Europastraat

Europastraten sünd en Klass vun Feernstraten, de sik in Europa, Zentral- un Lüttasien befinnt. Tosamen billt se en Nett mit en Läng vun üm un bi 50.000 km. Se sünd den internatschonalen Verkehr todacht un warrt dör en witt E mit de tohören Stratennummer op grönen Grund kenntekent.

In de mehrsten Länner staht de Europatraten-Beteken op Wegwiesers blangen de natschonalen Stratenbeteken. In annere Länner as t. B. Sweden un Norwegen hebbt di natschonalen Feernstraten alleen blots de Europastraten-Tallen. Belgien bruukt disse Systematik ok op Autobahnen, nich aver op annere Straten. In Düütschland fehlt de Europastratenbeteken op de Wegwiesers op Autobahnen meist jümmer. Se warrt dor an sik blots op de Afstandstafeln angeven. Opstunns gifft dat ruchweg 210 Europastraten.

Fastleggen vun de Europastraten

De Verloop vun de Europastraten warrt ünner dat Regeer vun de UN/ECE fastleggt. De Grundlaag is dat European Agreement on Main International Traffic Arteries (AGR) ^[1] (Europääsch Verstänningen över de Hööftstraten vun’n internatschonalen Verkehr) vun’n 15. November 1975. De 37 Verdragsparteien (Stand vun 2008) sünd dorbi de Plicht ingahn, dat in’n Verdrag beschrevene Nett vun Europastraten in’n Rahmen vun jemehr natschonalen Verkehrsentwckelnsprogrammen to bedenken. De Bundsrepubliek Düütschland is 1976 den Afkommen bitreden^[2] un hett dat an’n 3. August 1978 ratifizeert (BGBl. 1983 II S. 246)^[3]. Den Originaltext gifft dat blots in de dree Amtsspraken Engelsch, Franzöösch un Russ’sch^[4].

De Europastraten verloopt also nich blots dör Rebeden vun de Europääschen Union, man dör all europääschen Länner un över den europääschen Kontinent rut bit na Lütt- un Zentralasien.

In unregelmatige Afstännen warrt de List vun de Europastraten wieterschreven.

Tallen

Bit üm un bi 1985 harrn de wichtigsten Europastraten eenstellige Tallen, as t. B. de olle E 5 vun London na Istanbul oder de olle E 6 vun Kirkenes över Narvik na Rom. Disse fröheren eenstelligen Europastraten weern de klassischen Feernfohrerstrecken un sind in Deelafsnitten, de later nich generell nee betekent worrn sünd, tomeist bit vundaag eenstellig utschillert, so as de E 04 in Sweden un Finnland oder de E 06 in Sweden un Norwegen, also t. B. .

Vundaag richt sik de Beteken na de folgen Grundsätz: Europastraten warrt mit twee- oder dreestellige Tallen betekent. De wichtigsten Strecken (Kategorie A) sünd tweestellig un hebbt an’n Enn en „5“ oder „0“, wobi de Straten mit en „5“ ennt, in Noord-Süüd-Richt verloopt, wiel de annern in Oost-West-Richt föhrt. Se warrt jümmer vun West na Oost oder vun Noord na Süüd tellt.

Bispelen: De hüütige E 05 verlööpt vun Schottland bit Süüdspanien un de E 85 an’n westlichen Rand vun de Swarte See langs. De E 20 geiht vun Limerick bit na Sankt Petersborg. De E 40, de vun Calais bit an de chinees’sche Grenz in Kasachstan verlööpt, is mit över 8.000 km de längste Europsstraat. Op eenige dusend Kilometer överlappt se mit Feernstraten vun’t Asiaatsche Feernstraten-Projekt.

De Europastraten, de dortwüschen leegt hebbt entspreken graade oder ungraade Tallen. So leegt bi Oost-West-verloopen Straten twüschen de E 10 un de E 20 de wieteren Europastraten 12, 14, 16 un 18 in de glieken Grundricht.

All disse Hööftstrecken sünd Europastraten vun de Kategorie A. Europastraten, de dorvun aftwiegt, verbinnt oder ansluut (Kategorie B) hebbt dreestellige Tallen, wobi de, de in’n Oosten vun de E 101 leegt, mit en Null anfangt, also vun 001 bit 099 tellt warrt.

Historie

1931 is in Genf dat Bureau International des Autoroutes (B. I. A. R.) grünnt worrn mit dat Ansinnen, en gesamteuropääsch Snellstratennett intorichten. De Ideen sünd op de so nöömten „Internatschonalen Autokrongressen“ besnackt worrn.

Op den tweeten Autobahnkongress vun’n 18. bit to’n 20. April 1932 in Mailand is de Grünnen vun de Organisation Internationale des Autoroutes (O. I. A. R.) nafolgt. De harr den Sinn „de moralische un finanzielle Tosamenarbeit vun Staat un Privatinitiative in all Autostratenfragen to föddern, (…) de technischen, weertschopplichen, rechtlichen un sozialen Ünnerlagen för den Bo vun Autostraten to schapen (…) un en eenheitlich un harmonisch internatschonal Vörgahn antostreven, un dorbi so wiet as mööglich op de natschonalen Sünnerheiten Rücksicht to nehmen“.

Dorut sünd de eersten europawiet eenheitlichen tellten Feernstraten entstahn, man wegen de politischen Entwickeln eerst vele Johren later.

Wenn een de hüütigen Europastraten folgt, is man faken ok op weniger befohren Strecken ünnerwegens. Se hebbt dordör ok nich mehr den Roop as dat Exotische, as to’n Bispeel de fröheren Balkan- un Noordkapstrecken.