Bundsautobahn 100

De Bundsautobahn 100 (Afk.:BAB 100, in Kortform ok A 100 nöömt) is en öörtliche Autobahn midden in Berlin mit en Samtläng vun 22 km. De Autobahn verbinnt in en Süüdwestbagen de Bezirken Berlin Mitte, Charlottenburg-Wilmersdorf, Tempelhof-Schöneberg un Neukölln. Se weer anfangs as’n Ringautobahn plaant, man in de Twüschentiet is man dorvun af, den Ring to sluten. In’n Noordoosten vun de Binnenstadt geiht se blots as normale Straat wieter. Liekers hett de BAB 100 den Binaam Berliner Stadtring oder ok Stadtautobahn. Se dröff aver nich verwesselt warrn mit den Berliner Ring. To’n groten Deel folgt de Verloop vun de A 100 de Trasse vun de Berliner Ringbahn, wat de binnere S- un Iesenbahnring vun de Stadt is.

De Bundsautobahn 100 is ünner de Beteken „Bundsautobah 10“ as Karnstück vun’t West-Berliner Autobahnnett plaant worrn. Dorbi weer andacht, dat de halfrunne Struktur in’n Fall vun de Düütsche Weddervereenigen to’n Ringautobahn fardig boet warrt. Man, na de Weddervereenigen geev dat ne’e Plaans, de dorvun afrückt sünd, vun wegen, dat för de Autobahn grote städerboliche Ännern nödig wesen weern.

De Autobahn is in mehrere Afsnitten för den Verkehr freegeven worrn:^[1]

• 1958 AS Kurfürstendamm – AS Hohenzollerndamm
• 1960 AS Hohenzollerndamm – provisoorsche AS Detmolder Straße
• 1961 AD Funkturm – AS Hohenzollerndamm
• 1962 AD Charlottenburg – AS Kaiserdamm Süüd
• 1963 AS Kaiserdamm-Süüd – AD Funktoorn
• 1969 AS Detmolder Straße – AS Wexstraße
• 1973 AS Seestraße – AS Jakob-Kaiser-Platz
• 1976 AK Schöneberg – provisoorsche AS Sachsendamm
• 1978 AS Wexstraße – AK Schöneberg
• 1979 AD Charlottenburg – AS Jakob-Kaiser-Platz
• 1981 AS Alboinstraße – AS Gradestraße (as Krüüz Tempelhof plaant)
• 1987 provisoorsche AS Suadicanistraße – AS Alboinstraße
• 1996 provisoorsche AS Sachsendamm – provisoorsche AS Suadicanistraße; de beiden provissorschen AS sünd denn wegfallen
• 2000 AS Gradestraße – AS Buschkrugallee
• 2004 AS Buschkrugallee – AS Grenzallee
• (plaant) AS Grenzallee – AS Am Treptower Park
• (plaant) AS Am Treptower Park - AS Frankfurter Allee

De A 100 ennt opstunns achter dat ne’e Autobahndreeeck Neukölln an de provissorschen Anslusssteed Grenzallee. De Wieterbo bit na de Frankfurter Allee is al plaant un schall bit 2015 ümsett warrt. De Ansluss bit na de Landsberger Allee schall eerst dorna maakt warrn. En Sluten vun’n Ring, de dor noch över rutgeiht, is ut’n Flachennüttplaan rutstreken worrn. De Lück twüschen de Landsberger Allee und de Michelangelostraße schall nu an Steed vun en Autobahn mit normale binnerstädische Straten slaten warrn. Vun’t AD Neukölln föhrt to Tiet de Hööftricht as A 113 wieter na Dresden to un to’n Flaaghaven Berlin-Brannenborg Internatschonal, de in’n Bo is.

In de Johren 1959 bit 1962 is de Rudolf-Wissel-Brüch boet worrn. Se verlöpt över 930 m in’n Bagen över de Gleisen vun de Berlin-Hamborger-Bahn un de Berlin-Lehrter Bahn as ok över de Spandauer Spree. Se is dormit de längste Brüch vun Berlin. Eenige Op- un Affohrten vun’t Autobahndreeeck Charlottenburg leegt op de Brüch sülvst, du Affohrt Siemensdamm an een vun de Verbinnenskurven liggt op de linken Siet.

