Drüpper

Drüpper oder bi’e Mediziners Gonorrhö is ene Krankheit, de dör de Bakterien-Soort Gonokokken (Neisseria gonorrhoeae) utlööst warrt. Överdragen warrt disse Krankheit meist jümmer op sexuellen Weg.

Nadem een sik mit de Bakterien ansteken hett, duurt dat sowat twee oder dree Daag, dat sik de Krankheit wiest. Bi’n Mann entzünnt sik denn meist de Miegröhr. Denn gifft dat Utfluss vun Edder un Wehdaag bi’t Miegen. Bi de Fro kann sik de Boormudderhals entzünnen, wat ok mit Utfluss vun Edder verbunnen is. Normalerwies geiht dat vun alleen wedder weg, aver wenn sik de Krankheit utbreedt, denn köönt de Prostata un de Nevenklöten mit befallen warrn, wat in Unfruchtborkeit ennen kann. Wenn bi de Fro Boormuddersliemhuut un Eileiders befallen warrt, kann se ünner Ümstänn ok kene Kinner mehr kriegen.

Bi Kinner, de sik bi de Swangerschop al över de Mudder ansteken hebbt, kann de Krankheit de Ogen befallen un de Kinner köönt blind warrn.

Behannelt warrt de Drüpper mit Antibiotika. Fröher weer dat meist Penicillin, hüüt mööt wegen mehr un mehr Resistenz bi de Gonokokken meist annere Antibiotika geven warrn. Dorbi warrt meist ok de Sexualpartner vun de Person mitbehannelt, anners kann dat angahn, dat se sik jümmer wedder gegensiedig ansteken doot. Bet to dat Johr 2000 müss de Drüpper in Düütschland mellt warrn.