Lionel Kieseritzky

Lionel Adalbert Bagration Felix Kieseritzky (* 20. Dezember 1805/1. Januar 1806 in Dorpat; † 18. Mai 1853 in Paris) weer en livlannsch Schachmeester ut dat 19. Johrhunnert. Dat tweede Gebortsdatum is nah de juliaansch Klenner.

He wurr as Söhn vun düütsch-baltisch Öllern up rusisch (hüdtodag eestnisch) Territorium boren. He weer dat jüngste vun 14 Kinner vun Otto Wilhelm Kieseritzky un sien Fru Catharina Felicitas, geb. von Hoffmann.

Kieseritzky weer vun Berop Mathematiklehrer. Mit dartig Johr hett he sück aber entslooten, to emigreeren un leev dornah in Paris bit he bit 47 Johr storben is.

In Paris wurr he as Beropschachspeler bekannt, de in dat beröhmt Café de la Régence völ Partien speelt hett. Hier harrn vör hüm ok all Jean-Jacques Rousseau, Maximilien de Robespierre, Denis Diderot, Napoleon Bonaparte, Voltaire und André Danican Philidor Schach to’n Vergnögen speelt.

Bold weer Kieseritzky een vun de föhren Meester in Frankriek. He neem ok an dat Schachturnier 1851 in London deel, dat erste Schachturnier vun de Neetiet, an dat de föhrend Meesters vun Europa deelnemmen deen.

Kieseritzky weer en bannig gooden Kombinatschoonsspeler un dormit een Vetreder vun de sogenannt romatisch Schachepoche. Nah hüm is en Hööft-Anspeelariante in dat Königsspringergambit nömmt, wat nah de Tüüg 1. е2-е4 е7-е5 2. f2-f4 e5xf4 3. Sg1-f3 g7-g5 4. h2-h4 g5-g4 5. Sf3-e5 entsteiht.

In de Schachhistorie ingahn is he aber dör de „Unsterbliche Partie“, en Partie, de he 1851 in London tegen Adolf Anderssen speelt hett. Se düer blots 1 Stün un Kieseritzky hett nah 23 Tüüg verloren. Abner dör sien Speel droog he to en vun de muieste Matt-Kombitnatschoonen un Opferkombitnatschoonen bi, de je bi en Schachpartie vörkommen sünd. De „Unsterbliche“ sett Maatstaff för Ästhetik un Schönheit un wurrd dorher ok nie vergeeten. De Wettkamp, in de disse Partie speelt wurr, kunn Kieseritzky aber mit 9:6 (+8 -5 =2) för sück entscheeden. .

He wurr as eegensinnig un n’beeten verschraben dorstellt un hett sück tietwies för en dreedimensional Schachvariante insett. En vun hüm konstrueert Ruumschach keem bi Schölers un Meesterkollegen aber nich so good an.

Kieseritzkys best historsch Elo-Tall bedroog 2734. De hett he in’ Januar 1851 raakt. Twee Johr lang leeg he dormit up Platz 1 vun de Weltranglist.

• Tomasz Lissowski/Bartłomiej Macieja: Zagadka Kieseritzkiego [Das Rätsel Kieseritzkys], Warschau 1996.
• Gerald Schendel: Lionel Kieseritzky (1806-1853), ChessBase Magazin Nr. 85 (Dezember 2001), S.21 - 26

• Gerald Schendel: Wer war Lionel Kieseritzky? bi pocketfritz.de (hoochdüütsch)