Charade (Film)

Charade (op plattdüütsch so veel as „Scharaad“; dt. Titel: Charade) is de Titel vun en US-amerikaansche Kriminalkummedie ut dat Johr 1963. Cary Grant un Audrey Hepburn speelt de Hööftrullen. Speelbaas weer Stanley Donen.

Wiel ehrn Skiurlaub beslutt de US-amerikaansche Regina Lampert, dat se sik vun ehrn Ehmann, en Swiezer, scheden laten will. Man, torüch in Paris finnt se ehr Wahnung leddig rüümt vör. De franzöösche Polizei vertellt ehr, dat ehr Ehmann all de Möbel apentlich veraukschoneert hett un denn oogenschienlich weglopen wull. Dorbi is he aver an de Siet maakt worrn. Bi em weer blots en lütte Tasch to finnen mit en poor Saken, as en Notizbook, mehrere Päss un en freemaakten Breef an sien Fro.

Dorophen warrt Regina in en snaaksche Kriminalgeschicht verwickelt, de sik üm en Vörfall ut’n Tweeten Weltkrieg dreiht. Se warrt vun dree ehmolige Kriegskameraden bedrauht, de vun ehr 250.000 US-Dollar hebben wüllt, de se inst gemeensam bi en Goldroov in de Finger kregen harrn. Charly Lampert hett sien Kameraden aver över’t Ohr haut un dat Gold versteken, dat nu aver nich wedder opfuken deit. Ok en Mister Bartholemew vun de CIA kummt op Regina to un will, dat se för jem Spioneeren deit.

Dorto kummt, dat se in’n Skiurlaub den US-Amerikaner Peter Joshua drapen hett, in den se sik ’n beten verkeken hett un de ehr Geföhlen dorophen teemlich dörenanner bringen deit. Toeerst maakt he op charmant un will ehr hülpen. Man denn brickt sien Tarnung tosamen un he vertellt, dat he de Broder vun Carson Dyle weer. Carson Dyle weer dormols ok an den Goldroov bedeeligt wesen, harr den Krieg aver nich överleevt. Regina finnt aver rut, dat Carson Dyle gor keen Broder hatt hett, also glöövt se, dat Joshua en Meesterdeef weer.

De Inholt vun de Tasch, de bi Charly Lampert funnen worrn is, warrt vun de Bedeeligten jümmer wedder ünnersöcht. Man, rutkamen deit dorbi nix. Keeneen vertroet annerseen un denn kamt ok noch de Kriegskameraden na’nanner op snaaksche Oort un Wies üm’t Leven. Opletzt hebbt aver mehrere vun de Bedeeligten togliek de richtige Idee: Dat Vermögen, dat nich wedder optofinnen is, is versteken in de Breefmarken op den Ümslag, de in de Tasch stecken hett. De hett Regina intwüschen aver rutreten un an den Söhn vun ehr Fründin verschenkt, vunwegen dat se den Weert vun de Marken nich kennt hett. Un de Jung hett de Marken glieks dorop op’n Flohmarkt ümtuuscht. De Finner vun de Marken is aver ehrlich un gifft jem Regina wedder torüch. He vertellt ehr ok, wat se in Wohrheit weert sünd, neemlich tosamen üm un bi 250.000 US-Dollar.

An de Kollonaden vun’t Palais Royal un op de Bühne vun de Comédie-Française kummt dat to’n Showdown twüschen Joshua un Bartholomew. De is neemlich in Wohrheit gor keen Beamten vun de CIA, man Carson Dyle, de vörgeevlich in’n Krieg doodbleven wesen schall. Joshua kann Dyle utschalten. Regina segg, dat se de Marken nu an de US-amerikaansche Bottschop torüchgeven wüllt. Eerst dor verraat he sien wohre Identität: Joshua heet neemlich egentlich Brian Cruikshank un arbeit bi’t Schattamt vun de Bottschop. Sien Opdrag weer, de Büüt vun den Goldroov sekertostellen. Dat Happy End is vullkamen, as he Regina opletzt en Heiraatsandrag maken deit.

