Oliver Grundmann
Oliver Grundmann (* 21. August 1971 in Stood) is en düütschen Politiker von de CDU. He is siet 2013 Maat von’n Düütschen Bundsdag.
Grundmann is 1971 as Söhn von en Klempner un en Kinnerkrankenswester in Stood boren. De Vader weer 1945 as Verdrevenen ut Pommern na Stood kamen. Na’n Realschoolafsluss 1987 in Stood hett he en Lehr as Chemielaborant in Buxthu maakt. 1993 hett he över de BBS Stood dat Abitur namaakt un is denn för twee Johr as Offzeer in Cuxhoben bi de Bundswehr ween. Verlaten hett he de Bundswehr as Hauptmann von de Reserve. Den Sold bi de Bundswehr wull he för sien Studium opsporen. 1995 hett he anfungen, Juristeree an de Universität Hamborg to studeren. He harr en Stipendium von de Konrad-Adenauer-Stiftung. 2001 hett he dat Studium mit dat Eerste Staatsexamen afslaten. 2005 hett he bi dat Oberlandsgericht Celle dat Twete Staatsexamen maakt.
2001 is he Assistent von de Geschäftsleitung bi de Karl Meyer AG worrn. Later weer he Justitiar/Avkaat un Leitender Syndikus in dat Ünnernehmen. Von 2007 af an hett he as Geschäftsföhrer dat Dochterünnernehmen CarboNXT GmbH för CFK-Recycling opboot. Dat Recycling-Verföhren för CFK-Kunststoff, dat se dor utklamüsert hebbt, hett 2011 von’n Bundsweertschopsminister den Düütschen Rohstoffeffizienzpries kregen[1] un ok de Utteeknung „Ort im Land der Ideen 2012“.
Oliver Grundmann is verheiraadt un hett dree Söhns.
Politik
[ännern | Bornkood ännern]1987 is Grundmann in de Junge Union un de CDU rin. Von 1995 bet 2003 weer he Bezirksvörsitter von de Junge Union Elv-Werser.[2] He is 1996 in’n Stadtraad von Stood wählt worrn un is siet 2001 Viez-Börgermeester von Stood.[3]
2001 hebbt de Wählers em in’n Landkreis Stood in’n Kreisdag wählt. He is dor Viez-Vörsitter von de CDU-Frakschoon un Vörsitter von’n Regionalplanungs- un Ümweltutschuss.
Bi de Bundsdagswahl 2013 hett Grundmann 47,6 Prozent von de Eerststimmen in’n Bundsdagswahlkreis Stood I-Rodenborg II kregen un is direkt wählt worrn. As Afornten is he ordentlich Maat in’n Utschuss för Ümwelt, Naturschuul, Bo un Reaktersekerheit un Viez-Maat in’n Utschuss för Weertschop un Energie.[4]
He sitt in’n Opsichtsraad von de Elv-Kliniken Stood-Buxthu un de Iesenbahnen un Verkehrsbedrieven Elv-Werser.
Footnoten
[ännern | Bornkood ännern]- ↑ http://www.deutsche-rohstoffagentur.de/DERA/DE/Rohstoffeffizienzpreis/2011/rep2011_node.html
- ↑ http://www.ju-elbe-weser.de/ehemalige-bezirksvorsitzende/
- ↑ https://www.stadt-stade.info/stade/rathaus/rat/
- ↑ Der Wunsch geht zum Teil in Erfüllung. Oliver Grundmann sitzt im Umweltausschuss des Bundestags – Ersatzmitglied in Sachen Wirtschaft. Stader Tageblatt an’n 27. Dezember 2013
Weblenken
[ännern | Bornkood ännern]
- Grundmann sien Websteed (hoochdüütsch)