Don Quijote

Don Quijote de la Mancha is villicht de bekanntste Gestalt in de ganze spaansche Literatur. Dat Book vun den scharpsinnigen Eddelmann vun La Mancha schreev Miguel de Cervantes in dat Johr 1605. Sietdem is dat in mehr as hunnert Spraken översett wurrn. In Spanien gifft dat 300 un in Düütschland 100 verschedene Utgaven. De Franzoos Gustave Doré hett 120 Illustratschonen dorvun maakt, un vele Filmemakers hebbt den Stoff bruukt för ganze Serien, Trickfilme un Comics.

Don Quijote is de Eddelmann de na dat Lesen vun vele Ridderromane enen groten Fehler begeiht. He hollt de Ideen un Begevenheiten, de in disse Böker vörkaamt, för wohr. Sien Knapp Sancho Panza is jüst dat Gegendeel vun em. He is Realist un weet dorum, wat wohr is un wat man blots Spinneree is. So gifft dat twüschen de beiden stännig Spannungen. Cervantes hett in Don Quijote de twee Sieten vun den spaanschen Natschonaal-Charakter optekent un togliek verhöhnt. Aver de Dichter maakt in disse Parodie ok kloor, dat sik dat minschliche Leven överall in de Spannung twüschen Idealismus un Realismus afspeelt.

De Geschicht vun Don Quijote is 1909 ok op Platt rutkamen, vertellt vun Jochen Mähl.