Bützfleet

Wapen/Flagg	Koort
Basisdaten
Bundsland: Neddersassen Landkreis: Stood Gemeen: Stood
Inwahners:
Hööchd:	2 m över NN
Postleettall:	21683
Vörwahl:	04146
Geograafsche Laag:	Koordinaten:53° 39′ N, 9° 29′ O53° 39′ N, 9° 29′ O

Bützfleet (hoochdüütsch Bützfleth) is en Dörp mit üm un bi 4800 Inwahners in de Gemeen Stood in’n Landkreis Stood, Neddersassen.

Bützfleet liggt in de Masch glieks an de Elv un höört to Keden. Dat is de süüdlichste gröttere Oord in Keden, achter de Swing fangt Olland an. De Münn von de ole Bützfleter Süderelv is dör dat Abbenfleetsperrwark afsperrt. Dör den Oort merrn dör flütt de Hörn-Götzdörper Kanaal, de en Stück in’n Noordoosten denn in de Bützfleter Süderelv münnt.

De Naveröörd sünd Barnkroog un Abbenfleet in’n Noorden, Bützfletersand in’n Oosten, Götzdörp in’n Süden, Stodermoor in’n Süüdwesten un Bützfletermoor in’n Westen.

Bützfleet dükert as Buttesvlethe 1124 toeerst in de Oorkunnen op, as Land in Bützfleet an dat Klooster Harsfeld schenkt warrt. In disse Tied warrt ok toeerst von en Kapell in Bützfleet snackt.

As Dörp an de Elv weer de Schipperee jümmer wichtig för Bützfleet, aver ok de Bueree, besünners de Aavtbo, hett en grote Rull speelt.

De Oort weer vör 1885 Deel von dat Amt Freeborg un weer denn in’n Kreis Keden. 1932 is dat an’n Landkreis Stood kamen.

Bi de Stormflood von 1962 is de Oord deelwies överswemmt worrn. In de Johren 1960 is denn ok dat Industrierebeed Bützfleet anleggt worrn, dat glieks an de Elv op Bützfletersand liggt. Dorto höört dat grote Dow-Wark Stood, de Aluminium Oxid Stood un fröher VAW/Hydro Aluminium. Över den Haven Bützfleet is dat Rebeed an’n Seeverkehr anslaten.

Mit de Industrie is ok en Barg törksche Gastarbeiders na Bützfleet kamen, de dor nu al in twete un drüdde Generatschoon leevt. Vondaag hett de Oort ok en egen Moschee von DİTİB.

Bützfleet höört siet de Gemeenreform in Neddersassen an’n 1. Juli 1972 to de Gemeen Stood.

In’n Eersten Weltkrieg sünd 33 Soldaten ut Bützfleet fullen oder vermisst^[1].

Dat Wapen is baven blau un ünnen gröön dör en sülvern Wellenband deelt. Baven is en sülvern Seilschipp to sehn, ünnen en sülvern Urn.

Dat Wellenband steiht för dat Fleet, dat Blau un dat Schipp för de Elv un de Schipperee un dat gröön för dat siede Land un de Bueree. De Urn wiest op de wichtigen Funnen ut de Vörgeschicht in Bützfleet.

Bützfleet is evangeelsch-luthersch präägt un billt en egen Kaspel mit de Nicolai-Kark as Kaspelkark.

För de Kathoolschen is de Hillig-Geist-Kark in Stood tostännig.

In Bützfleet gifft dat ok de Ulu-Camii-Moschee von de Törksch-Islaamsche Union von de Anstalt för Religion.

De Oortsraad hett 15 Maten.

• 1956-30. Juni 1972: Nicolaus Dreyer (FDP, von 1969 af an CDU)
• 1991-2001: Hans-Hermann Ott (CDU)
• vör November 2010: Wolfgang Rust (CDU)
• November 2010–13. September 2019: Sönke Hartlef (CDU)
• 18. September 2019–: Christoph von Schassen (CDU)

Bi’n Bützfleter olen Karkhoff an de Nicolai-Kark steiht en Denkmaal för de Fullenen ut de twee Weltkrieg’ ut dat Kaspel Bützfleet.

De Bützfleter Wiehnachtsmarkt warrt jümmer an’t eerste Wekenenn in’n Advent in de Festung Graueroort fiert. Den eersten Wiehnachtsmarkt in de Festung hett dat 2010 geven.^[8]

De Freewillige Füürwehr is 1877 grünnt worrn. Bützfleet hett ok en Schützenvereen, de 1959 grünnt worrn is. Dat Schützenfest is an’t drüdde Wekenenn in’n August.

De Volksbank Keden hett in Bützfleet in’n Aavtmaschenweg 312 en Filiaal.

Bützfleet liggt an de Landsstraat 111, de in’n Noorden na Drochters un in’n Süden na Stood löppt. Lüttjere Straten gaht na Stodermoor un Bützfletermoor.

Dat Industrierebeed Bützfleet is an de Iesenbahn anslaten, de Oord hett aver keen Bahnhoff för Personenverkehr. De nächste Bahnhoff an de Nedderelvbahn is de Bahnhoff Stood.

Bützfleet hett en Speelkreis un en Kinnergoorn. De Kinnergoorn hett 1967 apen maakt un is wedder nee opboot worrn, nadem he 2007 kumplett utbrennt is. An Scholen gifft dat de Grundschool an’t Fleet un en Hauptschool. För de högeren Scholen mööt de Schölers na Stood. För’t Gymnasium normalerwies na de Vincent-Lübeck-School un för de Realschool na de Realschool Camper Höh.

De Oord hett veer Speelplätz un en Freebad. Blangen dat Freebad gifft dat bi Abbenfleet ok en Strand an’e Elv.

De Politiker Nicolaus Dreyer weer ut Bützfleet. Ok de Politiker Wilhelm Stülten is dor boren.

• Johann Kleenlof: Chronik von Bützfleth. 1974
• Dark Winters: Bützfleth: Siedlung und Bestattungsplatz. 2007

1. ↑ http://www.denkmalprojekt.org/dkm_deutschland/buetzfleth_wk1u2_ns.htm
2. ↑ C. H. Jansen: Statistisches Handbuch des Königreichs Hannover. 1824, Sied 100: http://books.google.de/books?id=tG0AAAAAcAAJ&pg=PA100
3. ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 144: http://books.google.de/books?id=eOI-AAAAcAAJ&pg=PA144
4. ↑ ^{a b c d} http://www.verwaltungsgeschichte.de/stade.html
5. ↑ http://www.gemeindeverzeichnis.de/gem1900/gem1900.htm?hannover/kehdingen.htm
6. ↑ ^{a b} http://tageblatt.de/main.cfm?MID=20579&Orig_DID=2154440&DID=2154440
7. ↑ ^{a b} twee Raadslüüd (een von de CDU un een von de SPD) hebbt sik von jemehr Frakschonen lööst un tohoop de Wählergemeenschop Bützfleet billt
8. ↑ Weihnachtsmarkt in Grauerort, Stader Tageblatt an’n 23. November 2012

Bützfleet. Mehr Biller, Videos oder Audiodateien to’t Thema gifft dat bi Wikimedia Commons.

• Websteed von Bützfleet (hoochdüütsch)

Öörd in de Gemeen Stood

Bützfleet | Haddörp | Hagen | Stood | Wiepenkathen