Op den Afsnitt Sachsendamm twüschen de Anslusssteden Innsbrucker Platz un Alboinstraße föhrt de Autobahn ünner mehrere Iesenbahnstrecken dör. An’t Westenn geiht dat los mit den 260 m langen Tunnel vun’n Innsbrucker Platz un de Berlin-Potsdamer Iesenbahn. Nipp un n au an de Utfohrt vun’n Tunnel löpt de Strecke as ünnere Even vun’t Autobahnkrüüz Schöneberg wieter. Achter’t Krüüz warrt de Bahnlien Berlin-Halle ünnerdweert, wat blangen de Gleisen ok mehrere parallele Stratenbrüchen inslutt. De Naam betütt sik op den parallel to de Autobahn lopen Sassendamm, de vun 1972 bit 1996 as Deelstück bruukt warrn müss, vun wegen dat de Streck ünner en Rangeerwark vun de Berlin-Dresdner Bah verlööp, de Verhanneln mit den dormoligen Besitter vun de Bedriefsrechten (wat indirekt de DDR weer) aver ahn Spood bleven.^[2]

De Tunnel Oortskarn Britz is in’n Juli 2000 apenmaakt worrn. In de ollen Plaans schüll de Tunnel as Hoochstreck föhrt warrn. Bit to’n Fall vun de Berliener Muer weer aver nich an en Ümsetten dacht. Üm den Oortsdeel Britz nich in twee Delen to splitten, is de Plaan ännert un de Oortsdeel mit en 1700 m langen Tunnel ünnerföhrt worrn. Binnen den Tunnel liggt na Oosten to de Halfanslusssteed Britzer Damm.

Blangen disse markanten Bowarken gifft dat an de Streck langs wietere boliche Sünnerheiten, as dat faken vörkummt, wenn Autobahnen nadräglich in de Stadtstruktur inarbeit warrt. Dör den drangen Platz in’t Rebeet üm den Berliner Funktoorn gifft dat dor op wenige Hunnert Meter en kumplexe Ansammeln vun Brüchen, Tunnels un Utfohrten, as to’n Bispeel de 210 m lange Tunnel ünner den Rathenauplatz, de in’n November 1958 apenmaakt worrn is.

Plaant is opstunns, de Autobahn 100 bit na de Landsberger Allee wietertoboen. Bit dat fardig is duert dat aver tomindst noch een Johrteihnt. De langsome Ümbo vun’n Bahnhof Oostkrüüz schall to’nn Enn hen en Noord-Süd-Tunnel för de Autobahn kriegen. Opstunns ennt de Autobahn 100 an’t Dreeeck Neukölln (an de A 113). Se schall in’n nächsten Boafsnitt na Oosten in’n Tunnel ünner de Grenzallee un de Neuköllnsche Allee dörföhrt warrn un denn över’n Anslusssteed an de Sonnenallee anbunnen warrn. De wietere Verloop geiht parallel to’n Göderbahnhoff Neukölln bit se an de Anlusssteed Am Treptower Park vörlöpig ophöört. De Tietrahmen för’n Wieterbo bit na de Frankfurter Allee un de Landsberger Allee is noch nich klor.

In de vun’n Utbo bedrapen Rebeden, sünners vun de Lüttgoornanlagen, gifft dat Wedderstand gegen den Utbo. Dorüm warrt mit’n Boanfang för 2010 nich rekent. De Senatsverwalten sett 2012 dorför an. De plaante Bowies vun den 3,2 km langen Afsnitt kann bit to söss Johren duern un warrt wohrschienlich mehr as 420 Mio. Euro kösten.^[3] Gegen den Utbo hett sik de Börgerinitiative BISS (Börgerinitiative Stadtring Süüd) grünnt. Se soorgt för verscheden Protestakschonen as to’n Bispeel de Fohrrad-Demo an’n 19. April 2009, an de 1.500 Lüdd deelnahmen hebbt.^[4]

För den Wieterbo vun’t Oostkrüüz na de Landsberger Allee geev dat twee Varianten vun’n Plaan. De Hööftplaan is en direkte Verbinnen över de Möllendorffstraße, wobi de Kark op’n Lichtenberg kumplizeert ünnertunnelt warrn müss. En annere Mööglichkeit weer de Utbo vun de Ruschestraße een poor hunnert Meter wieter na Oosten, de to Anfang dör en Neeborebeet vun de DDR föhrt.

• De Afsnitt Autobahndreeeck Funktoorn — Kurfürstendamm is mit en Utlasten vun 191.400 Fohrtüüch an’n Dag^[5] de an’n starksten befohrene Straat vun Düütschland un een vun de wichtigsten Straten in Europa. Fief wietere Deelstücken vun de A 100 sünd ünner de 10 meistbefohrenen Straten vun Düütschland:
  • Platz 2: Kaiserdamm – Dreeeck Funktoorn = 181.500 Fohrtüüch
  • Platz 3: Dreeeck Charlottenburg – Kaiserdamm = 176.700 Fohrtüüch
  • Platz 4: Kurfürstendamm – Schmargendorf = 176.700 Fohrtüüch
  • Platz 6: Innsbrucker Platz – Krüüz Schöneberg = 160.500 Fohrtüüch
  • Platz 10: Alboinstraße – Tempelhofer Damm = 148.400 Fohrtüüch
• Untyypsch för Autobahnen is de Anslusssteed 12 Kurfürstendamm, bi de de Op- un Affohrten nipp un nau in en Tempo-30-Zoon leegt. De Tofohrt na Süüden to an disse Anslussteed liggt in en Kurve un is ut boliche Grünnen een vun de körsten in Düütschland.
• Bit de Verkehrsföhren in’t Rebeet vun’n Sachsendamm (Krüüz Schöneberg) in de 1990er Johren dörgahn fardigstellt weer, weer de Autobahn dör en Lichttekenanlaag ünnerbroken, wat faken to lange Verkehrsstaus föhrt hett un to den Binaam „längste Parkplatz vun Berlin“.
• As de A 100 in de 1960er Johren apenmaakt worrn is, sünd an’n Rand vun de Autobahn mehrere Utbuchten mit Busanholten vun de dormoligen BVG-Lien 65 (later de Lien 105) boet worrn, de mit de Wedderapenmaken vun de Berliner Ringbahn 1993 wedder opgeven worrn sünd. Verkehrtechnisch weer dat en Problem, mit den Lienenbus wedder in den lopen Verkehr intoscheren. De Anholten weern to’n Deel över Treppen un korte Footgängertunnels vund e Straten togänglich. Vundaag sünd se slaten. Eenige vun de Togäng warrt in de Twüschentiet anners bruukt, to’n Bispeel as Imbissstännen.

