Georgien

'Sakartwelo,საქართველო'

(Flagg) (Wapen)
Wahlspröök: ძალა ერთობაშია/dsala ertobaschia („Kraft dör Eenheit“)
Natschonalhymne: Tawisupleba
Hööftstadt	Tiflis (georgisch Tbilissi) 38° 53′ N, 77° 02′ W
Gröttste Stadt	Tiflis
Amtsspraak	Georgische Spraak
Regeren Präsident	Präsidialrepubliek Salome Zurabishvili
Souveränität	Vun Russland 9. April 1991
Grött  • Allens  • Water (%)	69.700 km² ? %
Inwahnertall  • 2007 afschätzt  • Inwahnerdicht	3.720.400 67,3/km²
Geldsoort	1 Lari = 100 Tetri ([[ISO 4217|]])
BBP	$ (2016) $ 10.100 $ je Kopp
Tietzoon  • Sommertiet	UTC +4 (UTC) MEZ +3 (UTC)
Internet-TLD	.ge un .გე
ISO 3166	GE
Vörwahl	++995

Georgien is en Republiek, de in’n Oosten vun Europa liggt.^[1][2] Dor wahnt üm un bi 3.720.400 Inwahners. Bit 1991 höör Georgien nah de Sowjetunion to.

Wat de Geographie angeiht, liggt de Staat Georgien an de Grenz mank Europa un Asien. In'n Norden hett Georgien een Grenz mit Russland un in'n Süden mit de Törkie un mit Armenien. In'n Oosten is Aserbaidschan de Naber. Georgien is 69.700 km² groot. Up 87% vun dat Land finnt sik grote un lüttjere Bargen. In'n Noorden liggt de süüdlich Deel vun den Groten Kaukasus, in'n Süden de westlich Deel vun den Rügg vun den lüttjen Kaukasus. Dor is ok noch de Rand vun dat Hoochland vun Armenien. Dormank gifft dat plattet Land, as dat Kolchisch Deepland in'n Westen un datDeepland vun den Transkaukasus in'n Oosten. Düt Deepland warrt ünnerdeelt in dat platte Land vun Binnerkarteli, dat platte Land vun Ünnerkarteli un dat platte Land vun Alsasani.

De hööchste Barg is de Schchara in den Groten Kaukasus. He is 5.068,9 m hooch. De längste Stroom is de Kura. Düsse Stroom heet up georgisch Mtkwari un is öber allens 1.364 km lang, man bloß 351 km ströömt vun Süüd nah Oost dör Georgien dör. Annere Strööm sünd de Alasani (351 km), de Rioni (333 km) un de Enguri (213 km). Dat gröttste Binnenmeer is dat Meer vun Parawani. Dat liggt 2.073 m hooch un breedt sik öber 37,5 km² ut. De deepste Höhl vun de Welt, sowiet as de bekannt sünd, is de Voronya-Höhl. De is 2.164 m deep.

De gröttsten Städer sünd Tiflis (up georgisch Tbilissi) mit 1.258.085 Inwahners, Kutaissi mit 178.350 Inwahners, Batumi mit 118.297 Inwahners, Rustawi mit 112.624 Inwahners, Sochumi mit 81.546 Inwahners, Sugdidi mit 73.014 Inwahners, Gori mit 46.680 Inwahners un Poti mit 46.112 Inwahners (allens an'n 1.Januar 2005). Kiek ok nah bi de List vun de Städer in Georgien

Vunwegen sien Laag achter den Kaukasus kriggt Georgien de kole Luft ut den Noorden nich af un warrt upwarmt vun de Swarte See. Dat gifft verscheden Zonen vun dat Klima. Dat langt vun dat suptropisch-fochtige Klima in den Westen bit hen nah matig-dröög Binnenklima in'n Oosten. In Döörsnitt liggt de Lufttemperatur in den Westen bi 15 °C un in den Oosten bi 11 bit 13 °C. Regen gifft dat in'n Westen bi 3.000 mm, in'n Oosten bi 400mm. Dat Vörjahr in Georgien is kort mit grode Ünnerscheed in de Temperatur. De Summer is faken glönig heet. In'n Harfst is dat sunnig un warm un in'n Winter is dat mit den Snee man minne.

In Georgien gifft dat 4.700.000 Inwahners. Vun 1991 af an hefft 1.000.000 Minschen dat Land verlaten. Mank 2000 un 2005 is de Inwahnertall vun Georgien jedet Jahr üm 0,9% minner wurrn. Dat hett besunners to doon mit de Weertschup vun dat Land. Dor is dat bannig mit daal gahn. Besunners de Lüde hefft dat Land achter sik laten, de an de Scholen goot utbillt wurrn sünd. De hefft sik in annere Länner eenen Arbeitsplatz söcht, besunners in de annern Staaten vun de GUS, man denn ok in Westeuropa un in de USA. De gröttste Gemeenschup vun Georgiers in dat Butenland leevt in Moskau. Dor sünd dat üm un bi 300.000.

Bit nah den 2. Weltkrieg weer Georgien een Buurnland. De düütsche Politiker Karl Kautsky hett 1921 seggt, Georgien, dat weer een sozialistisch Buurnrepublik. Man Josef Stalin hett de Industrie nah Georgien bröcht. Vun dor af an trecken jümmers mehr Lüde in de groden Städer. Hüdigendags leevt 52,3% vun de Inwahners in de Städer un 47,7,% up dat platte Land. Vunwegen de Börgerkriegen in Abchasien un Süüdossetien mössen bi 250.000 Lüde ut jem ehr Heimat utkniepen oder sünd ok verdreben wurrn. In dat Jahr 2004 hett Georgien bi 230.000 Minschen ut Abchasien un 12.200 ut Süüdossetien upnahmen. Dor kaamt noch bi 2.600 Flüchtlingen ut Tschetschenien to.

Al jümmers hett dat in Georgien veel Volksgruppen geven. Hüdigendags sünd dat 26: 83,8 % vun de Inwahners sünd Georgiers, 6,5 % Aseris, 5,7 % Armeniers, 1,5 % sünd Russen, 0,9 % sünd Osseten, 0,1 % sünd Abchasen un tohopen 1,51 % höört noch to anner Volksgruppen to as Greken un Kurden.

Vun 1989 af an hefft veel Russen dat Land verlaten. Jem ehr Andeel an de Inwahners in Georgien is binnen 13 Jahren üm 4,8 % dalgahn. Ok allerhand Kurden hefft dat Land vun 1992 af an verlaten.

1. ↑ International Geographic Encyclopaedia and Atlas. Springer, 24 november 1979, p. 273
2. ↑ Europääsche Union, European Parliament Resolution 2014/2717(RSP), 17 July 2014: "...pursuant to Article 49 of the Treaty on European Union, Georgia, Moldova and Ukraine – like any other European state – have a European perspective and may apply to become members of the Union..."