Krim
De Krim (Krim-Tatarsch: Qırım, Ukrainsch: Крим - Krym, Russ’sch: Крым - Krym) is en Halfinsel in de Swarte See un de See vun Asow. Se is bi 27.999 km² groot. In dat Johr 2001 hefft dor 2.413.228 Inwahners leevt.[1] Up de Krim liggt de Autonome Republiek vun de Krim mit Simferopol as Hööftstadt. De wichtigste Habenstadt is Sewastopol an de Swarte See. Se höört nich to de Krimrepubliek mit to. Bekannt is ok de Badeoort Jalta. Annere wichtige Städer sünd Feodossja, Kertsch, Bachtschisaraj un Hursuf. Na Meenung vun de internatschonale Gemeen höört de Krim na de Ukraine to, man vun den 16. März 2014 af an steiht de Halfinsel de facto unner Russland siene Verwaltung. De beiden Länner laat ehren Anspruch up de Krim gegensiedig nich gellen.
Geographie
[ännern | Bornkood ännern]De Krim is in'n Noordwesten dör de Landeng vun Perekop verbunnen mit de Ukraine. De Straten vun Kertsch trennt de Halfinsel in'n Osten vun Russland sien Fastland. De Krim besteiht to'n groten Deel ut Steppe. In'n Süden reckt sik de Krimbargen hooch bit to 1.545 m. In Süüdosten vun düsse Barge liggt de Küstenstreek mit en mediterraansch Klima. Düsse Gemarken sünd bekannt vunwegen ehren Wien un ehre Badeöörd, dormank Jalta. Bi dat ööstliche Schiereiland vun Kertsch fangt de bi 100 km lange Nehrung vun Arabat an. Dat is en sandig Halfeiland, wat de See vun Asow vun den Syvasch scheden deit, wat en Brackwater-Laguun is.
Wie sik de Inwahners tohopen sett
[ännern | Bornkood ännern]Na den lesten Zensus ut de Ukraine vun 2001 harrn in de Krimrepubliek un Sewastopol alltohopen 2.413.228 Inwahners leevt. Dor mank weern:
- Russen 1.240.400 (60,1%)
- Ukrainers 576.600 (23,9%)
- Krimtataren 245.200 (10,2%)
- Wittrussen 35.000 (1,5%)
- Tataren 13.500 (0,5%)
- Annere 3,8%
De Spraak de up de Krim meist snackt warrt, is Russ’sch, wat ok as Lingua franca bruukt warrt.