Enak Ferlemann

Enak Ferlemann (* 12. Juli 1963 in Rauenfeelde) is en düütschen Politiker von de CDU.

Ferlemann is 1963 in Rauenfeelde boren. Na dat Abitur 1982 an dat Lichtenberg-Gymnasium Cuxhoben hett he en Lehr as Bankkoopmann un denn bet 1984 sien Wehrdeenst maakt. 1985 hett he en Studium von de Rechtswetenschop, Politologie un Philosophie anfungen. Siet 1995 is Ferlemann geschäftsführend Sellschopper bi de Dr. Mingramm Immobilien, Handel, Unternehmensberatung GmbH in Cuxhoben.

Ferlemann is verheiraadt un hett twee Kinner.

Ferlemann is 1976 as Schöler in de Junge Union ringahn un 1979 denn in de CDU. He is siet März 1995 as Nafolger von Wolfgang von Geldern Vörsitter von’n CDU-Kreisverband Cuxhoben un siet 1999 Vörsitter von’n CDU-Bezirksverband Elv-Werser (vördem Bezirksverband Stood). He is ok in’n Vörstand von de CDU in Neddersassen.

Ferlemann is 1986 in’n Raad von de Stadt Cuxhoben rinkamen un 1991 in’n Kreisdag von’n Landkreis Cuxhoben.

2002 is he in’n Bundsdag wählt worrn un weer von 2005 bet Oktober 2009 Vörsitter von de Landsgrupp Neddersassen in de CDU/CSU-Bundsdagsfrakschoon.

Ferlemann is 2002 un 2005 över de Landslist Neddersassen in’n Bundsdag wählt worrn. Bi de Bundsdagswahl 2009 weer he direkt wählt Kannedaat in’n Wahlkreis Cuxhoben – Stood II.

Ferlemann is siet Oktober 2009 Parlamentarsch Staatssekretär bi’n Bundsminister för Verkehr, Bo un Stadtentwicklung.

An’n 15. März 2007 hett he den Ehrenring von de Stadt Cuxhoben kregen.

• Websteed von Enak Ferlemann (hoochdüütsch)