertelen Epifysen, Gl. pinealis	Persepsjon, fantasi Nedre hjerne, ryggrad, sanseorgan	Sjette sans	Sambhu	KSHAM
5.	16 blad blå	Halschakraet Viśuddha	Eter Akasha	Skjoldbruskkjertelen Thyreoidea	Kommunikasjon Strupe, øvre lunger, armar, meltingskanal	Høyrsel	Sadashiva	HAM
4.	12 blad grøn	Hjartechakraet Anāhata	Vind Vayu	Brisselen Thymus	Lidenskap, mot, kjærleik Hjarte, lunger, blodsirkulasjon	Berøring	Isha	YAM
3.	10 blad gul	Solarpleksuschakraet Manipūra	Eld Agni	Bukspyttkjertelen3 Pancreas	Motivasjon, sjølvtillit Mage, lever, galleblære	Syn	Rudra	RAM
2.	6 blad oransj	Harachakraet (Magechakraet) Svādhisthāna	Vatn Apas	Testiklar Testis (mann) Eggstokkar Ovaria (kvinne)	Empati, kreativitet, seksualitet Kjønnsorgan, bein	Smak	Vishnu	VAM
1.	4 blad raud	Rotchakraet Mūlādhāra	Jord Prithivi	Binyrene Gl. suprarenalis	Fysisk helse, sjølvkjensle, framgang, tillit Imunforsvar, nyrer, urinblære, ryggrad, prostata	Lukt	Brahma	LAM

¹ Inga fysisk tilordning.² Sjela er ikkje rekna som eit element i alle tradisjonar.
³ Dei langerhanske øyane (Insulae langerhanenses) produserer dei endokrine hormona i bukspyttkjertelen.