Adelsdorp

Wapen/Flagg	Koort
Basisdaten
Bundsland: Neddersassen Landkreis: Oosterholt Gemeen: Grasbarg
Inwahners:
Postleettall:	28879
Vörwahl:	04792
Geograafsche Laag:	Koordinaten:53° 14′ N, 8° 60′ O53° 14′ N, 8° 60′ O

Adelsdorp (hoochdüütsch Adolphsdorf) is en Dörp in de Gemeen Grasbarg in’n Landkreis Oosterholt, Neddersassen.

De Oort liggt in dat Düvelsmoor. Dat Water ut dat Rebeed warrt över de Semkenfohrt afföhrt.

De Naveröörd sünd Slussdorp in’n Noorden, Nee Sankt Jürgen in’n Noordoosten, Tüschendörp in’n Oosten, Seehusen un Ottersteen in’n Süden un Bargdörp in’n Westen.

Adelsdorp is 1800 as fiev Kilometer lang Stratendörp un findörpsche Moorkolonie in dat Düvelsmoor grünnt worrn. Nöömt worrn is de Oort na Prinz Adolph Friedrich, en Söhn von’n hannöverschen Kurförst un brietschen König Georg III. Adolph Friedrich weer persönlich dor, as dat Dörp inwieht worrn is.

In’n Eersten Weltkrieg sünd 23 Soldaten ut Adelsdorp fullen oder vermisst un in’n Tweten Weltkrieg 39.^[1]

In de Franzosentied von 1810 bet 1814 hett de Oort to de Mairie Worpsweed in’n Kanton Leendaal höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Moorvaagdie Huttenbusch in dat Amt Otterbarg tohöört un denn von 1852 bet 1885 to dat Amt Leendaal. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en un grötteren Kreis Oosterholt tohoopgahn is.

De Oort is an’n 1. März 1974 mit de Gemeenreform in Neddersassen Deel von de Gemeen Grasbarg worrn.

Adelsdorp is evangeelsch-luthersch präägt un höört to dat Kaspel von de Findörp-Kark in Grasbarg.

För de Kathoolschen is de Goden-Hirt-Kark in Leendaal tostännig, de siet 1. September 2012 to de Karkengemeen von de Hillige-Familie-Kark in Oosterholt-Scharmbeek höört. De Goden-Hirt-Kark is 1961 boot worrn.

Dat Wapen von Adelsdorp wiest dwars deelt dör en sülvern Balken baven vörn op blauen Grund en sülvern „A“ un ünnen achtern op swarten Grund en gollen Steern mit acht Tacken.

Dat Wapen hett de Gemeen in’n Mai 1968 kregen. Dat „A“ steiht för den Naam von dat Dörp un sien Naamgever Adolph Friedrich. De sülvern Balken steiht as Symbool för de Dörpstraat, an de de Oort liggt. Dat Blau steiht för den Heven un dat Swart för dat Moor. De Steern wiest op den Astronoom un Amtmann in Leendaal, Johann Hieronymus Schröter, hen, de en Hoff in Adelsdorp harr.

In Adelsdorp steiht en Denkmaal för de Fullenen ut de twee Weltkrieg’.

De Schüttenvereen Adelsdorp is 1950 grünnt worrn.

Adelsdorp hett en egene freewillige Füürwehr, de an’n 15. Oktober 1943 grünnt worrn is.

De Dörpstraat von Adelsdorp is de Kreisstraat 29. De nächste gröttere Straat is de Landsstraat 153, de von Worpsweed in’n Noorden na Huttenbusch un Korlshöben geiht un in’n Süden bi Grasbarg an de L 133. De L 133 löppt in’n Süüdwesten na Leendaal un na Bremen rin un in’n Noordoosten na Tarms un Zeven.

De nächste Autobahn is de Autobahn 27 (Afsnidd Bremerhoben–Bremen–Wasra). De Opfohrt 19 Horn-Leh liggt so 22 Kilometer in’n Süüdwesten von Adelsdorp an de Leendaler Heerstraat. De Opfohrt 16 Bremen-Noord liggt 23 Kilometer in’n Süüdwesten an de Bundsstraat 74.

De nächste Bahnhoff is bi 21 Kilometer wied weg in’n Süden de Bahnhoff Sao’ern an de Bahnlien Hamborg–Bremen. Von 1907 bet 1978 hett dat ok Personenverkehr op de Bahnlien Stood–Oosterholt-Scharmbeek geven. De Bahnhoff Weyerdeelen-Umbeek weer in disse Tied söss Kilometer in’n Noordoosten. De Bahnlien Wilst–Töst harr von 1917 bet 1964 Personenverkehr. De Bahnhoff Tarms weer negen Kilometer wied weg in’n Oosten. De nächste Bahnhoff an de Bahnlien Bremen–Tarms, op de dat von 1900 bet 1956 Personenverkehr geven hett, weer söss Kilometer in’n Süden in Grasbarg.

De Kinner ut Adelsdorp gaht na de Grundschool Grasbarg.

1. ↑ Onlineprojekt Gefallenendenkmäler
2. ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 96
3. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 6
4. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 139
5. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 160
6. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 140
7. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 164
8. ↑ Inwahnertallen op gemeindeverzeichnis.de
9. ↑ ^{a b c} Inwahnertallen op verwaltungsgeschichte.de

Adelsdorp. Mehr Biller, Videos oder Audiodateien to’t Thema gifft dat bi Wikimedia Commons.