Filosofo
Filosofo (li Indonesia "filsuf") no samösa niha si no tobali ere filosofi, eluahania no itörö wamahaö filosofi ba universitas, perguruan tinggi ma zui ba seminari ba no i'awalisi irege isöndra döi nifotöi "sarjana" (ba Indonesia S1), "master" (ba Indonesia S2) ma zui "doktor" (ba Indonesia S3, ba nahia bö'ö latötöi ia PhD). Heŵa'ae simanö to'ölö wa lakaoni samösa niha filosofo tenga ha na no i'awalisi wamahaö andre no mege yaŵa, bahiza ha na no oya i'angeragö ngawalö hadia ia si fakhai ba filosofi ba no ifa'anö ia bakha ba mato ha'uga buku ba majalah ba ato niha sanema wa sindruhu mofa'atua-tua ia bakha ba mbolo filosofi.
Fehede filosofo tehalö moroi ba li Yunani φίλος (philos) eluahania "fa'omasi" ba σοφία (sophia) eluahania "fa'atua-tua".[1] Eluahania filosofo no samösa niha niha sangomasi'ö fa'atua-tua ba börö da'ö i'osindruhugö tödö wangalui fa'atua-tua andrö irege isöndra ia. Moguna tatöngöni da'a, börö me ba Indonesia ato niha sanörö famahaö ha ba wanöndra sambua dandra nifotöi "ijazah" ba ena'ö tola ifalemba furi döinia döi wa'asarjana. Bahiza ha niha si no manöndra ba mangokhögö fa'atua-tua nifotöi filosofo. Tola manö wa no isöndra döi "doktor" bakha ba filosofi samösa niha, bahiza tenga nasa sindruhu filosofo ia.
Ato ndra filosofo si tehöngö ba gulidanö. Duma-dumania asese tarongo döi ndra filosofo moroi ba danö Yunani sotöi Epikuros, Aristoteles, Plato, btn. So göi Descartes, Albert Camus, Voltaire, btn. moroi ba Perancis ma Immanuel Kant, Friedrich Hegel, ba Johannes Habermas moroi ba Jerman. Ya'ira andre ba ato ndra filosofo tanöbö'ö no ebua gölöra ba wondrou'ö fangi'ila niha, irege tola tedou miföna ngawalö hadia ia ba zi fasui ita: teknologi, etika, politik, demokrasi, sains, btn.
Umbu
[bulö'ö | bulö’ö kode]- ↑ Hoad, T. F. (1993). The Concise Oxford Dictionary of English Etymology. London New York: Oxford University Press. ISBN 0-19-283098-8.