• Dat Lexikon vun’n internatschonalen Film schreev vun en exzellenten Kriminalfilm, de deelwies bösen Humor wies, deels aver ok to’n Smüstern ansteken de.^[1]

• Adolf Heinzlmeier un Berndt Schulz menen in’t Lexikon „Filme im Fernsehen“, dat weer en Film mit Infäll un en Verwesseldrama vun hööchste Gööd. Se hebbt den Film mit 2½ vun 4 möögliche Steerns (över’n Dörsnitt) beweert.^[2]

• Prisma-Online bericht vun en Mischen ut Swarten Humor un Thrillerspannung, de op feine Oort tosamenbröcht weern. Man mark den Film an, dat he Alfred Hitchcock to’n Vörbild harr, un kuum een weer so dicht an Hitchcock sien Meesterschop in Saken Tempo, Spannung un Humor rankamn, as Stanley Donen. De Film weer mit 4 vun 5 möögliche Steerns uttekent.^[3]

De Film is för twölf Filmpriesen nomineert wesen, dorünner ok för en Oscar in de Kategorie Best Leed. Wunnen hett de Film söss Priesen:

• 1964: den Edgar Allan Poe Award in de Kategorie Best Speelfilm för Peter Stone
• 1964: den Golden Laurel, 2. Platz in de Kategorie Best Kummedieleistung vun en Mann för Cary Grant
• 1964: den Golden Laurel, 3. Platz in de Kategorie Best Kummedie
• 1964: den Golden Laurel, 3. Platz in de Kategorie Best Kummedieleistung vun en Fro för Audrey Hepburn
• 1964: de Goldene Plaat vun de David di Donatello Fimpriesen för Universal Pictures
• 1965: den BAFTA Film Award in de Kategorie Best britische Dorstellersche för Audrey Hepburn

Vun Stil her is Charade düütlich an de Kriminalfilmen vun Alfred Hitchcock anlehnt mit en Inholt, de mehrmols de Richt wesselt. Dorbi warrt een Figur na de annern an de Siet maakt, bit blots noch dree Lüüd över sünd. Dorto kummt, dat Donen mit Audrey Hepburn, Cary Grant, Walter Matthau, James Coburn un George Kennedy en naamhafte Kru tosamenkregen hett.

De Dialogen twüschen Lampert un Joshua sünd intelligent maakt un wesselt jümmer twüschen den Charme vun twee Minschen, de jüst dorbi sünd, sik inenanner to verkieken, un dat duersome Argdenkern, dat Lampert för Joshua hett, vunwegen dat he jümmer blots een Löög dör en annere uttuuscht. De Chemie twüschen de beiden passt nipp un nau, ofschoonst Cary Grant 25 Johren öller weer as Hepburn.

Hepburn weer de eerste Schauspelersche, de prozentual an den inspeelten Ümsatz bedeeligt weer. Charade hett sik as groten Spood rutstellt, wat den Speelbaas Donen dorto bröcht hett, dree Johren later mit Gregory Peck un Sophia Loren jüst so en Thrillerkummedie ünner den Titel Arabesque to dreihn.

De düütsche Premier weer an’n 13. Dezember 1963.^[1]

Charade is tweemol nee verfilmt worrn. En Remake is 2002 ünner den Titel The Truth About Charlie mit Mark Wahlberg un Thandie Newton verfilmt worrn. De Film weer aver en Flop un is gor nich eerst in de düütschen Kinos kamen. Dat tweete Remake is en Bollywoodfilm vun 2003 mit den Titel Chura Liyaa Hai Tumne.

1. ↑ ^{a b} Lexikon vun’n internatschonalen Film. CD-ROM-Utgaav. Systhema, München 1997
2. ↑ Adolf Heinzlmeier, Berndt Schulz: Lexikon „Filme im Fernsehen“. Neeutgaav. Verlag Rasch und Röhring, Hamburg 1990, ISBN 3-89136-392-3, S. 123.
3. ↑ Charade bi prisma-online.de; afropen an’n 1. November 2008

Charade. Mehr Biller, Videos oder Audiodateien to’t Thema gifft dat bi Wikimedia Commons.

• Charade in de Internet Movie Database (engelsch)
• Renzension vun Dietrich Kuhlbrodt op Filmzentrale.com