1. ↑ Andreas Jüttemann: Stadtautobahnbo in Westberlin 1965–1989.
2. ↑ Ulrich Paul: Autobahnbau am Sachsendamm nach über 20 Jahren fertig. Lokaldeel in: Berliner Zeitung. 8. Oktober 1996. ISSN: 0947-174X
3. ↑ Ausbau der A 100 wird teurer als geplant. Rundfunk Berlin-Brandenborg, 12. Dezember 2007.
4. ↑ Radfahrer und Skater rollen gegen A100-Ausbau Berliner Morgenpost, 19. April 2009
5. ↑ Bericht vun de Bundsanstalt för Stratenwesen

Bundsautobahn 100. Mehr Biller, Videos oder Audiodateien to’t Thema gifft dat bi Wikimedia Commons.

• Vullstännige Beschrieven vun’n Verloop (hdt.)
• Historie un Biller vun de A 100
• Börgerinitiative Stadtring Süüd (BISS)

Düütsche Bundsautobahnen

Strecken in Bedriev:

Hööftstrecken: A 1 | A 2 | A 3 | A 4 | A 5 | A 6 | A 7 | A 8 | A 9

Över- un regional: A 10 | A 11 | A 12 | A 13 | A 14 | A 15 | A 17 | A 19 | A 20 | A 21 | A 23 | A 24 | A 25 | A 26 | A 27 | A 28 | A 29 | A 30 | A 31 | A 33 | A 37 | A 38 | A 39 | A 40 | A 42 | A 43 | A 44 | A 45 | A 46 | A 48 | A 49 | A 52 | A 57 | A 59 | A 60 | A 61 | A 62 | A 63 | A 64 | A 65 | A 66 | A 67 | A 70 | A 71 | A 72 | A 73 | A 81 | A 92 | A 93 | A 94 | A 95 | A 96 | A 98 | A 99

Regional un lokal: A 100 | A 103 | A 111 | A 113 | A 114 | A 115 | A 117 | A 143 | A 210 | A 215 | A 226 | A 255 | A 261 | A 270 | A 280 | A 281 | A 293 | A 352 | A 391 | A 392 | A 395 | A 445 | A 480 | A 485 | A 516 | A 524 | A 535 | A 540 | A 542 | A 544 | A 553 | A 555 | A 559 | A 560 | A 562 | A 565 | A 571 | A 573 | A 602 | A 620 | A 623 | A 643 | A 648 | A 650 | A 656 | A 659 | A 661 | A 671 | A 672 | A 831 | A 861 | A 864 | A 952 | A 980 | A 995

Plaant oder ehmolige Strecken:
A 16 | A 18 | A 22 | A 32 | A 34 | A 35 | A 36 | A 41 | A 47 | A 50 | A 51 | A 54 | A 55 | A 56 | A 69 | A 74 | A 77 | A 80 | A 82 | A 83 | A 84 | A 85 | A 86 | A 87 | A 88 | A 89 | A 90 | A 91

A 102 | A 104 | A 105 | A 106 | A 107 | A 205 | A 227 | A 241 | A 250 | A 252 | A 253 | A 263 | A 282 | A 290 | A 314 | A 339 | A 369 | A 376 | A 388 | A 430 | A 432 | A 441 | A 443 | A 448 | A 451 | A 480* | A 533 | A 545 | A 552 | A 558 | A 580 | A 610 | A 621 | A 647 | A 652 | A 653 | A 654 | A 655 | A 680 | A 683 | A 687 | A 713 | A 720 | A 722 | A 731 | A 751 | A 752 | A 753 | A 828 | A 834 | A 840 | A 860 | A 862 | A 863 | A 863* | A 881 | A 895 | A 921 | A 922 | A 942 | A 944 | A 985 | A 990 | A 991 | A 992 | A 993 | A 994 | A 996 | A 997 | A 998 | A 999
* ehmolig Plaan, Tall is intwüschen anners vergeven