Johann Blohme

Johann Blohme oder Blohm, in offizielle Akten un Unnerlagen, ok in siene Signaturen meist up Hoochdüütsch Blum oder Blume (* um 1599 rüm, wohrschienlich in Bremen; † na 1689) weer en Bremer Stempelsnieder un Medaillenmaker.

He is boren as Söhn vun den Bremer Goldsmitt Cordt Blohme. Vun 1641/42 af an is he in Bremen to finnen. 1652 is he na Slott Gottorp beropen wurrn un in de Johre vun 1656/57 bit 1662/64 weer he Stempelsnieder an den König siene Münten in Kopenhagen. Bito weer he in düsse Tied ok jummers wedder for Bremen togange. Dat eenzig Portrait, wat dat vun em gifft, hangt in Bremen in dat Focke-Museum. Johann Heimbach hett dat malt. Unnertekent is dat mit de Wöör I.B.I (= Johan Blohm incisor) aetatis 38 Anno 1637. Dat bedutt up Platt Johann Blohme, (Stempel-) Snieder, 38 Johre oold, 1637. Wenn een vun dor af an 38 Johre torüch rekent, kummt een bi 1599 an as dat Johr, wo he boren is.

Siene Medaillen fallt unnerscheedlich ut. Ok wesselt se in’n Stil, so datt dat nich eenfach is, ruttofinnen, wat he maakt hett, wenn he dor nich sien Teken unnersett hett. In siene Kunst steiht he jummers op hooch technisch Niveau, vun de Motive her hollt he sik faken an Vörbiller vun Sadeler oder Loof. Wenn he unnertekent, schrifft Blohme faken up hoochdüütsch Bluhme ohn Apokoop. En Sammlung mit meist all Medaillen, de he maakt hett, finnt sik in dat Focke-Museum in Bremen. Dor ist avers man bloß en Deel vun utstellt. Annere Stücke liggt in dat Roseliushuus in Bremen, in den König siene Müntensammlung in Kopenhagen un in annere Münten-Kabinette.

• Medaillen up den Freden vun 1648 un 1649;
• Medaille to de Hochtied vun Willem vun Nassau/Maria vun England 1641,
• Hochtiedsmedaillen vun 1640, 1642, 1645 un allerhand sunner Johr;
• Medaillen up Bremen un den Roland vun 1640 un 1648;
• up König Gustav Adolf sien Dood 1632;
• up Johan Banér, vör 1635;
• up de Innahme vun Breisach dör Bernhard vun Sassen-Weimar 1638;
• up König Christian IV., un den Freden vun Brömsebro 1645,
• up Hertog Frederik vun Bruunswiek-Lüümborg, Domprovest to Bremen, 1646 un 1648;
• up König Frederik III. vun Däänmark (sunner Johr)
• up den Storm up Kopenhagen (1659);
• wieterhen hett Blohme Stempels sneden for allerhand däänsche Münten.

• Hermann Jungk: Die Bremischen Münzen. Bremen 1875 (mit Biller).
• Mitteilungen des Gewerbe-Museums Bremen. 1887, Heft 7, S. 49.
• J. Focke: Bremische Werkmeister. Bremen 1890.
• Quellen und Forschungen zur Geschichte Schleswig-Holsteins. Bd. 4, Leipzig 1916, 299, Bd. 5, Leipzig 1917, 335.
• J. Wilcke: Míntvsenet under Christian IV. og Frederik III. 1924.
• G. Galster: Danske og Norske Medailler og Jetons. 1936.
• N. L. Rasmusson: Medaljer och mynt i Westfaliska freden. Kat. Nordiska Museet, Stockholm 1948, Nr. 316, S. 106.
• N. L. Rasmusson: Zum Werke Johan Blums. In: Hamburger Beiträge zur Numismatik. 12/13:1958/59, 239.
• S. Fliedner: Johann Blum, ein bremischer Medailleur des 17. Jahrhunderts. In: Jahrbuch der Wittheit zu Bremen. 2:1958, 113–154 (mit Biller).
• H. Hede: Danmarks og Norges Mínter. Kopenhagen 1964, 42, 119.
• Gottorfer Kultur im Jahrhundert der Universitätsgründung. Kiel 1965.
• O. Millar: The age of Charles I. Ausst.-Kat. Tate-Gallery London 1972, 130.
• H. Smailes: The concise catalogue of the Scottish Nat. Portrait gallery. Edinburgh 1990.
• Weilbach: Dansk Kunstnerleksikon. 1: 1994, 306.