Percival Lowell

Percival Lowell (* 13. März 1855 in Boston; † 12. November 1916 in Flagstaff^[1]) weer en US-amerikaanschen Astronom. He füng as Amateurforscher an, is in’n Verlop pvun de Tiet aver to een vun de bekanntsten Astronomen vun sien Tiet worrn. He hett ok de Lowell-Steernwacht grüünt.

Lowell keemut en vun de rieksten un ansehnsten Patrizierfamilien vun Boston. Sien Süster Amy Lowell is en spoodrieke Dichtersche worrn, sien Broder Abbott Lawrence Lowell keem as Präsident vun de Harvard-Universität to Ansehn ^[2]. Sien Cousin Abbott Lawrence Rotch hett de Blue-Hill-Wederwacht grünnt un den Wederdraken in de Aerologie inföhrt.

Lowell harr sik jümmer al för de Astronomie intresseert, wat dör de Planetenbeobachten vun Giovanni Schiaparelli noch andreven weer, sünners de Opdecken vun de so nöömten „Marskanaals“ de de günstigen Oppositschoon 1877. Utlööst dör de Verfarven an’n Mars na de Johrstiet, entstünn bi Lowell un Camille Flammarion de Vörstellen, dat de „Canali“ künstlich boete Kanaals to’n Bewatern vun den utdröögten Planeten wesen künnen.

Disse Ansicht weer vun de Massenmedien ok dormols as as Sensatschoon ansehn un verbreedt, wat to en „Marsianer“-Manie un en reeg vun Science-Fiction-Romanen föhrt hett. Eerst dör de Ruumsonden vun de 1960er Johren weer kloor, dat de Marskanaals keen wohrhaftige Strukturen weern, man dör dat visuelle Lienenverstarken vun Terrassenränner un Lichtkanten, Kraterregen oder Canyons as dat Valles Marineris verkloort warrn kunnen.

Loweel fäng gau an ut sien Intresse en eernste un spoodrieke Wetenschop to maken. Üm de Planetologie to ünnerstütten, hett he in’t Johr 1894 mit sien Geld de Lowell-Steernwaacht in Flagstaff, Arizona, grünnt. He künn uttekente Facklüüd (so as A. E. Douglass) för sien Institut winnen, dat he goot inricht harr.

Dor weern intensive Studien to’n Mars, de Venus un annere Planeten maakt un ok de Melkstraat is veel ünnersöcht worrn. 1930 is dor denn ok (134340) Pluto opdeckt worrn, de ut dubbelten Grund de Afkörten „PL“ (♇) kregen hett. Dat Institut hett bit hüüt en bannig go’en Roop un befaat sik vundaag mit dat Utforschen vun Asteroiden.

Na em is de Asteroid (1886) Lowell nöömt.^[3]

• 1892 Maat vun de American Academy of Arts and Sciences
• 1904 Jules-Janssen-Pries

• Die Seele des Fernen Ostens. Översetten Berta Franzos. Jena : Eugen Diedrichs, 1911

Percival Lowell. Mehr Biller, Videos oder Audiodateien to’t Thema gifft dat bi Wikimedia Commons.

• Literatur vun un över Percival Lowell in’n Kataloog vun de Düütsche Natschonalbökeree
• Publikatschonen vun P. Lowell in’t Astrophysics Data System
• Naropen op P. Lowell in’t Astrophysics Data System
• Die Neun Planeten – Glossar (vun The Nine Planets)

1. ↑ Die kleine Enzyklopädie, Encyclios-Verlag, Zürich, 1950, Band 2, Seite 75
2. ↑ Chosön, the Land of the Morning Calm; a Sketch of Korea op World Digital Library; afropen an’n 23. September 2019
3. ↑ Dictionary of Minor Planet Names, Springer-Verlag; afropen an’n 23. September 2019